Elder D. Martin Goury

Vakaitutu Raraba ena Vitusagavulu

Ni tubu cake tiko ena dua na koro lailai mai Côte d’Ivoire, a tadra o Elder D. Martin Goury me yaco me dua na italatala ka qaravi ira na tani.

Ena Okotova ni 1992, ni tiko mai Lodoni, Igiladi, ka vulica na vosa Vakavalagi ka vuli tiko, a sotavi ira na daukaulotu ni Yalododonu Edaidai. O rau na daukaulotu, e dua vei rau o koya duadua ga na daukaulotu vosa vaka-Varanise mai Lodoni, a solia vei Elder Goury e dua na ilavelave ni iVola i Momani ena vosa vaka-Varanise.

Sa tekivu wilika na ivola oya qai ciqoma e dua na ivakadinadina ni kena dina. Ni rau gole mai ki na nona vale e dua na veisa daukaulotu vou ni oti e vica na vula, a curu ki na Lotu. “Au nanuma niu a marau vakalevu,” a kaya.

Sa tubu cake na nona marau ni ra vakavulici koya na daukaulotu me baleta na matabete. “Erau vakamacalataka na ibalebale ni matabete kei na sala meu vakayagataka kina oqori meu qaravi ira na tamata. Vei au, oqori na noqu tatadra sa yaco me dina, ” e kaya o Elder Goury. “Au a marau.”

A sucu o Dalébé Martin Goury ena ika 30 ni Janueri, 1964, vei rau o Yoro Goury Maurice kei Bame Gaby Odette. A tubu cake ena dua na koro na yacana o Lehipa kei na veikoro lelevu o Oume kei Gagnoa. A vakamautaki Ruth Simone Kennington ena Valetabu e Lodoni Igiladi ena ika 8 ni Epereli, 1995. Erau vakaitikotiko mai Abidjan, Côte d’Ivoire, ka va na luvedrau.

A rawata o Elder Goury na diqiri ni bejila ni veivakavulici mai na CAFOP (Animation and Educational Training Centers) de Man ena 1988 kei na mechanical engineering mai na London South Bank University ena 1997. Sa cakacaka oti vaka qasenivuli ena koronivuli ni imatai ni tabavuli, idinia ni droini, manidia ni cakacaka ka ivukevuke ni dairekita ni cakacaka e Cameron, manidia raraba e Nigeria ni OneSubsea Services, ka manidia ni cakacaka ena nona vanua ni Schlumberger. Ena dua na gauna lekaleka sa oti, a cakacaka o Elder Goury ena Lotu vakodineita veitokoni vei ira na veiliutaki kei na lewenilotu.

A veiqaravi tiko vaka-Vitusagavulu ni iWasewase ena iWasewase o Aferika Ena Ra ena gauna a kacivi kina. A veiqaravi taumada vakaperesitedi ni Tabana ni Kaulotu na Benin Cotonou, bisopi, daunivakasala ni matabisopi, peresitedi ni tabana, kei na peresitedi ni kuoramu ni italatala qase.