Veibasai ni Ka Kecega
Me rawa nida vakayagataka na noda galala ni digidigi, sa dodonu me tu na veibasai ni ka me da digitaka.
Walega oqo, au draiva voli ena dua na koro levu keirau sega ni kila vinaka, au sega ni nakita niu curuma cala, qai kauti keirau yani kei na watiqu kina dua na sala levu me vica vata na maile ka sega ni rawa ni keirau lesu tale. Keirau ciqoma na veisureti ni dua na itokani yalo vinaka kina nona itikotiko ka leqataka ni keirau sa na berata na gauna keirau namaki tiko kina.
Ni keirau lako tiko ena sala levu oqo ka vaqara tiko e dua gauna sala lesu, au beitaki au niu sega ni raica tiko vakavinaka na ivakarau ni veilakoyaki. Na ka oqo e vakavuna noqu vakasamataka na noda dau digidigi cala ena so na gauna kei na vuna meda sotava tu kina na kena isamunidawa ena yalomalumalumu kei na vosota me yacova ni qai rawa nida veisautaka na noda mua.
Na bula sa gauna ga ni digidigi. Sa solia vei keda na Tamada Vakalomalagi na isolisoli vakalou ni galala ni digidigi me rawa nida vuli kina mai na noda digidigi—mai vei koya e dodonu kei koya talega e cala. Eda vakadodonutaka na noda digidigi cala nida veivutuni. Oqo na vanua e yaco kina na tubu. Na ituvatuva nei Tamada Vakalomalagi ena vukuda kece e baleta na vuli, tubu, ka toso kina bula tawamudu.
Me tekivu mai na gauna keirau a tuberi kina mai vei rau na daukaulotu kei na watiqu ka curu kina Lotu ena vuqa na yabaki sa oti, au sa dau vakauqeti mai na ivakavuvuli bibi a solia o Liai vua na Luvena o Jekope ena iVola i Momani. A vakavulica vua ni “na Turaga na Kalou sa solia vua na tamata me lewa na ka me kitaka” ka “sa dodonu kina me tu na veibasai ni ka kecega.” Me rawa nida vakayagataka na noda galala ni digidigi, sa dodonu me tu na veibasai ni ka meda digitaka. Ni vakayacora oqo, sa vakananuma talega kina vei keda na iVola i Momani ni da sa “vakaroti vakavinaka” ka ni “Yalo i Karisito” sa soli vei keda yadua me da “kila na vinaka mai na ca.”
Ena bula, eda na sotava e vuqa na veidigidigi bibi. Me kena ivakaraitaki:
-
Digitaka se muria se sega na ivakaro ni Kalou
-
Digitaka meda vakabauta ka kila na gauna e dau yaco kina na cakamana se da waraka me yaco e dua na ka ni bera nida qai digia meda vakabauta oti sa qai.
-
Digia mo vakalevutaka na nomu vakabauta na Kalou se namaka ena rere e dua tale na bolebole ena siga ka tarava.
Niu gole cala ena sala levu oya, sotava na na isamunidawa ni neirau digidigi cala na lewa cala e rawa ni dau mosi baleta ni bale ga vei keda. Ia, e rawa nida dau digitaka meda ciqoma na vakacegu mai na iwalewale vakalou ni veivutuni, vakadodonutaka na ka e cala, ka vulica eso na lesoni ena veisautaka na bula ni o vakayacora vakakina.
Ena so na gauna e rawa tale ga nida sotava na veibasai ni ka kei na veivakatovolei mai na veika eda sega ni lewa, me vaka na:
-
Gauna ni bula vinaka kei na gauna ni tauvimate.
-
Gauna ni sautu kei na gauna ni veivaluvaluti.
-
Veiauwa ni siga kei na bogi kei na draki katakata kei na vula i batabata.
-
Gauna ni cakacaka muria mai na gauna ni vakacegu.
