“Elder I. Raymond Egbo,” Liaona, Me 2024.
Elder I. Raymond Egbo
Vakaitutu Raraba ena Vitusagavulu
Ni vuli tiko ena dua na koronivuli curuibure ni lotu mai Nigeria, a sureti Elder I. Raymond Egbo na ganena qase me “lako mai ka raica” na veika e solia tu na Lotu i Jisu Karisito ni Yalododonu Edaidai. Ni sa yabaki 14, sa tekivu lako ki na semineri ena yakavi.
Ni wilika tiko na ivola ni vuli semineri, a yaco yani o Elder Egbo ki na Vunau kei na Veiyalayalati 135 kei na vakamatei nei Josefa Simici ena vuku ni nona vakabauta.
“E dua na ka e tarai au vakaukauwa sara, kau kila ni Parofita o Josefa Simici e parofita ni Kalou. Au kila ni a vakamatei ena vuku ni dina,” e kaya o Elder Egbo, ka a qai lewena na Lotu ena dua na gauna lekaleka. “Au se vakila tikoga ena gauna oqo na veika au vakila ena siga oya niu wilika.”
E muri, ni se gonevuli tiko ena univesiti, a vakayaloqaqataki koya o ganena me laki kaulotu. A cudruvi koya o tamadratou ni sa biuta na nona vuli, ia a dau vola vua o Elder Egbo na ivola ka vakamacalataka na veika kece e cakava tiko kei na veika e vakavulica tiko.
E ka ni kurabui vei Elder Egbo, ni sa voleka ni cava na nona kaulotu, a wilika vua o nona peresitedi ni kaulotu e dua na ivola mai vei tamana ka kaya ni sa papitaiso. “Tukuna vua niu na waraki koya tiko,” a vola o tamana.
A sucu o Elder Idyo Raymond Egbo mai Port Harcourt, Rivers State, Nigeria, ena ika 25 ni June, 1974, vei rau o Udo Idio Egbo kei Veronica Ukamaka Egbo. A sotavi Comfort Ikip Ese ena nona toki na nona matavuvale ki na nona tabana ena 1994. Rau a vakamau ena 15 Me, 2003, e Calabar, Nigeria. E tolu na luvedrau.
E tiko na diqiri ni vuli, tuvatuva ni iwasewase, kei na veiliutaki vakabisinisi o Elder Egbo mai na tolu na univesiti. Sa cakacaka oti ena Semineri kei na Inisitute ni Lotu me tekivu mai na 2002 ena veimataqali itutu, oka kina me dairekita ni vanua ka dairekita ni iwasewase.
Ena gauna ni nona veikacivi, a veiqaravi voli o Elder Egbo vaka-Vitusagavulu ni iWasewase e Aferika e Ra. Sa veiqaravi oti vakaperesitedi ni Tabana ni Kaulotu na Nigeria Calabar ka sa daunivakasala ni mataveiliutaki ni iteki ka lewe ni matabose e cake. A laki kaulotu tudei ena tabana ni kaulotu mai Nigeria Lagos Mission.