“Elder Patrick Kearon: Vakarautaka ka Kacivi Mai vua na Turaga,” Liaona, Me 2024.
Veikacivi Vou
Elder Patrick Kearon: Vakarautaka ka Kacivi Mai vua na Turaga
Sa vakarautaki Elder Kearon na Turaga ena sala talei eso ka vakatabui koya ena dua na iyaragi ni isolisoli vakayalo ka na rawa kina vua me vakalougatataki ira na tani ena nona veikacivi tabu me ivakadinadina digitaki ni “yaca i Karisito ki vuravura taucoko.”
Ena dua na Vakarauwai ni oti e vica na yabaki nona kacivi me Vakaitutu Raraba ena Vitusagavulu, e rau a curu yani ki na sitoa o Elder Patrick Kearon kei na watina, o Jennifer, ka sotavi Elder W. Rolfe Kerr kei na watina, o Janeil ni rau sa vakarau biubiu tiko. E ratou veitalanoa vakalekaleka, ka gole yani o rau na Kerrs ki na nodrau motoka.
Voleka ni gauna vata ga oya, a torovi Elder Kearon e dua na turaga ka tarogi koya ena yalomarau, “O ya beka ni dua na Vakaitutu Raraba o a vosa tiko kina?” A sauma o Elder Kearon, “Io. Oya o Elder W. Rolfe Kerr ena Vitusagavulu.” A deguvacu na turaga oya, rai vakadodonu vei Elder Kearon ka sega ni kilai koya, ka kaya, “E rawa ni kilai e veigauna kece e dua na Vakaitutu Raraba, se vavei?” Sa qai vakusakusa yani na turaga oqo.
“Au taleitaka na italanoa oya baleta ni matataka na veika au vakila,” e kaya o Elder Kearon ena matadredredre. “Au rawa ni sotava talega nikua na veika vata oqo, ka na rairai sega ni rawa vua na tamata oya me raici au tani mai vei lewe vuqa me dua na iVakaitutu Raraba.”
Na nona dau veivakamarautaki kei na yalomalua o Elder Kearon a torovi koya mai vei ira era kilai koya se a nodra na madigi me ra veiqaravi vata kei koya. Kacivi, ka tabaki me lewena, na Kuoramu ni iApositolo Le Tinikarua ena ika 7 ni Tiseba, 2023, e kila o Elder Kearon ni nona veikacivi vou e sega soti ni baleti koya mai na tomani ni nona cakacaka tikoga na Turaga.
“Eda sa tiki taucoko ni Nona cakacaka,” e kaya o koya, “ni tovolea tiko me vukei ira na tamata me ra vakila na Nona rarama kei na Nona loloma kei na Nona veikauwaitaki. Na ka e vinakata o Koya me da cakava vaka lewe ni Nona Lotu me vakalougatataka na nodra bula na tani.”
Sa vakarautaki Elder Kearon na Turaga ena sala talei eso ka vakatabui koya ena dua na iyaragi ni isolisoli vakayalo ka na rawa kina vua me vakalougatataki ira na tani ena nona veikacivi tabu me ivakadinadina duatani ni “yaca i Karisito ki vuravura taucoko” (Vunau kei na Veiyalayalati 107:23). E dua e saumaki mai ki na Lotu ni se qai yabaki 26 ka lewe ni Lotu duadua ga ena kedra maliwa na tacina, o Elder Kearon e tamata yalololoma ka kila tu na ivakarau me vakarorogo kina, semati vata, ka vakacegui ira na luve ni Kalou. E dau yalololoma ka dau kune reki ena veiqaravi. Ni tarai ena veika malumu e sotavi kei na nodra yali na daulomani, e vakadinadinataka ni iVakabula o Jisu Karisito, ena Nona Veisorovaki, e solia na ilumu ni veivakabulai ka na yaco na siga me vakadodonutaka na ka kecega.
E dua na tisaipeli i Jisu Karisito o Elder Kearon ka nuitaka na Turaga. O koya e dua na iliuliu e dau rawarawa me muria baleta ni sa yalodina tiko me muria na iVakabula ka liutaki ira na tamata ki Vua.
