Mensahe sa Area
Ang Simbahan Nag-abli sa Ikatulo nga Templo sa Pilipinas
“Nagtuo ko nga nakahibalo nako nga ang Simbahan tinuod. Apan kini mao ang usa ka talagsaon nga subling kompirmasyon para nako nga kini mao gayod ang simbahan sa Ginoo.”
Daghang mga miyembro sa Simbahan ang mipahayag og susama nga mga pagbati mahitungod kon unsa ka lumo nga espirituhanong mga gutlo, maanindot nga mga milagro, matam-is nga mga panag-abot [reunion], ug mapaubsanong mga oportunidad sa pagserbisyo nga ilang nasinati atol sa Pagbukas sa Balay ug Pagpahinungod sa Urdaneta Temple nagdugang sa pagmatuod ngadto kanila nga kini mao gayod ang bugtong tinuod nga simbahan ug wala nay lain pa.
Kapin sa 66,000 ka tawo gikan sa nagkalain laing tinuohan, mga kahimtang sa kinabuhi, ug mga pangidaron maoy nagsaksi kon unsa ka nindot ug balaan ang Balay sa Ginoo. Alang sa kadaghanan, kadto mao ang panagsa ra kaayong mahitabo sa kinabuhi nga kahigayonan nga makakita sa sulod sa sagradong templo.
Pagbukas sa Balay sa Urdaneta Temple
Dugang walo ka tuig. . . .
Ang mga miyembro sa Simbahan mahinamon mahitungod sa pagdala sa ilang mga anak ngadto sa Templo, ilabi na sa mga gagmayng bata.
Daghang magtiayon ang naghandom mahitungod sa ilang kaminyoon sa templo. Espesyal kaayo ang kasinatian tungod kay kauban nila ang ilang mga anak.
Nakabaton sila og maanindot kaayo nga mga gutlo nga nagbarog atubangan sa mga salamin, nagtan-aw sa repleksiyon sa ilang pamilya ug naghanduraw sa mahangtoron nga pamilya.
Ang mga salamin nagpahinumdom usab nila sa ilang mga minahal nga mitaliwan na.
Si Zarah Angela Ramirez mipakigbahin, “Upat lang ka mga panagway ang akong nakita apan akong gibati ang usa ka kasiguroan nga adunay lima ka tawo sa akong pamilya, ug tungod kay akong bana ug ako naselyo sa templo, ang akong anak nga babaye kinsa mibiya kanamo sa edad nga 14 ka bulan among ikauban hangtod sa kahangtoran.”
Ang kwatro anyos nga si Muirinne Siahna De Guzman nagkanta sa “I Love to See The Temple [Gusto Ko nga Makita ang Templo]” samtang naglakaw siya padulong sa templo. Human sa paglibot misulti siya sa iyang mama, “Gusto ko maminyo dinhi!”
Usa ka 14 anyos nga batan-ong babaye miingon nga ang Lawak sa Pangasaw-unon mao ang iyang paborito.
Misulti siya sa iyang mama, “Mitan-aw ko sa salamin ug naghanduraw sa akong kaugalingon nga mas taas og gamay ug nagsul-ob og puti.”
Mitubag ang iyang mama, “Ugma damlag motabang ko nimo nga mag-ilis sa senina, ug mag-make up, ug ayohon ang imong buhok dinhi.”
“Ang akong 13 anyos nga anak nga babaye miingon nga lahi ang iyang katahom diha sa mga salamin sa lawak sa pagselyo,” midugang ang iyang mama. “Akong gisultian ang akong mga anak nga babaye nga ugma damlag uban sa husto nga tawo, sila magminyo dinhi niini nga lawak.”
Ang diyes anyos nga si Maureen Maramba human sa paglibot sa Templo og kaduha uban sa iyang pamilya mihangyo kon siya makabisita ba pag-usab. Ang iyang amahan misulti kaniya nga mohatag og kahigayonan ngadto sa ubang mga bisita.
Mitubag siya, “Gusto ko mobalik tungod kay dili pa ko makasulod sa dugayng panahon.” Nasayod siya nga kinahanglan pa niyang magpaabot og walo pa katuig sa dili pa siya makasulod og balik sa templo. Busa ang iyang pamilya midala kaniya sa pagbisita sa ikatulo nga higayon.
