Elder Sandino Roman

Vakaitutu Raraba ena Vitusagavulu

A vakatakilai o Elder Sandino Roman ki na kosipeli i Jisu Karisito ni se gone. Ena vei-Sigatabu e dau kauti rau mai kei ganena e dua na itokani nei tinana me rau sota kei ira na 15 tale na lewe ni Lotu i Jisu Karisito ni Yalododonu Edaidai ena dua na valenilotu lailai mai Mexico. 

A masu ena veisiga na gone yabaki lima me ratou saumaki mai na nona matavuvale ki na kosipeli. Ni oti e rua na yabaki, rau a papitaiso o tinana kei tamana. Ni oti e dua na yabaki, a papitaisotaki koya o tamana. “Ena vuku ni ka oqori, au kila ni Turaga e rogoca na nodra masu na gone,” a kaya o Elder Roman.

Na ciqomi ni kosipeli kei na veiqaravi ena Lotu sa vakayaco veisau ena nona matavuvale. “Au sa raica na veika e kauta mai na kosipeli ki na bula,” e kaya o Elder Roman. “Au kila ni kauta mai na marau kei na inuinui.”

A sucu o Sandino Roman ena ika 7 ni Okosita, 1973, vei rau o Lidia Corral kei Prometeo Roman e Iguala, Guerrero, Mexico. Ni qito tiko ena timi ni volleyball ni koronivuli na Benemérito de las Américas ka taukena na Lotu, a sotavi Guadalupe Villanueva Rojas o Roman. Erau a vauci ena Valetabu mai na Mexico City Mexico ena ika 19 ni Tiseba, 1998. E va na luvedrau.

A rawata o Elder Roman e dua na diqiri na bachelor of science ni ivakarau ni kompiuta mai na ITESM (na Monterrey Institute of Technology and Higher Education) ena 2000 ka dua na master ni veiliutaki vakabisinisi mai na Brigham Young University ena 2006. Sa cakacaka oti vaka manidia ni volivolitaki nei Johnson & Johnson kei na Lotu me manidia ni Valenivolavola ni Veiqaravi Veitokoni ni iWasewase e Mexico.

Ena gauna ni nona veikacivi, erau a veiqaravi tiko vakaperesitedi ni Tabana ni Kaulotu na Ecuador Quito North. Sa veiqaravi talega vaka-Vitusagavulu ni iWasewase, daunivakasala ni mataveiliutaki ni iteki, bisopi, lewe ni matabose e cake, ka peresitedi ni kuoramu ni italatala qase.

E kaya o Elder Roman ni nona takete levu ena bula, ena vanua cava ga e veiqaravi kina, o ya me rawata na veivakabauti ni Turaga. “Au vinakata me kila o Koya ni rawa ni vakabauti au meu cakava na cakacaka oqo,” a kaya.