Pagkahimong mga Tigtuman sa Pulong

Sa Kinatibuk-ang Kapangulohan sa Sunday School

Nganong importante kaayo nga gamiton unsay atong nakat-onan?

Brother Milton Camargo, Unang Magtatambag: Si Elder David A. Bednar sa Korum sa Napulog Duha ka Apostoles miingon: “Ang masayod pinaagi sa gahom sa Espiritu Santo nga si Jesus mao ang Kristo importante ug kinahanglan. Apan ang tinud-anay nga pagduol ngadto Kaniya ug paghatag sa atong tibuok kalag isip halad nagkinahanglan og dugang pa kay sa masayod lang. Ang pagkakabig nagkinahanglan sa tibuok natong kasingkasing, gahom, hunahuna ug kusog.”¹

Sa laing pagkasulti, kita mahimo ug kinahanglang magtuon sa mga kasulatan, mga pakigpulong sa kinatibuk-ang komperensiya, ug mga materyal sa Simbahan, ug mas makanunayon nga magtuon niini. Apan gawas kon atong gamiton ang unsay gitudlo sa Manluluwas, ang pagkahibalo lamang sa unsay Iyang gitudlo dili makapausab kanato.

Unsay makatabang kanato sa paglihok sa unsay atong nakat-onan?

Presidente Mark L. Pace: Ang Espiritu modasig kanato nga molihok, ug busa ang labing maayo nga paagi nga kita mamahimong mga tigtuman sa pulong mao ang pagbaton sa Espiritu nga mag-uban kanato.² Mao kana ang usa sa mga rason nga moambit kita sa sakramento matag semana. Kita mosaad nga kita modala dinhi kanato sa ngalan ni Jesukristo, ug sa kanunay mohinumdom Kaniya, ug maghupot sa Iyang mga sugo. Kana mao ang mga panawagan sa paglihok. Dayon samtang buhaton nato kadto nga mga butang, ang panalangin nga atong madawat mao ang kanunay nga makabaton sa Iyang Espiritu uban kanato.³

Ang sakramento motabang kanato sa pagsunod sa doktrina ni Kristo. Kini makatabang kanato sa pagpalambo sa atong hugot nga pagtuo diha Kaniya. Kini mag-aghat kanato nga maghinulsol, diin mao ang usa ka panawagan sa paglihok. Kini mag-aghat kanato nga mas maningkamot nga makahinumdom Kaniya atol sa semana. Ug usa sa mga tahas sa Espiritu Santo mao ang “[pag]pakita nganha kaninyo sa tanan nga mga butang nga kinahanglan inyong buhaton.”⁴

Samtang moapil kita sa Dominggo nga pagsimba ug pagkat-on, unsaon man nato nga makabalhin gikan sa pagpaminaw sa propetikanhon nga pulong ngadto sa pagbuhat sa unsay giaghat sa Espiritu nato nga buhaton?

Brother Camargo: Importante alang sa mga tawo nga motambong nga andam inig ka Dominggo nga maghisgot sa unsay gitudlo kanila sa Espiritu Santo atol sa semana. Kana usa ka nindot nga paagi sa pag-apil sa mga panaghisgot sa Sunday School, mga korum sa pagkapari, ug Relief Society.

Presidente Pace: Kadto kinsa motudlo inig ka Dominggo mahimong mangutana sa ilang kaugalingon, “Unsay akong mabuhat sa akong pagtudlo nga modasig sa tigpaminaw nga dili lamang mahimong usa ka tigkat-on apan usa usab ka tigtuman sa pulong? Sa unsang paagi nako madapit ang mga tawo sa akong klase o korum nga mahimong mas kugihan sa ilang nakasentro sa panimalay nga pagkat-on, aron mas epektibo silang makaapil diha sa gisuportahan sa Simbahan nga bahin sa pagtuon sa ebanghelyo?” Kabahin kana sa pagtuman—aron angkonon sa mga indibidwal ang ilang kaugalingon nga pagkakabig ug trabahoon ang ilang kaugalingon nga kaluwasan.

kabatan-onan diha sa usa ka klase sa Simbahan

Brother Jan E. Newman, Ikaduhang Magtatambag: Ug basin maayong buhaton sa mga magtutudlo ang pagtapos sa mga panaghisgot pinaagi sa pagsulti, “Ganahan kong makadungog og 10 segundos nga pamahayag sa unsay inyong nakat-onan o unsay ipabuhat sa Ginoo kaninyo sa unsay atong nahisgotan niini nga semana.” Kana mopalig-on sa imbitasyon aron molihok: “Unsa man ang gidapit sa Ginoo kaninyo nga buhaton niining semanaha, base sa atong kasinatian nga magkaubang nagtuon sa mga kasulatan?”

