Me Tiko na Vuamudou

Mai vei Elder Matthew L. Carpenter

Ena Vitusagavulu

E bibi me vauca na Yalo Tabu na noda cakacaka vakalotu kevaka eda vinakata me tiko vei keda na veivakalougatataki yalataki me baleta na veigauna tawamudu.

Niu se gonetagane, au dau taleitaka na piji dreu. Me yacova mai nikua, na vakasama ni noqu katia e dua na piji dreu, ka matua kei na kena ikanakana wiwi e vakavuna na titi ni weli. Ni tauca na piji matua, e taura e rua kina va na siga ni bera ni ca. Au nanuma vinaka na noqu mai tomani tinaqu kei iratou na taciqu ena neitou valenikuro ni keitou maroroya na piji tauci mai me baleta na vulaililiwa ka lako tiko mai ena noqu dregati ira ena tavaya. Kevaka keitou maroroya vakadodonu na piji, na vuanikau kamica oqo ena tu me vica vata na yabaki, sega ni rua kina va ga na siga. Kevaka e vakarautaki ka vakatakatataki vakavinaka, ena maroroi na vuanikau me yacova ni sa taluva na kena isogo.

E dusimaki keda o Karisito meda “lako vua, … me tiko tale ga na vuamudou.” Ia e sega ni vosa tiko oKoya me baleta na piji. E vosa tiko o Koya me baleta na veivakalougata ni Kalou vei ira na Luvena. Kevaka eda cakava ka maroroya na veiyalayalati vata kei na Kalou, na veivakalougataki e sala vata kei na noda veiyalayalati e rawa ni sivia na bula oqo ka vauci vei keda, se maroroi, e rawa ni vuamudou e vo me tawamudu.

Na Yalo Tabu, ena Nona itavi tabu vaka Yalo Tabu ni iYalayala ena vauca na cakacaka vakalotu yadua vei ira era sa yalodina kina nodra veiyalayalati me rawa ni vakabau ni oti na bula oqo. E bibi me vauca na Yalo Tabu na noda cakacaka vakalotu kevaka eda vinakata me tiko vei keda na veivakalougatataki yalataki me baleta na veigauna tawamudu, ka yaco me vuamudou sa vo tiko.

Oqo e bibi vakauasivi ni keda vinakata meda yaco ena bula vakacerecerei. Me vaka e vakavulica o Peresitedi Russell M. Nelson: e dodonu meda “tekivu ena noda vakasamataka na icavacava. … E dina, vei keda yadua, na ‘icavacava’ keda na via rawata meda bula vata kei na noda matavuvale me tawamudu ena dua na ituvaki ni bula vakacerecerei vata kei na Kalou, na Tamada Vakalomalagi, kei na Luvena o Jisu Karisito.” E tukuna talega o Peresitedi Nelson ni: “Na vakamau vakasilesitieli e dua na tikina bibi ni vakavakarau ni bula tawamudu. E gadreva e dua me vakamautaka na tamata donu, ena vanua donu, mai na lewa dodonu, ka talairawarawa ena yalodina kina veiyalayalati tabu oya. Sa qai vakadeitaki e dua ki na bula vakacerecerei ena matanitu vakasilesitieli ni Kalou.”

Na cava eso na veivakalougatataki ni bula vakacerecerei? E okati kina na bula ena serau ni Kalou me tawamudu vata vakaveiwatini, me taukena na “itikotiko vakaturaga, na veimatanitu, na veivanua vakatui, kei na kaukauwa, … kei na tomani tiko ni nodrau kawa me sega ni mudu ka sega ni mudu,” ka ciqoma na ka kecega sa tu vei Tamaqu.

E vakatakila na Turaga vei Josefa Simici:

“Ena matanitu vakasilesitieli e tiko kina e tolu na ivakatagedegede ni lomalagi se lagilagi;

“Me rawata na ivakatagedegede e cake sara, sa dodonu vua e dua na tamata me na curu ena ivakarau oqo ni matabete [na kena ibalebale na veiyalayalati vou ka tawamudu ni vakamau];

“Ia kevaka e sega, ena sega sara ni rawata.

“Ena rawa beka ni curu kina dua tale, ia sa yala ga e keri na nona matanitu; sa na sega ni rawa ni vakawa.”

