Eria Lidasip Mesej
Stap Karem Evriwan I Kam Tugeta long Tempol
Stat long taem we oli bin sastenem Presiden Russell M. Nelson long Epril 2018, oltaem hem i invaetem yumi blong laef long wan moa hae mo tabu wei, mo blong mekem lukluk blong yumi i longfala bitim ol jalenj blong laef ia i go long ol janis we i no save finis.
Long Epril 2018 hem i talem: “Mesej blong mifala i go long wol i simpol mo tru: mifala i invaetem evriwan long ol piknini blong God, long tugeta saed blong vel blong kam long Sevya blong olgeta, kasem ol blesing blong tempol, gat glad we i stap gohed, mo stret blong kasem laef we i no save finis.”1
Wan yia afta long jeneral konfrens hem i tijim: “Gol blong God i mas kam gol blong yumi. Hem i wantem ol pikinini blong Hem blong gobak long Hem, rere, kwalifae, kasem paoa, mo fetful long ol kavenan we oli bin mekem long ol tempol.”2
Mi groap long Ostrelia, tempol we i kolosap long mifala hem i Amilton, Niu Silan mo olsem wan niu misinari long Jenuware 1976, mi kasem endaomen long ples ia. Mi tingbaot yet kwaet mo pis ia we mi filim taem mi stap wosip insaed long haos blong Lod. Taem mi luk glad blong ol olfala kapol we oli mared, mi filim se mi nidim wan gudfala kompanion blong taem we i no save finis blong kasem ol ful blesing we tempol i gat.
Mi luksave blesing ia long Jenuware 1979, taem mi kambak wetem Maxine Thatcher, wan naesfala mo gudfala gel blong wod blong mi we i klin mo stret. Mitufala i sil blong taem we i no save finis. Mitufala i sapraes mo glad long ol kavenan we mitufala i mekem wetem wanwan long mitufala mo Lod. Mitufala i filim ol responsibiliti mo paoa blong ol blesing blong taem we i no save finis we i bin sil antap long ol hed blong mitufala. Be long mitufala, olsem plante we i stap laef long Ostrelia long taem ia, ol naesfala tempol eksperiens ia oli ol eksperiens ia nomo we mifala i gat.
Kolosap sikis yia afta, mifala i bin glad tumas taem oli dediketem Sidni Ostrelia Tempol long Septemba 1984. Mifala i draev 1100 kilometa blong stap long dedikesen blong tempol. Long taem ia i go, ol fetful Sents blong Melbon mo Brisban oli tekem ol trip evritaem long bas (12 aoa long wan wei) i go long Sidni Tempol—afta we oli finis wok long Fraedei, oli spendem Satedei long Tempol mo long naet blong hem oli gobak hom blong kasem jos long Sandei long taem.
Long 1988 famli blong mi i muv i go long Pet Ostrelia—mi gat wan niu janis blong wok. Sidni tempol nao ia i 4000 kilometa longwe long hom. Mifala i mekem ol famli komitmen blong draev i go long Sidni tempol evri tu yia. Taem mifala i kasem longwe, bae mifala i stap wan ful wik blong stap tekpat long ol odinens blong tempol. Ol piknini blong mitufala i gat ol memori ia yet blong ol tabu taem we mifala i bin stap gat tugeta taem mifala i stap draev tri mo wan haf dei long wan wei krosem Ostrelia.
Ol blesing i gohed, long Septemba 2001 taem oli dediketem Pet Ostrelia Tempol. Long tu yia taem long Ostrelia, ol tempol oli dediket tu long Melbon, Brisban mo Adeled.
Long toktok blong hem, “Ol Rij Samting long saed blong Spirit,” long taem blong Sesen blong ol Woman long Oktoba 2019 Jeneral Konfrens, Presiden Nelson i talem:
“Taem Jos i gro, bae oli bildim moa tempol blong mekem se moa famli i save gat ol bigfala blesing we i laef ia we i no save finis. Yumi tekem wan tempol olsem bilding we i moa tabu insaed long Jos. Taem oli anaonsem ol plan blong bildim wan niu tempol, hemi kam wan impoten pat blong histri blong yumi.”3
Long Pasifik Eria yumi stap laef tru wan taem long histri blong stap bildim tempol. Taem blong brekem graon long yia ia i makem stat blong konstraksen blong Vanuatu mo Papua Niu Gini tempol. Tempol long Oklan i stap kam antap gud, wetem woling aotsaed we i finis mo insaed oli stap gohed blong wokem nao ia. Disaen mo planing i gohed afta long anoansem blong ol tempol blong Kiribati, Neiafu Tonga, Ameriken Samoa mo Welington, Niu Silan. Investmen long ol tempol i gohed blong stap olsem wan witnes long hamas ol tabu odinens mo tempol wosip oli impoten.
