Digital Lamang: Mga Young Adult
Pagtinguha ni Kristo Panahon sa Pasko
Ang kalibotan naghimong sayon sa pagkalimot sa tinuod nga kahulogan sa Pasko, apan aniay pipila ka butang nga akong gihinumdoman nga buhaton aron sa pagtinguha Kaniya.
Bisan og maglisod usahay ko sa pagbuhat, kanunay nakong ipadaplin ang mga makabalda sa panahon sa Pasko aron motutok sa akong Manluluwas, si Jesukristo. Maningkamot akong moserbisyo sa uban ug mopaambit sa mensahe sa Iyang pagkatawo ug kahayag ngadto sa tanan.
Taliwala sa mga baligya nga barato ug mga Santa, ako mabinantayon sa posibilidad nga kon ako makalimot sa akong Manluluwas, akong makaplagan ang akong kaugalingon nga mitugyan ngadto sa mga tradisyon sa kalibotan kabahin sa Pasko. Hinuon, gusto kong motutok sa usa nga mao ang rason sa kasaulogan—si Kristo. Ang pagkat-on bahin sa kamahinungdanon sa Iyang pagkatawo misangpot ngadto sa talagsaon nga espirituhanon nga mga kasinatian sa akong kinabuhi. Kini mao ang panahon sa tuig nga ako mapahinumdoman sa sentro sa akong hugot nga pagtuo diha Kaniya tungod kay siya ang rason alang sa tanan nga maayo sa akong kinabuhi.
Ang Pasko gimarkahan diha sa daghang kalendaryo isip ang labing importanteng panghitabo sa tuig, ug alang nako kini usa ka panahon sa pagpamalandong sa pagkatawo, kinabuhi, kamatayon, ug pagkabanhaw sa akong Manunubos.
Ang pagkat-on bahin Kaniya ug ang pagkat-on gikan Kaniya.
Kini nga panahon sa tuig nagtabang kanako nga sinserong maghunahuna sa unsay Iyang nabuhat alang kanako ug unsay Iyang padayon nga gibuhat alang kanako. Ang hilom nga pagpamalandong mahitungod sa Iyang mga buhat sa pagserbisyo, Iyang mga sakripisyo, ug Iyang kinaiya, ingon man sa pagbasa sa mga asoy bahin sa Iyang pagkatawo ug pagpamlandong sa Iyang kinabuhi, makanunayon nga nagtabang kanako nga mobati nga mas duol Kaniya.
Siya nagpakabana sa Iyang pagpangalagad sa uban samtang matinguhaon sa pagtuman sa Iyang diosnon nga misyon. Samtang ako napahinumdoman sa Iyang ehemplo sa pagserbisyo sa panahon sa Pasko, ako mibati og kadasig sa pagpaambit sa akong paglaom ug hugot nga pagtuo diha Kaniya atol niining espesyal nga panahon ngadto niadtong akong gimahal og maayo ug mahimong magpakabana sa mga panginahanglan sa tanan nga naglibot kanako.
Sama pananglit, sa miaging Pasko ang akong pamilya ug ako adunay daghang sobra nga pagkaon sa Pasko. Migahin ko og kadiyot aron mainampoong namalandong kon unsay among mabuhat sa tanang sobra nga pagkaon. Hilabihan nakong nabati nga kinahanglan nako kining idrayb ngadto sa siyudad sa dapit diin akong nakita ang daghang tawo nga walay panimalay atol sa akong mga biyahe padulong ug pabalik sa unibersidad.
Puno ang duha ka kahon sa daghang pagkaon, milakaw ako aron sa pagpangita og mga tawo kinsa nagkinahanglan og pagkaon. Sa wala madugay nakakita ako og grupo sa mga tawo nga walay panimalay kinsa malipayon nga midawat sa panihapon sa Pasko. Mibati ako og kalipay samtang gipaambit nila ang pagpasalamat nga ilang nabati nianang adlawa. Ang pagpahayag sa ilang kamapasalamaton mipuno usab sa akong kaugalingong kasingkasing. Samtang mihatag ako og pagkaon aron sa pisikal nga pagpakaon kanila, ang espirituhanon nga kabaskog nga akong nadawat gikan sa pagpangalagad ngadto kanila mipabilin kanako nga busog sa dugay nga panahon human niana nga Pasko.
Atol sa among panag-istoryahanay, usa ka babaye nga walay panimalay misulti kanako nga siya adunay daghang makaon apan gustong mopakigbahin sa gitanyag nga pagkaon ngadto sa laing tawo nga nanginahanglan. Ug sa wala madugay, sa akong pagbiya sa siyudad, nalabyan nako ang samang babaye ug mitan-aw samtang gibutang niya ang pagkaon nga akong gihatag kaniya ngadto sa usa ka natulog nga lalaki nga walay panimalay ug hilom nga milakaw palayo.
Sa pagpaningkamot nga mahimong mas sama ni Kristo pinaagi sa pagpangalagad ngadto sa uban akong nakaplagan ang akong kaugalingon nga maoy gipangalagaran. Akong nakita ang kahayag ni Kristo niana nga adlaw. Akong nakita si Kristo diha sa akong mama nga makugihong miandam sa mga kahon sa pagkaon ug diha sa babaye nga walay panimalay kinsa nangalagad ngadto sa lain sa dihang siya mismo wala kaayoy ikahatag.
Sama sa gitudlo ni Elder Dale G. Renlund sa Korum sa Napulog Duha ka Apostoles: “Ang panahon sa Pasko usa ka matahom ug natural nga panahon sa pagtuon sa Iyang kinabuhi ug sa pagpaningkamot sa pagsunod sa Iyang kinaiya ug mga hiyas. Kon inyong buhaton, masayod kamo nga si Jesus mao ang Kristo, ang Anak sa Dios, ug nga Siya miula alang sa inyong mga sala.”1
Ang mensahe sa pagkatawo ni Kristo nagdala og paglaom ug kalipay sa akong kinabuhi, ug ako makapaambit niana nga mensahe ngadto sa uban. Ako makadugang sa akong kahayag ngadto sa bituon nga migiya sa mga mago, ug ako makatabang sa uban sa pagpangita sa Manluluwas. Akong nakaplagan nga ang mga panalangin sa pagdawat og mga gasa ug pagbati nga gihigugma nakatabang kanako nga mohangop sa ehemplo sa Manluluwas sa pagpanghatag. Samtang mangalagad ako sa uban ug makasaksi sa ilang pagpangalagad niining panahona, tinuoray akong mibati nga konektado ngadto sa Manluluwas.
Kon kitang tanan maningkamot sa pagbalewala sa kasamok ug kabisi sa panahon sa Pasko ug magtinguha nga mahimong mas Kristohanon, nasayod ako nga kita mobati nga mas konektado ngadto Kaniya diha sa atong kaugalingon nga mga kinabuhi ug mogiya usab sa uban ngadto Kaniya. Samtang akong giila kadtong tingali mibati nga wala makit-i, naminaw niadtong kinsa mibati nga wala madunggi, ug miserbisyo niadtong nanginahanglan—ilabi na atol niining sagrado nga panahon sa tuig—akong naamgohan nga ang kahigayonan nga mahimong mas sama Kaniya mao ang usa sa labing mahinungdanon nga mga gasa nga atong nadawat gikan Kaniya.
Dili igsapayan sa unsay mahimong isulti sa kalibotan mahitungod niining panahon sa holiday, kita makapaduol sa atong kasingkasing ngadto sa Manluluwas. Siya mao ang labing mahinungdanon sa espiritu sa Pasko.