MURIA NA PAROFITA

Ena Tadola Mai na Katuba Vakayalo: iTukutuku me baleta na valetabu mai vei Peresitedi Nelson

O na vulica na ivakarau ni kena dolavi na ilati ena kedrau tadrua o lomalagi kei vuravura, na ivakarau ni kena kerei na Kalou mera qaravi iko mai na nona agilosi, kei na ivakarau ni kena ciqomi na veidusimaki mai lomalagi.

“Ia oqo meda sa gole mada ki na ulutaga baleta na valetabu,” a kaya na noda parofita o Peresitedi Russell M. Nelson ena Koniferedi Raraba ni 2018.

Ena nona ivakasala tabu baleta na ivakarau meda na yaco meda Yalododonu Edaidai dau ivakaraitaki vinaka, a vakayaloqaqataki keda taumada kina meda veisautaka na noda itikotiko me vale e vulici kina na kosipeli ka tokaruataka vei keda na bibi ni kena vakayagataki na yaca dodonu ni nona Lotu na noda iVakabula: Na Lotu i Jisu Karisito ni Yalododonu Edaidai.

Oti o ya, a kerea vakabibi na ivavakoso e vuravura raraba mera na dau vakaliuca na valetabu.

“Eda sa kila tiko ni noda gauna e valetabu sa ka bibi sara ki na noda vakabulai ka bula vakacerecerei ka vakakina na noda matavuvale,” a kaya:

“Ni oti na noda ciqoma na noda dui cakacaka vakalotu ni valetabu ka cakava na veiyalayalati tabu vua na Kalou, oi keda yadua eda sa gadreva na veivaqaqacotaki kei na veituberi vakayalo koya sa rawa duadua ga ena vale ni Turaga. Ka ra sa gadrevi keda o ira na noda qase e liu meda na sosomitaki ira.

“Meda nanuma tiko na loloma cecere kei na lomadonu ni Kalou, o koya, ni se bera na tekivu kei vuravura, a vakarautaka na sala me solia na veivakalougatataki ni valetabu kivei ira era sa mate era a sega tu ni kila na kosipeli. Na cakacaka tabu ni valetabu oqo sa mai na gauna makawa. Kivei au na gauna makawa oqo e veivakurabuitaki ka sa dua tale na ivakadinadina ni sa ka dodonu.

“Kemuni na taciqu kei na ganequ lomani, na nona ravuravu o vunimeca sa toso cake tikoga na kena qaqa, kaukauwa kei na kena veimataqali. Na gadrevi ni noda tiko e valetabu ena kena veigauna sa gadrevi sara vakalevu nikua. Au sa vakamasuti kemuni mo ni raica ena masumasu na ivakarau ni nomuni vakayagataki gauna. Volia na gauna me nomu ena veisiga ni mataka ka vakakina ena nomu matavuvale. Kevaka o dau yaco rawarawa ki valetabu, au kerei iko mo raica e dua na sala mo veiloku wasoma kei na Turaga—mo tiko ena Nona vale tabu—ka qai maroroya na veiloku o ya ena kena dodonu kei na reki. Au yalataka ni Turaga ena kauta mai na cakamana e kila tu o Koya ni ko sa gadreva tu ni ko solibula mo veiqaravi ka sokalou ena Nona valetabu.”¹

Ena dua tale na vosa veivakauqeti sara, a kaya kina o Peresitedi, “Ena veigauna o sotava kina e dua ga na mataqali dredre ena nomu bula, na vanua taqomaki vakayalo mo tiko kina o ya ena loma ni nomu veiyalayalati ni valetabu.”²

A tekivuna na nona vosa ena nona vakamacalataka na veicurumaki ni cakacaka ni kena tara vou na Vale Tabu vakairogorogo e Salt Lake—ki na Mileniumi—ena kena vorati na veisaqasaqa kei vuravura. A qai vakamacalataka na kena bibi kivei keda meda vaqaqacotaka na noda dui yavu vakayalo, baleta nikua, sa kaukauwa cake sara, na kena vorati tiko na noda vakabulai tawamudu ena cagi kaukauwa ni bula oqo.

“Kemuni na taciqu kei na ganequ lomani, oqo na otioti ni gauna. Kevaka o iko kei au me daru na sabaya rawa na veika rerevaki kei na lomaocaoca, sa dodonu ga me tiko vei keda yadua na yavu tudei vakayalo e tara ena vatu nei noda Dauveivueti, o Jisu Karisito” (Raica na Ilamani 5:12).