‘Nabati Nako ang Impluwensiya sa Ginoo’
Si Josephine Abrogar, usa ka higala nga Katoliko, mibisita sa Manila Temple kapin na sa dekada ang milabay ug ginindotan og maayo niini. “Malinawon kaayo kadto bisan og diha lang ko sa gawas. Akong giampo nga ugma damlag ako makaangkon og higayon sa pagsulod. Usa sa kataposan, uban sa akong pamilya ako nakabaton sa dakong panalangin sa pagsulod sa Urdaneta Temple.”
Mapasalamaton siya sa mainiton nga pag-abi-abi nga ilang nadawat. “Salamat sa pagpakigbahin kanamo sa inyong sagrado nga templo. Salamat sa pagpakita kanamo nga ang usa ka pamilya mahimong magkauban hangtod sa kahangtoran,” siya mipahayag.
Si Chona Benar kinsa gitudloan sa mga misyonaryo nianang higayona sa iyang pagbisita mihulagway, “Sa akong pagsulod sa celestial nga lawak, nabati nako ang mga Kamot sa Ginoo nga mihikap sa akong ulo.”
Usa ka piho nga magtutudlo sa eskwelahan gikan sa lahi nga tinuohan naemosyonal diha sa sulod sa Celestial nga Lawak tungod kay samtang siya nag-ampo, mibati siya og mainiton nga paggakos.
Lig-on, Mapaubsanon nga mga Boluntaryo
Usa sa labing tigulang na nga mga boluntaryo mao ang mubo apan makapahingangha nga kusgan nga 72 anyos nga lalaki nga ginganlan og Santiago Queñano kinsa nagtrabaho diha sa Physical Facilities Sub-Committee. Siya mitabang sa pag-mop ug papanilhig sa mga salog; pagbalhin sa mga lingkoranan, mga lamesa, ug gani ang usa ka piano! Siya miserbisyo hapit kada adlaw gikan sa 7 sa buntag hangtod sa 8 sa gabii. Sa dihang gipangutana kon unsa ang nakapahimsog kaniya, mitubag siya, “Mituman ko sa Pulong sa Kaalam.”
Si Vilma Cortez, usa ka Prinsipal sa Elementarya nga Eskwelahan, laing boluntaryo sa Physical Facilities, nga mi-file og leave gikan sa trabaho aron moserbisyo, gihatagan og buluhaton sa pagmentinar sa mga banyo.
Miingon siya nga ang banyo mao ang iyang paborito nga dapit sa iyang balay.
“Ganahan ko mag-mop ug manglimpyo sa salog,” mipakigbahin siya. “Mibati gyod ko nga mapainubsanon. Bisan asa ko madistino, andam ko nga mohimo sa akong mga katungdanan.”
Si Errol Gascon Villaflor, usa ka boluntaryo nga gitahasan sa hapin sa mga sapatos nga estasyon miingon, “Mao kini ang labing makapaubsanon nga butang nga akong nahimo. Nagpahinumdom kini nako sa panahon sa dihang si Jesukristo mihugas sa mga tiil sa Iyang apostoles.”
Ang Hingpit nga Dapit
“Ako nakahibalo nga ang labing maayo nga dapit sa pagtanyag og kaminyoon mao ang diha sa templo tungod kay kini nagpakita sa akong tinuod nga tumong,” miingon si Jessie Afable Bituaran.
Tulo ka tuig ang milabay si Shella Mae Asuncion adunay usa ka damgo mahitungod sa iyang pagminyo diha sa Urdaneta Temple, ug pagka Marso 28, 2024, si Aldrine Bunagan Cawile mitanyag og kaminyoon ngadto kaniya diha sa Urdaneta Temple.
“Mahinamon kaayo ko sa paghimo nianang usa ka dakong mahangtoron nga pakigsaad uban kaniya,” miingon si Aldrine. “Ang templo mao ang hingpit nga dapit para nako aron motanyag og kaminyoon ngadto kaniya.”
“Damgo kini sa matag batang babaye nga maminyo diha sa templo alang sa kahangtoran,” miingon si Nica Joy Calma. “Si Marck nangutana nako kon mahimo ba niya nga matuman ang akong damgo.”
