Lokol Pej
Stap Komandem Ol Wota long Tanna
Tanna aelan, long Tafea Provins long Vanuatu, i wan 45 minit flaet long plen—o wan longfala ron long bot—i go long Efate, ples we misin ofis blong Jos Ia blong Jisas Kraes blong Ol lata-dei Sent i stap long hem.
Long taem blong wol sik, blong kam long Vanuatu i bin strik lelebet, i mekem se i had blong Jos long eria blong sendemaot o risivim ol misinari. Long en, aelan blong Tanna i nomo gat ol ful-taem misinari mo misinari wok i bin slo.
Eli long 2022, taem laef i stat blong kam nomol bakegen,misin presiden blong Vanuatu, Mark Messick, i bin glad blong kasem wan rikwes we i kam long Distrik Presiden blong Tanna. “Sendem ol misinari kwik!”
Presiden Messick i lanem se taem Tanna i nogat ful-taem misinari, ol lokol memba blong Jos mo ol misinari we oli kambak finis long haos long narasaed oli gohed blong tijim gospel long ol fren mo neba blong olgeta, mo oli gat raon long 85 kandidet we oli rere blong intaviu mo kasem baptaes. Kwik taem Presiden Messick i lukluk blong sendem ol Asisten Presiden (AP) misinari i go long Tanna.
Plan i nomo wok from laef volkeno blong Tanna i stat blong stap muvmuv. Afta, wan smol saeklon i kilim aelan, we i mekem bigfala damej—i pruvum bageken se Vanuatu i nambawan long Wol Ris Indeks long saed blong disasta we i folem fasin blong wol. Taem Tanna i stat blong stap kam gud aot long saeklon, wan brekaot blong Kovid-19 we i klosem daon ful Vanuatu, mo wan moa taem, oli bin strik long travel.
Long medel blong Okis nao Presiden Messik i jes save sendem ol AP blong hem i go long Tanna blong mekem intaviu blong ol kandidet ia mo rere long olgeta blong joenem Jos. Long ples ia nao, Presiden i wari se longfala wet i mekem sam long olgeta tingting i foldaon, se intres blong olgeta i maet lus.
Be taem Elda Sila Toa mo Brian Moses Nalin i go kasem—ol han i fulap wetem plante pepa blong intaviu blong baptaes—tufala faenem oposit se i tru. I no evri 85 ia nomo we i wantem tumas blong joenem Jos, be namba blong olgeta i go antap long 29 moa. Nao ia, 114 kandidet oli bin fetful blong stap wet blong kasem intaviu blong baptaes. Ol Elda oli gohed long wokbaot blong olgeta long evri eit branj blong Jos long Tanna.
Afta oli intaviu mo baptaesem sikis pipol long fas branj, Elda Toa mo Nalin i go long Saedsiwi, wan eria we i hae antap long hil. Tufala no gat wei blong kasem branj presiden blong saedsiwi be oli save se hem i stap wet long tufala yet, mekem se tufala i draevem track blong tufala i go longwe olsem we oli save mekem mo afta gohed blong wokbaot long leg blong 3 moa aoa. Taem oli kasem ples ia, oli no faenem presiden. Ol Elda oli wokbaot longfala rod ia blong nating nomo.
Afta bigfala ren i foldaon. Evriwan long Saedsiwi i save se taem i stat blong ren strong, rod blong go daon long hil bae i denja tumas. Elda Toa mo Nalin i kwik blong go bak long trak blong tufala. Tufala i save se evri smol taem we tufala i gat hem i impoten, from taem ol lokol riva oli stat blong kam antap, bae tufala i nomo save krosem. Tufala i kasem trak blong tufala long taem blong draev tru long fas mo seken riva, be tufala i save se namba tri riva bae i wan jalenj.
