“Ikapulo—usa ka Panalangin, Dili usa ka Palas-anon,” Liahona, Dis. 2022.
Dali, Sunod Kanako
Ikapulo—usa ka Panalangin, Dili usa ka Palas-anon
Ang Dios mihatag kanato sa balaod sa ikapulo sa pagpanalangin kanato sa temporal ug espirituwal nga paagi.
Ako usa ka kinabig sa Ang Simbahan ni Jesukristo sa mga Santos sa Ulahing mga Adlaw. Sa dihang 10 anyos pa ko, ang mga misyonaryo mituktok sa pultahan sa akong panimalay ug ang akong mama mipadayon kanila. Siya nabunyagan kapin na sa dekada sa una apan gipalayo ang iyang kaugalingon gikan sa Simbahan sulod sa daghang katuigan. Ang mga misyonaryo mitudlo kanamo. Ang akong inahan mibalik sa pagkaaktibo, ug ang akong upat ka mga igsoon ug ako nabunyagan.
Niadtong panahona, nagpuyo kami sa tumang kalisod nga kahimtang sa ekonomiya. Ang akong inahan, nga gibulagan sa akong amahan, mitrabaho aron sa pagsangkap alang kanamo. Bisan og nagtrabaho og tulo ka lain-laing trabaho, dili gihapon igo ang iyang kinitaan aron makasangkap sa among panginahanglan. Bisan pa man, isip dili aktibo nga miyembro sa Simbahan, ang akong inahan andam nga motuman sa iyang mga pakigsaad sa bunyag ug mosunod sa mga sugo nga gihatag sa Dios kanamo, usa niini mao ang balaod sa ikapulo. Mao nga bisan og lisod kadto alang kaniya ug sa tanan sa pamilya, siya mibayad sa ikapulo.
Ang akong inahan ganahan usab modapit sa mga misyonaryo aron moadto sa among balay para makakaon. Usahay magdapit siya og kapin sa 10 ka misyonaryo. Ug nahitabo ang usa ka milagro sa among panimalay nga susama sa milagro diha sa Bag-ong Tugon sa dihang ang Ginoo mipakaon og 5,000 gamit ang lima ka pan ug duha ka isda, ug aduna pay sobra aron matagbaw ang ilang kagutom. Mao kana ang nahitabo sa akong pamilya sa dihang ang mga misyonaryo nangaon sa among panimalay. Kon kita mosalig sa Ginoo, sa bisan unsang paagi makapaigo ra.
Ang akong mama mitudlo kanako pinaagi sa pagtulun-an ug pinaagi sa ehemplo nga ang Dios mihatag kanamo sa balaod sa ikapulo aron sa pagpanalangin kanamo sa temporal ug sa espirituwal nga paagi.
Ang Balaod sa Ikapulo
Ako motuo sa balaod sa ikapulo. Kini nga balaod anaa na sukad pa sa karaang panahon ug naglangkob sa pagdonar sa 10 porsyento sa atong tubo ngadto sa Simbahan alang sa katuyoan sa pagpanalangin sa mga anak sa atong Langitnong Amahan. Lakip sa ubang butang, ang ikapulo makatabang sa:
-
Pagpundo sa konstruksiyon ug pagmentinar sa mga chapel ug mga templo.
-
Pagsuporta sa pagsangyaw sa ebanghelyo ni Jesukristo.
-
Pagpahiluna sa pag-imprinta sa mga kasulatan sa naglain-laing mga pinulongan.
-
Pagpundo sa mga eskwelahan nga gipanag-iya sa Simbahan, ingon man sa relihiyoso nga edukasyon pinaagi sa seminary ug institute.
-
Pagsangkap alang sa panagpundok, pagpadigitalisasyon, ug pagmintenar sa mga rekord sa family history.
Usa ka Panalangin, Dili usa ka Palas-anon
Alang nako, ang balaod sa ikapulo nahimong usa ka panalangin ug dili usa ka palas-anon. Sa Malaquias 3:10, ang Ginoo nag-ingon, “Sulayi ako … ablihan ko ang mga bintana sa langit.” Ganahan ko niining direktang imbitasyon. Alang nako, sama ra kini nga ang Ginoo nagsulti kanako sa personal, mismo, “Kon [ikaw] dili motuo nako, buhata lang kini, ug [imong] makita.”
