« Te fa’a’ohipara’a i te hōho’a faufau », Te mau mātēria nō te fa’aa’o i te ta’ata (2020).
« Te fa’a’ohipara’a i te hōho’a faufau », Te mau mātēria nō te fa’aa’o i te ta’ata.
Te fa’a’ohipara’a i te hōho’a faufau
Te hōho’a faufau ’o te mau huru mātēria ato’a ïa e fa’ahōho’a ’aore rā, e fa’a’ite i te tino ta’ata ’aore rā te peu hereherera’a, ’o tē fa’atupu i te mau mana’o hereherera’a. ’Ua ha’api’i tāmau noa te ’Ēkālesia ē, e peu hara te fa’a’ohipara’a i te hōho’a faufau.
Te rahira’a o te ta’ata e fa’a’ohipa i te hōho’a faufau, e fa’aruru rātou i te mau fifi rau i roto i tōna tā’amura’a—i te Atua, iāna iho, ’e ia vetahi ’ē. E nehenehe ato’a rātou e fāri’i i te mau mana’o fa’ahapahapa ia rātou iho ’aore rā, te ha’amā. Noa atu te fāito fa’a’ohipara’a i te hōho’a faufau, e tuha’a faufa’a rahi te fa’a’itera’a i te here ’e te māuruuru i te mau ta’ata nō tō rātou itoito i te fa’a’itera’a mai i terā fifi, nō te tauturu ia rātou ’ia fa’arahi i te mana’o o tō rātou faufa’a ’e te ’aravihi ’ia upo’oti’a i ni’a i te fifi.
’Ia tauturu ana’e ’outou i te mau ta’ata e ’aro ra i te fa’a’ohipara’a i te hōho’a faufau, ’a ’imi i te arata’i atu ia rātou i te Mesia ra. ’A fa’aitoito i te mau ta’ata ’ia hāro’aro’a i te mau tumu i fa’a’ohipa ai rātou i te hōho’a faufau, ’e ’ia ha’amau i te tahi ’ōpuara’a nō te taui i tā rātou peu.
’Imi ’ia māramarama
E nehenehe te fa’a’ohipara’a i te hōho’a faufau e riro mai ’ei ma’i fa’atītī, terā rā e fa’aitoito ’outou i te mau melo ’ia tūtonu i ni’a i tō rātou ti’ara’a hanahana ’ei tamaiti ’e ’ei tamāhine nā te Atua, ’eiaha rā e fa’ariro ia rātou ’ei ta’ita’i reva nō terā peu. ’A feruri nā roto i te pure i te mau uira’a mai teie nō te māramarama maita’i a’e i te fa’a’ohipara’a a te melo i te hōho’a faufau, ’e nō te hāro’aro’a i tōna mau hina’aro.
-
E aha te mea tā te hōho’a faufau i fa’atupu i ni’a i tō ’oe orara’a ?
-
E aha te pinepinera’a tā ’oe fa’a’ohipara’a i te hōho’a faufau ?
-
Tae mai i teie taime, e aha te mea tei tauturu ia ’oe ’ia upo’oti’a i ni’a i teie fifi ?
-
’Ua nāhea ’oe i te fa’a’ohipara’a i te mau parau tumu o te ’evanelia nō te upo’oti’a i ni’a i teie fifi ?
Mai te mea tē ’ite ra ’outou i te peu māta’ita’ira’a, te ho’oho’ora’a, ’aore rā, te ’ōperera’a i te hōho’a faufau tamari’i, ’a paraparau atu i te huimana fa’atere o te fenua. Tē vai ato’a ra te hō’ē rēni tauturu nō tō ’outou ’episekōpo, nō te niuniu mai ’ia fārerei ana’e ’oia i teie fifi
Tauturu i te ta’ata
Pinepine te fa’a’ohipara’a i te hōho’a faufau i te riro ’ei fifi hau atu i te tahi noa paruparu pae mōrare, ’e e rave rahi tumu tō te reira. Te tauturura’a i te ta’ata ’ia māramarama maita’i a’e i te mau tumu e fa’a’ohipahia nei te hōho’a faufau, e nehenehe ïa te reira e ha’apūai iāna nō te upo’oti’a i ni’a i te reira.