Ug si Nica Joy miingon og OO!
‘Nagpahiyom Ngari Kanamo’
Si LeGrand Nonales Terceño, samtang siya nagpatukar sa “I Love to See The Temple” diha sa piano ubos sa punoan sa matahom nga Acacia nga mga kahoy sa gawas sa templo, nahingangha sa dihang ang gagmayng mga bata tagsa-tagsa nga miduol kaniya ug gikanta ang mga pulong sa kanta. Ang uban kanila mibira sa mga kamot sa ilang mga ginikanan ug mihangyo kanila nga moduyog sa pagkanta.
Ang uban nga mga bisita mihangyo kaniya sa pagtukar sa ilang paborito nga mga himno samtang nagpaabot sa pagsulod sa templo. Usa ka bisita miingon, “Ikaw nagdapit sa Espiritu gamit ang imong musika.”
Mipakigbahin si LeGrand, “Mibayaw kana kanako. Akong gibati nianang tungora nga ang Langitnong Amahan nagpahiyom ngari kanamo.”
Usa ka Dakong Panag-abot
Sulod sa unang higayon human sa 17 ka tuig, si Jerome Patrick Garcia ug Roslyn Molina sa kataposan nahimamat ang tawo kinsa ang ilang mga ginikanan mingalan kanila - Jerom Ruslan Laniohan, usa ka mibalik na nga misyonaryo gikan sa Philippines Laoag Mission nga mitudlo ug mibunyag sa ilang mga ginikanan sa Simbahan.
“Akong dungog nga ang ilang mga ginikanan mingalan kanila sa akong ngalan,” miingon si Jerom Ruslan. “Nalipay ko nga sa kataposan ako silang gikahimamat.”
Ang inahan ni Jerome Patrick mapasalamaton nga nakabisita sa Templo ug nahimamat pag-usab ang misyonaryo nga nakatabang og dako sa pagkakabig sa iyang bana. “Siya ang instrumento sa Dios. Siya mitabang kanamo nga mapalig-on ang among pagtuo diha ni Jesukristo,” miingon siya.
Usa ka grupo sa mibalik na nga misyonaryo gikan sa Philippines Baguio Mission (1985-1988) mipundok ug milibot sa templo.
Si Willie Almaras gikan sa Bacolod miingon nga ang grupo nangandam sulod sa usa ka tuig alang sa usa ka panagtagbo. Mahinamon siya nga mahimamat ang mga tawo nga iyang gitudloan ug nabunyagan. Daghan kanila aduna nay ilang kaugalingong mga pamilya ug ang ilang mga anak nakaadto na og mga misyon.
Siya mihinumdom sa mga panahon nga siya milakaw agi sa mga punoan sa acacia subay sa McArthur Hi-way sa Siyudad sa Urdaneta, sa dihang nagserbisyo pa siya og full-time nga misyon 30 ka tuig na ang milabay. “Naghunahuna ko kon para unsa kaha ang kadtong mga punoan sa kahoy,” miingon siya.
Si Willie nahingangha sa pagkakita sa samang mga kahoy nga karon nagpalibot sa maanindot kaayong Urdaneta Temple.
Si Gennevieve Acain De Jesus mibiyahe gikan sa Palawan uban sa iyang pamilya, human nagtigom og kwarta uban sa iyang anak nga nag-edad og pito sulod sa kapin sa usa ka tuig, namaligya og linuto [baked] nga mga pagkaon, pospas, ug champorado.
Ang iyang inahan kuyog unta nila apan sa wala damha mitaliwan siya pipila ka semana sa wala pa ang biyahe. Gidala ni Gennevieve ang usa ka litrato sa iyang mga ginikanan ug nagpalitrato nga anaa sa luyo ang templo, nagsimbolo nga sila nagkauban pa gihapon niya diha sa espiritu.
“Sa dihang nakakita kami sa Templo, ang palas-anon gitangtang sa akong bukobuko,” miingon si Gennevieve.
Ilang nahimamat ang daan na nga mga higala ug bag-o nga mga kaila.
“Migakos sila kanamo ug nalipay nga nagkita kami,” mihulagway siya. “Ang tibuok kasinatian sama sa usa ka panagpundok sa Israel, usa ka daklit nga pagtan-aw sa dakong panag-abot sa ikaduha nga pag-anhi ni Kristo.”
