Te mau mātēria tauturu nō te fa’aa’o i te ta’ata

Nāhea vau i te tauturu i te ta’ata ’ia fa’aineine i tā rātou iho mau fa’anahora’a ?

’Ei ti’a fa’atere nō te ’Ēkālesia, e rāve’a hō’ē tā ’outou nō te hōro’a i te pāturura’a i te mau ta’ata ’o tei fifi nā roto i te fa’a’ohipara’a i te hōho’a faufau ’e i tō rātou ato’a mau hoa fa’aipoipo, te mau metua, ’e te tahi atu mau ta’ata i ro’ohia. E nehenehe tā ’outou pāturura’a e tauturu ’ia fa’aiti i te ha’amā tei tā’ati-pinepine-hia i te fa’a’ohipara’a i te hōho’a faufau (’a hi’o Wendy Ulrich, « It Isn’t a Sin to Be Weak », Ensign, ’Eperēra 2015, 30–35).

E rave rahi ta’ata e ’ite nei i te manuiara’a nā roto i te fa’a’ohipara’a ’e te pe’era’a i tā rātou iho fa’anahora’a nō te ūpo’oti’a i ni’a i te hōho’a faufau. E tītauhia paha nō te ta’ata māta’ita’i hōho’a faufau ’e tōna hoa fa’aipoipo ’aore rā te melo o te ’utuāfare, i te hō’ē fa’anahora’a ta’a ’ē nō te ora ma’i i te reira. E hōpoi’a nā te ta’ata tāta’itahi ’ia ’imi i te heheura’a nōna iho, ’ia ’imi i te mau pāhonora’a, ’e ’ia fa’aineine ’e ’ia pe’e i tāna fa’anahora’a. ’Ei ti’a fa’atere, e nehenehe ’outou e fa’aitoito ’e e pāturu i te mau ta’ata ’a fa’aineine ai rātou i tā rātou mau fa’anahora’a, te hōpoi’a rā nō te ha’amau i te mau fa’anahora’a ’e nō te hi’opo’a i tō rātou maita’i, nā te ta’ata iho ïa.

Nā roto i te mau ’āparaura’a fa’auruhia ’e te mau ta’ata ’e tō rātou mau hoa fa’aipoipo ’aore rā te ’utuāfare, e nehenehe tā ’outou e fa’aitoito ia rātou ’ia fa’aineine i te mau fa’anahora’a nō te upo’oti’a i ni’a i teie fifi. ’A fa’atupu ai te mau ta’ata i te mau fa’anahora’a nō te taui, e nehenehe tā ’outou e pāturu ia rātou nā roto i te mau rāve’a i muri nei :

• Rōtahi i ni’a i te Mesia.

• Fa’aō mai ia vētahi ’ē.

• Fa’a’ohipa i te mau rāve’a tauturu tano.

Rōtahi i ni’a i te Mesia

Noa atu ē e rave rahi arata’ira’a nō te tauturu i te mau ta’ata ’ia haere i mua, tō ’outou ti’ara’a ’ei ti’a fa’atere o te tauturura’a ïa ia vētahi ’ē ’ia haere mai i te Mesia ra, ’ia ’imi i te ora pae vārua, ’e ’ia ’imi i te fa’afaitera’a ’e te Atua ’e i te feiā tā rātou i ha’amāuiui nā roto i tā rātou ravera’a.

’A fa’aitoito ai ’outou i te mau ta’ata ’ia fa’aineine i tā rātou fa’anahora’a, ’a tūtava i te tauturu ia rātou ’ia fa’arahi i tō rātou fa’aro’o i te Metua i te ao ra ’e ia Iesu Mesia. E tauturu ia vētahi ’ē ’ia ’ite i te mau ha’amaita’ira’a e tae mai nā roto i te ha’apa’ora’a i te parau a te Metua i te ao ra. E fa’aitoito ia rātou ’ia fa’a’ohipa i te mau ha’amaita’ira’a nō te tāra’ehara a Iesu Mesia ’e ’ia ha’apa’o i tā rātou mau fafaura’a. E ani ia rātou ’ia ’imi i te arata’ira’a a te Vārua ’a fa’a’ohipa ’e ’a ha’apāpū ai rātou i tā rātou fa’anahora’a.

