Faamanuiaina e ala mai Savali a Aposetolo o Aso Nei

“Faauta i lo tatou manaomia o le konafesi aoao!” sa molimau mai ai Elder Robert D. Hales i le 2013. “E ala i konafesi, e faamalosia ai lo tatou faatuatua ma faalolotoina ai a tatou molimau.” I le lauga lava lea e tasi, sa folafola mai ai e Elder Hales:

“. . . afai e te loto i ai, faalogo o le a e lagonaina le Agaga i totonu ia te oe. O le a tau atu e le Alii ia te oe le mea e finagalo o Ia e te faia i lou olaga.

“I konafesi e mafai ona tatou maua ai le afioga a le Alii ua faatatau mo na o i tatou lava.”

I lenei vaega faapitoa, o sui toalaiti o a tatou au peresitene o le Aualofa mai le salafa o le Pasefika ua molimau mai i faatonuga patino na latou maua mai le Agaga Paia e ala mai i upu a o tatou Aposetolo o aso nei. E faasoa mai e tuafafine taitasi se savali o le Konafesi Aoao sa faapitoa lava ona ia manatuaina, ma le auala ua faia ai se eseesega i lona olaga.

Tuafafine Shireen A’Costa

Uarota a Suva 1, Siteki a Suva Fiti

Ia Setema o le tausaga ua tuana’i, sa ou malaga ai i fafo i se misiona faalegaluega ma fuafua ai ou te malolo mo ni nai vaiaso mai le galuega manū o mafai ai. O vaiaso taitasi a o ou toesea ai, sa ou fai ifo pea ia te au o le a ou totogiina la’u sefuluai pe a ou toe foi mai. Ina ua ou toe foi mai i le fale i nai vaiaso mulimuli ane, sa ou iloaina ai ua tolu masina talu mai le taimi mulimuli na totogi ai la’u sefuluai. O lo’u Aso Sa muamua na ou toe foi ai i le lotu sa ou totogiina la’u sefuluai mo na o le masina muamua na ou toesea ai, ona ou tauivi ai lea i lou mafaufau. Ua matou i ai nei i le vaitau o aso fiafia. Pe sa manaomia moni ea ona ou totogiina?

Ina ia faafilemu lo’u mafaufau, sa ou tusi atu i lo’u epikopo ma faasoa atu i ai lo’u faafitauli ma le faamoemoe o le a ia alofa mutimutivale mai ia te a’u ma ta’u mai le mea sa ou fia faalogo i ai. Sa ia fesili mai, “E te fia alu i le malumalu pe leai?” Mo le umi e mafai ona ou manatuaina ai, o lenei poloaiga sa o se tulaga lea e muai manaomia.

Sa ou iloa i lo’u loto sa tofotofoina lo’u faatuatua ma sa ou teenaina mo a’u lava faamanuiaga sa folafola mai e le Alii mo i latou e totogiina ma le faamaoni a latou sefuluai: “O le a Ia toina pupuni o le lagi mo outou, ma sasaa atu le manuia mo outou, ina seia silisili ona tele.”

I lana saunoaga, Sefuluai: Toina o Pupuni o le Lagi, sa faasoa mai ai Elder Neil L. Andersen:

“O pupuni o le lagi e matala mai i auala e tele. O nisi e faaletino, ae o le tele e faaleagaga. O nisi e maaleale ma faigofie ona le amanaiaina. Ia faatuatuaina le taimi a le Alii; e oo mai lava faamanuiaga.”

I le avea ai o se tina ua maliu le toalua, o se tina i se tamaitai talavou lalelei, o se mātua nofotoatasi, ma o le fesoasoani muamua i le Aualofa a le matou uarota, ou te faalagolago tele i nei faamanuiaga folafolaina.

O le olioli sa ou lagonaina, o le filemu sa lofituina ai a’u na semanu e le mafai pe ana ou le faamaoni ma faatuatua i le faia o le mea sa’o. Ou te iloa ma le mautinoa o nei folafolaga e moni, ma e ui lava i luitau uma sa ou onosaia, ae ua faamanuiaina pea lava pea lo’u olaga.

Sister Marlène Aroita

Uarota Toahotu, Siteki a Tahiti Taravao

O le mea moni, o savali uma o konafesi aoao e fafagaina lo’u agaga . . . i taimi uma.

I le konafesi o Oketopa 2023, ona sa ou feagai ma se taimi faigata faalelagona, o le savali a Elder Alan T. Philipps i lana saunoaga, E silafia ma Alofa le Atua ia te Oe, na aumaia ia te a’u se toomaga sili. Na fesoasoani ou te manatua ai o a’u o se afafine faapelepele o le Tama Faavavau ma lo’u Faaola o Iesu Keriso. Sa Ia totogiina le tau mo lo’u agaga. E ala mai i Lana taulaga, e mafai ai ona ou salamo i taimi uma ou te faia ai se measese ma tutumau ia avea ma tagata sili o a’u lava.