“Au sa kerei kemuni vakayadudua kina, sa dei beka na nomuni yavu? Kei na veivaqaqacotaki cava ki na nomu ivakadinadina kei na kila vinaka na kosipeli sa gadrevi kina?

“Na valetabu sa usutu ni kena vaqaqacotaki na noda vakabauta kei na vakaukauwataki vakayalo baleta na iVakabula kei na Nona vunau era sa uto ni valetabu. Na veika kece e vakavulici e valetabu, mai na veivakasalataki vakakina mai vua na Yalo, ena vakalevutaka noda kilai Jisu Karisito vinaka. Na Nona cakacaka vakalotu bibi ena vauci keda ki Vua ena veiyalayalati tabu ni matabete. Ni sa maroroya tiko na noda veiyalayalati, ena qai vakalougatataki keda ena Nona kaukauwa ni veivakabulai (Raica na Vunau kei na Veiyalayalati 109:15, 22). Io e dina, eda sa na gadreva sara na Nona kaukauwa ena veisiga ni mataka.

“Sa yalataki tu vei keda ni ‘kevaka [eda] sa vakarau vakavinaka tu [eda] na sega sara ni rere,’ (Vunau kei na Veiyalayalati 38:30; raica na Vunau kei na Veiyalayalati 10:55). Na veivakadeitaki oqo sa bibi sara na kena yaga ena gauna oqo. Sa kaya kina na Turaga se cava sara na veibolebole vovou ena gauna oqo, o ira era sa tara na nodra yavu vei Jisu Karisito, ka ra sa vulica na sala mera rawata kina na Nona kaukauwa, e sega ni dodonu mera rawai ena veika dredre duatani ni gauna oqo.”³

A tomana kina o Peresitedi Nelson, “vei kemuni yadua sa cakava oti nona veiyalayalati ni valetabu, au sa kerea mo ni vakasaqara ena—masumasu ka vagumatua—mo ni kila vinaka na veiyalayalati kei na cakacaka vakalotu ni valetabu. Ena tadola mai na katuba vakayalo. O ni na vulica na ivakarau ni kena dolavi na ilati ena kena tadrua o lomalagi kei vuravura, na ivakarau ni kena kerei na Kalou mera qaravi iko mai na Nona agilosi, kei na ivakarau vinaka cake me ciqomi na veidusimaki mai lomalagi. Na nomu sasaga ena yalodina mo vakayacora ena vaqaqacotaka ka vakaukauwataka na nomu yavu vakayalo. . . .

“Yalovinaka mo vakabauta ni gauna au kaya kina ni sa tara vakaukauwa na nomu yavu vakayalo vei Jisu Karisito, sa sega ni dodonu mo na rere. Ni ko dinata tiko na nomu veiyalayalati a vakayacori e valetabu, o na vakaukauwataki ena Nona kaukauwa. Ni qai yaco mai na uneune vakayalo, sa na rawa vei iko mo tudei tu vakaukauwa baleta ni qaqaco vinaka ka tawayavalati rawa na nomu yavu vakayalo.”⁴

E vinakati keda o Peresitedi Nelson meda nanuma tiko ni valetabu sa ka bibi ki na noda bula na Yalododonu Edaidai baleta ni sa na dusimaki keda tikoga yani vua na noda iVakabula o Jisu Karisito.

Ena vidio ni kena marautaki kina na vakatabui tale ni Valetabu e Washington D.C., a kaya kina na noda parofita:

“Eda sa kalougata ni tiko na noda veivaletabu. Ena levu cake tikoga na iwiliwili ni valetabu ni tubu tiko na Lotu. Ia e sega ni baleta na iwiliwili, kei na vanua era tiko kina. Ka vakakina na kena itaratara. Ia sa baleta ga na cakacaka vakalotu e caka tiko kina.

“Ni ko raica e dua na valetabu, e dodonu mo kila tiko ni sa ivakatakarakara i Jisu Karisito, ni o Koya na noda Dauveivakaduavatataki kei na Tamana. Ni sai Koya ga ka sa mai Vua eda na yaco rawa kina vei Tamada Vakalomalagi.

“Oqo talega sa ivakatakilakila ni noda vakabauta ni da bula ni oti noda mate. Na valetabu yadua sa tutaka me ikalawa, na ikalawa tabu ki na bula tawamudu baleti keda kei na noda matavuvale.”⁵