«Ընտանիքները և աշխարհի լույսը», Լիահոնա, հունվար 2023
Ծնողների համար
Ընտանիքները և աշխարհի լույսը
Հարգելի՛ ծնողներ,
Ընտանիքը Երկնային Հոր՝ Իր զավակների համար նախատեսած երջանկության ծրագրի առանցքային մասն է։ Այս համարի հոդվածները կարող են օգնել ձեզ բարելավել շփումները ընտանիքում և օգնել հաղթահարել դժվարությունները ընտանեկան հարաբերություններում։ Դուք կարող եք նաև օգտագործել այս համարը, որը կօգնի սովորեցնել երեխաներին որոշ կարևոր դասեր Նոր Կտակարանից։
Ավետարանի քննարկումներ
Հիսուս Քրիստոսը մեր ճշմարիտ լույսն է
Ձեր ընտանիքի հետ կիսվեք Երեց Բալլարդի էջ 4-ում գտնվող հոդվածի որոշ ուսմունքներով Հիսուս Քրիստոսի՝ որպես աշխարհի լույսի դերի մասին։ Ընտանիքով կազմեք ձեր տան լույսի տարբեր աղբյուրների ցուցակը և քննարկեք տարբեր բաներ, որոնք մեր կյանքում հնարավոր են դառնում լույսի շնորհիվ։ Որպես հոգևոր լույսի ամենամեծ աղբյուր՝ Հիսուս Քրիստոսն ի՞նչ եղանակներով է մեզ օգնում։
Ազատ շփումն ընտանիքում
Կյանքի դժվարություններին հոգևոր առումով պատրաստված լինելը կարևոր է։ էջ 12-ում կարդացեք հոգեկան առողջության խորհրդատուի մի քանի խորհուրդ, թե ինչպես կարևոր, զորացնող զրույցներ վարել ձեր երեխաների հետ։ Այդ մտքերից և առաջարկներից ո՞րը կարող եք իրականացնել ձեր ընտանիքում։
Պատրաստենք մեր սրտերը խոսքի համար
Էջ 38-ում կարդացեք եղբայր Կամրգոյի հոդվածը սերմնացանի առակի մասին։ Քննարկեք ձեր ընտանիքի հետ, թե ինչ են խորհրդանշում առակում հողի տարբեր տեսակները։ Կրտսեր խմբի երեխաները կարող են առակի վերաբերյալ առարկաներ նկարել և խոսել դրանց մասին, իսկ ավագ խմբի երեխաները կարող են կարդալ առակը Մարկոս 4․3-20 հատվածներում և կիսվել իրենց մտքերով կամ հարցերով։
Եկ, հետևիր ինձ. Ընտանեկան զվարճանք
Աստծո օգնությամբ կատարենք դժվար գործեր
Ինչպես Մարիամին և նրա զարմուհի Եղիսաբեթին Նոր Կտակարանում (տես Ղուկաս 1․5-55), մեզ նույնպես երբեմն խնդրում են դժվար գործեր կատարել, և մենք գուցե մտածենք՝ արդյոք կարող ենք։
-
Սենյակի մի ծայրում դրեք դատարկ տարա, օրինակ՝ դույլ կամ տուփ։
-
Ընտանիքի յուրաքանչյուր անդամի տվեք մի փետուր։
-
Սկսելով սենյակի մյուս ծայրից՝ ընտանիքի յուրաքանչյուր անդամ թող փորձի իր փետուրը գցել տարայի մեջ՝ փչելով դրա վրա այնպես, որ այն մնա օդում, մինչ նրանք անցնեն սենյակի մի ծայրից մյուսը։
-
Հանձնարարությունը ավելի բարդացնելու համար տվեք նրանց ընդամենը 30 վայրկյան և ձողիկներ, որոնց միջոցով կփչեն փետուրի վրա։ Շարունակեք նվազեցնել հատկացվող ժամանակը, մինչև հանձնարարությունը կատարելը անհնարին դառնա։
Քննարկում․ Նկատի ունենալով, որ որոշ մարտահրավերներ կարող են անհաղթահարելի լինել այս կյանքում, կիսվեք փորձառությամբ, որն ամրացրել է ձեր վկայությունը հետևյալ խոսքերի վերաբերյալ․ «Ինչ որ անհնար է մարդկանց համար, Աստծու համար հնարավոր է» (Ղուկաս 18․27)։ Ի՞նչ փոքր քայլեր կարող եք ձեռնարկել ձեր կյանքում ամեն օր՝ անհնարին թվացող առաջադրանքները կատարելու համար։