Long Oktoba 2018 Presiden Nelson i tijim:
“Stap bildim mo mentenem ol tempol i no save jenisim laef blong yu, be blong stap spendem taem blong yu insaed long ol tempol bae i save jenisim laef blong yu. Long olgeta we longtaem oli nomo go long tempol, mi leftemap tingting blong yufala blong rere mo gobak kwiktaem. Afta mi invaetem yufala blong wosip insaed long tempol mo prea blong filim lav blong Sevya dip insaed long hat blong yufala, se wanwan long yufala i save kasem ol testemoni blong yufalawan se Hem i lidim tabu wok ia we i no save finis.”4
Taem Mexine mo mi i bin mared 40 yia i pas long Niu Silan tempol, hop blong wosip oltaem long tempol long Ostrelia i bin wan drim we i longwe. ?Wan man i bin gat tingting ia se, Ostrelia baei gat 5 tempol we oli stap nao ia kwik taem bifo 25 yia?
Long Pasifik yumi save go plante taem long ol tempol blong yumi mo rere from ol fiuja blesing. Taem yumi stap wet long anaonsmen blong tempol we bae i finis blong sam moa yia, yumi save tekem tu spesifik aksen:
1. Mentenem tempol rekomen we i stap laef.
Presiden Nelson i givim long ful Jos wan presen taem hem i serem ol tempol rekomen kwestin olsem pat blong klosing toktok blong hem long konfrens blong Oktoba 2019. Ol kwestin ia oli save helpem yumi blong sakem sin mo rere blong gat ol intaviu wetem ol branj/wod o stek/misin lida. Mifala i leftemap tingting blong evri adalt memba, we i tekem tu olgeta we oli go finis long tempol, blong riniu ol tempol rekomen blong yufala evri yia. Iven spos yu filim se yu no stret, toktok wetem Branj Presiden o Bisop blong yu, we bae i glad blong helpem yu blong rere. Hemia i wan long ol impoten mo tabu rol blong hem olsem wan jaj blong israel we i gat lav.
Presiden Nelson i ademap:
“Mi laekem blong toktok long ol yut blong yumi. Mifala i invaetem yufala blong kwalifae blong gat ol limit tempol rekomen. Bae oli askem nomo ol kwestin we oli aplae long yufala blong rere yufala from ol odinens blong proksi mo konfomesen. Mifala i talem tangkyu from fasin blong stap klin blong yufala mo wiling blong tekpat long tabu wok ia blong tempol.”5
Blong stap mekem ol yut blong olgeta i kam faswan, ol bisop mo branj presiden bae i miting wetem evri yut mo niu memba blong helpem olgeta blong kasem mo mentenem ol tempol rekomen.
2. Mekem taem long taemtebol blong yumi blong tekpat plante long tempol.
Stap planem ol tempol trip mo adem ol tempol apoenmen long ol kalenda blong yumi i helpem yumi blong stap glad blong tekpat long tempol oltaem. Wanwan taem we yumi visitim tempol yumi lanem moa abaot Jisas Kraes mo impoten wok blong Hem blong helpem yumi long wokbaot blong yumi i go bak long Papa blong yumi long Heven.
3. Famli Histri
Presiden mo Sista Nelson i gohed blong soem wan gudfala eksampol tru long famli histri wok blong tufalawan. Presiden Nelson i rimaenem yumi evritaem, long hamas wok blong givhan long ol famli blong yumi long tugeta saed blong vel i impoten. Mi save tru long eksperiens blong miwan glad ia blong faenem ol bubu blong mi, rekodem ol ditel blong olgeta, sabmitim ol nem tru long FamilySearch, mo afta tekpat long ol tabu odinens blong olgeta insaed long tempol.
Wan kwot blong Presiden Nelson long klosing toktok blong Oktoba 2022 Jeneral Konfrens i rimaenem yumi se tempol, “i Haos blong Hem. Hem i fulap wetem paoa blong Hem. Yumi neva karemaot ae blong yumi long wanem Lod i stap mekem blong yumi nao ia. Hem i stap mekem tempol blong Hem i kam moa isi blong ol man i save go long hem. Hem i stap mekem i kam moa isi long wan spid we naoia yumi stap bildim ol tempol. Hem i stap leftemap paoa blong yumi blong help blong karem Isrel i kam tugeta. Hem i stap mekem tu i kam moa isi long yumi blong kam klin long saed blong spirit. Mi promes se moa taem insaed long tempol bae i blesem laef blong yu long wei we i no gat nara samting i save mekem.”6
Mi prea se insaed long ol hom blong yumi mo long ol wod mo branj famli blong yumi, yumi putum olgeta samting ia faswan. Ol tempol rekomen, tekpat long tempol, mo stap rere long ol nem blong ol famli blong ol tempol odinens, blong mekem se yumi save kwalifae from evri blesing we i kam tru long ol niu tempol mo olgeta we oli stap finis taem oli dediketemolgeta raon long ol naesfala aelaen blong Pasifik.