Te tōro’a ’ohipa

’Ua riro te tōro’a ’ohipa maita’i ’ei rāve’a e nehenehe ai i te mau ta’ata ’ia pāhono maita’i i tō rātou iho mau hina’aro ’e i te hina’aro o tō rātou ’utuāfare, nō te fa’a’ohipa ato’a i tō rātou ’aravihi ’e nō te ’ite i te manuiara’a. Parau mau tē vai ra te feiā ’imi ’ohipa e vai ’ohipa ’ore noa ra, e rave rahi rā tē rave ra i te ’ohipa i teienei, terā rā tē ’imi ra rātou i te tahi rāve’a rahi atu ā, mai te tauira’a ti’ara’a ’ohipa ’aore rā te fa’arahira’a i te moni ’āva’e.

Ta’a ’ē noa atu te tumu te ta’ata e ’imi nei i te ’ohipa, e nehenehe te mā’imira’a ’ohipa ’ia riro ’ei ’ohipa fifi mau, ’e e riro ē, te ta’ata ’imi ’ohipa tōna mau hina’aro rau. E riro te reira mau hina’aro nō te pae faufa’a ānei, te pae ferurira’a, te pae tino, ’aore rā te pae vārua. ’A ’ohipa ai ’outou ’e te mau ta’ata ’o tē ’imi nei i te ’ohipa, ’a ’imi nā mua ’ia māramarama i tō rātou mau hina’aro, ’e i muri iho e arata’i ai ia rātou i te mau rāve’a tauturu ’o tē nehenehe e tauturu ia rātou ’ia fa’atupu i te manuia tāmau. ’A fa’a’ite i tō ’outou here i te ta’ata tā ’outou e tauturu ra, ’e ’a tauturu ia rātou ’ia noa’a tō rātou ti’aturira’a ’a ’imi ai i te ’ohipa ’aore rā i te tahi atu mau rāve’a ha’api’ira’a ’aore rā te rāve’a nō te ha’amau i tāna iho ’ohipa.

’Imi ’ia hāro’aro’a

’Ia ’imi ana’e te hō’ē ta’ata i te ’ohipa, ’a ha’apāpū nā mua roa ē tē ’ite ra ’oia ē tē ta’ahia ra tōna mau mana’o. E mea hau a’e ’ia rave i te reira i roto i te hō’ē tāu’ara’a parau hō’ē hō’ē nō te tauturu i te ta’ata ’ia vai hau, ’ia ineine ’oia nō te fa’a’ite rahi atu ā. ’A feruri nā roto i te pure ’ia ui i te mau uira’a mai teie i muri nei, ma te au maita’i ’e te ’ā’au maita’i, nō te tauturu ia ’outou ’ia māramarama maita’i a’e i tōna vaira’a, ’e nō te hāro’aro’a i tōna mau hina’aro :

’Ua ’ite au ē e ’ere ato’a i te mea ’ōhie ’ia ’imi i te hō’ē ’ohipa. ’E aha te huru i tō ’oe pae ? E aha tā’u e nehenehe e rave nō te tauturu ?
E aha tā ’oe ’ohipa i teienei ?
E aha tā ’oe e ’imi ra ?
E aha te tōro’a ’aore rā te ’ohipa tā ’oe e hina’aro ra ?

Tauturu i te ta’ata

’A māramarama maita’i ai ’outou i te mau hina’aro o te ta’ata nō te pae o te ’ohipa, e nehenehe e fa’a’ohipa i te tahi o te mau mana’o tauturu i muri nei. ’A paraparau ai ’outou iāna, ’a ara ’ia fa’a’ite i te here ’e te au maita’i mai tā te Fa’aora e nā reira ra. Nō te arata’ira’a e nāhea i te tauturu maita’i a’e i te ta’ata ’ia ’imi i te ’ohipa, ’a hi’o i te parau pāpa’i « How to Help Someone Looking for a Job [Nāhea i te tauturu i te hō’ē ta’ata ’ia ’imi i te hō’ē ’ohipa] » ta’a ’ē atu i te mea e vai ra i raro nei.

E ui nā mua hou ’a fa’a’ite ai i te parau nō tāna mā’imira’a ’ohipa.

’A feruri nā roto i te pure i te tahi atu mau ta’ata ’o tē nehenehe e tauturu i te ’imira’a ’ohipa a terā ta’ata, mai te mau melo o te pāroita ’e te titi.
E ui i terā ta’ata : « E nehenehe ānei tā’u e fa’a’ite i te reira i te tahi atu mau ta’ata tē vai ra tā rātou mau hoa maita’i ’e e mau rāve’a e roa’a ai te ’ohipa nā ’oe ? »

’A fa’a’ite noa i te mau parau e tū’ati i te hina’aro o terā ta’ata.

Te ’imi pāpū nei te rahira’a o te mau ta’ata i te ’ohipa tano , ’eiaha rā te tahi noa atu ’ohipa, nō reira e ha’apāpū ē e fa’a’ite noa ’outou i te mau mana’o ’ohipa ’e te mau hoa e au i te mau fā tōro’a ’ohipa a terā ta’ata. Noa atu ē e mana’o maita’i tō ’outou, e nehenehe te fa’a’itera’a i te mau huru mana’o ’ohipa ato’a i te fa’atupu i te mana’o ē, ’aita te ta’ata e ta’a ra i tōna hina’aro.
E nehenehe e tāpe’a i te hō’ē tāpura nō te feiā i roto i te pāroita ’o tē nehenehe e hōro’a i te mau rāve’a tauturu i te feiā ’imi ’ohipa i roto i te mau taiete ’ohipara’a ’e te mau tōro’a rau.

