Mga Young Adult
Pagtukod sa Atong Sukaranan pinaagi sa Gagmay ug Yano nga mga Butang
“Pinaagi sa gagmay ug yano nga mga butang ang mga dagko nga butang ipahinabo” (Alma 37:6).
Ako adunay usa ka plastik nga dekorasyon nga bituon diha sa akong kwarto nga akong gidala sa balay gikan sa akong misyon. Ganahan kong motan-aw niini kon kini pasigahon na. Kining gamay nga bituon gibitay diha sa bungbong aron kini akong makita sa matag gabii samtang matulog ko ug unang butang kon mobangon na ko.
Bag-ohay lang akong nabantayan nga ang akong bituon dili lig-on nga pagkataod sama sa normal niini nga pagkataod, apan wala nako kini hatagi og dakong pagtagad. Masaligon ra ko nga ang usa ka piraso nga tape nga naggunit niini ngadto sa bungbong mopilit.
Dayon usa ka buntag ang akong bituon wala na diha—natagak kini. Nakahukom ko nga isiguro pag-usab ang bituon gamit ang mas daghang tape. Niining higayona migamit ko og lima ka piraso—usa ka piraso alang sa matag tumoy sa bituon—aron pagsiguro nga dili na kini mahulog pag-usab.
Mao kadto ang higayon nga akong naamgohan nga ang akong gamay nga nagsigang bituon sama sa matag usa kanato, ug ang tape nga naggunit niini nagrepresentar sa atong espirituhanong mga pamatasan. Ang kahayag nga anaa sa sulod kanato hingpit nga nag-agad sa mga butang nga atong buhaton aron mapalig-on, o masiguro, ang atong mga pagpamatuod. Ang matag piraso sa tape nga akong gibutang sa bituon nakapahinumdom kanako sa Alma 37:6, “Pinaagi sa gagmay ug yano nga mga butang ang dagkong butang ipahinabo.”
Naghunahuna usab ko kabahin kon giunsa nako sa pagkamatikod nga ang akong bituon hapit na matagak sulod sa pipila ka adlaw, apan walay gibuhat aron maluwas kini hangtod nga kini nadayon sa pagkatagak. Ug sama kini sa atong mga pagpamatuod—kon kita mokompyansa ug kalimtan sa pagbuhat ang gagmayng, espirituwal nga mga buhat nga makatabang sa pagpabilin sa atong hugot nga pagtuo nga lig-on, ang atong mga pagpamatuod maluya.
Karon ang bituon nagpahinumdom kanako sa matag gabii sa pagpangutana sa akong kaugalingon og pipila ka pangutana: Unsa ka daghan nga “espirituwal nga tape” ang akong ibutang karong adlawa? Nasiguro ba og igo ang akong hugot nga pagtuo nga ako luwas sa espirituhanong paagi gikan sa pagkapukan? Makakita ba ang uban sa Kahayag ni Kristo ngari kanako?
Kon maghunahuna ako niini nga mga pangutana, makahimo ako sa pagtan-aw kon unsaon nako nga mas mapalig-on ang akong pagpamatuod ni Jesukristo. Ako naaghat sa paghunahuna kon makatuon ba kaha ako sa akong mga kasulatan og mas lawom, mas makaampo nga makanunayon, mas kanunayng makaadto sa templo, o moserbisyo ba sa akong calling nga mas epektibo. Akong gipamalandongan kon unsa kaha ang akong mga ipangutana sa Ginoo ug unsaon nako sa pagpangita sa kamatuoran. Ug ako nagiyahan sa paghimo og ginagmay nga mga kausaban sa pagdapit sa Espiritu nga mas buhong sa akong kinabuhi.
Ang kaaway kanunayng maningkamot sa pagbalda kanato gikan sa paghimo niining ginagmay, espirituhanong mga butang o mokombinser kanato nga ang pagbuhat lang sa labing gamay igo na alang kanato sa paghupot sa atong mga pagpamatuod. Apan si Presidente Russell M. Nelson mipahinumdom kanato nga kita kinahanglan nga aktibong moamping sa atong hugot nga pagtuo: “Ako mohangyo kaninyo sa paggahin og panahon alang sa Ginoo! Himoang lig-on ang inyong kaugalingong espirituwal nga pundasyon ug makasugakod sa pagsulay sa taas nga panahon pinaagi sa pagbuhat niadtong mga butang nga magtugot sa Espiritu Santo nga magauban kaninyo kanunay.”1
Sama sa sobra nga mga piraso sa tape [pangpilit] nakatabang sa akong gamay nga bituon nga dili matagak, ang pagbutang og mga piraso sa “espirituwal nga tape” ug pagpaminaw sa mga pag-aghat sa Espiritu makatabang kanato nga magpabiling duol sa Manluluwas, ang sukaranan sa atong hugot nga pagtuo, ug mabatokan ang pagbira sa kaaway. Si President Dallin H. Oaks, Unang Magtatambag sa Unang Kapangulohan, mipasabot sa kaimportante sa ginagmay nga mga butang: “Ang kayano sa paagi o sa kasayon sa gisugo nga buluhaton wala magpasabot nga dili kini importante.”2
Sama sa gisulti niini diha sa Alma 37:6, ang Dios makatabang kanato sa pagkab-ot og talagsaong mga katuyoan pinaagi sa atong ginagmay nga mga paningkamot nga maduol ngadto ni Kristo. Siya makapalambo sa atong yano nga mga batasan sama sa pag-ampo, pagtuon sa kasulatan, ug pagtambong sa templo sa paghatag kanato og kalig-on nga atong gikinahanglan sa pagbuntog sa kaaway ug sa uban nga mga babag sa atong kinabuhi. Kon kita mobuhat niining gagmay ug yano nga mga butang, kita mahimong makanunayon sa atong hugot nga pagtuo. Sama sa akong gamay nga bituon, ang atong sukaranan diha ni Kristo magpabilin nga sigurado samtang kita mopadayon sa unahan diha sa dalan sa pakigsaad.
Ang tagsulat nagpuyo sa Pescara, Italy.