Elder Steven D. Shumway

Vakaitutu Raraba ena Vitusagavulu

Ni oti e rua na yabaki na nona cakacaka mai Exxon Chemical Co. e Houston, Texas, Amerika, a vulica kina o Elder Steven D. Shumway ni rau sa kacivi na nona itubutubu me rau vakatulewa ena dua na tabana ni kaulotu e Bolivia ka gadreva na veivuke ena bisinisi ni matavuvale mai Arizona.

“Au sega ni vinakata meu vakasaurarataki iko mo lesu mai,” a kaya vua o tamana. “Ia kevaka o sega ni lesu mai, au leqataka na veika ena yaco ki na bisinisi.”

E dua na vakatulewa dredre me caka, e kaya o Elder Shumway.

Rau a lako vata kei watina me lima na auwa ki na Valetabu e Dallas Texas ka tiko kina ena siga oya ka sega ni ciqoma e dua na kena isau. Ni oti oya, rau a sikova e dua na sitoa ni ivola ka raica na itukutuku nei Peresitedi Gordon B. Hinckley (1910–2008), Go Forward with Faith.

“Keirau vakila ruarua ni kaya na Turaga, ‘E dodonu mo ni toso ki liu ena vakabauta ena noqu sala, ka sega ena nomuni sala,” e kaya o Elder Shumway. “Keirau sa mani toki ki Arizona, ka sa yaco me dua vei ira na veisau bibi ka totoka duadua ena neitou bula.”

E dua na ka vinaka duadua era sa vulica ena nodra vakamau, e kaya o Elder Shumway, o ya “ni gauna o ciqoma kina na veisureti [ni Turaga], o na tiko sautu. O na toso tiko. E vinaka cake na veika kece mai na nomu tovolea mo cakava na veika ena nomu sala.”

A sucu o Steven D. Shumway ena ika 30 ni June, 1970, mai Springerville, Arizona, Amerika, vei rau o Wilford Douglas kei Dixie Ann Shumway, ka tubu cake mai Eager, Arizona. A vakamautaki Heidi O’Brien ena Valetabu e Salt Lake ena 29 ni Tiseba, 1994. Erau nodratou itubutubu e va na gone ka ratou vakaitikotiko e Pinetop, Arizona.

A rawata o Elder Shumway e dua na diqiri na chemical engineering mai na Brigham Young University ena 1996, a cakacaka ena Exxon Chemical Co. mai na 1996 ki na 1998, ka sa peresitedi ka Vakailesilesi Liu ni Whiting Brothers Investment Co. me tekivu mai na 1998.

Ena gauna ni nona veikacivi, a veiqaravi voli o koya vaka-Vitusagavulu ni iWasewase. Sa veiqaravi oti vakaperesitedi ni Tabana ni Kaulotu na Illinois Chicago, peresitedi ni iteki, bisopi, peresitedi ni kuoramu ni italatala qase, qasenivuli ni vakavakarau ni kaulotu ena iteki, ka daukaulotu tudei ena Tabana ni Kaulotu na Pennsylvania Philadelphia.