Presidente Pace: Usa sa mga rason nga magkauban kitang mosimba matag Dominggo mao aron mapalig-on nato ang usag usa. Dili ko maayo nga mag-aawit. Kon mokanta ko sa choir, motupad ko sa usa ka tawo nga nakahibalo unsaon pagkanta, ug kana makatabang nako nga mas momaayo ang akong pagkanta. Sama lang kana sa pagsunod sa ebanghelyo. Ang pakig-uban sa mga tawo nga maayong nagsunod sa ebanghelyo makatabang kanato nga mas maayong mosunod usab sa ebanghelyo.

Atol sa semana, sa unsang paagi nato magamit ang atong nakat-onan gikan sa atong Dali, Sunod Kanako nga pagtuon?

Brother Camargo: Kasagaran human kita mobasa o maminaw, mopasalig kita sa pagbuhat og usa ka butang. Apan dayon paglabay sa usa o duha ka adlaw, makalimot kita. Mao kana nganong importante nga isulat ang mga pag-aghat nga atong mabati ug ang mga pasalig nga atong gihimo, aron makahinumdom kita niini atol sa semana. Adunay dako nga gahom sa mga pulong, “Hinumdomi, hinumdomi.”⁵

Brother Newman: Sama sa Manluluwas, kita makalibot sa pagbuhat og maayo. Samtang inyong sundon ang Iyang ehemplo sa pagserbisyo, mahimo kining kabahin kon kinsa kamo. Aduna koy hingpit nga ehemplo niana usa ka Dominggo sa simbahan. Ako lang ang anaa didto kay nasakit ang akong asawa. Sa dihang milingkod ko, ang tawo sa akong luyo miingon, “Asa ang imong asawa?” Miingon ko, “Dili kaayo maayo ang iyang paminaw.” Miingon siya, “Mahimo ba kaming magdala para ninyo og pagkaon alang sa panihapon karong gabii?” Miingon ko, “Ayaw kabalaka. Anaa na.” Miingon siya, “Nan magdala kami og pagkaon ugma.” Ug gidad-an mi nila og panihapon.

Bisan walay bisan unsa nga pag-aghat, kini nga mga silingan mibuhat og butang nga maayo, kay mao kana kon kinsa sila. Kon mga disipulo kita ni Kristo ug makakita kita og tawo nga nanginahanglan, dili kita moingon, “Aw, tingali napangitaan na kana nila og paagi.” Buhaton nato ang unsay atong mabuhat aron sa pagtabang.

Presidente Pace: Bisan asa man kita—sama pananglit, nagdrayb paingon sa trabaho o eskwela—makahunahuna kita mahitungod sa Manluluwas. Apan ang pagkahimong usa ka tigtuman sa pulong nagpasabot nga kinahanglan kitang mobuhat og labaw pa kay sa paghunahuna lamang mahitungod Kaniya. Aniay pipila ka piho nga mga butang nga inyong mabuhat aron sa paggamit sa unsay inyong nakat-onan diha sa personal, sa pamilya, ug sa Dominggo nga pagtuon:

Tugoti nga modasig kaninyo sa paglihok ang mga saad sa mga pag-ampo sa sakramento.
Pinaagi sa pag-ampo, pagtuon, ug kamasulundon, dapita ang Espiritu sa paggiya kaninyo.
Ipahisama ang mga kasulatan nganha sa inyong kaugalingon.⁶ Sa inyong indibidwal o pamilya nga pagtuon, pangutan-a ang inyong kaugalingon, “Duna bay usa ka butang niini nga kasulatan nga makatabang kanako nga makahibalo kon unsa ang buhaton?”
Samtang maminaw kamo sa mga propeta ug apostoles, pangutana, “Unsa man ang kinahanglan nakong buhaton sa unsay akong nakat-onan?” Hatagi og piho nga pagtagad ang bisan unsang panawagan sa paglihok nga inyong mabati o madungog.
Isulat ang inyong mga pagbati ug mga impresyon aron maka-follow up kamo niini.
Buhata kon unsay gitudlo kaninyo. Pag-ampo alang sa giya. Dayon, sama sa gisulti ni Nephi, “moadto ug mobuhat.”⁷
Tabangi ang inyong silingan. Ang inyong silingan mao ang bisan kinsa sa inyong palibot nga nanginahanglan og tabang.

Brother Camargo: Dunay dugang pa sa kasulatan nga nag-awhag kanato nga mahimong mga tigbuhat ug dili mga tigpaminaw. Kini nagpadayon:

“Ang mamati sa iyang pulong apan dili magtuman niini, mahisama sa usa ka tawo nga manamin ug makakita sa iyang tinuod nga hitsura:

“Makasud-ong siya sa iyang kaugalingon apan inigpahawa na niya, malimot lang dayon siya sa iyang hitsura.

“Apan ang tawo nga magsusi pag-ayo sa hingpit nga kasugoan nga naghatag ug kagawasan sa mga tawo ug magpadayon sa pagtamod niini, panalanginan sa Dios ang iyang buhaton kay dili man siya kutob ra diha sa pagpamati.”⁸

Presidente Pace: Pagkanindot nga pahinumdom nga kon kita mahimong mga tigtuman, mapanalanginan kita pinaagi sa pagsunod sa ebanghelyo!