Mo yes, trak blong tufala i stak long rod. Tufala i traem blong pusum—be no gat. Tufala i ringim Distrik Presiden, mo kwik taem oli kasem help, be trak i stil no muv. Riva i kam antap mo ron strong mekem se ol man blong help oli mas kamaot mo muv i go long ples we i sef. Afta, Elda Nalin i luk wan nara samting we i mekem hem i wari. Hem i luk se ol wota long nara riva saed i go—we i mit wetem riva ia—i kam strong mo i stap fos blong brok i go.
Long maen blong hem, Elda Nalin i luk olsem se wan fos we oli no save luk i stap holem bak namba tri riva ia, olsem se i stap givim moa taem long olgeta . . . be hem i save se bae i no blong longtaem. Fos ia i stap kam strong moa.
Elda Toa mo Nalin oli ol eksampol blong ol gudfala yang man blong Vanuatu—oli tekem responsibiliti mo kam gud long evri wei. Long olgeta, wan trak i sas tumas, speseli long wan kantri we ol famli oli no save mekem blong pem edukesen blong ol pikinini blong olgeta we i no sas olsem wan trak. Tufala Elda i traem blong lukaotem gud trak blong Jos long evri wei, be nao ia wota i kam antap kasem ol handel blong doa blong trak. Tufala i ringim Misin Presiden blong olgeta. “Wanem nao bae mitufala i mekem?”
Ansa blong Presiden Messick i: “Tangkyu long koling blong yutufala. Nao ia kamaot long trak mo sevem yutufalawan. Mi no kea abaot trak; mi kea long yutufala.”
Taem tufala i hariap blong kamaot long trak, Elda Toa i klaem bihaen blong karem ol skripja blong tufala mo 114 intaviu pepa we oli nidim blong baptaes. Hem i nomo luk olgeta. Afta wan voes i singaot,“Wota i stap kam! Kamaot long trak!” mo Elda Toa i kamaot long doa bihaen long stret taem we wota i karemaot trak i go daon.
Kwiktaem ol Elda i luksave se ol skripja mo 114 intaviu pepa i stap yet insaed long trak—we nao ia wota i karemaot—oli yusum paoa blong prishud mo givim koman long trak se bae i protektem ol gudgudfala pepa blong tufala. “Hemia nao wanem yu save mekem wetem prishud,” tufala yangfala man ia i talem afta, wetem strong tingting. “Yu givim koman”.
Elda Toa mo Nalin i bin mekem blong kamaot sef, mo long saed blong riva, tufala i nildaon mo prea. Taem tufala i prea se trak bae i sef mo se ol skripja mo ol intaviu pepa bae i stap drae, tufala misinari i filim wan pis se evri samting bae i oraet. Afta, tufala i wokbaot i gobak daon long hil ia.
Nekis dei, ol Elda i kasem wan kol we i kam long Distrik Presiden. Branj presiden blong saedsiwi i faenem trak blong tufala, 250 mita daon long krik. Taem ol Elda i go kasem blong karemaot, oli no faenem wan kil o skratj long bodi blong trak, nomata long rod blong hem long riva, we ol tri, ston mo toti oli pas folem rod ia.
Insaed blong trak i no bin gud. I bin wetwet. Enjin i nogud, mo evri samting long trak—ol pamflet, manuel, buk—oli wetwet nogud . . . be ol skripja mo 114 intaviu pepa blong ol Elda nomo i no bin wetwet. Oli stap antap long evri samting, mo drae gud i stap.
Taem oli stap wok blong mekem gud trak, Elda Toa mo Nalin i gohed blong stap wokbaot. Long nekis stop blong tufala, tufala i intaviu mo baptaesem 48 kandidet bifo oli gohed long raet blong krosem Tanna aelan. “Taem yu taet blong wokbaot,” wan long olgeta i talem long wan long tufala misinari, “Yu wokbaot wetem hat blong yu.”
Hat blong olgeta mo prishud merikel i helpem tufala fetful Elda ia blong kasem mo tekem evri 114 kandidet ia sef i kam long Jos Ia blong Jisas Kraes.