Baraca Gabriel W. Reid

iKarua ni Daunivakasala ena Mataveiliutaki Raraba ni Matawilivola ni Sigatabu

Vei Gabriel W. Reid, e dua na tiki talei duadua ni noda iliuliu ni kaulotu o ya me raici ira na daukaulotu “mera kana magiti ena vosa i Karisito,” tara cake na taleitaki ni ivolanikalou, ka gadreva me yaco me vakataka na iVakabula.

“Kevaka o sa vakasamataka vakaidina na sala me ‘kamica’ kina vei iko na nomu vulica na kosipeli, me vaka e tukuni ena ivolanikalou [raica na Alama 32:28], oqori na gauna ena veisau kina na nomu bula,” e kaya o Baraca Reid, ka mai vakacavara na nona veiqaravi vakaperesitedi ni Tabana ni Kaulotu na Australia Sydney ena Julai.

A sucu o Baraca Reid mai Pago Pago, Samoa vaka-Amerika. E vosataka na vosa vaka-Samoa, Sipeni, kei na vosa Vakavalagi. Ena vosa vaka-Samoa, e kaya, na vosa kana magiti ena iVola i Momani e vakadewataki me “taumamafa fiafia” kei na vosa vaka-Sipeni me “deleitar.” E kaya o koya ni vosa ruarua e dusia na marau.

Niu daunivakasala ena Mataveiliutaki Raraba ni Matawilivola ni Sigatabu vou, “Au sa nanamaki meu vukei ira na tani me ra raica na levu ni reki e tiko ena kena tauwaki na ivolanikalou,” e kaya o koya.

A sucu o Gabriel “Gabe” Walter Po’u Reid ena ika 28 ni Me, 1977, vei rau o Eugene kei Tupu Reid ka susugi cake ena koro o Leone mai Samoa vaka-Amerika. Na nona lomana na Kalou kei na gagadre me vakaliuci Koya a tekivu taumada ni se gone ka tokoni koya ena nona qito soka ena Brigham Young University mai na 1999 ki na 2002 ka qai tomana nona qito ena National Football League mai na 2003 ki na 2006.

Ena gauna o ya ni nona bula, a vulica kina e dua na lesoni yaga: “Ni sa tukuna vei iko na Turaga e dua na ka, mo soli iko kece kina.’”

A vakamautaki Heather Lynn Sasse o Brother Reid ena Valetabu e Bountiful Utah ena ika 24 ni June, 2000. E va na luvedrau. A taurivola mai BYU ena 2002 ena dua na koroi ni bejila ena veiwekani ni veimatanitu. Nikua e taukena e dua na kabani ni taravale.

Me ikuri ni vakatulewa ena Tabana ni Kaulotu na Australia Sydney, sa veiqaravi oti o Baraca Reid vakadaunivakasala ni mataveiliutaki ni iteki, lewe ni matabose e cake, bisopi, peresitedi ni Cauravou ena tabanalevu, daucakacaka vakalotu ni valetabu, kei na daukaulotu tudei ena Tabana ni Kaulotu na Chile Santiago South mai na 1996 ki na 1998.