O le iloaina poo ai i tatou e faamalosia ai i tatou i le Olaga

Saunia e Elder Jared V. Ormsby

Fitugafulu Eria a le Pasefika

A’o ma laiti, sa ma fiafia lava ma lou uso laitiiti o Luka pe a foi mai lo ma tama i le fale mai le galuega. E ma te faatali i o ma ofu moe ma faanatinati atu i lalo i faasitepu e faafeiloai o ia i le faletaavale pe a taunuu. E faailoa mai lava e lo ma tama ia i ma’ua lona fiafia tele e vaai mai ia i ma’ua. E na te taʻua i ma’ua o ana “tagata autu”. E na te fesili mai pe sa faaape’i lo ma aso ma po o a mai lo ma tina.

O nisi taimi e faato’a oo mai lo ma tama i le fale ua uma ona tuu i ma’ua i le moega e lo ma tina lelei. I na taimi e sau ai o ia e asiasi mai i o ma’ua potu. E ma te fesili atu i taimi uma ia te ia e faasoa mai se tala a o sauni e momoe. Sa ma fiafia i ana tala. E faatatau lava ia i ma’ua, “Iareto ma Luka”. O le mea e sili ona taua, e faaiu lava ia tala i le ala lava e tasi. O Iareto ma Luka o le a tuputupu ae o ni “tagata lelei” ma “auauna i ni misiona”.

O nei tala sa i ai se aafiaga loloto ia i ma’ua a’o tuputupu ae. E ala mai i nei tala, na faamalosia mai ai e lo ma tama ia i ma’ua e faapea o lo ma faasinomaga e totonugalemu i le talalelei a Iesu Keriso, o le avea ma ni alii lelei, ma le gafatia e faia ai soo se mea ma te mafaufau i ai. Pe a matou malaga faatasi o se aiga, e faamamafa mai e o ma matua o i ma’ua o fanau a le Atua ma e mafai ona faamanuiaina i ma’ua i soo se mea ma te taula’i atu i ai i le olaga.

Ou te talitonu o nei tala na fesoasoani e fausia ai lo ma talitonuga I o ma tulaga gafatia ma le malosiaga faalelagona. E ala i le aoaoina pe o ai i ma’ua ma e uiga i lo ma’ua gafatia paia, na tapenaina i ma’ua e o ma matua ina ia faamanuiaina ma faatoilaloina faigata ma luitau i le olaga.

O i tatou o fanau a le Atua. Pe a tatou malamalama i o tatou faasinomaga paia, e fesoasoani ia i tatou e faatoilaloina luitau ma faia filifiliga sili atu. E fesoasoani ia i tatou e “mafaufau faaselesitila” aua ua le gata ina tatou malamalama poo ai i tatou, ae faapena foi i le mafuaaga ua tatou iai iinei ma le faamoemoega o puapuaga.

Ua aoao mai Peresitene Russell M. Nelson e tolu upumoni faavae e fesoasoani tatou te saunia ai mo le ola e faavavau:

Muamua, ia iloa le upumoni po o ai oe
Lona lua, ia iloa le upumoni e faatatau i mea ua ofoina mai ia te oe e le Tama oi le Lagi ma Lona Alo.
Ma le lona tolu, ia iloa le upumoni e faatatau i lou liua.

E pei ona saunoa Peresitene Nelson “…o le ala e te mafaufau ai po o ai moni lava oe e aafia ai toetoe lava o faaiuga uma e te faia”. Na faailoa mai e Peresitene Nelson ni faasinomaga autu se tolu: muamua, o i tatou o fanau a le Atua, lona lua, i le avea ai ma tagata o le Ekalesia, o i tatou o fanau o le feagaiga, ma lona tolu, o i tatou o soo o Keriso. O nei faasinomaga e mafai ai ona tatou lauolaola fa’aleagaga nai lo le “mole fa’aleagaga”.

A o avea a’u ma se loia talavou, sa masani ona ou faailoaina a’u o se “loia”. Peita’i, o le tulafono o se matātā ou te faia, ae le o a’u moni lena. Sa ou iloa pe afai ou te faasino ia te a’u o se “soo o Keriso”, ou te le toe faavasegaina lo’u olaga i le ekalesia, galuega, aiga, po o gaoioiga faaagafesootai ae nai lo lena, o le a faia a’u faaiuga uma e faatatau i lo’u taunuuga e faavavau. Ou te talitonu, o se taunuuga, o le a avea a’u o se tane, tamā, uo ma se loia lelei atu.

I tausaga e tele ua mavae, ao avea ma se Peresitene talavou o le Siteki, o se tasi o a matou epikopo sa faaleagaina lona fale i Kalaiasitete e mafuie ma sologa ma sa tatau ai ona fesiitai solo i le tele o taimi. Sa ou fesili atu i lenei alii lelei pe sa faapefea ona ia taulimaina nei mafatiaga. I lena taimi, sa ia faamanatu mai ia te au o ia ma lona aiga sa latou iloa o i latou o fanau a le Atua, ma sa latou talitonu o le a tausia ma leoleoina i latou e le Atua.

O le aoaoina o a tatou fanau i le po o ai i latou e fesoasoani e saunia ai i latou mo le faavavau. Fai mai le Faataoto 22:6, “A’oa’o ia i le tama e tusa ma lona ala; a oo ina toeaina lava o ia, e le te’a ese ai.”

A tatou aoao fanau i le fuafuaga a lo tatou Tama Faalelagi faatasi ma o latou faasinomaga ma gafatia paia, ua tatou aoao atu e alofaina i latou, ma e i ai so latou taua, ma o o latou gafatia paia o le avea faapei o lo latou Tama i le Lagi. Pe a tatou ola e tusa ma na upumoni, ua tatou faaali atu ia tatou fanau, talavou, ma talavou matutua e faapea, e mafai ona latou faatoilaloina luitau o le olaga ma faamanuiaina ma fiafia e ala i le ola ai i le talalelei a Iesu Keriso.

Na tautino mai e Mamona, “Faauta, o a’u o se soo o Iesu Keriso, le Alo o le Atua. Ua ia valaauina a’u e talai atu Lana afioga i totonu o ona tagata, ina ia mafai ona latou maua le ola tumau-faavavau.” I lenei faamatalaga ua faasoa mai ai ma le malosi e Mamona lona faasinomaga, molimau, ma le faamoemoega. A o taliaina e a tatou talavou upu a Mamona i lenei tausaga, o le a le gata ina latou aufaatasi ma lo tatou Tama Faalelagi ma Iesu Keriso i le La galuega paia ae ia saunia lelei ai mo luitau ma faigata o le olaga faaletino.

Pe tatou te laiti pe matutua, talosia ia tatou manatuaina pea le fautuaga maoae a Elder Dieter F. Uchdorf:

“. . . o lo tatou taunuuga e le fuafuaina i le aofai o taimi tatou te tautevateva ai ae o le aofai o taimi tatou te tutulai ae ai, tafi ese le pefu mai ia i tatou, ma agai i luma.”