Yalodina kina iVakataotioti

Mai vei Sisita Andrea Muñoz Spannaus

Na iKarua ni Daunivakasala ena Mataveiliutaki Raraba ni Goneyalewa

Ena Ligana,ona rawa ni vakadruka na Koliaci kece ga era basika ena nomu bula.

Kemuni noqu itokani lomani, nikua au via vosa vei kemuni—na itabagone ena Lotu.

Sa mai yabaki dua na neitou veiqaravi vaka Mataveiliutaki Raraba ni Goneyalewa. E levu na ka e mai yaco ena yabaki sa oti!

Keitou sotava e vuqa vei kemuni eda mai vulica vata na ivakavuvuli i Karisito. Eda lagata vata na sere, veitokani, ka veiqaravi ena noda itikotiko raraba. Eda mai vaqaqacotaki ena rogoci ni nomuni ivakadinadina ena koniferedi ni itabagone kei na veisoqoni e vuravura raraba. Eda mai sokalou vata ena vale ni Turaga.

Ena veigauna kece oqori keitou wasea tiko e dua na itukutuku ni Turaga o Jisu Karisito. E sega ni dua na kena duidui ena bogi nikua; e dua noqu itukutuku vei kemuni, na itabagone ena Lotu i Jisu Karisito.

Na vei Taro Levu

O sa bau vakasamataka beka ena rawa vakacava mo yalodina tiko vua na Kalou ni o bula voli ena vuravura caka cala? O na rawata mai vei na kaukauwa mo toso tikoga ki liu ka tomana tikoga na caka vinaka? O na vakila vakacava na reki dina?

Au nanuma ni veika e rau sotava o Tevita kei Koliaci ena rawa ni veivuke.

Tevita kei Kolaiaci

Ena Veiyalayalati Makawa, e rau a veivaluti tiko na mataivalu ni Filisitia kei Isireli, ena vei mataka kei na yakavi, ena dau bolebole toka e dua na tuwawa ni Filisitia o Koliaci kina dua ga na Isireli me vala kei koya.

Ena kedra maliwa na Isireli e tiko kina o Tevita, e dua na vakatawa ni sipi gone ka tamata lailai sara mai vei Koliaci, ka vakaitamera na nona vakabauti Jisu Karisito. E yaloqaqa o Tevita me vala. Na tui tale madaga e saga me vakayalolailaitaki koya, ia e digia o Tevita me vakararavi vei Jisu Karisito.

Taumada, e vala o Tevita kei na dua na laione kei na pera. Mai na veika oqori, e kila o koya ni taqomaki koya na Kalou ka vakavuna me qaqa. Vei Tevita, na inaki ni Kalou e inaki bibi duadua. Vakasinaiti tu ena vakabauta na Kalou ka na sega ni laivi koya, e soqona e lima na vatu, taura cake nona irabo, ka gole yani me sotava na tuwawa.

E tukuna vei keda na ivolanikalou ni matai ni vatu a viritaka yani o Tevita e tau e yadrei Koliaci, ka mate kina.

Vasaqara na iSaunitaro

E dina ga ni vakayagataka o Tevita e dua na vatu me vakamatei Koliaci, ia e vakarautaka mai o koya e lima. E lima! E vukei au na ka oqo meu vakasamataka na sala au rawa ni vakarautaki au kina meu sotavi vuravura.

Vakacava mada, kevaka na vatu yadua nei Tevita e matataka e dua na kaukauwa eda gadreva meda bula qaqa kina? Na cava beka na lima na vatu oqori? Au vakasamataka ni na rawa ni vakaoqo:

Na vatu ni noqu lomana na Kalou.
Na vatu ni noqu vakabauta na iVakabula, o Jisu Karisito.
Na vatu ni noqu kila na kequ ivakatakilakila dina.
Na vatu ni noqu veivutuni e veisiga.
Na vatu ni noqu rawa ni vakayagataka na kaukauwa ni Kalou.