Keda vulica eke ni rawa vei dua me tiko ena matanitu vakasilesitieli se tiko ena mata ni Kalou, ka sega ni vakawati. Ia me vakacerecerei ena ivakatagedegede e cake sara ni matanitu vakasilesitieli, e dua me na vakamau mai na lewa dodonu ka dina kina veiyalayalati e cakava ena vakamau oya. Ni keda sa yalodina ki na veiyalayalati oqori, na vauca na veiyalayalati ni vakamau na Yalo Tabu ni yalayala. Na veivakalougataki vauci vakaoqo sa yaco me vuamudou sa vo tiko.

Na cava e gadrevi meda yalodina kina veiyalayalati vou ka tawamudu ni vakamau?

O Peresitedi Russell M. Nelson e vakatavulica ni e rua tiko na mataqali ivau ni da curu kina veiyalayalati tawamudu ni vakamau oqo: e dua na ivau vakababa ena kedrau maliwa na veiwatini, kei na dua na ivau gole icake vata kei na Kalou. Me vauci vei keda na veivakalougatataki ni bula vakacerecerei ka tiko ga ni oti na bula oqo, sa dodonu meda dina kina ivau ruarua vakababa kei na ivau ki lagi ni veiyalayalati.

Me maroroi na ivau vakababa vata kei na watimu, sa vakasalataki keda na Kalou meda “lomana na watimu ena lomamu taucoko, ka … kabiti koya duadua ga.” Vei ira sa vakamau, mo kabiti koya duadua ga e kena ibalebale mo drau veivakasalataki vata ena loloma, drau veilomani ka drau veimaroroi, o dau vakaliuca na gauna vata kei watimu mai na veika e sega ni taleitaki, o qai masuta na Kalou me vukei iko mo vorata na nomu malumalumu. E kena ibalebale talega ni sega na veiwekani se veiyacovi ena taudaku ni nomu vakamau, oka kina na veiwedevi se veigadivi, ka sega na iyaloyalo vakasisila, ka vakavuna ga na garogaro ca.

Me maroroi na ivau vakababa ni veiyalayalati, na veiwatini yadua e gadreva me tiko ena loma ni vakamau. E vakatavulica wale tikoga oqo o Peresitedi Dallin H. Oaks: “Eda kila talega ni na sega ni vakasaurarataka e dua na [Kalou] kina dua na veiwekani ni veivauci ke sega ni lomana dina. Sa vakadeitaki na veivakalougatataki ni veivauci ni veimaliwai vei ira kece era maroroya na nodra veiyalayalati ia ena sega vakadua ni vakasaurarataki e dua na veimaliwai e sa vauci ki na dua tale na tamata e sega ni bula kilikili se sega ni vinakata.”

Na cava na ivau ni gole icake ka vakamacalataka o Peresitedi Nelson? Na ivau ni gole icake e dua eda cakava vata kei na Kalou.

Noda maroroya na ivau ni gole cake vata kei na Kalou, sa dodonu meda dina ki na veiyalayalati ni valetabu eda sa cakava me baleta na lawa ni talairawarawa, solibula, na kosipeli, tiko savasava, kei na veivakatabui. Eda veiyalayalati tale ga kei na Kalou meda ciqoma na noda itokani tawamudu ka yaco meda watina ka itubutubu buladodonu. Nida maroroya na ivau ni gole icake, eda sa rawata na veivakalougatataki ni tiki ni matavuvale ni Kalou ena veiyalayalati vaka-Eparaama, oka kina na veivakalougatataki ni kawa, na kosipeli, kei na matabete. Na veivakalougatataki oqo era sa vua talega ka sa vo tiko.

E dina nida nuitaka nio ira kece era curu kina veiyalayalati vou ka tawamudu era na dina tikoga ka sa vauci tu vei ira na veivakalougatataki me tawamudu, ena so na gauna e dau vaka me sega ni yacovi keda rawa na vakasama o ya. Ena noqu cakacaka vakalotu taucoko au dau sotavi ira na lewenilotu era cakava ka maroroya na veiyalayalati ia e sega ni vakakina o watidra. Era tu talega o ira era sega ni vakawati, ka sega ni tiko vei ira na madigi mera vakamau ena bula oqo. Era tiko talega o ira sega ni yalodina kina nodra veiyalayalati ni vakamau. Na cava ena yaco vei ira na tamata yadua ena ituvaki yadua vakaoqo?

