“Elder Michael B. Strong,” Liaona, Me 2024.
Elder Michael B. Strong
Vakaitutu Raraba ena Vitusagavulu
A tekivu mai vale na vuli kosipeli nei Elder Michael B. Strong, ka rau vakavulici kina mai vei rau na nona itubutubu.
“Sa tubu ga na noqu ivakadinadina ka yaco me kaukauwa cake ka kaukauwa cake ena veigauna kecega, voleka ni sega ni laurai rawa,” e kaya o Elder Strong. Ni rai lesu, “Au sa raica vakawasoma na liga ni Kalou ena noqu bula, ia e mai tacegu toka ena vica na ka titobu vakayalo ka bibi a sotavi.”
Ni rau sa susuga cake na nodrau matavuvale o koya kei watina, rau sa nakita tiko me rau vakacuruma na kosipeli ki na nodrau bula. “Keirau sa tovolea me keirau cakava me tali sara ga na kosipeli ki na isulu ni neitou bula,” e kaya o Elder Strong. “O keitou sara ga oqori.”
A rawata o Elder Strong e dua na diqiri na bachelor of science ena microbiology ka kena ikarua na chemistry mai na Brigham Young University ena 1989 kei na dua na diqiri ni veiqaravi vakavuniwai mai na Baylor College of Medicine ena 1993.
A vuniwai o koya, ena gauna a kacivi kina, a cakacaka vakailesilesi liu ni itukutuku vakavuniwai ena University of Utah.
Sa raica o Elder Strong ni gauna e sotava kina na leqa, oka kina na leqa ena nona cakacaka, sa dau dusimaki o koya ki na iwali ni leqa ena gauna e masulaka kina. “Au rawa ga ni vakila ni solia vei au na Turaga na vakasama kei na kena vakarautaki na iwali ka kena irairai vei au niu a sega ni raica rawa,” a kaya. “Au sa qai kila ni kauwaitaki keda dina o Koya.”
Ena gauna a kacivi kina me Vakaitutu Raraba ena Vitusagavulu, a veiqaravi tiko o Elder Strong vaka-Vitusagavulu ni iWasewase ena iWasewase ko Utah. Sa veiqaravi talega vakaperesitedi ni Tabana ni Kaulotu e Perú Lima Central, peresitedi ni iteki, bisopi, ka daukaulotu tudei ena Tabana ni Kaulotu na Bolivia Cochabamba.
A sucu o Michael Brent Strong mai Salt Lake City ena ika 6 ni Okosita, 1965. A vakamautaki Christin Connelly ena 22 ni Okosita, 1987, ena Valetabu e Salt Lake. Erau nodratou itubutubu e ono na gone. Rau vakaitikotiko o Elder kei Sisita Strong mai Centerville, Utah, Amerika.