« Te hāmani-’ino-ra’a (te mau hina’aro o te ta’ata hāmani ’ino) », Te mau mātēria tauturu nō te fa’aa’o i te ta’ata (2020).
« Te hāmani-’ino-ra’a (te mau hina’aro o te ta’ata hāmani ’ino) », Te mau mātēria tauturu nō te fa’aa’o i te ta’ata.
Te hāmani-’ino-ra’a (te mau hina’aro o te ta’ata hāmani ’ino)
Te mau rēni tauturu
E mea ti’a i te mau ’episekōpo, te mau peresideni ’āma’a, ’e te mau peresideni titi ’ia niuniu ’oi’oi i te rēni tauturu nō te ti’a fa’atere o te ’Ēkālesia i te mau taime ato’a e fa’aro’o rātou i te parau nō te ’ohipa hāmani-’ino-ra’a. E hōro’a teie mātēria tauturu i te arata’ira’a nō te tauturu i te mau ta’ata i hāmani-’ino-hia ’e nō te pāhono i te mau tītaura’a nō ni’a i te fa’a’itera’a. Haere i ni’a i Te mau nūmera rēni tauturu nō te nūmera rēni tauturu ’e te tahi atu mau ha’amāramaramara’a.
’Aita e ti’a i te hō’ē ta’ata fa’atere o te ’Ēkālesia ’ia vaiiho i te hiti i te hō’ē parau fa’a’ite hāmani-’ino-ra’a ’aore rā ’ia a’o atu i te hō’ē ta’ata ’eiaha e fa’a’ite i te hō’ē ’ohipa e tano e tu’u i te tiripuna hara rahi.
Fenua Marite ’e Canada
Mai te mea e ’ite mai te tahi atu mau melo i te hāmani-’ino-ra’a, e mea ti’a ia rātou ’ia niuniu ’oi’oi atu i te mau ti’a mana ture. E ti’a ato’a ia rātou ’ia fārerei atu i tō rātou ’episekōpo ’aore rā te peresideni titi ’o tē niuniu atu i te rēni tauturu nō te hāmani-’ino-ra’a nō te fāri’i i te arata’ira’a nō te tauturu atu i te feiā tei hāmani-’ino-hia ’e nō te ha’apa’o i te mau tītaura’a nō te fa’a’itera’a i te parau.
Te mau fenua i rāpae’au ia Marite ’e Canada
Ha’āpi’i mai nāhea ’e e aha te taime ’outou e fa’a’ite ai i te hāmani-’ino-ra’a. E mea ti’a i te mau peresideni titi ’e te mau ’ēpisekōpo ’ia pi’i ’oi’oi i te rēni tauturu nō te arata’ira’a mai te mea ē tē vai ra te hō’ē rēni i roto i tō rātou fenua. I roto i te mau fenua ’aita e vai ra te rēni tauturu, te ’episekōpo tei ’ite i te hō’ē hāmani-’ino-ra’a, e niuniu atu ’oia i tōna peresideni titi. E ’imi ’oia i te arata’ira’a mai roto mai i te ti’a o te ture a te ārea, i te piha tōro’a a te ārea (hi’o Buka arata’i rahi : Te tāvinira’a i roto i te ’Ēkālesia a Iesu Mesia i te Feiā Mo’a i te mau Mahana Hope’a nei (2020), 38.6.2.1, ChurchofJesusChrist.org). E mea ti’a i te tahi atu mau melo ’ia ha’apa’o i te mau tītaura’a ato’a a te ture nō ni’a i te fa’a’itera’a i te parau, ’e ’ia fārerei i tō rātou ’episekōpo.
E’ita e ti’a ’ia fāri’i i te hāmani-’ino-ra’a
’Ua riro te hāmani-’ino-ra’a ’ei taparahira’a ’aore rā ’ei tāu’a-’ore-ra’a ia vētahi ’ē (mai te hō’ē tamari’i ’aore rā hō’ē hoa fa’aipoipo, te ruhiruhiā, ’aore rā te huma) ’e ’ua fa’atupu atu ra i te fifi rahi i te pae tino, i te pae ferurira’a, ’aore rā i te pae ’āpeni. Te ti’ara’a o te ’Ēkālesia maori rā e’ita te hāmani-’ino-ra’a e fāri’ihia i roto i te mau huru ato’a ’e te feiā hāmani-’ino e hōpoi’a tā rātou i mua i te Atua. ’Ua fa’autu’ahia te hō’ē ta’ata ra nō te hāmani-’ino-ra’a, ’aore rā ’aita, e tu’uhia te ta’ata hara i mua i te fa’atītī’aifarora’a a te ’Ēkālesia ’e e nehenehe ’oie e ’ere i tōna ti’ara’a melo i roto i te ’Ēkālesia (hi’o Mataio 18:6 ; Mareko 9:42 ; Luka 17:2).
