“Pasko in Israel,” Liahona, Dis. 2022.
Mga Tingog sa mga Santos sa Ulahing mga Adlaw
Pasko sa Israel
Nag-inusara kami ug layo gikan sa panimalay, apan pipila ka adlaw sa wala pa ang Pasko, dunay tawo nga nanuktok sa among pultahan.
Niadtong Agosto 1977 ang akong bana ug ako mibalhin ngadto sa Rehovot, Israel, uban sa among tulo ka anak, ang tanan ubos sa sayis anyos ang pangidaron. Dili pamilyar ang pinulongan, gamayng tawo ra ang makasulti og Iningles, lahi ang pagkaon kay sa among naandan, ug ang pagpamalit usa ka hagit. Daghan kami og nakat-onan atol sa duha ka tuig nga nagpuyo kami didto.
Paspas nga milabay ang panahon, ug sa wala madugay Disyembre na. Alang sa kadaghanang tawo sa maong nasod, ang Disyembre 25 mahimong sama lang sa bisan unsang ubang adlaw. Apan alang sa among pamilya ug sa gamayng gidaghanon sa ubang mga Kristiyano nga nagpuyo sa Israel, Pasko gayod kini.
Nakaila-ila kami og matahom nga Judeo nga magtiayon, si Israel ug Millie Jachobson. Miabot siya [si Israel] ngadto sa Israel isip usa ka bakwit gikan sa iyang lumad nga Lithuania, ug siya [si Millie] gikan sa South Africa. Sila anaa sa ulahing bahin sa ilang 60 nga pangidaron ug nagpuyo sa usa ka gamay nga apartment mga 1.6 ka kilometro gikan kanamo. Si Israel nagtrabaho sa Weizmann Institute of Science, diin nagtrabaho usab didto ang akong bana. Mabination sila kanamo, nagdapit kanamo nga moadto sa ilang apartment sa pipila ka higayon aron sa pagsaulog sa nagkalainlaing Judeo nga mga holiday.
Samtang nangandam kami alang sa Pasko nianang tuiga, gusto namo nga mabati sa among mga anak ang importansiya sa pagsaulog sa pagkatawo sa Manluluwas. Nakakaplag ako og tabonon [brown] nga pangputos nga papel ug gigunting kini nga maporma og Christmas tree. Gikoloran kini sa among mga bata og berde nga mga krayola. Dayon gipapilitan namo og kendi ang among papel nga kahoy isip mga dayan-dayan ug gipapilit kini sa bungbong. Wala kami magdahom og daghang gasa sa ilawom sa among christmas tree nianang tuiga. Gibati namo nga nag-inusara ug layo gikan sa tanang tawo ug tanang butang nga among nailhan.
Usa ka gabii pipila lang ka adlaw sa wala pa ang Pasko, dunay tawo nga nanuktok sa among pultahan. Sa dihang giablihan namo ang pultahan, nakita namo si Israel Jachobson nga nagbarog didto, naggunit og cake. Siya ug ang iyang asawa nasayod nga mga Kristiyano kami ug nga ang pagkatawo ni Jesukristo importante kanamo. Gibuhat nila ang unsay ilang gihunahuna nga labing maayo ug naghimo og cake aron sa pagtabang kanamo sa pagsaulog sa adlawng natawhan sa Manluluwas. Usa kadto ka malumo nga kasinatian alang sa among tibuok pamilya.
Niana nga Pasko nalingaw kami sa pagbisita sa Betlehem ug sa kaumahan palibot niini. Apan walay butang nga mas nakatandog kanamo kay sa mahunahunaon nga gasa sa usa ka maalamon nga lalaki nga ginganlan og Israel Jachobson ug sa iyang mabination, mahigugmaon nga asawa, nga si Millie.