Digital Lamang
Pagserbisyo sa Ngalan ni Jesukristo
Ang tagsulat nagpuyo sa Idaho, USA.
Gusto ko nga ang serbisyo ug gugma nga akong ihatag adunay pagkasusama sa gugma ug serbisyo sa Manluluwas.
Ang akong lola mao ang labing maayo nga tighatag. Ang iyang mga gasa mahunahunaon, ug ang matag gasa nga iyang giputos gitabonan og matahom nga papel nga adunay bagay nga laso nga nindot kaayo pagkahigot. Ang pag-adto ngadto sa iyang panimalay sa buntag sa Pasko daw sama sa pagsulod sa himoanan og gasa ni Santa. Ang iyang gasa mao ang gasa nga maghinamhinam ka nga madawat sa Pasko ug sa matag adlawng natawhan usab. Bisan pa, wala ko nakahinumdom sa tanang gasa nga iyang nahatag kanako. Unsay espesyal mao ang paagi nga siya mihatag niini.
Sa ulahing bahin sa 2016, si Lola nahiling nga adunay kanser. Kini nga babaye kinsa maayo kaayong mohatag atol sa Pasko anaa sa ospital alang sa iyang paborito nga holiday sa tuig. Nagsugod ko og kabalaka kon sa unsang paagi kana makaapekto ni Lola, maong gibati nako nga kinahanglan nakong tawagan ang akong mama ug mangutana niya kon sa unsang paagi ako makatabang ni Lola bahin sa iyang mga gasa. Nakaila na ni Lola, dugay na gayod tingali siyang nakahimo sa iyang mga plano sa Pasko ug masagmuyo gayod og maayo kon dili kini mabuhat. Ug tinuod man, si Mama miingon nga napalit na ni Lola ang mga regalo.
Ang akong lolo mihatag kanamo sa buluhaton sa pagputos ug pag-andam sa mga gasa alang sa matag usa sa trese ka apo ug mga kapikas, uban sa mga gasa alang sa sobra sa baynte siyete ka apo sa tuhod. Mainampingon nakong gipili ang mga sudlanan sa gasa, tisyu, ug mga sobre.
Gi-scan nako ang usa ka kard gikan sa usa ka miaging tuig aron sa paghinumdom sa ilang tinuig nga mensahe: “Mahangtorong Naghigugma, Lola ug Lolo.” Uban sa pagtugot ni Lolo ug Lola, gibuhat nako ang akong labing maayo aron sa paghimo og usab sa ilang mensahe. Naningkamot akong miputos sama sa pagputos ni Lola. Gusto nako nga hingpit ang tanan—sa pagbuhat niini sama sa iyang buhaton.
Sa dihang mga tunga-tunga nako sa pagbutang sa mga regalo sa mga sudlanan, sa pagdayan-dayan niini og pasidlak [glitter], ug pagtaod sa mga kard ngadto sa mga sudlanan, ang Espiritu mihunghong kanako, “Kini kabahin sa unsay gipasabot sa pagdala sa ngalan sa usa ka tawo diha kanimo. Kini kabahin sa unsay gipasabot sa pagbuhat sa mga butang sa ngalan sa usa ka tawo.” Sa paninguha nga mohatag sama ni Lola, nagkaduol ko kaniya. Nagsugod ko sa paghunahuna og maayo kon unsay gipasabot sa pagdala sa ngalan ni Kristo ngari kanato.
Sa bunyag, mipakigsaad ko sa pagdala sa ngalan ni Jesus ngari kanako ug sa “kanunay nga mohinumdom [K]aniya” (Moroni 4:3). Matag semana atol sa sakramento, akong gibag-o kana nga pakigsaad ug magsugod pag-usab. Mas gipersonal nako kana nga pagdapit karon. Mas nakasabot ko kon sa unsang paagi ang pagdala sa ngalan ni Kristo ngari kanato naglakip sa pagpakabuhi sama nga Siya nagpakabuhi.
Nasayod ko kon sa unsang paagi si Lola mihatag tungod kay kadaghan na akong nahimo nga tigdawat sa iyang gugma ug kamanggihunahunaon. Nasayod ko kon sa unsang paagi ang Langitnong Amahan ug si Jesus mohigugma ug mohatag tungod kay makanunayon akong nakasaksi sa Ilang mga panalangin sa akong kinabuhi.
Usa ako ka tigdawatan sa grasya ni Kristo. Gusto nakong buhaton ang unsay Iyang buhaton. Gusto ko nga ang kinabuhi nga akong gipuy-an, ang serbisyo nga akong ihatag, ug ang gugma nga akong ipaambit nga magdala og pagkasusama sa Iyaha—aron mabati nga ingon og kini naggikan Kaniya. Mapasalamaton ako nga aduna akoy kahigayonan sa pagserbisyo ni Lola ug, sa pagbuhat sa ingon, mas nakasabot gayod sa mga gasa nga gihatag sa Manluluwas kanako.