Meda veitalanoataka mada na sala eda vakalougatataki mai na kaukauwa eso oqo.

iMatai, na vatu ni noqu lomana na Kalou. Lomana na Kalou sa imatai ni vunau levu. Na idusidusi ni Me iSakisaki ni iTabagone e vakatavulici keda: “Ni lomani keda na Kalou. E sa Tamamu o Koya. Na Nona loloma uasivi e rawa ni vakauqeti iko mo lomani Koya. Ni sa veivakauqeti bibi duadua ena nomu bula na nomu lomana na Tamada Vakalomalagi, ena rawarawa cake e vuqa na vakatulewa.”

Na noda loloma vua na Kalou kei na noda veisemati voleka kei Koya e solia vei keda na kaukauwa eda gadreva meda veisautaka na lomada ka vakarawarawataka na noda sotava na veibolebole eso.

iKarua, na vatu ni noqu vakabauta na iVakabula, o Jisu Karisito. Ni lako mai i vuravura o Jisu Karisito, e vakararawataki ena vuku ni noda ivalavala ca, ka kauta Vua na noda rarawa, yaluma, malumalumu, kei na noda tauvimate vakayago kei na vakasama. Oqori na vuna e kila kina o Koya na sala me vukei keda kina. Na vakabauti Jisu Karisito e kena ibalebale meda nuitaka vakataucoko na Nona vuku, gauna, loloma, kei na kaukauwa ni sorovaki ni noda ivalavala ca. Na vatu ni vakabauti Jisu Karisito ena vakadruka na “tuwawa” cava ni noda bula. Eda rawa ni vakadruka na vuravura lutu oqo baleta nia vakadruka iliu o Koya.

iKatolu, na vatu ni noqu kila na kequ ivakatakilakila dina. Sa vakatavulica, noda parofita lomani, o Peresitedi Russell M. Nelson, na keda ivakatakilakila bibi duadua sai koya nida luveni Kalou, luveni veiyalayalati, ka tisaipeli i Jisu Karisito.

E veisau na veika kecega niu kila se o cei o au. Niu vakatitiqataka noqu rawa ka, au dau kaya vakawasoma ena noqu vakasama se ena domolevu, “Au luvena yalewa na Kalou, Au luvena yalewa na Kalou,” na kena levu me yacova niu sa yalodei tale meu toso tiko ga.

iKava, na vatu ni noqu veivutuni e veisiga. Ena idusidusi ni Me iSakisaki ni iTabagone, eda wilika kina: “E sega ni totogi ni ivalavala ca na veivutuni; oqori na sala e sereki keda kina na ivakabula mai na ivalavala ca. Na veivutuni e kena ibalebale na veisau—meda vuki tani mai na ivalavala ca ka gole vua na Kalou. E kena ibalebale meda vinaka cake ka ciqoma na veivosoti. Na mataqali veisau vakaoqo e sega ni ka ni dua ga na gauna; oqo e dua na sasaga e na tomani tikoga.”

E veivakauqeti nida vakila na veivosoti ni Kalou kei na noda kila nida sa savai ka vakaduavatataki kei Koya. Na veivutuni e rawa ni noda kece.

Na ikalima ni vatu sai koya na vatu ni noqu rawa ni vakayagataka na kaukauwa ni Kalou. Na veiyalayalati eda cakava kei na Kalou, me vaka eda cakava ena cakacaka vakalotu ni papitaiso, e solia vei keda na kaukauwa vakalou. Nona kaukauwa na Kalou e kaukauwa mana ka rawa ni vukei keda meda sotava na bolebole, cakava na vakatulewa vinaka, ka vakalevutaka cake na noda igu meda vosota vakadede na ituvaki dredre eso. E dua na kaukauwa eda rawa ni tubu kina ena veika matata eda gadreva.

Na idusidusi ni Me iSakisaki ni iTabagone e vakamacalataka ni: “Veiyalayalati e semati iko vua na Tamada Vakalomalagi kei na iVakabula. Era vakalevutaka na kaukauwa ni Kalou ena nomu bula.”