E dina ga ni sega ni rawa nida digia ena veituvaki vakaoqo baleta ni dau yaco ga, eda se galala tikoga meda digitaka na iwalewale me da bokoca kina. E rawa nida vakayacora vakakina ena ivakarau ni rai vinaka se sega ni inuinui. E rawa nida segata meda vuli mai na ka oya ka kerea na nona veivuke kei na veitokoni ni noda Turaga, se e rawa nida vakasamataka ni sa o keda duadua ga ena veivakatovolei oqo ka sa dodonu meda sotava duadua. E rawa nida “moica na noda laca” kina ka dina vou oqo, se e rawa nida lewa meda kakua ni veisautaka e dua na ka. Ena buto ni bogi, e rawa nida waqaca noda cina. Ena draki batabata ni vulaililiwa, eda digitaka meda daramaka na isulu katakata. Ena gauna ni tauvimate, e rawa nida vaqara na veivuke vakavuniwai kei na veivuke vakayalo. Eda digia na ivakarau meda sotava kina na ituvaki eso oqo.
Moici, vuli, vakasaqara, digia era vosa cakacaka kece. Nanuma o keda na tamata ka sega ni iyaya. Meda kua sara ni guilecava ni yalataka o Jisu me “colata o koya na nodra mosi kei na nodra tauvimate na nona tamata … me rawa kina ni … vakila,” se vukei, keda nida gole Vua. Sa rawa nida digia meda tara cake noda yavu ena uluvatu sai Jisu Karisito, ni yaco mai na covulaca “ena sega ni rawai keda.” Sa yalataka ko Koya ni “kevaka eda lako mai [Vua], ena ciqomi ira o Koya, sa kalougata o ira era sa lako mai [Vua].”
Oqo,sa dua tale na ikuri ni ivakavuvuli bibi duadua. E kaya ko Liai ni sa “dodonu me tu na veibasai ni ka kecega.” Kena ibalebale qo ni veika veibasai era sega ni veiyawaki. E rawa mada ga nira veivukei vakataki ira. Eda na sega ni raica rawa na reki vakavo kevaka eda se bera ni vakila na yaluma ena dua na gauna. Nida via kana ena so na gauna ena vukea meda vakavinavinaka vakalevu ena gauna e levu tale kina na kakana. Ena sega ni rawa nida raica na ka dina vakavo kevaka eda sa raica oti na lasu ena so na vanua.
Na veibasai eso oqo era tautauvata kece kei na yasa e rua ni ilavo siliva. Erau na dau tiko ruarua na yasana ruarua. E vakarautaka n akena ivakaraitaki o Charles Dickens ni vakasama oqo ena nona vola ni “gauna vinaka duadua, ni gauna ca duadua.”
Meu na cavuta mada e dua na ivakaraitaki mai na neirau bula. Na vakamau, tauyavu e dua na matavuvale, era sucu mai na gone sa kauta mai vei keirau na gauna cecere duadua ni reki keirau sa bau sotava ena neirau bula, ia na veigauna bibi talega ni mosi, yaluma, kei na rarawa ni yaco e dua na ka vua e dua vei keimami. Na reki tawayalani kei na marau levu kei ira na luvei keirau ena so na gauna sa dau muria mai na tautauvimate, curu i valenibula, kei na sega ni moce rawa ena bogi, vakakina na kune vakacegu ena masu kei na veivakalougatataki vakamatabete. Na veika duidui e yaco oqo sa vakavulica vei keda nida sega ni tiko duadua ena veigauna ni rarawa, ka ra sa vakaraitaka talega vei keda na levu ni ka eda rawa ni kauta ena veivuke ni Turaga. Na veika oqori sa veivuke me buli keda ena veisala vakasakiti, ka ra sa yaga kece. E sega beka nio koya oqo na ka eda lako mai kina ki ke?