Usa ka Dapit sa mga Milagro
Ang Marso 23, 2024 mao ang kinabisihan nga mga adlaw sa Pagbukas sa Balay nga adunay kapin sa 11,000 ka bisita. Ang mga bisita nagpaabot nga naglinya diha sa grabeng kainit sa adlaw.
“Apan ang ilang pailob ug pagkamasinabtanon dalaygon,” matod pasa boluntaryo nga si Dino Santos. “Makita ninyo ang ilang kamahinamon.”
Mipadayon siya, “Daghan ang nag-ampo nga masalipdan ang adlaw sa mga panganod, ug voila! Ang adlaw gisalipdan gayod! Usa kadto ka milagro, usa ka pag-ampo nga gitubag dayon!”
“Sa Celestial nga Lawak, mibati ko og kasiguroan nga ako mamaayo,” mipamatuod si Domingo Servito nga nag-antos og makamatay nga kondisyon sa panglawas.
Siya milagroso nga nakalahutay sa walo ka oras, taas og risgo nga dakong operasyon human sa Pagbukas sa Balay, ug sa paglabay sa pipila ka semana nakahimo siya sa pagtambong sa Pagpahinungod, ug misaulog sa iyang ika-68 nga adlawng natawhan sa adlaw human sa Pagpahinungod. Siya mihatag og pagsaksi nga, “kon inyong mabati ang pasalig sa Espiritu, kini tinuod gayod nga mahitabo.”
Sa tibuok nga pagserbisyo ni Arlene Quisias atol sa Pagbukas sa Balay, wala niya gibati ang kasakit o paghubag hinungdan sa usa ka walay pagkaayo nga sakit nga nakaapekto sa iyang mga kaugatan.
Nag-antos siya sa Chronic Venous Insufficiency, nga maoy hinungdan sa dili maantos nga kasakit sa iyang bat-ang hangtod sa iyang mga kumagko sa tiil. Mosuol kini kon siya molakaw, molingkod, o mobarog sulod sa taas nga panahon. Bisan pa man sa kondisyon sa iyang panglawas, siya miboluntaryo, naghangop, ug gilibot ang mga bisita nga nakinahanglan og dugay nga paglakaw ug pagbarog. Apan siya nakahimo sa pagbuhat sa ingon kapin na sa usa ka semana nga walay kasakit.
“Usa kadto ka milagro!” miingon siya.
Sa wala pa siya nasakit, misaad siya sa Ginoo nga motabang siya sa Iyang mga buhat. Sa dihang gipahibalo ang Urdaneta Temple, ang iyang kabubut-on sa pagtuman niana nga saad dako kaayong miusbaw.
Si Sister Ana Marie Karganilla, Committee Coordinator, nabalaka tungod kay ang mga hapin sa sapatos nga iyang gi-order na daan sa gawas sa nasod wala naabot, usa ka bulan paingon sa pagbukas sa balay.
Nagkadako ang iyang kabalaka sa dihang ang mga aytem wala pa miabot usa nalang ka semana sa dili pa ang kalihokan.
Dayon usa ka adlaw sa wala pa ang pagbukas sa balay, ang mga hapin sa sapatos milagro nga miabot, ang tanan nga 200,000 niini!
Nakat-on si Ana Marie nga mas mosalig sa Ginoo ug nga Siya dili motugot sa bisan unsang butang nga mobabag sa pag-uswag sa Iyang mga Buhat.
Laing kalisod nga giatubang sa mga Committee Coordinator ang kalabot sa mga lingkoranan alang sa pagpahinungod.
“Asa man kita makaabang og maayo nga mga lingkoranan?” Si Elder Gregorio Karganilla miingon. “Apan dayon niadtong Pebrero, ang Tabernacle Choir mianhi sa nasod.”
Ang pagbisita sa choir sa Pilipinas duha ka bulan sa wala pa ang pagpahinungod usa ka milagro. Ang mga lingkoranan nga ilang gigamit gidala alang sa pagpahinungod.
Tinuod gayod, ang Ginoo molihok sa misteryoso nga mga paagi.
