Mga Istorya gikan sa Mga Santos, Volume 3

Neal A. Maxwell sa Ikaduhang Gubat sa Kalibotan

Mga litrato sa maayong kabubut-on sa pamilyang Maxwell

Nahitabo kini nga istorya sa Okinawa, Japan niadtong 1945 diin ang 18 anyos nga si Neal A. Maxwell nagserbisyo sa militar sa Estados Unidos. Si Elder Maxwell sa kaulahian miserbisyo diha sa Korum sa Napulog Duha ka Apostoles gikan 1981 ngadto sa 2004.

Ang Allies misaulog sa “Victory in Europe Day” niadtong Mayo 8, 1945. Miabiba si Neal Maxwell sa balita, sama sa ubang Amerikano nga mga sundalo nga nakig-away aron sa pag-angkon sa Japanese nga isla sa Okinawa. Apan ang ilang mga pagsaulog nabuntog sa reyalidad sa ilang kaugalingong sitwasyon. Uban sa kamikaze nga mga piloto nga miatake sa dunggoanan sa Okinawa ug sa pagpamomba sa mga kanyon nga mipadilaab sa mga bungtod sa isla, ang Amerikano nga mga sundalo nakahibalo nga ang ilang bahin diha sa pakig-away dugay pang mahuman.

“Tinuod kini nga gubat,” naghunahuna si Neal. Ang panggubatan dili gayod nindot sa reyalidad kay sa unsay gipatuo kaniya sa mga mantalaan ug mga salida. Mipuno kini kaniya og makaluya, lain nga pagbati.

Si Elder Maxwell (dapit sa wala) miserbisyo sa militar sa Estados Unidos diha sa panggubatan sa Ikaduhang Gubat sa Kalibotan.

Si Neal ug ang mga sundalo uban kaniya gidestino ngadto sa usa ka dibisyon isip puli nga mga sundalo. Niadtong Mayo 13, misulat siya ngadto sa iyang panimalay sa Utah. Wala siya tugoti nga mosulti sa iyang mga ginikinan sa piho nga mga detalye sa iyang buluhaton, apan giseguro niya sila sa iyang maayong kahimtang. “Nag-inusara gayod ko kon kabahin sa espirituhanon nga mga kauban, gawas sa Usa,” misulat siya. “Nasayod ko nga nag-uban Siya kanunay kanako.”¹

Si Neal anaa sa usa ka mortar squad nga gisangonan sa pagpabuto og mga eksplosibo ngadto sa mga posisyon sa kaaway nga nakatago sulod sa isla. Mipuwesto siya diha sa usa ka lungag [foxhole], ug human sa pipila ka adlaw nga pagbinayloay og mga pag-atake, ang kusog nga mga uwan mihimo sa uga nga palibot ngadto sa usa ka kalapokan. Ang lungag ni Neal napuno sa lapok, nga mihimo sa pagpahulay nga ingon og imposible samtang misulay siya sa pagkatulog nga magbarog. Ang kulang nga mga rasyon sa militar gamay ra og nahimo aron sa pagpugong sa kagutom, ug ang tubig nga iyang nadawat gisaka sa bungtod gamit ang lima ka galon nga mga sudlanan ug kanunayng dunay lasa sa lana. Daghang lalaki ang miinom og kape aron matabonan ang kahugaw sa tubig, apan gusto ni Neal nga mahimong masulundon sa Pulong sa Kaalam ug mibalibad. Naningkamot siya og maayo sa pagtigom og tubig sa ulan, ug sa mga Dominggo, gigamit niya ang tubig nga iyang napundok ug ang usa ka biskwit gikan sa iyang mga rasyon alang sa sakramento.²

Usa ka gabii sa ulahing bahin sa Mayo, tulo ka bomba sa kaaway ang mibuto duol sa posisyon sa mortar ni Neal. Hangtod nianang higayona, ang mga Japanese wala makakaplag sa lokasyon sa iyang squad. Apan karon ingon og ang mga artillerymen nakabanabana sa iyang posisyon ug nagkaduol na. Sa dihang mibuto ang laing bomba pipila lang ka piye ang gilay-on, nahadlok si Neal nga ang sunod makaigo na sa gipuntirya niini.