Ena ivolanikalou eda kunea talega kina eso na ivakaraitaki vinaka:
-
O Liai e vakavulica na luvena o Jekope ni veika rarawa a sotava ena lekutu a vukea me kila na cecere ni Kalou, vakakina na “[Kalou] ena vakatabuya na [nona] vakararawataki me vinaka kina o [koya].”
-
Ena nona vakararawataki o Josefa Simici ena Valeniveivesu mai Lipati, a tukuna vua na Turaga ni “veika kece oqori ko na ulumatua kina ka vinaka cake.”
-
Kena itinitini, na isoro tawayalani nei Jisu Karisito sai koya na ivakaraitaki cecere duadua ni mosi kei na vakararawataki se qai bau kunei, ia sa kauta talega mai na veivakalougatataki vakasakiti ni Nona veisorovaki vei ira kece na luve ni Kalou.
Ena vanua e tu kina na rarama ni matanisiga, ena tiko talega kina na rurugu. Na ualuvu e rawa ni kauta mai na veivakarusai, ia era kauta talega mai na bula. Na wainimata ni rarawa sa vakavuqa ni dau vuki me wainimata ni marau. Na yalo ni rarawa nira sa takali na noda daulomani sa dau saumi lesu e muri ena reki ni veisotari tale. Ena veigauna ni ivalu kei na veivakarusai, e vuqa na iwalewale lalai ni yalovinaka kei na loloma sa yaco tale tikoga vei ira era “mata rai, ka daliga rogo.”
Na noda vuravura nikua sa dau vakaitovotaki ena rere kei na nuiqawaqawa—rerevaka na veika e rawa ni kauta mai vei keda na vunilagi. Ia sa vakavulici keda ko Jisu meda nuitaki Koya ka “vakararavi tiko [Vua] ena vakasama kece, kakua ni vakatitiqa, ka kakua ni rere.”
Meda sasaga vagumatua e veigauna meda raica na yasa ruarua ni ilavo siliva yadua e votai mai vei keda ena noda bula. E dina ni sega beka ni laurai vinaka sara mai na yasa ruarua ena so na gauna, e rawa nida kila ka nuitaka ni na tiko.
E rawa nida vakadeitaka ni veika dredre, na yalorarawa, na veika rarawa, kei na mosi era sega ni tukuni keda, ia na ivakarau eda sotavi ira kina ena vukea na noda tubu ka toro voleka vua na Kalou. Na noda itovo ni bula kei na digidigi e tukuni keda vakavinaka cake mai na noda bolebole.
Nio bula vinaka tiko, mareqeta ka vakavinavinakataka ena veiminiti. Nio tauvimate, segata mo vuli mai kina ena yalovosota ka kila ni oqo ena rawa ni veisau tale me vaka na loma ni Kalou. Nida yalorarawa, nuitaka ni marau sa tiko ga vakalailai ki liu; eda sega ga ni dau raica. Vagoleya na nomu rai ka laveta nomu vakasama kina yasa vinaka ni bolebole, baleta ni sega ni vakataratutu nira dau tu talega! Kakua ni guilecava mo vakavinavinaka. Digia mo vakabauta. Digia mo vakabauti Jisu Karisito. Digia mo dau nuitaka tikoga na Kalou. Digia mo dau “vakasama vakaselesitieli,” me vaka se qai vakavuvulitaka wale toka ga o Peresitedi Russell M. Nelson!
Meda dau nanuma tikoga na ituvatuva nei Tamada Vakalomalagi ena vukuda. E lomani keda o Koya ka tala mai kina na Luvena e Duabau Ga me veivuke ena noda vakatovolei ka dolava vei keda na katuba me da lesu Vua. E bula ko Jisu Karisito ka tucake tu kina ena veigauna, ka waraki keda meda digia meda kacivi Koya me solia mai na veimaroroi, igu, kei na veivakabulai. Ena veika oqo au sa vakadinadina kina ena yaca i Jisu Karisito, emeni.