Itulau i le Lotoifale
O Laasaga Ofoofogia a Raymond Knight i le Malumalu
E tele vavega na saunia ai le ala mo le malaga a Raymond Knight i le Maota o le Alii.
Muamua o lona papatisoga i Alice Springs i le aso 1 o Iulai 2017, i le 74 o ona tausaga. Na manatua e Elder Joel Barfuss o le misiona a Adelaide Ausetalia, “Sa ma savavali atu i se fuafuaga faatulagaina ma vaaia Ray o loo savali atu i se isi auala, sa tonu loa o le a ma liliu atu i le ala lea tau ina ia talanoa atu ia te ia. . . . Sa sau o ia i le lotu i le Aso Sa lena ma o le tele o le isi vaega o se talafaasolopito.
O le vavega lona lua na oo mai i talafaasolopito o aiga. I totonu o tausaga ina ua mavae lona papatisoga, sa fesoasoani atu ulugalii faifeautalai matutua o Elder ma Sister Clark, ma mulimuli ane o Elder ma Sister Gamble ia Ray ia iloa le talafaasolopito o lona aiga.
Sa fesoasoani Elder Scott Gamble ia Ray e iloa lona tamā e ala i le faasino igoa o le fanuatanu o BillionGraves.
“E lauiloa Ray i faifeautalai talavou i Alice Springs,” fai mai ai Sister Diane Gamble. Latou te iloaina uma o ia ma alolofa i ai. E fiafia o ia e faasoa mai tala o le olaga e faatatau i le ala na a’oa’o ai o ia e lona tina matua e su’isu’i a’o iva ona tausaga, o le ala na fesili atu ai lona afafine i Filipaina e aumai ia te ia se kangaroo, ma faatatau i le ala na ia su’iina ai se ofu mafanafana mo Johnny Cash, o se tagata pese lauiloa mai sisifo.”
O le vavega lona tolu e aofia ai se faasologa o mea na tutupu na faatagaina ai Ray e malaga i le 1,532.8 kilomita e auai i le malumalu mo le ulua’i taimi.
O le kanesa na manaomia ai le aveesea o le manava o Ray, ae a’o tau toe faamalosi mai i se taotoga tele, sa a’oa’o atu e le au Gambles ia te ia lesona faasauniuni mo le malumalu, sa ia faaauauina ina ua te’a i tua mai le falema’i.
O le Peresitene o le Paranesi o Schwalger na tuuina atu le faatagana mo faifeautalai e faaauau ai lesona a Ray i le telefoni ma i lona fale. Sa faaaoga e le au Gambles ni manoa vulu ma isi mea e fesoasoani ai e faamanino mataupu faavae e pei o le ata o le faaolataga.
Mulimuli ane sa maua ai e Ray lona pepa faataga o le malumalu, ma faatasi ai ma le fesoasoani mai le Tupe o le Fesoasoaniga Lautele mo Tagata Ulu i le Malumalu (General Temple Patron Assistance Fund), sa ia saunia loa e maua ona faaeega paia.
O le lua vaiaso a’o lei oo i le aso na fuafua ai e ulu i le malumalu, na maua ai e le au Gambles se valaau mai ia Ray. E manatua e Tuafafine Gamble, “Sa i ai o ia i le falema’i ma sa fai mai ia i ma’ua, ua mana’o e oti. Sa ma mauaina o ia i le Matagaluega o Faalavelave Faafuase’i o loo tuuina atu ai ia te ia se fagu vailaau faafomai, lea e foliga mai e matuā tiga lava. Sa tuuina atu ia te ia e Elder Gamble se faamanuiaga, lea sa fesoasoani ia te ia e onosaia le faagasologa o ona togafitiga.
Ina ua mafai e Ray ona malaga, na oo mai ai loa le taimi ua leva ona faatalitali i ai. Na malaga Ray ma le ulugalii faifeautalai i le aso 30 o Ianuari 2024, ma sa savavali atu le aumalaga i le malumalu i le aso na sosoo ai.