Te mau hōpoi’a mātāmua a te ’Ēkālesia i roto i te mau ’ohipa hāmani-’ino-ra’a ’oia ho’i 1) ’o te tauturura’a ïa, nā roto i te huru maita’i ’e te marū, te feiā tei hāmani-’ino-hia ’e 2) ’o te pārurura’a ïa i te feiā pāruru ’ore ’eiaha te hāmani-’ino-ra’a ’ia tupu fa’ahou ā. Noa atu ē e mau hāmani-’ino-ra’a tē ha’apēpē i te tino, e mea ha’afifi te mau huru hāmani-’ino-ra’a ato’a i te ferurira’a ’e i te vārua. E pinepine te hāmani-’ino-ra’a i te fa’a’ino i te fa’aro’o ’e e nehenehe te reira e fa’atupu i te ’ārepurepu, te fē’a’ā, te ti’aturi ’ore, te fa’ahapara’a iāna iho, ’e te mata’u i roto i te ta’ata i hāmani-’ino-hia.
Pinepine, e mau hara rahi atu ā tā te feiā o tē hāmani ’ino ’o tei ’ore ā i ’āfaro ’aore rā e mau fifi i te pae o te ferurira’a ’aore rā ’ua hāmani-’ino-ato’a-hia rātou iho. Tē tupu nei te ’oto i roto i te tahi mau ta’ata hāmani ’ino, te hina’aro ’ia fā’i i tā rātou mau hara, ’e te ineine nō te ha’amata i te ’ohipa tātarahapara’a. Tē vai ra vētahi e fa’ari’i ’ore ē e ’ohipa hape tā rātou, e fa’afaufa’a ’ore ri’i i tā rātou ravera’a, ’aore rā e fa’ahapa i te tahi atu ta’ata. Te hi’opo’ara’a i te mana’o ’oto ’e te hina’aro ’ia taui o te ta’āhira’a mātāmua ïa nō te tauturu i te ta’ata rave hara.
E nehenehe te tahi mau ta’ata hāmani ’ino e riro ’ei ta’ata ha’avarevare ’e te rāmā, ’e te fa’ahuru ’ē i te parau, nō reira tā rātou fa’ati’ara’a i te mau ’ohipa i tupu e ta’a ’ē ai i tā te ta’ata i hāmani-’ino-hia. I te mau taime ato’a, ’a feruri i te maita’i ’e te pāruru o te ta’ata i hāmani-’ino-hia. E mea ti’a i te mau ’ēpisekōpo ’e te mau peresideni titi ’ia niuniu i te rēni tauturu ’a ha’amau ai rātou i te hō’ē fa’anahora’a pāruru.
’Aita e tītauhia nei i te feiā fa’atere o te ’Ēkālesia, ’aita ato’a ho’i e fa’aitoitohia nei, ’ia māhu’i i te ma’i ’e ’ia rapa’au i te mau ta’ata tei fifihia i te pae ferurira’a i muri iho i te tahi hāmani-’ino-ra’a. Nō te rahira’a o te feiā hāmani ’ino, e mea ti’a ia rātou ’ia tītau i te tauturu a te tahu’a fa’aa’o. E nehenehe te piha ’ohipa nō te ’utuāfare (mai te mea tē vai ra) e fa’afāna’o i te mau hi’opo’ara’a ’e e hōro’a i te ha’amāramaramara’a i te feiā fa’atere nō ni’a i te mau rāve’a tauturu i tō rātou vāhi.
E mea ti’a i te mau ’ēpisekōpo ’ia hi’o i te Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei (2020) nō te arata’ira’a nō ni’a i te mau pi’ira’a o te ’Ēkālesia, te parau fa’ati’a nō te hiero, ’e te tahi atu mau uira’a, i te taime ’ua ravehia te tītorotorora’a nō ni’a i te hāmani-’ino-ra’a ’e ’ua ’īritihia mai te pū’ohura’a nō tōna teimahara’a. ’Ia feruri ’outou i te parau nō te mau ’ōpanira’a ti’ara’a melo nō te feiā ’āpī tei rave i te hāmani-’ino-ra’a, ’a tai’o i te Buka arata’i rahi, te 32.7.7.
’Imi ’ia hāro’aro’a
’A feruri nā roto i te pure ’ia ui i te mau uira’a mai teie te huru nō te tauturu ia ’outou ’ia māramarama maita’i i te fifi o te ta’ata ’e tōna ineine ’e te tumu ’oia e tātarahapa nei.
-
E nehenehe ānei tā ’oe e tauturu mai iā’u ’ia hāro’aro’a i teie ’ohipa ?
-
E aha te faufa’a nō ’oe ’ia tātarahapa ?
-
Nāhea ’oe i te fa’a’ohipara’a i te mau parau tumu o te ’evanelia nō te ’ūpo’oti’a i ni’a i te huru ’e te mau peu hāmani ’ino ?
-
E aha tā ’oe i ineine e rave nō te taui ?
-
Nāhea e nehenehe ai iā’u ’ia tauturu ia ’oe i roto i tā ’oe ’ohipa tātarahapara’a ?
-
Tē vai ra ānei te tahi atu ā mea nō ni’a i teie hāmani-’ino-ra’a e mea ti’a iā’u ’ia ’ite ?
