E aha te taime e feruri ai nō te tauturu a te feiā ’aravihi

’Aita e tītauhia, ’aita ato’a e fa’aitoitohia i te feiā fa’atere o te ’Ēkālesia ’ia riro ’ei feiā ’aravihi i te pae nō te ea o te ferurira’a. Noa atu rā i te reira, e mea pinepine te mau ta’ata e vai ra i roto i te reira fifi, i te fāriu atu i ni’a i tō rātou feiā fa’atere nō te ani i te tauturu ’ia ’ite ē, e aha te ’ohipa e rave.

Fātata te tā’āto’ara’a o te ta’ata e fārerei nei i te tahi mau huru fifi i te pae o te ea nō te ferurira’a i terā ’e terā taime o te orara’a, e nehenehe te mau tāmatara’a e riro ’ei mea ’ino mau. Te mau ta’ata e fa’aruru ra i te tahi mau huru ri’i tāmatara’a, pinepine rātou i te pāhono i te mau mana’o tauturu i vauvauhia i roto i te parau poro ra Fa’atano i ni’a i te orara’a misiōnare (buka iti, 2013). Noa atu ’ua fa’aineinehia teie rāve’a tauturu nō te mau misiōnare, e tauturu te reira i te ’itera’a i te mau rāve’a e nehenehe ai i te mau huru ta’ata ato’a ’ia pāhono i te mau tāmatara’a. Hau atu i te reira, e nehenehe te hō’ē pāturura’a here nā roto mai ia ’outou, nā te mau melo o te ’utuāfare, ’e nā vetahi ’ē, e tauturu i te ta’ata ’ia upo’oti’a i ni’a i te fifi nō te ea o te ferurira’a.

Terā rā, mai te mea ’aita te reira ta’ata e pāhono i te reira mau ravera’a, e riro te hō’ē ta’ata ’aravihi nō te ea o te ferurira’a i te tītauhia ’ia hōro’a mai i te hō’ē hi’opo’ara’a tano.

Teie te tahi mau fifi pae ferurira’a e tītau i te hō’ē hi’opo’ara’a a te hō’ē ta’ata ’aravihi nō te ea o te ferurira’a, ’e ’o tā te mau melo fa’atere o te ’Ēkālesia e nehenehe e fārerei i roto i tā rātou pāroita ’aore rā, ’āma’a :

• Te mau mana’o ’aore rā, te mau tāmatara’a ’ōnohi

• Fa’aturumara’a maoro

• Te ’orera’a e ti’a ’ia rave i te mau ’ohipa mātarohia i te mau mahana ato’a

• Hepohepo, ti’aturi ’ore, riri iāna iho

• Tāpūra’a, tāpūpūra’a, ha’amāuiuira’a iāna iho

• Te mata’u rahi ’ia poria ; te topara’a rahi ’aore rā, te mara’ara’a rahi o te kilo

• Te peu ’aore rā, te mau parau e tu’u ’ore ’aore rā, nā ni’a iho noa ma te vī ’ore

• Mau mana’o ’aore rā, mau hina’aro ’ū’ana tāmau

• Fa’a’ite tāmaura’a i te mau fifi ri’i

• Te ri’ari’a, te mata’u rahi, ’aore rā, te mau mana’o hepohepo vī ’ore

• Mo’emo’era’a

• Te mau tāuiuira’a o te huru ’aore rā, o te huru ta’ata

• Ahoaho, moemoeā ha’avare, fa’aro’o i te reo

• Peu ’āpenira’a ataata

• Mau peu fifi (riri, peu ’ino, ’arora’a)

I roto i teie mau tupura’a fifi ’e te tahi atu, ’a feruri e tāu’aparau i te feiā ’aravihi (hi’o « ’Āparaura’a ’e te rapa’āura’a a te feiā ’aravihi » Buka arata’i rahi, 31.2.6). E nehenehe te feiā fa’atere o te ’Ēkālesia e fārerei atu i te Pū tāvinira’a ’utuāfare (mai te mea tē vai ra) ’aore rā, te piha tōro’a nō te ārea nō te ’ite ē, nāhea ’ia tauturu i te ta’ata ’e nō te ’imi i te mau rāve’a tauturu.