Ang sunod Niyang gisulti nakapuno nako sa kamasaligon ug paglaom: “Ibubo ko [kanimo] sa madagayaon gayod ang mga panalangin” (Malaquias 3:10). Ako mopamatuod nga ang Ginoo kanunayng motuman sa Iyang mga saad.
“Kinsa Ako, miingon ang Ginoo, nga nagsaad ug wala matuman?
“Ako nagsugo ug ang mga tawo wala mosunod; Ako mobakwi ug sila dili makadawat sa panalangin.
“Unya moingon sila sa ilang mga kasingkasing: Kini dili buhat sa Ginoo, kay ang iyang mga saad wala matuman” (Doktrina ug mga Pakigsaad 58:31–33).
“Nganong Wala man Ako Mapanalangini?”
Sa makausa, sa pagtapos sa tulumanon sa sakramento, usa ka sister miduol ngari nako ug nangutana nako kon unsa ang tambag nga akong ihatag kaniya. Miingon siya nga siya nawad-an sa iyang hugot nga pagtuo sa balaod sa ikapulo. Mipasabot siya nga taud-taud na siya nga nagtinguha og promosyon sa trabaho. Bisan tuod og siya matinud-anong nagbayad sa iyang ikapulo ug nangayo sa Dios aron panalanginan siya niining promosyon, siya wala makadawat niining talagsaong gitinguha nga panalangin. Ang akong tambag alang niini nga sister sama ra nianang akong ipaambit kaninyo karon.
Akong nakat-onan nga kon ang Ginoo mosaad kanato og daghan kaayong mga panalangin nga wala nay igong kabutangan niini, usahay maghunahuna kita nga nagpasabot kana nga kita makadawat diha dayon sa materyal nga bahandi, sama sa usa ka umento o promosyon sa trabaho. Hinoon, si Elder David A. Bednar sa Korum sa Napulog Duha ka Apostoles miingon nga “kon kita mosunod sa balaod sa ikapulo, kita kanunayng makadawat og importante apan dili dayon makita nga mga panalangin nga wala nato damha ug daling mabaliwala.”1
Pag-ila sa mga Panalangin
Kini importante nga hisgotan nga kining mga panalangin mahimong dali ra nga mailhan pinaagi sa Espiritu Santo. Sa personal, akong gibati nga napanalanginan nga ako nakaangkon og maayo nga trabaho sulod sa daghang katuigan. Akong gibati nga napanalanginan tungod kay ang Ginoo nagtugot kanako, sa akong asawa, ug sa akong mga anak sa pagtagamtam og maayong panglawas. Siya mipanalangin kanako nga makat-on sa pagdumala sa akong oras ug sa akong mga kapanguhaan ug sa pag-angkon og dugang edukasyon. Mitabang siya nako nga makakat-on sa pagdumala sa akong temporal nga kapanguhaan aron mas makapahimulos sa unsay Iyang nahatag kanako.
Ang Espiritu Santo nagtudlo kanako nga ako kinahanglan magmapasalamaton sa tanan niining mga butang. Kana, alang nako, maoy gipasabot nga giablihan ang langit ug sa pagdawat sa mga panalangin diha sa kabuhong.
Dili aron Makalikay sa mga Pagsulay
Ang pagbayad og ikapulo dili aron makalikay kita gikan sa mga pagsulay, apan nakaamgo ko nga ang Ginoo mipanalangin kanako og kalig-on ug kaalam ug miandam og dalan aron nga ako makabuntog sa lisod nga mga panahon.