1. Kevaka o yalodina tikoga kina veiyalayalati o cakava ena gauna o vakaedaumeni kina, ona ciqoma na veivakalougatataki yadua e yalataki vei iko ena edaumeni kevaka sara mada ga sa voroka na watimu na nona veiyalayalati se gole tani mai na vakamau. Kevaka o vauci ka qai sere e muri, kevaka e sega ni bokoci na nomu veivauci, ena yaga tiko ga vei iko na veivakalougatataki yadua ni veivauci oya kevaka o yalodina tiko ga.

   Ena so na gauna, ena vuku ni veivakacacani kei na mosi dina sara, ena rairai vinakata na watina yalodina me bokoca na nona vauci vata kei na watina tawavakabauta me rawa ni yawa sara mai vei koya, e vuravura kei na veigauna tawamudu. Ke o lomaleqataka ni o na semati kina dua na watimu e liu e sega ni veivutuni, nanuma tiko, o na sega! Ena sega ni gadreva na Kalou vua e dua me tiko ga ena dua na isema vauci ena gauna taucoko ka saqata na nona lewa. E vakadeitaka na Tamada Vakalomalagi nida na ciqoma na veivakalougatataki kece sara e vakatara na noda gagadre kei na digidigi.

   Ia, kevaka e gadrevi tiko ga me bokoci na veivauci, ena rokovi na galala ni digidigi. E rawa ni muri eso na iwalewale. Ia e sega ni dodonu me caka wale tu ga vakaoqo! Sa tu vei iratou na Mataveiliutaki Taumada na idola me vauci e vuravura kei lomalagi. Ena gauna ga sa na vakadonui kina na bokoci ni veivauci mai vei iratou na Mataveiliutaki Taumada, na veivakalougatataki ka sema ki na veivauci oya sa na oti na kena kaukauwa; rau ruarua vakababa kei koya ki lagi. Sa ka bibi meda kila nida ciqoma na veivakalougatataki ni bula vakacerecerei, sa dodonu meda vakaraitaka ni da sa tu vakarau meda curu ka yalodina kina veiyalayalati vou ka tawamudu oqo, se ena bula oqo se ena bula ka tarava.

2. Vei ira na lewe ni Lotu sega ni vakawati, yalovinaka mo nanuma “ena sala kei na gauna ni Turaga, ena sega na kalougata mera vakuwai kina na Nona Yalododonu yalodina. Na Turaga ena vakatulewa ka saumi ira na tamata yadua me vaka na gagadre dina ni yalodra vakakina na nodra cakacaka.”

3. Kevaka o sega ni yalodina kina nomu veiyalayalati ni valetabu, se tiko beka na inuinui? Io! Na kosipeli i Jisu Karisito e kosipeli ni inuinui! Na inuinui e lako mai vei Jisu Karisito vata na veivutuni vakaidina kei na talairawarawa kina vakamuri ni ivakavuvuli nei Karisito. Au sa raica na tamata yadua ni ra caka cala bibi, ka voroka na veiyalayalati tabu. Ena veigauna kece, au raici ira era sa veivutuni vakaidina, vosoti, ka lesu tale ki na salatu ni veiyalayalati. Kevaka o sa voroka na nomu veiyalayalati ni valetabu, au sa vakauqeti iko mo gole vei Jisu Karisito, veivakasalataki vata kei nomu bisopi, veivutuni, ka dolava na yalomu kina kaukauwa cecere ni veivakabulai sa vakarautaki tu ena vuku ni Veisorovaki i Jisu Karisito.

Kemuni na taciqu kei na ganequ, sa solia vei keda na Tamada Vakalomalagi dauloloma na veiyalayalati me rawa nida rawata na veika kece sa vakarautaka tu o Koya me baleti keda. Na veivakalougatataki tabu oqo mai vua na Kalou era sa kamikamica cake sara mai na vuanikau vakavuravura kecega. E rawa ni maroroi vei keda me tawamudu, me vuamudou sa vo tiko, nida sa yalodina tiko ki na noda veiyalayalati.

Au vakadinadinataka ni sa vakalesuya mai na Kalou na lewa me vauci e vuravura kei mai lomalagi. Na lewa oqori e kune ena Lotu i Jisu Karisito ni Yalododonu Edaidai. Era taura tu na Mataveiliutaki Taumada kei na Kuoramu ni Le Tinikarua ka vakayagataki ena veidusimaki nei Peresitedi Russell M. Nelson. O ira era curu ki na veiyalayalati vou ka tawamudu ni vakamau ka maroroya na veiyalayalati oqori e rawa nira vakavinakataki ka yaco mera ciqoma na taucoko ni lagilagi nei Tamada, veitalia na ituvaki era sega ni lewa rawa.

