Alang sa mga Inahan sa Gagmayng mga Bata
Kamo Aduna bay Hugot nga Pagtuo ni Kristo sama sa Usa ka Bata?
Ako nadasig sa daghan kaayong paagi sa hugot nga pagtuo sa akong kauglingong mga anak.
Sa dihang si Jesukristo mibisita sa Amerika, usa sa unang mga butang nga Iyang gidapit ang Iyang mga disipulo sa pagbuhat mao ang “mahimo nga sama sa usa ka gamay nga bata” (3 Nephi 11:38).
Ngano man kana? Ang mga bata wala masayod sa tanang butang. Ang akong kwatro anyos nga anak nangutana nako og daghan kaayong pangutana—labing minos usa ka gatos kada adlaw! Apan ang iyang pagkakuryoso ug kauhaw sa kahibalo tingali pipila sa natural nga mga paminsar sa bata nga gusto sa Manluluwas nga atong sundon.
Samtang ako nagtan-aw sa akong mga anak nga nagtubo, adunay tulo ka lahi nga mga leksiyon nga ilang gipakita kanako kabahin sa ilang hugot nga pagtuo sama sa bata:
-
Sila adunay hingpit nga pagsalig sa ilang mga ginikanan.
Kon ang akong mga batang babaye adunay problema o gisakitan o nahadlok, sila motawag dayon nako o sa akong bana. Sila dili mohunong ug maghunahuna kon sila angayan ba nga tabangan. Wala nila gihunahuna kon igo na ba ang ilang pagkamasulundon. Nasayod lang sila nga kami nagmahal kanila ug andam sa pagtabang.
Kita makasalig sa Langitnong Amahan sa samang paagi.
Akong gimahal ang akong mga anak nga babaye. Apan ang gugmang anaa nako alang nila dili ikatandi sa gugma sa Langitnong Amahan alang kanato. Sa higayon nga kita motawag sa atong Amahan sa Langit, Siya anaa (tan-awa sa Joshue 1:9). Kita makabati diha-diha dayon sa Iyang paghupay ug kalinaw, ug, uban sa pailob ug hugot nga pagtuo, kita makadawat og mga tubag sa atong mga pangutana.
Pananglitan, pipila ka tuig ang milabay nahatagan ko og makapahinam nga tanyag sa trabaho. Apan nabalaka ko nga kini magkinahanglan nga motrabaho ko ma-Dominggo. Samtang nanglimbasog ko sa pagdesisyon kon unsa ang buhaton, ako nag-ampo ug nagpuasa. Napuno ko sa kalinaw ug gani naaghat sa paghangyo sa manadyer kon maka-day off ba ko ma-Dominggo. Kon wala ang akong pagsalig sama sa usa ka bata ngadto sa Langitnong Amahan, dili gayod unta ko makabaton og kaisog sa pagbungat sa maong kondisyon, apan ang manadyer miuyon. Busa, gisugdan nako ang usa ka bag-o ug makapahinam nga yugto.
-
Sila dili moreklamo sa unsay gitudlo kanila.
Niadtong ang akong anak nga babaye gamay pa, nangutana siya nako kon nganong ang iyang mga magnet motapot sa fridge apan dili sa bongbong. Akong gipasabot kon sa unsang paagi mogana ang mga magnet, ug siya mituo dayon niining bag-ong kahibalo ug misugod sa pagsulay sa magnet diha sa lain-laing mga butang.
Sama sa pagsalig sa akong anak nga babaye sa mga tubag nga akong gihatag kaniya, ang Langitnong Amahan naglaom kanato nga mosalig sa Iyang mga tubag.
Human ko misugod sa akong trabaho, ang mga hagit miabot. Ang akong mga oras nahimong hilabihan ka lisod diha sa akong pamilya, ug ang akong manadyer nag-anam na og kaproblema nako. Misugod ko sa pagduda sa tubag nga akong nadawat kabahin sa pagdawat sa trabaho.
Ang Langitnong Amahan mao “ang Dios sa kamatuoran, ug dili magbakak” (Ether 3:12), busa ako miasumer nga ako wala makasabot sa Iyang paggiya, nga nakapahunahuna nako kon unsa ka daghan ang uban pang mga pag-aghat nga wala nako masabti. Dayon akong nahihumdoman ang mga pulong ni Alma nga Batan-on: “Pagsulay sa akong mga pulong, ug pagbansay sa usa ka tipik sa hugot nga patuo, oo, bisan kamo kutob ra sa pagtinguha sa patuo, tugoti kini nga tinguha nga molihok diha kaninyo” (Alma 32:27).