I le 81 o ona tausaga ua i ai nei, sa mafai e Ray ona auai i sui papatisoga ma faamauga mo ona augatuaa alii. Ona ia faaaogaina lea o le pule o lona Perisitua Mekisateko, mo le uluai taimi, e faatino ai faamauga sui mo Tuafafine Gamble ma ona augatuaa tamaitai. “Sa maligi o’u loimata ina ua tuu e Ray ona lima i luga o lo’u ulu,” o le tala lea a Tuafafine Gamble.
O le vavega lona fa sa maua i le mana o le tatalo.
Sa le’i malosi Ray i le aso na aumai ai o ia e Elder Gamble mo ona faaeega paia. O ona togafitiga faafomai na niniva ai o ia ma vaivai ai i ona tulivae. Sa manaomia ona tutū ma malōlō mo nai taimi i le va o le potu o le faletalimalo ma le taavale.
Ina ua mae’a se tatalo faatauanau mo le soifua maloloina o Ray ma le gafatia e faaauau ai lana malaga, sa oso i fafo Ray mai le taavale ma savali i totonu o le malumalu e maua ona faaeega paia. E le’i toe i ai nisi faafitauli mo ia i lena aso.
Faatasi ma le lagolago faaopoopo mai ulugalii faifeautalai matutua, o le au Felts ma le au Carrs, ma Peresitene ma Tuafafine Kuhn mai le au peresitene o le misiona, sa mafai e Ray ona faatino faaeega paia sui mo ona augatuaa. Sa faamatala mulimuli ane e Elder Gamble faamautinoaga o le Agaga i le Potu Selesitila, lea sa ia vaai ai i loimata o tafe ifo mai alafau o Ray. “O le taimi muamua lenei ua ou lagonaina ai se latalata i le Alii i se ala loloto.” na faamatala mai ai e Ray. “Ua ou maofa i Ana faamanuiaga silisili.”
O lona gafatia e auai ai i sauniga uma sa fuafuaina mo lana malaga i le malumalu sa faalagolago i lagona o Ray, ae o aso sa le’i auai ai o ia, fai mai Tuafafine Gamble, sa fesili tagata uma i le malumalu po o fea Ray. “Sa pei sa latou fesili e uiga i se uo ua leva ona leiloa.”
Sa faalagolago Ray i nisi aso i le mana o le tatalo e faaauau ai pea. “I le taeao o le Aso Toonai, sa [ia] toe lagonaina le ma’i,” o le lipoti lea a Tuafafine Gamble. “Sa matou faia se tatalo ma Ray i le taavale ma ia toe fiafia ai i le taimi lava lena ma sa mafai ai ona faaauau ana faamauga.”
E faatatau i le valaaulia a Peresitene Russell M. Nelson e “mafaufau faaselesitila”, na saunoa mai le tagata fai faamauga, “o le faia o faamauga e latalata lava i le ‘mafaufau faaselesitila’ lea e mafai ona maua e se tasi i lenei olaga.”
Na faamau muamua Ray i ona matua, ona faamau ai lea o lona tina i matua matutua na tausia Ray. I le aofaiga, e 96 sauniga faaleaiga na faatinoina i le gasologa o le vaiaso. E tele aafiaga o le alofa mutimutivale na latou lagonaina ai le latalata atili i le Agaga.
“E le mafai ona amata ona ou faamatala atu ia te outou le matagofie o le faafeiloaiina o a’u i le malumalu mo le ulua’i taimi,” o le tala mai lea a Ray i ona manatunatuga. “O se oliolisaga e le mafaufauina. Ua ou tulimatai atu mo nisi asiasiga se tele i le malumalu. . . Maimau pe ana mafai ona lagonaina le olioli lava lea e tasi i isi nofoaga uma i le lalolagi atoa, ma o tagata taitasi uma e mafai ona taulai atu i le aafiaga matagofie ma le filemu o le afioaga o lo tatou Tama Faalelagi, semanu e le mafai ona toe i ai se avanoa mo le tiga ma le faatafunaga matautia lea tatou te a’oa’o i ai i taimi uma i lo tatou lalolagi.”