E tūtava i te tauturu i te mau ta’ata ’ia fāriu i te Fa’aora ra. ’O ’oia te puna rahi roa a’e nō te pūai ’e tē mau ra ’oia i te pa’ari rahi roa a’e. ’Ua ’ite ’e ’ua here ’oia i te ta’ata tāta’itahi. ’Ia fāriu te mau ta’ata i te Fatu, e arata’ihia rātou nō te ’ite e nāhea ’ia pāhono i teie fifi, ’e e utuutu ’oia ia rātou. E ’imi i te fa’aurura’a e nāhea i te pāturu i te mau ta’ata ’e te mau hoa fa’aipoipo ’e nāhea ’ia tauturu ia rātou ’ia patu i tō rātou aura’a ’e te Fa’aora.

E fa’aō mai ia vētahi ’ē

E ’ū’ana roa te hōho’a faufau i roto i te vāhi mo’emo’e ’e e fa’atupu pinepine te reira i te ha’amā. E nehenehe te fa’aitoitora’a i te ta’ata ’ia tū’ati ia vētahi ’ē e tauturu ia rātou ’ia ’ite i te pūai. E mea faufa’a ’ia ha’amau terā ta’ata ’e tōna hoa fa’aipoipo i te hō’ē pupu ta’ata tauturu e fa’aitoito ia rāua ’e tō rāua tupura’a.

Tei te huru o te ta’ata iho te rahi ’e te nātura o te pāturura’a e hina’arohia. Te hō’ē ta’ata tei hi’o i te hōho’a faufau i te tahi noa taime, e hina’aro paha ïa ’oia i te tahi taime iti ’e te tahi tauturu na’ina’i nō rāpae mai, nō te fa’a’ore i te fifi. E parau mau ato’a paha te reira nō tōna hoa fa’aipoipo. Terā rā, te hō’ē ta’ata ’o tei hi’o i te hōho’a faufau nō te hō’ē tau maoro ’e ’aita te hoa fa’aipoipo i ’ite ’aore rā ’o tei haere roa atu i roto i te hōho’a hā’iri’iri, e tītauhia paha nōna te taime roa atu ā ’e te tauturu rahi atu ā. Penei a’e e tītau-ato’a-hia te tahi taime roa atu ā ’e te tauturu rahi atu ā nō tōna hoa fa’aipoipo.

’Utuāfare

E nehenehe te here, te pāturura’a, ’e te arata’ira’a e tae mai nā roto mai i te mau melo o te ’utuāfare. ’A fa’aitoito i te mau ta’ata ’ia tūru’i i ni’a i te pūai o tō rātou hoa fa’aipoipo, o te mau metua, ’e o te mau fēti’i nō te ’aro i te fifi nō te hōho’a faufau. Terā rā, e mea ti’a i te mau ta’ata ’ia feruri i te māuiui e tupu ato’a ra i roto i te mau melo o te ’utuāfare. ’A fa’aitoito i te mau ta’ata ’ia ani i te pāturura’a mai roto mai i te mau melo o te ’utuāfare ’o tei fa’aineine ia rātou nō te pāturu mai. Te rahira’a taime e ’ū’ana te fa’a’ohipara’a o te hōho’a faufau i roto i te vāhi mo’emo’e ; nō reira e nehenehe te ha’apa’o-maita’i-ra’a i te fa’a’itera’a i te reira e riro ’ei tuha’a faufa’a nō te ora mai i terā ma’i. Nō te mau ta’ata i fa’aipoipohia, i mōmo’ahia ’aore rā e tā’amura’a i fa’auhia, ’ua riro te fa’a’itera’a ’ei tuha’a faufa’a rahi.

