Savali Faaleautaitai i le Eria
A o ou faatinoina lo’u faatuatua ia Iesu Keriso, o le a Ia faamanuiaina a’u i Lona mana
E masani lava ona ou fiailoa e ala i le faatuatua ma le tulaga le mailoa o lo tatou “malamalama”. I le avea ai ma se tamaitiiti aoga seminare, sa ou mauaina le fuaiupu lenei i le Tusi a Mamona:
“. . . o le faatuatua e le o le maua lea o se malamalama atoatoa i mea; o lea afai ua ia te outou le faatuatua ua outou faamoemoe mo mea e le vaaia, a e moni” (Alema 32:21).
Ona ou iloa ai lea e lua faafeagai: faatuatua ma le malamalama; ma a maua le malamalama ona le toe i ai lea o le faatuatua.
Ua faamautinoa mai e Paulo le manatu autū o le faatuatua i le Eperu: “A o le faatuatua, o le faalagolago lea i mea ua faamoemoe i ai, o le mautinoa lea o mea e le o vaaia” (Eperu 11:1). E pei lava o loo faapea mai Paulo pe a saʻili se tasi mo se faamaoniga po o le mea moni, o le a lē toe i ai le faatuatua ma le faamoemoe.
Ua faamanino mai e Alema lenei mea i se faamatalaga moni: “. . . ona afai ua iloa e se tagata se mea, ua leai se pogai ia te ia e faatuatua ai, ona ua ia iloaina” (Alema 32:18). Ua ou iloaina o aso nei e toatele o loo sailia le malamalama ma le “upu moni”, ma a latou mauaina, po o le mea ua latou manatu o le upumoni, ona le toe i ai lea o le faatuatua ma le talitonuga.
O Le Faatuatua o le aiga o Maurer i lo latou Liliuga
O le faatuatua o lo’u aiga na amata i le tele o tausaga ua mavae a’o 10 tausaga o lo’u tamā. Ina ua tuua e vaegaau a Amerika, i lalo o le taitaiga a le Ta’ita’i’au o McArthur, Filipaina ona o le tulaga alualu i luma o lapani, sa latou faatuina se nofoaga mo aoaoga/faafiafiaga i fafo o Perisipeni, Ausetalia. O o’u matua matutua o faifaatoaga susu i le vaitafe o Perisipeni ma sa avea le la faatoaga ma nofoaga autu o tolauapiga o fitafita Amerika.
I se tasi aso a’o tatau e lo’u tama ma lona tuafafine susu o povi, so ofo ane e se fitafita e igoa ia Danny Roberts ia i la’ua se fesoasoani. Sa ia lagona le tuuatoatasi ma o ona mafaufauga sa i lona aiga i se faatoaga i Amerika. Sa nofo Danny mo le taumafataga o le afiafi, ma ina ua fesiligia pe o le a lana tapuaiga, sa ia faamatalaina le tala o le Uluai Faaaliga.
Ma le fiafia tele, sa talanoaina e lo’u aiga mea sa aoaoina ai i latou, ma latou fesiligia se fesili e masani ai le tele o tagata sailiili: “Pe mafai e se tamaitiiti e 14 tausaga ona vaai moni i le Atua ma Iesu Keriso i o tatou aso?” O le “lagona” na siomia ai le talanoaga na faaosofia ai le mafaufau loloto. Na iu ai ina latou manatu afai na mafai e Mose ma Aperaamo ona vaai ia Iesu i tausaga ua mavae, aisea la e le mafai ai foi e se perofeta i o tatou aso.
Na amata ona i ai se emo o le faatuatua i le aiga o Maurer. Pe sa latou iloa ma le mautinoa e moni lenei mea? Leai. Pe sa latou maua se asiasiga patino mai le Tama Faalelagi? Leai. O le a le mea na uunaia ai i latou e faia le laasaga e sosoo ai? O le Agaga o le Atua na musuia o latou mafaufau e moni lea lagona, ma o se faamoemoe atonu lava e moni lenei mea.
O le faatuatua e aumaia se mana ma se mana’o, ma e faaosofia ai i tatou i faatinoga. Sa malosi le lagona o le faatuatua sa latou mananao ai e suesue atili. O le falesa aupito lata ane o le Ekalesia a Iesu Keriso o le Au Paia o Aso e Gata Ai sa silia ma le lua itula le mamao. Ae sa latou auai i le Aso Sa na sosoo ai ma sa fiafia i le Agaga sa latou lagonaina ai iina. Sa latou alolofa i tagata o e sa faamaoni ma faauo.