Na veivakalougatataki yalataki oqo e semati ki na noda veiyalayalati e rawa ni vauci vei keda ena Yalo Tabu ni Yalayala ka yaco me vuamudou sa vo tiko me sega ni mudu ka sega ni mudu. Au vakadinadinataka oqo ena yaca i Jisu Karisito, emeni.

iDusidusi

1. Joni 15:16.

2. Raica na Dale G. Renlund, “Rawata na Kaukauwa Va-Kalou mai na Veiyalayalati” Liaona, Me 2023, 35–38; Doctrine and Covenants 132:7.

3. E vauci e dua na cakacaka vakalotu ni sa vakabau ruarua mai lomalagi kei vuravura baleta ni vakayacora e dua e tu vua na lewa ka sa vakadonuya na Yalo Tabu.

   “Eda dau nanuma ni lewa ni veivauci e yaga ga kina so na cakacaka vakalotu ni valetabu, ia na lewa oya e gadrevi me rawa ni vakadeitaki kina na cakacaka vakalotu e vuravura ka vakakina e taudaku ni mate. Na kaukauwa ni veivauci e vakatikora edua na drega ni veivakadonui ena nomu papitaiso, me ivakaraitaki, me kilai kina eke ka vakakina mai lomalagi. Me kena ilutua, na cakacaka vakalotu kece ni matabete era vakayacori ena ruku ni idola ni Peresitedi ni Lotu, me vaka e vakamacalataka o Peresitedi Joseph Fielding Smith, “O koya [na Peresitedi ni Lotu] sa solia vei keda na lewa, sa solia na kaukauwa ni veivauci ena noda matabete, baleta ni tiko vua na idola oya.’” (D. Todd Christofferson, “Na Kaukauwa ni Veivauci,” Liaona, Nove. 2023, 20).

   “Na cakacaka sa vauci mai vua na Yalo Tabu ni Yalayala sai koya e dua ka sa vakadonuya na Yalo Tabu; sai koya e vakadonui mai vua na Turaga. … E sega ni dua e rawa ni lasu vua na Yalo Tabu ka yaco yani me sega ni kilai. … Na ivakavuvuli oqo e vakayagataki talega ki na vei cakacaka vakalotu tale eso kei na cakacaka kecega ena Lotu. Ia kevaka erau sa ‘dodonu ka dina’ na ilawalawa ruarua [ena dua na vakamau] [Vunau kei na Veiyalayalati 76:53], kevaka erau kilikili, ena vauci e dua na drega ni veivakadonui ena nodrau vakamau ena valetabu; kevaka era sega ni kilikili, era na sega ni vakadonui mai na Yalotabu ka na tarovi na veivakadonui ni Yalo Tabu. Na bula kilikili ka tarava ena vakaukauwataka na veivauci, kei na bula tawadodonu ena voroka na veivauci kecega” (Bruce R. McConkie, “Holy Spirit of Promise,” ena Preparing for an Eternal Marriage Student Manual [2003], 136).

   “Na Yalo Tabu ni Yalayala sai koya na Yalo Tabu ka na biuta na sitaba ni veivakadonui ena cakacaka vakalotu yadua: papitaiso, veivakadeitaki, veitabaki, vakamau. Na yalayala oya ni na ciqomi na veivakalougatataki ena yalodina. Kevaka e dua na tamata e voroka e dua na veiyalayalati, se mai na papitaiso, veitabaki, vakamau se dua tale na ka, ena kauta laivi na Yalotabu na sitaba ni veivakadonui, ka na sega ni ciqomi na veivakalougatataki. Na cakacaka vakalotu yadua e vauci vata kei na yalayala ni dua na isau ka yavutaki ena yalodina. Na Yalo Tabu ena kauta laivi na sitaba ni veivakadonui ena vanua e voroki kina na veiyalayalati” (Joseph Fielding Smith, Doctrines of Salvation, comp. Bruce R. McConkie [1954], 1:45).

4. Russell M. Nelson, Heart of the Matter: What 100 Years of Living Have Taught Me (2023), 15. Na vei cakacaka vakalotu kei na veiyalayalati kece e dodonu me dregati mai vua na Yalo Tabu ni Yalayala, me kaukauwa kina ni oti na tucaketale mai na mate (raica na Vunau kei na Veiyalayalti 132:7).