Da veitalanoataka mada na isema oqori. Ko nanuma beka nona vakavulica o Karisito na duidui ni vale ka tara ena dela ni vatu kei koya ka tara ena nuku? E vakamacalataka o Elder Dieter F. Uchtdorf: “E sega ni bula e dua na vale ena dua na cava baleta ni kaukauwa na vale. E sega talega ni bula tiko baleta ni kaukauwa na vatu. Na vale sa bula mai na cava baleta ni sa kabi dei tu ki na vatu kaukauwa oya. Sai koya na kaukauwa ni isemakina vatu e bibi.”

Na noda isema yadua vei Jisu Karisito ena solia vei keda na yaloqaqa kei na nuidei meda toso tikoga i liu ena kedra maliwa na tamata era sega ni rokova na noda vakabauta se o ira era dau vakararawataki keda. E sureti keda o Karisito meda dau vakananumi Koya tikoga; e tukuna vei keda, meda “vakararavi tiko mai vei au ena vakasama kece Noda vakasamataka na iVakabula ena solia vei keda na makare ni vakasama meda vakatulewa kina, eda na sega ni rere na cakava na ka, kei na noda rawa ni vakasega kina veika e veibasai mai na ivakavuvuli ni Kalou. Niu sotava na dredre ena dua na siga kau vakila ni sega ni rawa niu vosota tale, noqu vakasamataki Karisito e kauta mai vei au na vakacegu ka solia na inuinui.

Eda na vakayagataka vakacava na kaukauwa oqo i Jisu Karisito? Noda talairawarawa kina noda veiyalayalati kei na vakalevutaki ni noda vakabauti Jisu Karisito e ka bibi.

Au diva dina me dua tale na nona vatu o Tevita; oqori ena vatu ni noqu ivakadinadina. Na noda ivakadinadina e tarai cake mai ena veika vakayalo eda sotava ka da kila kina na veivakayarayarataki vakalou ena noda bula. E sega ni dua e rawa ni kauta tani mai vei keda na kila oqo. Noda kila na veika eda kila mai na veika vakayalo eda sotava e mareqeti. Na dina kina kila eso oqori e solia vei keda na galala. E solia vei keda na reki! Kevaka eda taleitaka na dina, eda na vakasaqara, ena gauna eda kunea kina, eda na valataka.

Dua na Veisureti

Me vaka ga noqu digia na vatu naba ono, au sureti iko mo ni sota vakalasi, kuoramu, se matavuvale ka vakasamataka na veikaukauwa eso ko na gadreva mo yalodina tikoga vua na Kalou, ka vakadrukai vuravura.

Dua na Yalayala

Noqu itokani lomani, e nanamaki tu o Karisito me salavata kei keda ena ilakolako ni noda bula. Au yalataka vei iko, ni ko taura matua na itautauri kaukamea, ko na salavata kei Jisu Karisito. Koya na liutaki iko ka o Koya vakavulici iko tiko. Ena Ligana, ona rawa ni vakadruka na Koliaci kece ga era basika ena nomu bula.

iVakadinadina

Au vakadinadinataka ni rawa nida kunea na reki ena noda masu, wilika na iVola i Momani e veisiga, vakaivotavota ena sakaramede ena vei Sigatabu, kei na lakova na semineri—ena matakalailai! E kunei na reki ena cakacaka vinaka.

E kunei na reki ena noda yalodina vua na Kalou ni vuravura taucoko, na iVakabula kei vuravura, na Tui ni vei Tui. E kunei na reki nida tisaipeli i Jisu Karisito.

Na Kalou na Tamada. E kila o Koya na gagadre ni lomamu kei na veika ko rawa ni rawata, ka nuitaki iko o Koya.

Kemuni na itabagone lomani, ena vukei iko o Jisu Karisito mo yalodina tikoga kina ivakataotioti. Ena veidina oqo, au wasea kina na noqu ivakadinadina ena yaca i Jisu Karisito, emeni.