Elder Karl D. Hirst

Vakaitutu Raraba ena Vitusagavulu

E nanuma o Elder Karl D. Hirst ni o koya e dua na “tamata wale ena dua na ilesilesi talei.”

Na Vitusagavulu Vakaitutu Raraba vou e raica na nona ivakadinadina kei na kena veivakadeitaki e vaka ni sa ka wale talega. “E sega ni dua na veisiko, e sega sara ga ni dua na ka vakayalo vakasakiti—kau sa sega ni leqataka oqori baleta niu sa vakasinaiti ena sala sa digitaka kina na Kalou me vosa vei au, kevaka sara mada ga e digitaka o Koya me vosa vei ira na tamata ena dua tale na sala,” e kaya o Elder Hirst. “E sega ni vakasakiti, ia e sa talavo.”

A cicivaka e dua na sitoa lailai ena tutu ni sala na tamai Elder Hirst, o Jack. A kila na Lotu i Jisu Karisito ni Yalododonu Edaidai mai vei ira na dauvolivoli ka lewena na Lotu ena vica na yabaki ni oti na nona sucu o Karl ena ika 28 ni Feperueri, 1972, mai Bury, Lancashire, Igiladi.

A tekivu na ivakadinadina nei Elder Hirst me baleti Jisu Karisito ena nona vulica na italanoa ni iVakabula ka lagata na sere ni lotu ni tiko ena Matawilivola ni Sigatabu ena dua tale na lotu ni se gone kei tinana, Vivien Ruth Meakin Hirst, kei buna.

A qai tiko e muri o Karl ena soqoni ni Yalododonu Edaidai ka ciqoma e dua na veisureti mai vua e dua na qasenivuli ni Lalai me papitaiso, ka ciqoma ni sa yabaki 10. Mai na limasagavulu na yabaki ni nona bula, sa maroroya tiko o Elder Hirst na nona vakabauta kei na ivakadinadina vaka-gonelailai.

“Sa vosa vei au na Kalou e yaloqu ena sala vata ga a vakayacora o Koya ena gauna au a tiko kina ena Lalai kei na sala vata ga a cakava kina o Koya niu tiko voli ena Matawilivola ni Sigatabu,” e kaya o Elder Hirst.

A vakamautaki Claire Elizabeth Wright ena ika 29 ni Me, 1993, mai Burnley, Lancashire. Erau a vauci ena siga o ya ena Valetabu e Lodoni Igiladi.

A ciqoma o Elder Hirst e dua na diqiri ni bejila ni lawa ena 1996 mai Lancaster University kei na dua na master diqiri ni veiliutaki vakabisinisi mai na Alliance Manchester Business School ena 2016. Me tekivu mai na 1997, sa cakacaka tiko vaka loya.

Eratou a vakaitikotiko mai Bolsover, Chesterfield, Igiladi, na itubutubu ni ono na gone, ka veiqaravi tiko vaka dairekita ni veisoqoni ni Me iSakisaki ni iTabagone ena gauna a kacivi kina.