Elder Aroldo B. Cavalcante

Vakaitutu Raraba ena Vitusagavulu

Ena nona veisureti e dua na tavalena, o Aroldo B. Cavalcante yabaki 18 a tiko ena dua na koniferedi ni iwasewase ena 1988 ka vakaitavi kina o Peresitedi Gordon B. Hinckley (1910–2008), ka veiqaravi tiko vaka-iMatai ni Daunivakasala ena Mataveiliutaki Taumada.

“Au vakila e dua na ka kaukauwa sara,” a nanuma lesu. “Au rawa ni raica e dua na rarama mai vei Peresitedi Hinckley.”

E dina ga ni a lako tiko i lotu ena tolu na yabaki ka tarava, a sega ni papitaiso. Dua na siga eratou a tukituki na daukaulotu ena nona katuba. Nira taura tu na nodra ivola, era wilika na veika era a vola na daukaulotu sa oti me baleti koya. Na ka a lauti koya oya na iotioti ni iyatuvosa: “E sega ni vinakata me soli koya vei Jisu Karisito.”

E nanuma lesu o Elder Cavalcante, “Au nanuma niu sa yalodina sara vei Jisu Karisito, ka sa rui bibi vei au na malanivosa oya.”

Ni vakasamataka tiko se oqori talega na ka e vakasamataka na iVakabula ena vukuna, a taroga, “Na cava au rawa ni cakava meu veisautaka kina na ka oqo, iTalatala?’”

Eratou sa tekivu vakavulici koya na daukaulotu, ka papitaiso na yabaki 21 oqo ni oti ga e 10 na siga. Sa yalodina tiko o Elder Cavalcante ki na kosipeli ni iVakabula me tekivu mai na gauna o ya.

“Na cakacaka oqo e sega ni baleti keda. E baleta na iVakabula. Kau tovolea meu cakava na noqu vinaka taucoko ena Vukuna, sega ena vukuqu,” e kaya o Elder Cavalcante.

A sucu o Aroldo Barreto Cavalcante Filho ena ika 22 ni Noveba, 1970, mai Fortaleza, Ceará, Brazil. A vauci vei Christiana Ramalho Bezerra Leite ena Valetabu e Recife Brazil ena ika 21 ni Janueri, 2004. Erau itubutubu ni lewe va na gone.

A ciqoma o Elder Cavalcante e dua na diqiri ni vuli ena lawa ni veiliutaki mai na Federal University of Ceará ena 1997. Sa cakacaka oti vaka loya vei Procuradoria Geral do Município mai na 1997 ki na 2005 ka itokani manidia ni Barreto Cavalcante Advogados mai na 1999.

Ni bera ni kacivi me Dua na Vitusagavulu Vakaitutu Raraba, a veiqaravi tiko o Elder Cavalcante vakaperesitedi ni kaulotu mai Brazil. Sa veiqaravi talega vaka-Vitusagavulu ni iWasewase, peresitedi ni iteki, bisopi, ka daunivakasala ni matabisopi.