“Paglihok pinaagi sa Hugot nga Pagtuo kang Jesukristo,” Liahona, Dis. 2022.
Alang sa mga Ginikanan
Paglihok pinaagi sa Hugot nga Pagtuo kang Jesukristo
Minahal nga mga Ginikanan,
Si Jesukristo mao ang Mesiyas, ug Siya mihatag og daghang paagi alang kanato nga makaangkon og pagpamatuod sa Iyang tahas ug gahom sa atong kinabuhi. Kini nga isyu sa magasin makatabang kaninyo sa pagtudlo sa inyong mga anak mahitungod sa pagbaton og hugot nga pagtuo kang Jesukristo ug sa unsang paagi nga atong maila ang mga panalangin nga Siya ug ang Langitnong Amahan mohatag kanato. Mahimo usab ninyong gamiton ang mosunod nga mga ideya sa pagtabang kaninyo sa pagpalambo sa pagtuon sa inyong pamilya sa Dali, Sunod Kanako ug sa pagsugod og mga panaghisgotan mahitungod sa importansiya sa pagbayad og ikapulo.
Mga Panaghisgotan sa Ebanghelyo
Ang Gasa sa Manluluwas
Sa pahina 4, si Presidente Henry B. Eyring nagpaambit og mensahe sa Pasko bahin sa kalipay ug pagmaya diha sa labing dako nga gasa nga gihatag sa Dios kanato—Iyang Anak, si Jesukristo. Basaha ang iyang artikulo ug hisgoti kon nganong ang Manluluwas usa ka gasa diha sa inyong kinabuhi.
Paglihok sa Unsay Atong Nakat-onan
Sa unsang paagi kita mahimong mas epektibo sa paglihok sa mga butang nga atong makat-onan sa atong pagtuon sa ebanghelyo? Sa pahina 10, basaha ang mga hunahuna gikan sa Kinatibuk-ang Kapangulohan sa Sunday School mahitungod kon sa unsang paagi kita mahimong mas maayo nga “mga tigtuman sa pulong” (Santiago 1:22).
Mga Panalangin sa Ikapulo
Sa pahina 40, si Elder Moisés Villanueva naghulagway kon giunsa niya, isip usa ka 10 anyos nga kinabig sa Simbahan, sa pag-angkon og pagpamatuod sa ikapulo pinaagi sa pagtan-aw sa iyang inahan nga matinud-anong nagbayad og ikapulo. Siya dayon mipasabot sa importansiya sa pag-ila sa dili tataw nga mga panalangin—temporal ug espirituhanon—nga moabot isip resulta sa pagbayad og ikapulo. Isip usa ka pamilya, makabasa kamo og mga bahin sa iyang artikulo ug maghisgot sa dili tataw nga mga panalangin nga moabot gumikan sa pagbayad og ikapulo.
Kalingawan sa Pamilya sa Dali, Sunod Kanako
Mga Pahinumdom ni Kristo
Ang Daang Tugon naglakip og mga simbolo sa Manluluwas ug sa Iyang Pag-ula nga makatabang kanato nga makat-on mahitungod Kaniya.
-
Papilia ang matag tawo og usa sa mosunod nga mga simbolo ni Kristo nga gigamit diha sa Daang Tugon:
-
Karnero (Exodo 12:5; 1 Pedro 1:18–20).
-
Mana (Exodo 16:4, 12–21, 31; Juan 6:30–40).
-
Tubig (Exodo 17:1–6; Jeremias 2:13; Juan 4:7–14).
-
Bitin nga bronsi (Numeros 21:4–9; Juan 3:14–15).
-
Bato (1 Samuel 2:2; 2 Samuel 22:2–3; Isaias 28:16).
-
Sanga (Isaias 11:1–2; Jeremias 23:5; 33:15).
-
Kahayag (Salmo 27:1; Isaias 60:19; Juan 8:12).
-
-
Gamit ang papel o ubang mga butang, paghimo og pangdayan-dayan nga giporma sama sa gipili nga simbolo ug ipakita kini diha sa usa ka espesyal nga dapit aron sa paghinumdom sa Manluluwas.
-
Tun-i ang mosunod nga mga pakisayran sa kasulatan nga gilista uban sa matag simboto sa ibabaw.
Panaghisgotan: Unsa ang gitudlo sa matag simbolo mahitungod sa Manluluwas? Unsa ang kahulogan ni Jesukristo sa inyong kinabuhi?
Alang sa dugang nga pagtuon bahin niini nga hilisgotan, mahimo kamong mobasa o maminaw sa Abril 2017 nga pakigpulong sa komperensiya ni Presidente Russell M. Nelson “Pagdawat sa Gahom ni Jesukristo diha sa Atong Kinabuhi” (Liahona, May 2017, 39–42).