“Na Turaga,” e kaya o Peresitedi Jeffrey R. Holland, Peresitedi Vakatawa ni Kuoramu ni iApositolo Le Tinikarua, “sa kauti Patrick yani ki na itutu sa taura tu oqo.”
iTubutubu Daulomani, Yalodina
Patrick Kearon a sucu mai Carlisle, Cumbria, ena vualiku kei Igiladi ena 18 ni Julai, 1961, ki vei rau o Paddy kei Patricia Kearon. Ni rau a sota na nona itubutubu, e rau a veiqaravi tiko ena mataivalu e Peritania ena gauna ni iKarua ni Valu Levu—o tinana ni a nasi tiko vaka mataivalu mai Idia kei Burma kei tamana ena Mataivalu ni Waqavuka Vakatui (MWV), talai ki Varanise, Vualiku kei Aferika, Sicily, kei Itali.
E nanumi rau na nona itubutubu, o Paddy kei Patricia, o Elder Kearon ena nodrau bula yalodina, veiqaravi, kei na solibula.
Dina ga ni rau sega ni dau lako mai lotu, e ratou a bula voli ena yalodina vakamatavuvale, veiqaravi, kei na solibula ka a vakauqeti Patrick tu vakadede, ka gone duadua vei iratou na lima na luvedrau na veiwatini. E nanumi Pat ni dua na tina dau loloma, “tina vakasakiti,” veidusimaki vakamalua, vakavuqa ena ivakaraitaki, ka sega sara ni dau cudruva e dua. E dau lomasoli, tu dei, ka veiraurau vinaka sara. Ka nanumi Paddy ena “nona igu, yalovinaka, kei na katakata e sega ni vakamacalataki rawa; nona loloma … na vanua dravuisiga mamaca kei Arapea [kei] na veidelana qiqi e Igiladi kei Ailadi; kei na nona gagadre ki lomalagi, na rarama ni matanisiga, kei na wasawasa. Au rawa ni kila vakamatata na nona ivakatakilakila ena noqu gadreva meu tiko e tautuba, ena vanua galala, ena cagi kei na rarama ni matanisiga.”
Ni oti nona veiqaravi ena RAF, a lako o tamai Elder Kearon me cakacaka vaka konitaraki ni tataqomaki mai Saudi Arabia. A vulica o Patrick, ni se gonetagane yabaki vitu e dua na lesoni bibi ena talairawarawa, ka cavuqaqataka ena imatai ni nona vosa ena koniferedi raraba ni vakaitutu Raraba. Ni sega ni kawaitaka na nodrau ivakasala na nona itubutubu me daramaka na ivava ena dua na ilakolako ni keba ena vanua dravuisiga, a lako okoya me vakadidike ena “ivava sabisabi” ka sotava kina e dua na kati ni scorpion ena botoni ni yavana.
Patrick Kearon ni se gonetagane e Saudi Arabia.
Ni oti e tolu na yabaki, a kunei koya o Patrick ena koronivuli curu i bure mai Igiladi ena levu ni nona galilitaki rau na nona itubutubu, e dua na galili ka vakamalutaki walega ena nodrau ivola ni veivakayaloqaqataki.
“A logaloga vinaka dina o Harry Potter ena Hogwarts ena kena ivakatauvatani. E a dredre,“ e kaya o koya me baleta na koronivuli curu i bure. “Au na lako ga i vale e na Siganisucu, Siganimate, kei na vulaikatakata. Au cakava eso na ivolanivula lailai ena draunipepa, biuta e dua na laini ena veisiga yadua, ka wilika tiko na siga me yacova niu sa rawa ni lesu tale ki na noqu matavuvale.”
Ni oti e vica na yabaki, ni se qai tekivu vuli tiko o Patrick ena ikarua ni nona koronivuli curu i bure mai Igiladi, a liwa mai e dua na cava kaukauwa mai na Wasa Ailadi. Na veika e yaco ena kui ni cava e luvuci kina e 5,000 na itikotiko ena veiyasana vakavolivolita. Eratou a kacivi o Patrick kei iratou na nona lewe ni kalasi me ratou veivuke ena sasamaki levu.
“Au se nanuma tikoga na bibi ni ibe suasua kei na kena iboi ni ka kece oqori,” e kaya o koya. “Ia au nanuma noqu guta ka cakava na cakacaka vata kei ira na noqu itokani vakavuli. Kau nanumi ira na tamata kei na nodra vakavinavinaka.”