Arata’i atu iāna i te feiā ’aravihi. Te rahira’a o te taime, e’ita te hō’ē ta’ata ’imi ’ohipa e tīa’i nei ia ’outou ’ia fa’a’ite atu iāna nāhea ’ia rave i tāna mā’imira’a ’ohipa ’aore rā ’ia riro ’ei ta’ata fa’aineine nō te ’ohipa, nōna. E mea pinepine a’e ’outou i te tauturu rahi roa atu nā roto i te fa’a’itera’a ia rātou i te mau rāve’a tauturu a te feiā ’aravihi nō te pae o te mā’imira’a ’ohipa.

Te mau rāve’a a te ’oire, te mau video i ni’a i te natirara, te mau mā’imira’a natirara, te mau buka, ’e te mau parau ve’a e vai ra, e mau rāve’a tauturu fa’ahiahia roa ïa nō te mā’imira’a ’ohipa.
Mai te peu e hina’aro te ta’ata i te hō’ē ta’ata fa’aineine nō te ’ohipa, ’a tauturu iāna ’ia tū’ati atu i te hō’ē ta’ata ’aravihi i roto i te mau rāve’a mā’imira’a ’ohipa. E mea pinepine te mā’imira’a natirara nō te hō’ē ta’ata fa’aineine tāmoni ’ore, e ta’ata fa’aineine nō te ’ohipa, i te hōro’a mai i te i’oa o te tahi ta’ata ’aravihi, tei ’ana’anatae e tauturu mai.
I te tahi mau vāhi, e nehenehe ’outou e tū’ati atu i te tauturu ’e te mau rāve’a a te piha ’ohipa nō te tōro’a ’ohipa a te ’Ēkālesia.
Mai te mea tē tupu ra te ahoaho ferurira’a ’aore rā manava nō te mā’imira’a ’ohipa fifi, e nehenehe e fa’afārerei iāna i te hō’ē tahu’a a’o ’aore rā te tahi atu mau rāve’a tauturu nō te ea o te ferurira’a.

Turu i te ’utuāfare

E nehenehe te mau tāfifira’a nō te ’ohipa e fa’atupu i te fifi i ni’a i te mau melo o te ’utuāfare ’e te ta’ata ato’a. E tītauhia paha te tauturu i te pae o te ferurira’a, i te pae vārua, ’e i te pae moni nō te ’utuāfare. ’A ha’amana’o ’ia vai ara noa i te mau vaira’a huru rau o te ’utuāfare tāta’itahi. ’A ara maita’i i te mau fifi ea i te pae manava e nehenehe e tupu mai nō te mau tāfifira’a nō te ’ohipa, nō te fa’afārerei i terā mau ta’ata i te mau rāve’a mai te mau taote.

’A ’āparau i te ’utuāfare nō ni’a i tō vaira’a i te pae faufa’a, ’e ’a paraparau nō ni’a i tā rātou mau rāve’a tauturu. ’A ha’amana’o ē e rave rahi melo e taiā ’e e’ita e hina’aro e ani i te tauturu pae moni, noa atu ē ’aita tā rātou i nava’i. ’A vai ara i te reira, ’e ’a hōro’a atu i te tauturu, ’eiaha e tīa’i ’ia anihia mai. E nehenehe e hi’o i te mātēria tauturu nō te faufa’a moni, ’ei tauturu.

Fa’a’ohipa i te mau rāve’a tauturu a te pāroita ’e a te titi

E nehenehe te mau melo o te ’Ēkālesia e pāturu ’e e tauturu i te feiā e ’imi ra i te ’ohipa. ’A ha’amana’o ’ia ani i te parau fa’atia hou ’a fa’a’ite ai i te parau nō ni’a i tā te ta’ata mā’imira’a ’ohipa. ’A ani i te mau melo ’ia tai’o i te parau ve’a ra « Nāhea i te tauturu i te hō’ē ta’ata ’ia ’imi i te hō’ē ’ohipa » nō te tauturu ia rātou ’ia ’ite nāhea ’ia aupuru i te hō’ē ta’ata e ’imi ra i te ohipa.

Nō te mau ta’ata e fifi tō rātou nō te ’ite mai i te ’ohipa (mai te ta’ata ’aita i noa’a te tahi ha’api’ipi’ira’a, ’aore rā e fifi i te pae sōtiare ’e te manava, ’aore rā e fifi nō te reo), e tītauhia paha ia ’outou ’ia fa’a’ohipa i te tahi atu ā mau rāve’a tauturu :

Mai te mea ē tē vai ra, e nehenehe Development Counseling Services [Te piha ’ohipa nō te fa’aa’ora’a i te fa’ahotura’a] e tauturu. E ’ite-ato’a-hia teie piha ’ohipa i te pū Deseret Industries .
A ’imi i te mau rāve’a tauturu i ni’a i « Disabilities Resources [Te mau rāve’a tauturu nō te mau huma] » i ni’a ia ChurchofJesusChrist.org.

’A ’imi ’e ’a fa’aitoito i te fa’a’ohipara’a i te mau fa’anahora’a tāvinira’a ’e te mau rāve’a tauturu a te fenua. Teie te tahi mau rāve’a :

Te mau pū a te hau ’e te mau taiete unuma.
Te mau pū ’ohipara’a nō te fare ha’api’ira’a tōro’a.
Te mau pū e ’ere nā te hau (ONG).
Te mau fa’anahora’a farapatira’a (apprentissage), ha’api’ipi’ira’a, ’e ha’api’ira’a i ni’a i te ’ohipa.