“Nalig-on pinaagi sa Ehemplo ni Maria,” Liahona, Dis. 2022.
Mga Tingog sa mga Santos sa Ulahing mga Adlaw
Nalig-on pinaagi sa Ehemplo ni Maria
Si Maria mipahinumdom kanako nga imbes mabalaka, makapili ako nga mosalig sa Dios ug sa Iyang plano alang kanako.
The Annunciation [Ang Pagpahibalo], ni Carl Heinrich Bloch
Bisan kinsa nga nakaserbisyo og misyon nakahibalo nga ang pagpaabot og tawag sa telepono bahin sa pagbalhin makaugtas. Ang pagpaabot og tawag human miabot ang akong bag-o nga presidente sa misyon makapabalaka kaayo nga panahon alang kanako.
Naghunahuna ko kon asa ako moserbisyo ug kinsa ang mahimo nako nga bag-ong kompanyon. Naghunahuna usab ko kon unsa kaha ang kinaiya sa akong bag-o nga presidente sa misyon ug sa unsang paagi siya mobuhat sa mga butang.
Usa ka buntag samtang nagkaduol ang mga pagbalhin, nabasa nako ang asoy sa anghel nga si Gabriel nga nagpakita ngadto ni Maria. Natandog ako sa pagpamatuod nga gipaambit ni Gabriel ngadto kaniya: “Kay alang sa Dios walay dili mahimo” (Lucas 1:37). Natingala usab ako sa mapainubsanon nga tubag ni Maria: “Sulugoon ako sa Ginoo. Mahitabo unta kanako ang imong gisulti” (Lucas 1:38).
Segurado gayod, tingali nahadlok si Maria sa umaabot. Unsa kahay reaksiyon ni Jose? Unsa kaha ang hunahunaon sa uban? Apan si Maria masaligong mitugyan sa iyang kabubut-on ngadto sa Dios ug sa Iyang plano alang kaniya.
Nakaamgo ko nga samtang giatubang nako ang akong kaugalingong mga kahadlok, gusto ko nga mahimong sama ni Maria. Gusto kong mosulti sa akong kaugalingong paagi, “Sulugoon ako sa Ginoo.” Gusto kong mobuhat sa bisan unsa nga ihangyo sa Dios kanako ug moadto bisan asa ko Niya tawagon. Nahupay ako sa pahinumdom ni Gabriel nga uban sa Dios, posible ang tanang butang.
Alang sa nahibilin sa semana, bisan kanus-a nga mosantop ang mabalak-on nga mga hunahuna sa akong isip, naghunahuna ko ni Maria. Ang iyang ehemplo mihatag kanako og kaisog ug kalig-on sa pagpadaplin sa akong mga kabalaka.
Ang atong Manluluwas mipakita og ehemplo niining pareho nga kinaiya sa kamapainubsanon ug kalig-on sa dihang Siya miingon diha sa Tanaman sa Getsemani, “Amahan ko, mahimo mo ang tanan. Kuhaa kining kupa gikan kanako. Apan dili ang akong pagbuot maoy matuman kondili ang imo” (Marcos 14:36). Nianang higayona, ang Manluluwas miila nga ang tanan nga butang posible sa Dios. Apan sama sa Iyang inahan, Siya masaligong mitugyan sa Iyang kabubut-on ngadto sa kabubut-on sa Iyang Amahan.
Aduna akoy maanindot nga mga kasinatian uban sa akong bag-ong kompanyon diha sa among bag-o nga area. Karon nag-atubang ako og mas makahadlok nga mga wala mahibaloi. Apan sa dihang makahinumdom ko ni Maria—ug sa akong Manluluwas—ako napahinumdoman nga imbes mabalaka, makapili ako nga mosalig sa Dios ug sa Iyang plano alang kanako. Kon Siya mohangyo kanako sa pagbuhat og lisod nga butang, ako makaatubang niana nga buluhaton uban sa hugot nga pagtuo tungod kay Kaniya walay imposible.