Na ka a sotavi oya e rairai na imatai ni nanuma nei Patrick ki na veivakalougatataki ni muavata ni veiqaravi kei na ciqomi ni veiqaravi. E muri, qai kila o koya ni sa biuti koya na nona yalolailai ni itabagone “niu a vakaitavi tiko ena sasaga cecere oqo meu vukei ira na tiko tikivi keda.”
Ni oti na vuli torocake, a lesu tale o Patrick ki Saudi Arabia, ka tekivu vuli veiliutaki ena dua na kabani cokovata ni veimatanitu ni kakana kei na gunu. Na veika a yaco oya a tekivutaka na nona cakacaka ena vica vata na vanua ni cakacaka, ka yaco sara me tini ni daunivakasala ni veitaratara e Igiladi kei Sisita Kearon.
“Sa Veisau na Noqu Bula”
Ni yabaki 19 o Patrick, a takali na tamana kei tacina ena dua na vakacala-ka vakadomobula ni motoka e Saudi Arabia. “E veisau na noqu bulani rau sa yali,” e kaya o koya. Sa mai yali na ligai tamana veidusimaki, veivakayaloqaqataki, kei na rai rekitaki ni vuravura. A yali ena rarawa kei na lala ena dua na gauna, a gole ki vale o Patrick ki Igiladi vata kei tinana ia a qai lesu tale ki cakacaka e Saudi Arabia.
“E tu vei au na veimadigi yaga kece sara meu vulica ka tubu ka raica na kena cakacakataki na bisinisi,” e kaya o koya. E vakavinavinaka vakalevu o koya vua “e dua na boso totoka a dauniveivakavulici ka tuberi au ka yaco me dua na itokani lomani. O koya e dua vei ira na iyaloyalo vakatama au sa vakalougatataki kina mai na mate nei tamaqu.”
E muri, ni cakacaka tiko e Lodoni, a sotava o Patrick eso na lewe ni Lotu.
“Era a ivakaraitaki cecere ni neitou vakabauta,” a nanuma lesu o koya. “E dua vei rau mai California, kau a lako lai tiko kei na matavuvale oya niu cakacaka tiko e kea.“
Na ka oqori a solia vei Patrick e dua na yavu totoka ni kena kilai na Lotu. E tarai koya na reki ni matavuvale ka kunei ena veiqaravi, ia e vuqa na nona vakatataro me baleta na ivunau kei na vakabauta ni Lotu. Ni tiko tale mai Igiladi ni oti e rua na yabaki, a sotava o koya eso na “daukaulotu uasivi” ena gaunisala mai Lodoni. Ni oti na veivosakitaki ni kosipeli vata kei ira me vica na vula ka tukuna ni a sega ni toso tiko ki liu ena papitaiso, erau tarogi koya ke vinakata e dua na veivakalougatataki.
“Au vakadonuya me dua na noqu veivakalougatataki mai vua e dua na daukaulotu qase au kila,” e nanuma lesu o koya. “Na veika au vakila ena gauna ni veivakalougatataki oya sa dua na gauna bibi ni noqu saumaki. Oqo e dua na vakasama sega ni cakitaki rawa ni rarama kei na reki kei na vakacegu ka sega na vosa me vakamacalataka rawa. Na vosa ni veivakalougatataki a veivakauqeti ka maqosa sara.”
Na veika a sotavi oya, kei na “vica tale na ka ena noqu toso ki liu ena papitaiso,” a muataki Patrick ki na dua na ivakadinadina ni iVakabula kei na Nona Lotu vakalesuimai. Ni oti e vica na vula, ena Yakavi ni Siganisucu ni 1987, a papitaiso o koya me lewena na Na Lotu i Jisu Karisito ni Yalododonu Edaidai.
Vei ira era vakasaqara tiko na ivakadinadina, e kaya o Elder Kearon: “Digitaka na vakabauta, ka ciqoma na veisureti ena Alama 32. Muria na nomu nanuma vakayalo. Era na dusimaki iko, ka o na kila.”