Sa leai ni faifeautalai ona o le taua, ae o taitai ma tagata o le ekalesia sa aoaoina ma fesoasoani e faamalosia lo latou faatuatua ia Iesu Keriso. Sa mausali le aiga i lo latou faatuatua ma fausia se malamalamaaga malosi o le Ata o le Faaolataga. E ala mai i le ositaulaga, o lo latou faatuatua ia Iesu Keriso na latou maua ai se mana latou te le’i iloaina muamua e oo mai i lena taimi.
E masani ona ou manatunatu i lena aafiaga tulaga ese na maua e lo’u tama, o ona tuafafine e toalua o, Tess ma Julie, ma o latou matua. Sa latou ositaulaga, onosaia faigata, ma suia ituaiga olaga—e mafua uma mai ona latou te lagonaina sa taitaia e le Alii lenei Ekalesia, sa saunia le avanoa silisili mo le faaolataga faavavau ma le fiafia tumau. E i ai se mana e oo mai pe a faatinoina le faatuatua.
O le tala faigofie o le vaai o Iosefa Samita i le Tama ma le Alo, e le talitonuina e pei ona vaai i ai nisi i aso nei, e aumaia le filemu i lo’u agaga, o le faamalieina i lo’u talitonuga, ma aumaia le faamoemoe ma le faatuatua i se ala mo a’u e faalatalata atu ai i lo tatou Faaola o Iesu Keriso.
Faatuatua e osia ai Feagaiga
O le taunuu mai o le Malumalu i Hamilitone Niu Sila i le 1958 na faatupuina ai se faamautinoaga i le Au Paia i Ausetalia atonu na pau lea o le avanoa mo latou e osia ai feagaiga paia ma le Alii. Ina ua faailoa mai e lo’u tama e manaomia e i matou o se aiga ona o atu i le malumalu, na fesili lo’u tina pe mafai faapefea ona tupu lena mea – sa leai se latou tupe ma, i taimi avanoa o lo’u tama, sa ia fausiaina pea le fale sa latou nonofo ai. Sa 2 tausaga lo’u matua i lena taimi ma sa faato’a fanau lo’u uso.
Faatasi ma se faatuatua lē maluelue, sa faatulaga e lo’u tama le fuafuaga e malaga i le vaa. Sa ia le’i iloaina pe faapefea, ma sa leai ni fuafuaga auiliili, ae sa ia lagona se faamautinoaga ma se faamoemoe o le a saunia e le Alii. Sa talaina mai e lo’u tama se tupe mai lana inisiua, ma e ui lava e lei lava sa matou tupe e toe foi ai, ae sa matou folau lava.
Ina ua uma ona ulufale lo matou aiga i le malumalu paia ma sa faamauina i le isi mo le olaga nei ma le faavavau, o lo’u tama, sa toe amata foi ona faaaoga lona faatuatua. Sa mafai ona ia maua se galuega e maua ai se tupe e ola ai ma toe foi ai i Ausetalia. Atonu e fai mai nisi sa faasesēina lo’u tamā, ae i tausaga mulimuli ane, sa tautino mai e lo’u tama ma lo’u tina o lenei faatinoga o le faatuatua, na aumaia ai le mana ma le taitaiga i o latou olaga.
O le faatuatua moni o le talitonu lea i perofeta, tagata vaai ma tali faaaliga (po o o latou auauna filifilia) ma maua le loto toa e mulimuli ai ia latou fautuaga ma faia faatinoga e aumaia ai vavega. E masani lava o laasaga tetele o le faaaogaina o le faatuatua o le a faatoa oo mai lava pe a faia ni laasaga laiti o le faatuatua.
Atonu e le o ia i tatou le malamalama, ae o le taula’i atu o la tatou vaai ia Iesu Keriso e mafai ai ona fesoasoani ia i tatou e galulue i le faatuatua. E masani lava pe a toe mafaufau, tatou te tepa ai i tua ma iloa le mana o le Alii ma lona taūa tele i o tatou olaga ao tatou galulue i le faatuatua—ma le le iloa. Ona avea lea o lenei mea ma “faamaoniga o mea e le o vaaia.”