“Baraca Chad H Webb,” Liaona, Me 2024.
Baraca Chad H Webb
Matai ni Daunivakasala ena Mataveiliutaki Raraba ni Matawilivola ni Sigatabu
Ni se cauravou, a vuli tiko o Chad Webb ena College ni Eastern Utah (sa Utah State University Eastern oqo) ena gauna a sotava kina e dua na ka vakayalo ka vakatitobutaka na nona ivakadinadina ni kosipeli. Na ka e yaco oya a tekivu ena gagadre me vaqaqacotaka na nona vakabauta.
Ena loma ni cakacaka ni vuli kei na qito basketball ena nona timi ni koliji, a vulica kina o Baraca Webb na ivolanikalou, masu, ka vakasamataka vakatitobu e dua na ka me vakaliuci ena nona vakavakarau me laki kaulotu tudei mai Veracruz, Mexico.
Dua na bogi batabata a lako voli ena dua na taubale balavu wavoki Price, Utah, ka vakasamataka na veika kece e vulica tiko. A yaco mai na veidusimaki vakalomalagi ni curu yani ki na dua na ikelekele ni motoka lala.
“Au vakila ni sa yaco mai na isau kece ni noqu masu kei na taro, kau vakila vakatitobu sara na dina ni kosipeli kei na Lotu,” a kaya. “Na dina oqori e curu vakamatata sara ki na noqu vakasama, kei na nqou vakila ni kilai au tiko na Tamada Vakalomalagi. Au vakila na Nona loloma kei na Nona veidusimaki. Oqori e dua vei ira na ka au a sotava taumada meu vakatitobutaka kina na noqu ivakadinadina.”
A sucu o Chad H Webb mai Rexburg, Idaho, Amerika, ena ika 18 ni Tiseba, 1964, vei rau o Larry George Webb kei Paige Webb. A tubu cake ena ceva kei Idaho ka vakamautaki Kristi Ann Bronson ena Valetabu e Logan Utah ena ika 4 ni Okosita, 1990. Erau vakaitikotiko mai Layton, Utah, Amerika, ka ono na luvedrau.
A taurivola mai na Brigham Young University o Baraca Webb ena diqiri ni bejila ena vosa vaka-Sipeni kei na dua na diqiri ni master ena veiliutaki ni vuli kei na yavu. A vakavulica na kalasi ni semineri e Salt Lake City kei na kalasi ni inisitute e Virginia kei Utah, tauyavutaka na parokaramu ni inisitute mai Washington, D.C., ka raica raraba na nodra veituberi kei na digitaki na qasenivuli ni semineri. Me tekivu mai na 2008 sa veiqaravi tu mai kina vakailiuliu ni Semineri kei na Inisitute ni Lotu.
A vagalalataki o Baraca Webb ena nona a peresitedi voli ni iteki na Layton Utah Valley View ni bera toka vakalailai na nona veikacivi. Na nona veikacivi e liu e oka kina na bisopi, lewe ni matabose e cake, kei na peresitedi ni kuoramu ni italatala qase.