Sa dihang ang akong kinamagulangang anak nga lalaki masuso pa, nakadawat ko og tawag didto sa akong opisina. Adunay milungkab sa akong panimalay. Ang akong labing dakong kabalaka mao ang kaseguradoan sa akong asawa ug anak nga lalaki. Daghan sa among mga butang ang nakuha, lakip ang among mga pasaporte ug mga visa, nga bag-o lang namong giproseso aron makaeskwela og kurso sa gawas sa nasod. Bisan sa pagkawala sa mga kabtangan, mibati ko nga napanalanginan sa hilabihan kay ang akong asawa ug anak nga lalaki wala didto sa panimalay sa dihang ang pagpangawat nahitabo. Kadto sigurado nga usa ka panalangin.
Ang Ginoo miabli sa mga bintana sa langit ug mibutang sa hustong mga tawo diha sa maong dalan kinsa nakatabang kanamo nga maproseso pag-usab ang mga dokumento nga among gikinahanglan sa pag-eskwela. Ug bisan pa man sa kasamok sa kahiladman nga namugna sa pagpangawat, ang akong pamilya ug ako nakadawat sa panalangin sa espirituhanong pasalig nga ang tanan mamaayo ra.
Wala nagdugay human niana, ang patigayon diin ako nagtrabaho grabeng naapektohan sa socio-political nga kasamok sa akong natawhan nga siyudad. Nabalaka ko nga ang tanan nga akong gipondar inubanan sa kakugi ug sakripisyo mawala. Hinoon, ang mga bintana sa langit giablihan na usab. Uban sa hugot nga pagtuo, pagpursiger, ug kakugi, ang patigayon naulian.
“Kining kabos nga babayeng biyuda nakahulog og labaw pa kay sa tanan kanila nga nanagpanghulog ngadto sa panudlanan:
“Kay ang gihulog sa uban sobra sa ilang bahandi; Apan bisan sa kakabos sa biyuda, mihatag siya sa tanan nga iya.”
The Widow’s Mite [Ang Gamayng Salapi sa Biyuda], ni James Tissot
Uban sa Tinuod nga Tumong
Sa Simbahan ni Jesukristo, kita naghatag og dakong bili sa sagradong kinaiyahan sa ikapulo ug mga halad. Ang balaod sa ikapulo managsamang mosulay sa adunahan ug sa kabos. Ang kabos tingali moingon, “Ako nagkinahanglan niining dyes porsyento aron makalahutay.” O ang adunahan tingali moingon, “Dyes porsyento dako kaayo.” Apan kon kita kabos man o adunahan, ang Ginoo nagsugo kanato sa paghatag sa atong mga halad inubanan sa hingpit nga katuyoan sa kasingkasing, nga may tinuod nga tumong. Dili igsapayan sa kantidad sa atong halad, kini kinahanglan nga usa ka hingpit nga ikapulo. Hinumdomi ang istorya mahitungod sa gamayng salapi sa biyuda:
“Samtang naglingkod si Jesus atbang sa panudlanan sa Templo, naniid siya sa mga tawo nga nanghulog didto sa ilang mga halad. Daghang mga dato ang nanghulog ug daghang kuwarta.
“Ug dihay usa ka kabos nga babayeng balo, nga miabot ug mihulog og duha ka diyot, nga mibilig usa ka daku.
“Gitawag ni Jesus ang iyang mga tinun-an ug giingnan, “Sultihan ko kamo nga ang gihulog niining kabos nga biyuda labaw kay sa gipanghulog sa uban:
“Kay silang tanan miamot gikan sa ilang naghingapin nga kahamugaway; apan kini siya, gikan sa iyang kapit-os mihatag sa tanan nga diha kaniya, sa tanan nga iyang kabuhian” (Marcos 12:41−44).
Ako mopamatuod nga ang balaod sa ikapulo nahimong panalangin sa akong kinabuhi. Ang Ginoo tinuod gayod nga moabli sa mga bintana sa langit ug ibubo ang mga panalangin sa kabuhong. Kini nga mga panalangin dili kanunayng moabot kon gusto nato, apan kita kinahanglan magtinguha sa giya sa Espiritu aron nga kita makaila kon unsa ang abunda nga ihatag sa atong Langitnong Amahan ngari kanato. Ako nag-ampo nga ang Ginoo mopanalangin kaninyo nga inyong maila diha sa inyong kaugalingong kinabuhi ang mga panalangin sa balaod sa ikapulo.