“E Dua na iVurevure ni Kaukauwa”
Ni oti e rua na yabaki nona papitaiso, a tiko o Patrick ena dua na tabanalevu ni itabagone qase cake mai Lodoni ena gauna a sotavi Jennifer Hulme kina, e dua na gonevuli ena Brigham Young Univesiti mai Saratoga, California. A gole mai Lodoni o Jennifer me ono na vula me vulica na vulica na itukutuku ni droini kei na ivola Vakavalagi. O koya ka gone duadua vei iratou e walu na gone, a susugi cake ena Lotu.
E voleka ni gauna vata ga o ya, e toboka na matana o Patrick.
“Niu vakaraici koya ena veimaliwai kei ira na tamata ena tabanalevu, au raica na sala a qaravi ira kina,” e kaya o Jennifer me baleti Patrick. “Se lewenilotu vou, lewenilotu sa lesu tiko mai, e dua ka sotava tiko na dredre, se dua e itokani voleka, e dau qaravi ira na tamata kecega ena mataqali loloma kei na kauwai vata ga. Na ituvaki taumada oya ka bibi duadua a dreti au mai vua. Oqo e dua na ivakarau vinaka au raica ni taracake tiko o koya, ka sa dau vakayagataka vakavinaka na Kalou, ena 33 na yabaki keirau sa vakamau kina.”
Na loloma kei na veidokai nei Elder kei Sisita Kearon me rawa kina vei rau me rau cakacaka vata ena vakabauta.
Ni oti na nodrau veimusumusuki, erau a vakamau na veiwatini ena Valetabu e Oakland California ena Janueri ni 1991. E ratou qai susuga cake na nodrau matavuvale mai Igiladi me 19 na yabaki me yacova ni sa kacivi o Elder Kearon ena 2010 Vakaitutu Raraba vaka-Vitusagavulu ni oti na nona veiqaravi ena vica na veikacivi vakaveiliutaki, oka kina vaka peresitedi ni iteki ka Vitusagavulu ni iWasewase. A veiqaravi tiko vaka-Peresitedi Qase ni Vitusagavulu ena gauna a kacivi kina ki na Kuoramu ni iApositolo Le Tinikarua.
E kaya o Elder Kearon ni o watina e tisaipeli yalodina ka kila na nona ivakatakilakila dina. “E bulataka o koya e dua na bula marau, vinaka, maucokona, veivukei, rekitaki ni bula, vata kei na iVakabula ena kena usutu. O koya e dua na ivurevure ni kaukauwa ka dua na veivakalougatataki levu vei au me tekivu mai na gauna keirau a sota kina.”
O Susannah, na ikarua ni luvedrau yalewa ni lewe tolu na veiwatini, e kaya ni dau taleitaka o tinana me solia vakataki koya: “E sinai tu ena bula kei na rarama ka tu vua na yalodina ni kosipeli.” Me vakataki tamana, na tinana e “dauvakarorogo vinaka.”
Era kaya o Susannah kei iratou na tacina na nodrau loloma kei na veidokai ni nodratou itubutubu e rawa kina vei rau me rau cakacaka vata ena vakabauta ki na inakinaki vata. Erau dau vakarorogo ka veirokorokovi ka vakavinavinakataka na nodra dui vakasama kei na vakanananu.
E kaya o Emma, na luvedrau yalewa gone duadua, na nodrau veimaliwai duavata na nona itubutubu kei na nodrau loloma vakawasoma vei ira na luvedrau “sa cakava e dua na vanua mamarau ka taqomaki e vale.”
A kaya o Lizzie Kearon Staheli, na luvedrau qase duadua, me baleti tamana: “O Ta e dau raici ira na tamata ena mata va-Karisito. E dau maqusa o koya me vakayaloqaqataki ira ka vakaukauwataki ira na tamata. E raica o Koya na kena rawa ni yaco vei keda kece, se cava ga na keda ituvaki.”
E kuria o Emma: “E sinai tu ena vakabauta ka taleitaka na reki e kauta mai vua na kosipeli. Ni sa kunea na kosipeli vakalesui mai me vaka e dua na uabula, sa vakavinavinakataka o koya na duidui e yaco ki na nona bula e dua me ivurevure ni rarama kei na reki.“
E vakatokai iratou na luvena yalewa o Elder Kearon—o Lizzie (taba vata kei na watina, o Jonathan), Susannah, kei Emma—“na rarama totoka duadua ena noda bula, na noda iyau talei cecere duadua.”