Ako adunay tinguha sa pagpadayon sa pagtuo diha sa Langitnong Amahan, busa ako mipili sa pagpakita og hugot nga pagtuo ug pag-eksperimento diha sa Iyang pag-aghat alang nako sa pagdawat niining trabaho, ug ako mipadayon.
-
Sila adunay dili matay-og nga hugot nga pagtuo.
Masakiton kaayo ko sa dihang nagmabdos ko sa akong kinamanghoran nga anak. Apan usa ka hapon, ang akong anak nga babaye gusto nga makiglakaw [hiking]. Ang akong bana misulti niya nga masakiton kaayo ko para makalakaw. Ang akong anak nga babaye nag-ampo ug mihangyo sa Langitnong Amahan sa pagtabang kanako nga maarang-arang ug nangandam dayon sa pag-lakaw. Pipila ka minuto ang milabay, ang akong bana natingala nga nakita ko nga nagmata na. Gisultihan ko niya mahitungod sa pag-ampo sa among anak nga babaye, ug sa iyang tim-os nga hugot nga pagtuo nga nakapadasig nako nga maningkamot sa paglakaw. Sa usa ka paagi, nakaabot ko sa tumoy sa bukid.
Ang pagbaton og hugot nga pagtuo sa paghuman sa akong kontrata sa trabaho nagkinahanglan usab og hugot nga pagtuo sama sa akong anak nga babaye. Dili nako makita unsa ang anaa sa unahan. Apan ako nagpadayon sa unahan nagbaton og hugot nga pagtuo nga ang Langitnong Amahan mogiya kanako sa akong trabaho alang sa usa ka rason. Ug kana nga rason sa kataposan gibutyag.
Sa usa ka malinawon nga adlaw sa trabahoan, usa ka kauban sa trabaho misulti nako nga sa dihang nasayod siya nga ako usa ka miyembro sa Simbahan, miasumer siya nga ako wala ray kalainan sa pipila ka mabingkilon nga relihiyosong mga tawo gikan sa iyang nasinati. Misulti siya nako nga siya natandog sa akong pagtahod ug kamabination alang kaniya ug sa ubang mga kauban sa trabaho. Nagahin ang among mga oras sa pag-istoryahanay kabahin sa hugot nga pagtuo ug ni Jesukristo.
Misulti siya nako nga siya gustong motuo Kaniya, ug ang Espiritu mipuno diha sa akong dughan samtang akong gisulti kaniya ang kabahin sa ebanghelyo.
Ako nakaamgo nga siya mao ang usa ka rason nga ang Langitnong Amahan migiya kanako niining trabaho. Usa kadto ka milagro.
Sama sa gitudlo ni Presidente Russell M. Nelson, “Ang mga milagro moabot sumala sa inyong hugot nga pagtuo sa Ginoo. Ang sentro nianang hugot nga pagtuo mao ang pagsalig sa Iyang kabubut-on ug gitakda nga panahon—unsaon ug kon kanus-a Siya mopanalangin kaninyo sa milagrosong tabang nga inyong gitinguha. Ang inyong pagkawalay pagtuo lamang maoy mopugong sa Dios sa pagpanalangin kaninyo sa mga milagro aron sa pagbalhin sa mga bukid sa inyong kinabuhi.”1 Sa dihang ako mipakita og hugot nga pagtuo sama sa usa ka bata diha sa Iyang pag-aghat sa pagdawat niining trabaho ug paghuman sa akong kontrata, ang Langitnong Amahan mipakita kanako sa Iyang abilidad sa pagpahinabo og mga milagro.
Ang Hugot nga Pagtuo nga Sama sa usa ka Bata Makapabilin Kanato diha sa Dalan
Ang kinabuhi mahimong makapalisod sa pagpadayon sa paghupot og yano, apan gamhanan, hugot nga pagtuo sama sa usa ka bata. Nasayod ang atong Manluluwas niini. Mao nga Siya nagdapit kanato sa paghunahuna sa ligdong nga ehemplo sa mga bata. Kon kita adunay kasingkasing nga bukas sa pagsalig sa atong Langitnong Amahan ug sa Iyang mga propeta sama sa gagmay nga mga bata, kita makasinati og talagsaong espiritwal nga paglambo ug mas masabtan ang gugma ug ang plano nga Siya anaa alang sa matag usa kanato.