Pagpahinungod sa Urdaneta Temple
Si Presidente Dallin H. Oaks miingon, “Nalipay kami nga makaamgo nga mas miuswag kamo sa espirituhanong paagi kaysa sa pagbiya namo ni Sister Oaks 20 ka tuig na ang milabay.”
“Dugang pang liboan kaninyo ang hingpit nga tigbayad sa ikapulo nga nakapahimo niining posible nga mosarang alang sa dugang nga mga templo nga matukod niining bulahan nga yuta,” siya mipadayon.
Siya mipahayag usab sa iyang kahingangha kon sa unsang paagi ang pagkamiyembro sa Simbahan sa Pilipinas mitubo ngadto sa 870,000, diin ang 200,000 niini nahisakop ngadto sa Urdaneta Temple district.
“Usa ka pagpahinungod sa templo nagpahinumdom usab kanato sa pagpahinungod og usab sa atong kaugalingon diha sa pagkamatinud-anon ngadto sa Ginoo ug sa Iyang mga buhat,’ miingon siya.
‘Walay Luna Alang sa Kabalaka’
Sa dihang si Elder Carlos Revillo, Jr., Ikaduhang Magtatambag sa Kapangulohan sa Area misugod sa pagpahinungod uban sa mainiton nga “Maayong buntag,” daghan kon dili man tanan ang nasurprisa, nakaamgo ng ang kalihokan ipahigayon gamit ang pinulongan nga Filipino, dugang pa sa dihang ang mensahe ni Presidente Russell M. Nelson gihubad sa Filipino, ug si Presidente Dallin H. Oaks migamit og tighubad diha sa iyang tupad.
Mao kini ang unang higayon sa kasaysayan sa Pilipinas nga ang usa ka pagpahinungod sa templo hingpit nga gipahigayon gamit ang lumad nga pinulongan sa nasod. Mao kadto ang unang higayon nga ang choir miawit sa Hosanna Anthem sa Filipino.
Si Elder Gregorio Karganilla, miingon nga siya usab nasurprisa, tungod kay naanad siya nga mamulong ug maminaw sa mga pakigpulong sa Simbahan diha sa Iningles.
“Ako nakaamgo nga dili kadto alang nako,” gisulti niya human nga nakakita sa usa ka tawo diha sa Templo nga nagtando-tando sa iyang ulo, nagpasabot nga klaro niyang nasabtan ang matag pulong.
Sa iyang pagpauli gikan niana nga kalihokan, nangutana siya sa iyang katabang kon nalingaw ba siya sa Pagpahinungod ug siya miingon, “Oo. Tungod kay akong nasabtan og maayo ang tanang butang.”
“Ang Ginoo nakahibalo ug nakasabot sa atong mga panginahanglan,” miingon si Elder Karganilla.
Ang disesayis anyos nga si Dwan Chevelle Bondad, usa sa mga mamumulong, mipakigbahin nga siya dili igo nga masaligon sa paghatag sa iyang pakigpulong diha sa Filipino, tungod kay Iningles ang iyang unang pinulongan.
“Nahadlok ko nga tingali dili nako masulti og maayo ang akong pakigpulong,” miingon siya.
Ang iyang mga ginikanan sila si Marisol ug Oliver Bondad mipakigbahin sa samang kabalaka. “Dili siya maayo kaayo sa Tagalog. Basin og makulbaan siya ug tingali mokanga,” mibutyag ang iyang mama. “Mao nga amo siyang giapil sa among inadlaw-adlaw nga pag-ampo.”
Dugang pa niya, “Kami nag-ampo og maayo. Masaligon kami nga ang Ginoo mopanalangin kaniya.”
Samtang siya nagrebyo sa iyang pakigpulong, si Dwan naglisod sa pagsabot sa iyang kaugalingong mensahe.
Dayon ang usa ka matahom nga sukwahi nahitabo. Miingon siya, “Sa higayon nga ako mihatag sa akong pakigpulong diha sa Celestial nga Lawak, ang akong kaugalingong mensahe mas nasabtan pa gayod nako.”
Mibati siya nga nahupay. “Akong nadawat ang tabang nga akong gikinahanglan ug ang akong mga kabalaka nahanaw,” miingon siya. “Nakaamgo ko nga walay luna alang sa kabalaka diha sa Celestial nga Lawak.”