O Jean B. Bingham, na Peresitedi Raraba vakacegu ni iSoqosoqo ni Veivukei, e vakamacalataki Elder Kearon ni sa rui malumu ena gauna ni leqa. A nanuma lesu o koya e dua na gauna a tao tu kina o Elder David A. Bednar ena Kuoramu ni iApositolo Le Tinikarua, o Elder Kearon, kei na so tale ena gauna e ratou tao tu kina ena dua na vanua tani ena dua na veisaqasaqa vakapolitiki. Ena veidusimaki nei Elder Bednar, a vakayagataka o Elder Kearon e vica na auwa ena dua na talevoni ni setilaiti ka cakacaka vata kei ira na vakailesilesi ni vanua kei na mata ni Lotu me tauyavu e dua na sala ni nodra vagalalataki.
“Na nona itovo malumu, sasaga vakatabakidua, kei na veivakararamataki vakauqeti a vakavurea e dua na iwali ka vakatarai me keitou biubiu taqomaki,” e kaya o Sisita Bingham.
Ena Tiseba ni 2021, e kurabui na matavuvale ni kila ni sa kune vei Sisita Kearon na kenisa ni sucu.
“Au sega ni nanuma ni na tauvi au se o keirau na kenisa,“ e kaya o Sisita Kearon. A vakatoka o koya me dua na gauna dredre sara ni veiqaravi, ia na iVakabula sa nona ivurevure ni kaukauwa mai na veika kece oqo. “Au se tiko ga ena kemocerapi, ia au vakavinavinaka niu kaya niu sa galala mai na kenisa era rawa ni tukuna na vuniwai.”
E kaya o Elder Kearon: “Sa tudei ka yalodina tiko o Jen ki na veika kece oqori. Keitou dau vakavinavinakataka e veisiga na nona bula, ka keitou vakavinavinakataka na veiqaravi uasivi a soli vua.”
Me vaka na veivakatovolei tale eso rau sa sotava kei watina, e kaya o Sisita Kearon, “Na bula e solia vei keda na ka eda sega ni vinakata meda cakava. Eda besetaka. Eda a sega ni kerea. Ia me da na sotavi ira ga. Na sala vinaka duadua me da sotava kina na veika e dredre sara sai koya me da gole vua na Turaga ka kerea na Nona kaukauwa, me da vakabauti Jisu Karisito kei na Nona loloma soliwale kei na kaukauwa. Ena dua na gauna balavu sa oti, au a vulica kina e levu na ka me baleta na sala e dau vukei keda kina na iVakabula ena noda veigauna titobu, butobuto.
Erau a rawata o Elder kei Sisita Kearon na kila-ka tabu oya ni sucu oti na imatai ni luvedrau, o Sean.
“Na Vatu ni Veisorovaki i Jisu Karisito.”
Ena imatai ni bukete nei Sisita Kearon, rau a vulica taumada na veiwatini mai na vakadikevi ni ultrasound ni luvedrau gonetagane e “dua na leqa ni uto, e dua na ituvaki rerevaki ni bula,” e kaya o Elder Kearon. “Keitou vaqara na vo ni vuniwai ni bukete vinaka duadua, uto, kei ira na dauveisele uto me walia na nona leqa. Keitou kunea e dua na timi kalasi e vuravura mai Lodoni, ka ratou yalodei ni rawa ni ratou walia na leqa.”
A veisele na dauveisele vei Sean ni se qai yacova e 19 na siga na nona sucu mai. E balavu ka mosimosi na veisele. Ni oti o ya, e kaya o Elder Kearon, “Sa sega tale ni rawa me tekivu vakataki koya na uto i Sean. Ka, sa takali mai vei keitou o koya. A mosimosi sara na nona mate. Oqo e sega ni kena icavacava keitou a lolovaka, masulaka, ka vakamamasu, ia keirau kila ni sa tiko ena gauna oya na ligai lomalagi.”
