“Elder David L. Buckner,” Liaona, Me 2024.
Elder David David L. Buckner
Vakaitutu Raraba ena Vitusagavulu
A sucu o Elder David L. Buckner ena ika 27 ni Sepiteba, 1963, mai Ogden, Utah, Amerika, ia a “tubu cake” ni vakaitikotiko voli ena tolu na yabaki mai Sacramento, California, Amerika.
O David yabaki 11 a toki ki California vata kei na nona matavuvale, e gone duadua vei iratou na lima na luvedrau o Melba kei E. LaMar Buckner, ena gauna a kacivi kina o tamana me vakatulewa ena tabana ni kaulotu ni Lotu e Sacramento. Yawa mai vei ira na itokani tudei mai Utah, a vulica na sala me rawati kina na itokani vou ka kunea e “300 na tacina kei na ganena qase” ena kedra maliwa na daukaulotu tudei.
E bibi duadua, ni sa tekivu me ti na waka ni nona ivakadinadina ni kosipeli i Jisu Karisito. “Na veika oqori a veisautaka na veika kece me baleti au,” a kaya.
E muri a qai veiqaravi ena Tabana ni Kaulotu na Ecuador Guayaquil. Ena tolu ga na vula mai na nona kaulotu, ni veiqaravi tiko vakaperesitedi ni tabana ena tauni o Jipijapa, a tagi vata kei ira na lewe ni tabana kei na so tale ena nona luvu e dua na gonetagane yabaki 11 ena dua na itaviqaravi ni Lotu.
Ni vakatakerekere tiko vua na Tamada Vakalomalagi ena macawa kei na vula ka tarava mai, a rawata e dua na ivakadinadina sega ni yavalati rawa me baleta na yavu ni veivakabulai. A vakadinadinataka talega na yalololoma ni Turaga ni ra ciqoma na kosipeli eso tale ena itikotiko. Era sa qai kila vata na ituvaki tabu ni bula kei na kaukauwa ni loloma soliwale ni Turaga.
Ni oti na nona kaulotu, a vuli o Elder Buckner ena Brigham Young University, ka sotavi Jennifer Romney Jackson kina. Erau a vakamau ena 30 ni Okosita, 1990, ena Valetabu e Salt Lake. A tubu cake o Sisita Buckner mai New York, Amerika, ka rau toki kina na veiwatini ni oti na nodrau vakamau. Erau susuga cake na lima na luvedrau mai Manhattan, ka matataka kina na Lotu o Elder Buckner ena nodratou iLesilesi kilai levu na iLiuliu Ni Lotu.
A ciqoma o Elder Buckner e dua na diqiri ni bejila ni vakadidike ena veika vakailavo mai BYU ena 1988 kei na dua na diqiri na master ni veiliutaki vakabisinisi mai na Durham University ena 1991. A ciqoma tale ga e dua na master ni veimaliwai ni veimatanitu mai BYU ena 1995, qai ciqoma na juris doctorate (diqiri cecere ni lawa) mai BYU ena 1996. Sa parofesa tiko ena koliji ka, me tekivu mai na 1999, na peresitedi ni Bottom Line Training kei na Consulting Inc. Sa veiqaravi oti o Elder Buckner vaka-Vitusagavulu ni iWasewase, peresitedi ni iteki, lewe ni matabose e cake, ka bisopi.