Vakadewa Vosa ena Koniferedi Raraba

Ni vo e dua na auwa me vakayacori na soqoni yadua ni koniferedi raraba, era na soqoni vata mai e drau na kenadau ni vosa ena dua na rumu levu me ra vakayagoyago vinakataka na veivosa eso ni koniferedi ka ra sa vakadewataki ki na dua vei ira na 103 na vosa.

Ni sa tekivu na koniferedi, e dua ga na nodra madigi. E dodonu me vinaka, ka dodonu me vinaka ena imatai ni gauna. Na kena vakadewataki vakavinaka e gadrevi kina na vakasama, na vakasama vakamatata, kei na maqosa ni vosa, ena nomu vakadewa na yalo kei na inaki nei koya e vosa ena itutu ni vunau ena yalo vata ga a tauyavutaki kina na itukutuku.

E sivia ni 800 na itaukei ni vosa kei ira na lesumai ena kaulotu era vakadewataka na veitiki eso ni koniferedi raraba oqo. Rauta ni veimama era a vakadewataka na itukutuku mai Salt Lake City, Utah, Amerika, ia na veimama kadua era vakavakadewa tiko ga mai na nodra vanua. Eso era vakaitavi talega ena vakadewataki ni vosa ni koniferedi ena macawa ni bera na koniferedi raraba.

Ena gauna ni kakaburaki, era dau cakacaka na dauvakadewa vosa ena timi lewe va ki na ono ena dua na soqoni, me ra wilika na itukutuku yadua ena dua na rumulailai ena Valenivolavola ni Lotu se ena veivanua digitaki e vuravura raraba. Era dara na irogorogo e uludra me rogoci kina na vosa Vakavalagi, ka ra sarasara na dauvakadewa ena dua na sikirini me ra toso vata kei koya e vosa tiko. Me dau tiko ena nodra vakasama na dauvakadewa vosa—ena dua ga na gauna e rua na veivosaki—ena veimataqali vosa.

E kaya o Dauvakadewa Jonas Prasad ni o ira na lewe ni Lotu vosa vaka-Idia mai Viti era sa gadreva tu me ra rogoci ira na parofita ena nodra vosa. Ni vakamacalataka tiko e dua na marama, a kaya kina, “Ena vica vata na yabaki, na soqoni duadua ga ni Lotu e tiko vua a vakayacori ena vosa Vakavalagi. E dina ga ni a sega ni vosataka e dua na vosa, a lako mai ka dabe vakamalua me vakila ga na Yalotabu. Ena gauna oqo sa marautaka tiko o koya me rogoca na kosipeli ena nona vosa.”