Tauturu i te ta’ata
’A paraparau ai ’outou i te ta’ata, e nehenehe e fa’a’ohipa i te tahi o te mau mana’o i muri nei :
E paraparau i te ta’ata i te mau fa’ahope’ara’a nō tē hāmani-’ino-ra’a i ni’a iāna iho ’e te ’utuāfare, nā reira ato’a te ha’api’ira’a tumu ’e te mau ture a te ’Ēkālesia e tū’ati i te hāmani-’ino-ra’a. (’A hi’o fa’ahou i te mau rāve’a tauturu i roto i te Ture ’e te mau ha’api’ira’a a te ’Ēkālesia nō te tahi atu mau ha’amāramaramara’a.)
E tauturu i te ta’ata ’ia ’ite i te tīa’ira’a ’e te fa’aorara’a māuiui nā roto ia Iesu Mesia ’e tāna tāra’ehara.
Nō te mau ’ohipa mai te hāmani-’ino-ra’a i ni’a i te tino ’aore rā nā roto i te parau, e tauturu i te ta’ata ’ia ’imi i te mau rāve’a au ’e te ha’amāuiui ’ore nō te pāhono i te mau vaira’a fifi ’e te mau mana’o fifi, mai teie i muri nei :
-
E rave i te tahi taime nō te vaiiho i te mau mana’o ’ia tāmarū, ’ia noa’a mai te pāhonora’a feruri-pāpū-hia, maoti te hāhaerera’a nā rāpae, ’ei hi’ora’a, ’aore rā te huti-hōhonu-ra’a i te aho, te tai’ora’a ē tae i te 100, ’e ’aore rā te ’ohipara’a i ni’a i te hō’ē ’ōpuara’a.
-
E fa’a’ite i te mau māna’ona’ora’a ma te hau ma te ’ore e fa’ahapa.
-
E rave i te taime nō te feruri i tō vetahi ’ē mana’o ’e ferurira’a.
Turu i te ’utuāfare
E ha’afifi te hāmani-’ino-ra’a i te mau melo o te ’utuāfare mai te ta’ata hāmani ’ino. Hi’o i te hōpe’ara’a i ni’a i te hoa fa’aipoipo o te ta’ata ’aore rā te ’utuāfare ’e ’a ’āparau i te reira mau fifi. Parau mau tītauhia ’ia tauturu i te ta’ata hāmani ’ino i roto i tāna ’ohipa tātarahapara’a, i te tahi rā taime e mana’o te feiā i hāmani-’ino-hia ē ’aita rātou e ha’apa’ohia ra, i te ’itera’a ē, e au ē, tē rōtahi ra te feiā fa’atere i ni’a i te tauturu-nā-mua-ra’a i te ta’ata hāmani ’ino. E hi’opo’a tāmau noa i te ta’ata i hāmani-’ino-hia nō te ha’apāpū ē tē ha’apa’o-ato’a-hia nei tōna mau hina’aro.
E fa’a’ohipa i te mau rāve’a tauturu a te ’oire ’aore rā te tauturu a te tahu’a fa’aa’o nō te mau melo o te ’utuāfare ’o tē hina’aro i te tauturu ’aore rā i te tūru’ira’a.
E tauturu i te mau melo o te ’utuāfare ’ia māramarama nāhea te Fa’aora e nehenehe ai e tauturu ia rātou nō te fa’aora iho i tō rātou māuiui (hi’o Alama 7:11 ’e Mataio 11:28–30).
E hōro’a i te tūru’ira’a tāmau i te tahi atu mau ta’ata i roto i te ’utuāfare tei māuiui ato’a i teie ’ohipa.
Fa’a’ohipa i te mau rāve’a tauturu a te pāroita ’e a te titi
’A ani i te parau fa’ati’a a te ta’ata hou ’a tāu’aparau ai i tōna vaira’a i te tahi atu mau ta’ata. E mea ti’a i te mau ’ēpisekōpo ’ia tāniuniu i te rēni tauturu nō te hāmani-’ino-ra’a mai te mea e hiti mai te mau uira’a nō ni’a i te ’ōmo’era’a ’e te hōpoi’a pārurura’a.
’A tauturu i te ta’ata ’ia tītau ’e ’ia fāri’i i te tauturu a te tahu’a fa’aa’o, mai te mea e tītauhia.
-
’A fa’a’ohipa i te mau rāve’a tauturu o te fenua iho e au i te mau parau tumu o te ’evanelia.
-
’A niuniu atu i te piha ’ohipa nō te ’utuāfare ’aore rā i te piha tōro’a a te ārea nō te mau rāve’a tauturu hau atu ’aore rā te mau rāve’a fa’aa’ora’a ta’ata.
E nehenehe e ’ohipa ’e te ’episekōpo nō te fa’ata’a i te taime i roto i te ’āpo’ora’a pāroita ’aore rā te tahi atu rurura’a, nō te ha’api’ipi’i i te feiā fa’atere nō ni’a i te āraira’a ’e te pāhonora’a i te hāmani-’ino-ra’a.