Itulau i le Lotoifale
O Le Tusi a Mamona e Musuia ai le Faatuatua ia Iesu Keriso
O le au paia i Melepone o Le Ekalesia a Iesu Keriso o le Au Paia o Aso e Gata Ai ua latou liliu atu i le Faaola i a latou suesuega o le Tusi a Mamona i le 2024.
I le avea ai ma se vaega o le taulaiga a le Au Peresitene o le Eria o le Pasefika mo le 2024, sa auai ai tagata o le Ekalesia a Iesu Keriso o le Au Paia o Aso e Gata Ai i sauniga tapuai i Aso Sa taitasi, sosoo ai ma le latou vasega o Aoaoga Faavae o le Talalelei lea latou te talanoaina ai mea na latou aoaoina i le vaiaso ua te’a mai le Tusi a Mamona: O Se Tasi Molimau ia Iesu Keriso.
O lenei vaega o tusitusiga paia, o se soa i le Tusi Paia, ua faaliliuina ai loto, tai toatasi, i le Faaola o le lalolagi, e ala i le faamalosia o le faatuatua ia te Ia, ma fesoasoani i tamaiti aoga o lenei tusitusiga paia ia lagonaina le alofa o le Atua.
Ina ua faalogo Isaraelu Lutalo, o se tagata fou faatoa papatisoina o le Ekalesia, e uiga i le Tusi a Mamona mo le taimi muamua, sa ia faitau i le 2 Nifae 31:17–18 e uiga i le ulu atu i le malo o le lagi e ala i le salamo ma le papatisoga.
“Ina ua ou faitau i lenei mau mo le ulua’i taimi, sa saunoa moni mai lava i loʻu loto,” sa ia manatunatu ai. “Sa ou fia iloa pe faapefea ona manuia i le malo o le Atua, e faia Lana galuega. Sa ou aoaoina o laasaga muamua o le salamo ma le papatisoga. O nei fuaiupu e latalata i lo’u loto.”
Sa saunoa mai Lincoln Babbage, o le o loo auauna atu o se taitai o se aulotu i Melepone, e faapea, “Ou te faafetai mo le Agaga e aumaia e le Tusi a Mamona i lo’u olaga. I se tasi taimi, a o ou mafaufau loloto i le faamoemoega o le olaga ma le auala e ola ai i se olaga lelei, sa ou faitau i le Alema, mataupu e 5 e uiga i le olaga ma le toetutu. Sa ou maua se lagona mafanafana tele i lo’u loto ma lagonaina le Agaga o ta’u mai ia te au e tumau i le ala sa’o ma le vaapiapi (o le tausia o poloaiga a le Atua) ma o le a lelei mea uma.”
O Elder Kunhua Lee, o loo auauna atu o se faifeautalai talavou mai Taiwan, sa saunoa i se sauniga i le Aso Sa talu ai nei e faatatau i mea sa ia aoaoina e uiga i le faatuatua mai le Tusi a Mamona. “I le Alema mataupu e 32,” na ia fai mai ai, “ua tatou aoao ai tatou te faaali atu lo tatou faatuatua i le Atua e ala i auala laiti ma faatauvaa. E pei lava o se fatu e tupu a’e e avea ma se laau, o le faataitai ai i le faatuatua e taitai atu ai i le faatuatua sili atu.”
Fai mai Sister Trisha Teeples, o se isi faifeautalai, “A tatou o mai i le lotu ma se loto momomo ma le agaga salamo, o le a fesoasoani le Faaola ia i tatou e suia o tatou natura ma lagona Lona alofa. O le tele o lo tatou foai atu ia te Ia, o le tele foi lena o lona toe foai mai ia i tatou. E eseese uma o tatou faanoanoaga ma tiga i o tatou olaga, ae e leai se mea e telē atu i lo tatou Faaola. Ua aumaia e le Tusi a Mamona ia te a’u le tele o faamafanafanaga ma faamalosia ai la’u molimau ia Iesu Keriso.”
O Jody McClellan, o se faifeautalai matua o loo auauna ma lana tane i Melepone, e fiafia i le matagofie “o le mafai ona tatou faitau ma suesue i le Tusi a Mamona mo le olaga atoa ma aoao ma tuputupu ae i faitauga taitasi.”
I le 1 Nifae, mataupu e 8, na vaai ai le perofeta o Liae i se faaaliga i le laau o le ola ma fua paepae matagofie e faatusa i le alofa o le Atua. Ua manao o ia i lona aiga ia pipiimau i se ai uamea i luga o se ala sao e tau atu i le laau ina ia mafai ona latou aai faatasi ma ia i lenei fua tautele.
O le manatunatu ai i lenei tala i le Tusi a Mamona, na faapea mai ai Sister McClellan, “Ua faamanatu mai ia te au le taua o le pipiimau i le ai uamea ma tumau i le laau a o taumamafa i le fua o le laau—i se isi faaupuga, o le auai i feagaiga tatou te osia i Le Ekalesia a Iesu Keriso o le Au Paia o Aso e Gata Ai. Mai le papatisoga e oo i le tumau e oo i le iuga, tatou te aai i le fua lea, e pei ona faamatala mai e Liae, ‘e faatumulia ai o tatou agaga i le olioli tele’.
A o ou auauna atu, a o ou auai, ma a o ou matauina faifeautalai o faasoa atu le olioli o le talalelei, e le mafai ona taofia lo’u mafaufau i le ‘manaomia’ o fua o le talalelei. Ou te faafetai mo le 18 masina ua tofia ai au e Iesu Keriso e valaaulia isi e aai i le fua ma maua ai le fiafia moni e faavavau.”