Milayat pagawas gikan sa lungag, mipasalipod siya sa usa ka gamay nga bungdo. Dayon, nakaamgo nga anaa pa gihapon siya sa peligro, nagdali siyang mibalik ngadto sa lungag aron maghulat sa bisan unsa nga mosunod.

Paghulagway pinaagi ni Greg Newbold

Diha sa lapok ug kangitngit, miluhod si Neal ug nagsugod sa pag-ampo. Nasayod siya nga dili siya angayan sa bisan unsang espesyal nga mga pabor gikan sa Dios ug nga daghang matarong nga mga tawo ang nangamatay human sa paghalad ug kinasingkasing nga mga pag-ampo atol sa pakig-away. Gihapon, nangamuyo siya sa Ginoo nga luwason ang iyang kinabuhi, misaad nga ipahinungod ang iyang kaugalingon ngadto sa pagserbisyo sa Dios kon maluwas siya. Aduna siyay nabulingan nga kopya sa iyang patriyarkal nga panalangin diha sa iyang bulsa, ug gihunahuna niya ang usa ka saad nga anaa niini.

“Ako mosaad kanimo og proteksiyon batok sa gahom sa tiglaglag nga ang imong kinabuhi dili mapamub-an,” nga mabasa diha sa iyang panalangin, “ug nga ikaw dili mahikawan sa pagtuman sa matag buluhaton nga gihatag kanimo didto sa kinabuhi sa wala pa dinhi sa yuta.”

Gitapos ni Neal ang iyang pag-ampo ug mihangad sa langit sa kagabhion. Ang makapusgay nga mga pagbuto mihunong na, ug hilom ang tanan. Sa dihang wala na mibalik ang mga pagpamomba, nabati niya diha sa iyang kalag nga gipreserbar sa Ginoo ang iyang kinabuhi.³

Wala madugay human niana, misulat si Neal og pipila ka sulat ngadto sa iyang pamilya sa panimalay. “Gimingaw gayod ko kaninyo, usahay gibati nako nga kahilakon,” miingon siya. “Ang kinahanglan lang gayod nakong buhaton mao ang magpakatakos sa akong patriyarkal nga panalangin, sa inyong mga pag-ampo, ug sa akong relihiyon. Apan ang panahon ug ang akong pagserbisyo sa militar usa ka bug-at nga palas-anon sa akong kalag.”

“Makasulti ko nga Dios lamang ang mipugong sa akong kamatayon sa pipila ka higayon,” miingon siya. “Ako adunay pagpamatuod nga walay tawo nga makagun-ob.”⁴

Mubo nga mga Sulat

1. Maxwell, Personal nga Kasaysayan, kahon 1, folder 3, 10; Hafen, Disciple’s Life, 102, 105. Gi-edit ang kinutlo aron mas sayon basahon, ang orihinal nga tinubdan adunay “tinuod kadto nga gubat.”

2. Maxwell, Interbiyo sa Giasoy nga Kasaysayan [1976–77], 117; Maxwell, Personal nga Kasaysayan, kahon 1, folder 3, 11–12; Hafen, Disciple’s Life, 107–9, 112; Freeman ug Wright, Saints at War, 358.

3. Hafen, Disciple’s Life, 109–10; Maxwell, Personal nga Kasaysayan, kahon 1, folder 3, 10, 12; Maxwell, Pagdiktar, 3.

4. Hafen, Disciple’s Life, 112; Neal A. Maxwell ngadto ni Clarence Maxwell ug Emma Ash Maxwell, Hunyo 1, [1945], Neal A. Maxwell World War II Correspondence, CHL.