Te ho’ira’a i roto i te tāvinira’a

Penei a’e e mau misiōnare tei ho’i ’oi’oi i te fare ’o tē hina’aro e ho’i i roto i te tāvinira’a misiōnare ’e ’aore rā e ’imi i te tahi atu mau rāve’a nō te tāvini. I terā vaira’a, ’a feruri i te mau rāve’a i muri nei :

1. Te fa’aho’ira’a iāna i roto i te misiōni porora’a rave tāmau.

E mea faufa’a roa ’ia feruri māite te misiōnare i te tumu nō tōna ha’amāuruuru-’oi’oi-ra’a-hia ’e i te mea ē, e riro teie mau fifi i te tupu fa’ahou ā, mai te mea e fa’aho’ihia ’oia i ni’a i te tōro’a. Te mea pinepine, ’ia ho’i ’oi’oi mai te mau misiōnare i te fare, ’ua iti mai te urupu’upu’u nō te misiōni ’e ’ua maita’i mai to rātou ea pae tino ’e pae ferurira’a. ’A ha’amana’o ē e mea pinepine te mau tītaura’a ’e te mau ’ohipa fa’atupu urupu’upu’u o te hō’ē misiōni i te fa’a’ū’ana i teie mau fifi.

Mai tā te peresideni Gordon B. Hinckley i ha’api’i mai : « E mea faufa’a roa te ea maita’i pae tino ’e pae ferurira’a. Noa atu te huru o te ma’i ’e ’aore rā te paruparu pae tino ’e pae ferurira’a o te hō’ē misiōnare ’ia haere mai ’oia i roto i te ’āua, e ’ū’ana roa atu ā i mua i te urupu’upu’u o te ’ohipa… Tē hina’aro nei tātou i te mau misiōnare, terā rā e mea ti’a ’ia mara’a ia rātou i te rave i te ’ohipa… E mea tītauhia te ea maita’i ’e te pūai, i te pae tino ’e i te pae ferurira’a, nō te mea e mea fa’ahepo te ’ohipa, e mea roa te mau hora ’e e nehenehe te urupu’upu’u e riro ’ei mea teimaha» (« Tāvinira’a misiōnare », Te putuputura’a ha’api’ipi’ira’a mātāmua nā te feiā fa’atere o te ao nei, 11 nō Tēnuare 2003, 17–18). E mea ti’a i tera ta’ata ’ia pāpū ē e mara’a iāna e ha’apa’o i te huru o te ’ohipa ’ia ho’i ’oia i roto i te ’āua misiōni. Nō te fa’aho’ira’a iāna i ni’a i te tōro’a, tītauhia i te peresideni titi ’ia hāpono i te mau mea i muri nei i te tuha’a fa’atere misiōnare :

• Te hō’ē rata nā te peresideni titi e ani ra i te fa’aho’ira’a iāna i ni’a i te tōro’a, ’o tē ha’apāpū ra ē ’ua ti’amā te missiōnare nō te tāvini, ’ua tātā’i-pauroa-hia te mau fifi nō tōna ha’amāuruurura’ahia, ’e ’ua uiui ’oia i te misiōnare, ’e tē mana’o ra rāua to’opiti te misiōnare ē, e nehenehe ’oia e rave maita’i i roto i te ’āua.

• Te hō’ē rata nā te misiōnare e fa’a’ite ra i tōna mau mana’o nō ni’a i te ho’i-fa’ahou-ra’a i roto i te tāvinira’a misiōnare.

• Te hō’ē rata nā te taote, nō rātou ’o tei ho’i i te fare nō te hō’ē ma’i ’aore rā te hō’ē fifi i te pae nō te ferurira’a, ma te fa’a’ite i te huru o te reira, te rapa’aura’a i fa’aterehia, te manuiara’a te rapa’aura’a, te mau rā’au ’aore rā te tahi atu rapa’aura’a e tītauhia i roto i te ’āua misiōni, nā reira ato’a te hō’ē hi’opo’ara’a nō ni’a i te ’aravihi o te misiōnare i raro a’e i te mau fa’ahepora’a o te tāvinira’a misiōnare ’e i pīha’i iho i te hō’ē hoa misiōnare.

• E tītauhia te fa’a’āpīra’a o te mau mau ’api parau nō ni’a i te ea ’e te niho mai te mea ’ua hau i te hō’ē matahiti te ha’amāuruurura’ahia.

2. Misiōni i te piha ’ohipa (SM).

E nehenehe e ’ōpuahia te mau rāve’a tāvinira’a i roto i te mau ti’ara’a rau ’e nō te maorora’a huru rau. ’A hi’o i ni’a i te tahua natirara ChurchofJesusChrist.org/Service-missionary nō te tahi atu mau ha’amāramaramara’a.

3. Te tahi atu mau pi’ira’a.

I te mau ārea ’aita e rāve’a tāvinira’a misiōnare piha ’ohipa, ’aore rā mai te mea e ’ere te reira i te fa’auera’a ’ohipa tano nō te hō’ē misiōnare, e nehenehe e fa’atae atu i te pi’ira’a misiōnare pāroisa ’e ’aore rā ’ei rave ’ohipa nō te hiero ’aore rā e hi’ohia te hō’ē rāve’a nōna nō te hōro’a i tōna taime.