E kaya o Sisita Kearon, “A liutaki keirau na Kalou ena veivula ni bukete oya kei na bula totoka, lekaleka ni luvei keirau tagane ena kena itinitini, keirau kila ni keirau sa cakava na veika kece e rawa ni keirau cakava vua. Sa dua dina na vakacegu levu oya.”
Na veivakabulai e lako mai na kena kilai vakamatata cake na Veisorovaki kei na Tucaketale ni iVakabula a taukena o Sisita Kearon mai na dua na vuli titobu ni 1 Nifai kei na 2 Nifai. “Ena yaluma ni nona yali, au vakila ni vaka meu cawiri ena dua na qara loaloa,” e kaya o koya. “Ia, ni sa oti e dua na gauna, sa qai vesuki na lutu galala e na vatu ni Veisorovaki i Jisu Karisito—baleta ni dina. Na Nona loloma soliwale, Nona bula dina, e vakamamadataka sara na takali mosimosi ka nuitaki.”
Na veivakabulai e lako mai na nodratou sucu na luvedrau yalewa e tolu na veiwatini. “Era kauta mai na veivakabulai vei ira,” e kaya o Elder Kearon. “Sai iratou na rarama totoka duadua ena neirau bula, na neirau iyau levu duadua.”
Na veivakabulai e lako mai na nodra vosa na iliuliu vakauqeti ni Lotu, oka kina e dua na vosa ni koniferedi raraba nei Elder Lance B. Wickman, a wasea kina o Elder Wickman na mosi ni toso ena sala ni valenibula ni sa davo matemate tiko na luvena tagane lailai ena dua na mate ni gone. “E vakatavulica o Elder Wickman ni ‘vakabauta sai koya na rai’ ka sa vakararavi vua na Turaga na vakabauta,” e kaya o Elder Kearon. “E dau vakamareqeti sara vei au na nona vosa baleta ni kila vakamatata o koya na veika a sotava oya. Oqo a vakalevutaki ena levu ni gauna au wilika ka vakarorogo kina.
Na veivakabulai e lako mai na veiqaravi vei ira na tani ena nodra leqa—me ra ise ni valu mai Iurope, na veivakacacani se vakasaurarataki, se o ira na iliuliu ni Lotu vakataki Elder Paul V. O Johnson ena Mataveiliutaki ni Vitusagavulu, ka a vakayalia e dua na luvena yalewa ki na kenisa ena rua na vula ni bera ni laki tomani Elder Kearon ena Mataveiliutaki ni iWasewase e Iurope ena 2015.
“E rau a totoka sara o koya kei Sisita Kearon ena nodrau vukei keirau ena gauna ni lolosi kei na veivakabulai oya,” e kaya o Elder Johnson. “E rau a kauwaitaka sara vakalevu na neirau ituvaki. Au sa dau lomani irau tu ga kina.”
Oqori na sala ni bula vakatisaipeli. Eda veivuketaka na noda icolacola. Eda rarawa vata kei ira sa rarawa. Eda vakacegui ira era gadreva na veivakacegui. Ka da sa tu ka ivakadinadina ni Kalou—kei na yalayala tawamudu ni veivakaduavatataki rekitaki e rawati mai na Veisorovaki i Jisu Karisito. (Raica na Mosaia 18:8–9.)
A kidavaki ira na lewenilotu o Elder Kearon ena iWasewase tokalau kei Iurope.
Ia, ni sa yaco mai vei keda na gauna ni veivakatovolei, na loloma veivakabulai kei na ilumu ni veiqaravi era sa saumi lesu. Me vaka e dua na iApositolo ni Turaga o Jisu Karisito, sa vakarautaki o Elder Kearon me wasea ki vuravura taucoko ni itukutuku ni kosipeli ni inuinui, veivakabulai, kei na vakacegu.
“Na cava e yaco kina vei keda na veivakatovolei dredre?” E taroga o Elder Kearon. “Baleta ni da lako mai ki vuravura me da vuli, me da tubu, me da vakasavasavataki, ka me da lomana ka nuitaka na Tamada mai Lomalagi kei na noda iVakabula. Ena gauna oqo, eda sega ni rawa ni raici Rau, ka Rau sega ni rawa ni tauri keda. Ia na veivakalougatataki ni Veisorovaki ni iVakabula e tawayalani—tawayalani!”