E tusa lava pe le maoae lo’u talitonu ia te au lava, ae faatasi ma le Alii i o’u tafatafa, ou te maua ai le malosi e onosaia ai tulaga uma. E le afaina pe a tagi, pe taofi, pe pa’u . . . ona o le a iai se aso lelei atu a taeao, faatasi ma le olioli, alofa, ma le faatuatua. Ou te faafetai i le iloa sa alofa tele le Atua ia i tatou taitoatasi, sa Ia saunia ai mea uma mo lo tatou fiafia. O Peresitene Russell M. Nelson ma taitai uma o le Ekalesia o tufuga aao a lo tatou Tama Faalelagi e taiala i tatou i o tatou puapuaga.

O tausaga nei e lua ua tuana’i atu, o savali o konafesi aoao sa foliga mai o se maea faaola . . . o tali i a’u talosaga. Sa latou fesoasoani mai ia te au e uia o’u faanoanoaga ma le onosai sili atu a o ou faaauau ai i le ala o feagaiga. O loo ou taumafai i le mea sili ou te mafaia e mulimuli i le fautuaga a Peresitene Nelson ina ia agalelei tele atu ma ia i ai se mafaufau faaselesitila. Ua sologa lelei tulaga ua i ai; ua faigofie atu ona tauave le avega. A aunoa ma lo Laua alolofa, semanu e le mafai ona ou faaauau i luga o le ala. Ou te iloa e alofa le Atua ia i tatou, ma o se pulu pasama mo lo’u loto ma le agaga.

Tuafafine Emma Alofipo Tanuvasa

Uarota a Massey Park, Siteki a Aukilani Papatoetoe

O le saunoaga a Peresitene Russell M. Nelson i le konafesi aoao sa faaautuina Olioli ma le Ola ai Faaleagaga (Oketopa 2016) sa matuā aafia ai lo’u olaga. Sa ia aoao mai o se mataupu faavae autu i le ola faaleagaga, aemaise lava i o tatou tulaga pagatia, o le “Ua i ai tagata, ina ia latou maua le olioli.”

O Aokuso 2014, na maliliu ai o’u matua lalelei o Kalisi ma Fa’amanatu Alofipo i le vaiaso lava e tasi ona o gasegase. O o’u matua o ni tagata liliu mai i Le Ekalesia a Iesu Keriso o le Au Paia o Aso e Gata Ai, ae o le taimi lava na liliu mai ai, sa tumau e oo i le iuga o ni soo moni o Iesu Keriso. E faapefea la ona ou maua le olioli i le toesea ai o oʻu mātua uma e ui lava e i ai taimi e matuā lofituina ai loʻu faavauvau?

Sa faamanatu mai e Peresitene Nelson ia te a’u e faapea:

“E mafai ona tatou amata i le ‘vaavaai atu ia Iesu o le na te taitaiina ma le na te faaatoatoaina le faatuatua’ ma, ‘i mafaufauga uma.’ E mafai ona tatou tuuina atu le faafetai mo Ia i a tatou tatalo ma e ala i le tausia o feagaiga na tatou osia ma Ia faapea ma lo tatou Tama Faalelagi. Ao atili ai ona moni lo tatou Faaola ia i tatou ma a o tatou augani atu mo Lona olioli ina ia tuu mai ia i tatou, o le a faateleina ai lo tatou olioli.”

Ou te iloa e moni lenei mea ma molimau atu o le olioli moni e oo mai e ala ia Iesu Keriso ma Lana Togiola e le i’u. E oo mai e ala i le tausia o a’u feagaiga, lea e fusia ai a’u i lo’u Faaola ma tuuina mai ia te a’u le avanoa i Lona mana maualuga atu ma feagai ai ma soo se tofotofoga po o faigata. E oo mai le olioli e ala i le faamauina o se aiga e faavavau i le malumalu paia—i o’u matua, lo’u toalua o Alofa ma le ma tama teine o Ane.

O le olioli e oo mai foi e ala mai i uso ma tuafafine faamaoni o auaunaga o e e faamalosia i tatou i taimi e manaomia ai.

Sa molimau mai Peresitene Nelson e faapea: “O le olioli o se meaalofa mo e faamaoni. O le meaalofa e oo mai i le taumafai ma le loto i ai e ola i se olaga amiotonu, e pei ona a’oa’oina mai e Iesu Keriso.”