“Elder Christopher H. Kim,” Liaona, Me 2024.
Elder Christopher H. Kim
Vakaitutu Raraba ena Vitusagavulu
Ni sa yabaki 14 o Elder Christopher H. Kim ka donumaka e dua na madigi me wasea na kosipeli vei ira na nona itokani, a qai kila ni dodonu me kila na dina ni iVola i Momani me rawa ni lau na nona vosa.
“Niu masulaka na iVola i Momani, au vakila e dua na yalo vakacegu,” e nanuma lesu o koya. “Vakasauri ga, a sega ni dua na taro se vakatitiqa baleta na iVola i Momani.” Ena imatai ni gauna ena nona bula, a tomana, “Au a vakila dina na Yalotabu, kila na dina me baleta na iVola i Momani, ka kila ni o Josefa Simici e parofita ni Kalou.”
A sucu o Christopher Hyunsu Kim ena ika 18 ni Noveba, 1965, mai Daegu, ena Ceva kei Korea, ka qase duadua vei iratou na va na luvei Chinho Kim kei Kuncha Kim. A curu ki na Lotu nona matavuvale ni se gone lailai sara. A vakaitikotiko mai Daegu o Elder Kim me yacova ni sa taurivola mai na koronivuli torocake ka ratou toki na nona matavuvale ki Amerika, ka vakaitikotiko ena Ceva kei California.
Ni veiqaravi tiko ena Tabana ni Kaulotu na Washington Seattle, a veiqaravi tiko o Sisita Seongmi (Sue) Hong ena Tabana ni Kaulotu na California Los Angeles. Ni tiko e kea, a yaco me rau veikilai kei tinai Elder Kim. E muri, ni rau sa vakacavara oti na nodrau kaulotu o Elder Kim kei Sisita Hong, rau sa tekivu veigadivi. Erau a vakamau e nai ka 7 ni Tiseba, 1991, ena Valetabu e Los Angeles California. E dua na luvedrau tagane ka tolu na luvedrau yalewa.
A taurivola mai na Brigham Young University o Elder Kim ena dua na diqiri ni bejila ni veika ni bula veimaliwai ena 1995 ka dua na master ni veiliutaki vakabisinisi ena 1997. Ni oti nona vuli, a cakacaka e Amerika, Thailand, kei na Ceva kei Korea. Me tekivu mai na 2005, a cakacaka tiko mai na Unicity International, e dua na kabani i Utah dau veivotayaka na ka ni kakana kei na isasauni, ena dua na gauna walega oqo vakaperesitedi ni makete, mai Seoul, Ceva kei Korea.
Sa veiqaravi oti o Elder Kim me tekivu mai na 2019 vaka-Vitusagavulu ni iWasewase. Sa veiqaravi talega vakaperesitedi ni iteki, daunivakasala ena mataveiliutaki ni iteki, peresitedi ni kaulotu ena iteki, ka lewe ni matabose e cake.