Nanag-awit uban sa mga Anghel
Daghan ang mapasalamaton alang sa choir tungod sa paghimaya sa Ginoo pinaagi sa ilang musika.
“Ang langitnong mga tingog sa choir nakatabang nako nga mabati ang Espiritu samtang sila nag-awit sa matahom nga mga himno,” miingon si Blesilda Macaraeg. “Nabati nako kon unsa ka dako ang paghigugma sa Langitnong Amahan ug ni Jesukristo kanato.”
“Gamay nga grupo apan gamhananl!” usa ka tawo mikomentaryo.
Si Mark Bernard Daroy, Music Sub-Committee Chair miingon, “Usa kadto ka paningkamot sa usa ka team. Kami nagpasalamat usab sa mga anghel nga miawit uban kanamo.”
Nagsanag nga mga Panagway
Si Agustin Veras, Jr. naglingkod diha sa unang laray sa lingkoranan sulod sa Templo, nasurprisa nga nakakita ni Presidente Dallin H. Oaks nga nagbarog duol ra kaniya.
“Nakalitan ko uban sa dakong kahimuot. Mao pa kadto ang akong unang higayon nga makasugat sa usa ka apostol sa Ginoo! Ang Iyang panagway misanag,” miingon siya. “Dili nako mapugngan ang akong mga luha tungod kay akong nabati ang iyang gugma. Ang akong pagpamatuod sa apostoles sa Ginoo napalig-on.”
Usa ka brother diha sa usa ka wheelchair wala damhang nakalitan usab nga makita si Presidente Oaks sa iyang atubangan diha sa Lawak Hulatanan sulod sa Templo. “Siya adunay matam-is nga pahiyom, hitsuraan nga tawo,” hulagway pa niya. “Siya walay gisulti nga bisan unsang butang apan ang iyang Espiritu kusog kaayo. Ako kining nabati.”
Usa ka Makapahimuot nga Surprisa
Ang mga boluntaryo mipundok sa Lawak Hulatanan diha sulod sa Templo human sa Pagpahinungod. Gamay ra ilang nahibaloan nga sila anaa alang sa usa ka makapahimuot nga surprisa!
Sa dihang miabli ang pultahan, dali silang mibarog sa kahingangha sa pagkakita ni Presidente Dallin H. Oaks sa ilang atubangan!
Si Pres. Oaks midayeg ug mipasalamat sa tanan nga mitabang sa paghimo sa Pagbukas sa Balay ug Pagpahinungod nga usa ka kalamposan.
Siya midugang, tingali nagpasabot ngadto sa 15-minutos nga pagkawala sa kuryente atol sa sesyon sa hapon, “Ang bisan unsang butang mahimong adunay mahitabong dili maayo apan kita walay mahimo bahin niini.”
Mipadayon siya, “Nakatambong ko og daghang mga pagpahinungod sa templo ug ako makasulti nga kini nga team maayo kaayo, kon dili man kinamaayohan.”
Mipakigbahin si Elder Gregorio Karganilla:
“Sa dihang si Pres. Oaks mianhi sa Lawak Hulatanan sa wala pa mipauli sa Utah, para nako sama ra kini kon si Jesukristo ang mibisita kanamo sa lawak aron mopahayag sa Iyang pasalamat alang sa tanan nga among gibuhat aron mahimo ang Pagpahinungod sa Templo nga makapalig-on ug malamposon.”
Si Presidente Oaks mipahayag dayon sa iyang gugma ngadto sa mga boluntaryo ug mibiya kanila nga adunay mga luha ug diwa sa kalipay.
Usa ka Pilipino nga Templo
Daghan ang nahingangha nga ang ikatulo nga templo sa Simbahan dinhi sa nasod tinudanay nga Pilipino gayod. Ang kinoloran nga bildo nga mga bintana adunay mga desinyo nga sama sa sampagita nga bulak ug mga dahon sa manga. Adunab usab orihinal nga mga painting nga nagpakita sa mga talan-awon sa Pilipinas, nagpahinumdom sa Pilipino nga mga Santos nga ang Ginoo sa pagkatinuod nagpakabana sa Iyang katawhan dinhi niini nga bahin sa ubasan.