5. Russell M. Nelson, “Vakamau Vakasilesitieli,” Liaona, Nove. 2008, 94.

6. Vunau kei na Veiyalayalati 132:19.

7. Raica na Vunau kei na Veiyalayalati 84:38.

8. Vunau kei na Veiyalayalti 131:1–4.

9. Raica na Vunau kei na Veiyalayalati 132:19–20. “Na icavacava cecere duadua oya—na bula vakacerecerei ena matanitu vakasilesitieli—e vakanamata kina na Lotu i Jisu Karisito ni Yalododonu Edaidai.“ (Dallin H. Oaks, “Lagilagi ni Veimatanitu,” Liaona, Nove. 2023, 26).

10. “Me vaka ga ni rau wasea na vakawati kei na matavuvale e dua nai vau vakababa e duatani ni duavata ka buli kina e dua na mataqali veilomani totoka ni da vauci keda ki na veiyalayalati gole icake ki vua na … Kalou ni keda curu ena veiyalayalati vou ka tawamudu ni vakamau” (Russell M. Nelson, Heart of the Matter41–42).

11. Vunau kei na Veiyalayalati 42:22; raica talega na iVoladusidusi Raraba: Veiqaravi ena Lotu i Jisu Karisito ni Yalododonu Edaidai, 38.6.16. Ni veivosakitaka tiko eke na vakamau, au sa vakaibalebaletaka tiko na vakamau me vaka na lawa ni Kalou, ka vakamacalataka na vakamau me duavata vakalawa ka vakalawa ena kedrau maliwa e dua na tagane kei na dua na yalewa (raica “Na Matavuvale: Ai Vakaro ki Vuravura Raraba,” Valenivola Vakosipeli).

12. Raica na “Na Matavuvale: Ai Vakaro ki Vuravura Raraba,“ Valenivola Vakosipeli.

13. Raica na Vunau kei na Veiyalayalati 42:22–24.

14. Dallin H. Oaks, “Lagilagi ni Veimatanitu,” 29; vakaikuritaki.

15. Raica na Vunau kei na Veiyalayalati 86:8–11; 113:8; Eparaama 2:9–11.

16. Raica na iVoladusidusi Raraba, 38.4.1.

    Niu kaulotu tudei tiko o Switzerland, keirau a wasea vata kei noqu itokani na kosipeli vei rau e dua na veiwatini totoka ni Siwisi yabaki 60. Ni keirau vakavulici na veiwatini oqo me baleta na Lotu vakalesui mai i Jisu Karisito, a vakaraitaka na marama oqo ni taleitaka vakalevu na veika keirau vakavulica tiko. Ena vica na macawa ka tarava, a rawata kina e dua na ivakadinadina ni sa vakalesui mai na Lotu i Jisu Karisito, ena lewa dodonu mai vua na Kalou, ka dusimaka tiko o Jisu Karisito na Nona Lotu mai vei ira na parofita kei na apositolo bula. Keitou sa vakanamata me keitou vakavulici rau na veiwatini oqo me baleta e dua na ivunau cecere duadua ni Veivakalesui mai, na madigi ni vakamau tawamudu. Ia, e kurabuitaki ni keirau vakavulici rau na veiwatini oqo me baleta na ivunau ni vakamau tawamudu, a kaya na marama ni Swiss ni na sega ni taleitaka me tiko vata kei watina me tawamudu. Vei koya, e sega ni okati o lomalagi me tiko vata kei watina ka sa oti e 36 na yabaki ni nodrau vakamau. A papitaiso na marama oqo, ia e sega ni vakakina o watina. Erau a sega ni vauci ena valetabu.

    Ia, vei ira e lewe levu, ena sega ni lomalagi o lomalagi ke sega ni tiko vata kei koya na tamata e vakamau kina. Mo tiko vata kei na watimu o lomana me tawamudu e vaka me rogorogo dina vaka-lomalagi. Me vaka a wasea o Elder Jeffrey Holland me baleta na watina lomani o Pat, “Ena sega ni lomalagi o lomalagi ke sega o koya” (raica na “Scott Taylor: For Elder Holland, Heaven without His Wife and Children ‘Wouldn’t Be Heaven for Me,’” Church News, July 22, 2023, thechurchnews.com).

17. Raica na Dallin H. Oaks, “Lagilagi ni Veimatanitu,” 26.

18. Russell M. Nelson, “Vakamau Vakasilesitieli,” 94.

19. Raica na Joni 15:16.