Fa’a’ohipa i te mau rāve’a tauturu tano

E rave rahi tumu e arata’i nei i te hō’ē ta’ata ’ia fa’a’ohipa i te hōho’a faufau. Te rāve’a pae vārua, noa atu ē e mea faufa’a rahi, e ’ere paha te reira ana’e te tauturu tei tītauhia nō te mau ta’ata. Penei a’e e tītau-ato’a-hia e fa’a’āfaro i te tahi atu mau mea i roto i tō rātou orara’a, mai te mau ’umera’a o te tino, ’e o te manava ’e o te sōtiare. ’A fa’aitoito tano i te mau ta’ata ’ia feruri i te mau huru tauturu tei tītauhia nō rātou, nō te ’aro i te tahi atu ā mau ’umera’a i roto i tō rātou orara’a. Tē vai ra te ’imira’a i te tauturu i roto i te mau rāve’a mai te mau rēni natirara maita’i ’e te mau taote ’e te mau tahu’a manava.

Te mau taote

Penei a’e e tītauhia te mau taote ’e te mau tahu’a manava, i te taime iho ā rā ’ua manuia ri’i noa te mau tauto’ora’a i ravehia, i te tāmatara’a i te fa’a’ore i te hōho’a faufau mai roto atu i tō rātou orara’a. E tītau-ato’a-hia paha te reira tauturu nō te hoa fa’aipoipo, e fa’aruru ho’i rātou i te ha’avarera’ahia tō rātou ti’aturira’a. E mea ti’a i te mau ta’ata ato’a e mā’itihia nō te ō i roto i tā rātou mau fa’anahora’a nō te ūpo’oti’a i ni’a i te hōho’a faufau, ’ia pāpū maita’i i te mau ture o te ’evanelia.

Rāve’a ’āpī

E rave rahi mauiha’a natirara ta’a ’ē tē nehenehe e tauturu i te mau ta’ata ’ia pāto’i i te fa’ahemara’a e hi’o i te hōho’a faufau. E hōro’a mai te tahi o te reira i te mau ha’amāramaramara’a tauturu, mai te tuha’a ra « Addressing Pornography [Pāhono i te fifi nō te hōho’a faufau] » o te ChurchofJesusChrist.org, te Support Guide: Help for Spouses and Family of Those in Recovery [Arata’ira’a tauturu : Tauturu nō te mau hoa fa’aipoipo ’e te ’utuāfare o te feiā tē ora mai ra tōna ma’i, te mau rāve’a ha’apurorora’a a te ’Ēkālesia, fightthenewdrug.org, ’e te tahi atu ā. E hōro’a te tahi mau rāve’a rorouira i te rāve’a āraira’a mai te mau tīti’a ’o tē hi’opo’a ’e ’o tē tāpe’a i te tomora’a, ’e te tahi atu mau rāve’a tauturu, mai te fa’anahora’a fortify.com, e hōro’a i te hō’ē āraira’a naho.

Te mau tuha’a nō te hō’ē fa’anahora’a maita’i

’A hāmani ai te mau ta’ata i tā rātou fa’anahora’a, ’a fa’aitoito ia rātou ’ia feruri i teie mau mea :

• Pāpa’i i tā rātou fa’anahora’a, e fa’ahiti māramarama maita’i i te mau ’ohipa ’e te mau fā, ’e i muri iho e fa’a’ite, e hi’opo’a ’e e fa’atanotano i te mau fa’anahora’a ’ia hina’arohia.

• Hi’o nāhea ’ia vai itoito noa, noa atu e fa’aruru rātou i te mau taupupūra’a.

• Ha’amau i te hō’ē fa’anahora’a ti’a’aura’a, i reira e nehenehe ai ia rātou ’ia fa’a’ite i tō rātou haerera’a i mua i te hō’ē melo o te ’utuāfare e nehenehe e ti’aturi, te hō’ē hoa, ’e ’aore rā te hō’ē ti’a fa’atere o te ’Ēkālesia. ’Aita i tītauhia ’ia rave i te reira mau parau fa’a’ite ti’a’aura’a ’e te ’episekōpo.

• E ani i te hō’ē hoa fa’aipoipo, te metua, te tahi atu melo o te ’utuāfare, ’aore rā i te tahi atu ta’ata ’ia hi’opo’a ’e ’ia pe’e i tā te reira fa’anahora’a. E nehenehe te reira e riro ’ei tauturu, te fa’a’ite-tāmau-ra’a i te tahi atu ta’ata nō ni’a i te terera’a te mau fa’anahora’a. (’A hi’o « E aha te mea e rōtahi atu nō te ūpo’otia i ni’a i te hōho’a faufau ? »)