’A ha’apa’ari i te māramaramara’a o te ta’ata nō ni’a i te ha’api’ira’a tumu ’o tē nehenehe e tauturu iāna ’ia upo’oti’a i ni’a i te fa’a’ohipara’a i te hōho’a faufau :
-
’A tauturu iāna ’ia māramarama i te ti’ara’a o te Fa’aora ’e tōna ’aravihi ’ia tauturu ia tātou maoti tāna tāra’ehara.
-
’A tauturu i te ta’ata ’ia ’ite i tōna ti’ara’a ’ei tamari’i nā te Atua ’e ’ia ’ite i tōna iho mau pūai, mau tārēni ’e te ’aravihi.
-
’A tauturu i te ta’ata ’ia māramarama i te parau nō te ti’amāra’a ’ia mā’iti ’e tāna hōpoi’a ’ia fa’a’āfaro i te reira fifi.
-
’A tauturu i te ta’ata ’ia māramarama i te hō’ē o te mau hope’ara’a ’ino o te fa’a’ohipara’a i te hōho’a faufau, ’oia ho’i, e mea pinepine te ta’ata fa’a’ohipa i te ha’amata i te hi’o ia vetahi ’ē mai te au i te mau tao’a nō te ha’amāha i tō rātou mau hina’aro, ’eiaha rā ’ei tamaiti ’aore rā, ’ei tamāhine nā te Atua.
-
’A ’āparau i te ta’a-’ē-ra’a i rotopū i te mana’o fa’ahapa (« ’ua rave au i te hō’ē ’ohipa ’ino ») ’e te ha’amā (« e ta’ata ’ino vau »), ’e ’a tauturu i te ta’ata ’ia māramarama i te faufa’a o te mana’o fa’ahapa ti’a, ’e te ha’apaera’a i te ha’amā.
-
’A fa’aitoito i te melo ’ia ’imi i te mau ha’amāramaramara’a nō ni’a i te hereherera’a mā, te hereherera’a ti’a, ’e te ’ohipa a te hina’aro herehere i roto i te mau ’ōti’a tā te Atua i ha’amau.
’A fa’aitoito i te ta’ata ’ia ha’amau i te hō’ē ’ōpuara’a nō te fa’aea i te fa’a’ohipa i te hōho’a faufau.
-
’A ani i te ta’ata ’ia ’imi i tāna iho fa’aurura’a nō te ha’amau i te hō’ē ’ōpuara’a e nehenehe e manuia.
-
’A fa’aitoito i te ta’ata ’ia fa’anaho i te mau rāve’a nō te fa’aiti i te hi’ora’a i roto i te hōho’a faufau, mai te ha’amaura’a i te mau tīti’a natirara ’e te fa’ati’ara’a i te tahi atu ta’ata ’ia tomo i roto i te mau mātini ’āfa’ifa’i, te mau mātini rorouira ’e te mau parau tomora’a nō te hi’opo’a i te pāpa’a hi’ohi’ora’a.
’A fa’aitoito i te ta’ata ’ia ’imi i te vaira’a mataro-roa-hia a’e ’o tē fa’arahi i te fa’ahemara’a ’ia fa’a’ohipa i te hōho’a faufau, ’e nāhea i te ’ape i te reira.
-
’A fa’ata’a i te « i hea », « a hea », ’e « nāhea » o te vaira’a tāta’itahi (e nehenehe e fa’aiti i te haerera’a i ni’a ’e te fa’a’ohipara’a i te mau ha’apararera’a parau, mai te mau ve’a, te mau buka, te ’āfata teata, te teata, te pehe, te itenati, ’e tē vai atu ra).
-
’A hi’ohi’o e aha te mau mana’o i tae ai i ni’a i terā vaira’a (mai te ha’umani, te mo’emo’e, te riri, te hepohepo, ’aore rā, te rohirohi).
’A ani i te ta’ata ’ia ’āparau i te fifi i tōna hoa fa’aipoipo ’aore rā, i te hō’ē metua.
-
’A fa’aitoito i te ta’ata ’ia ha’amau i te hō’ē ’ōpuara’a nō te fa’atupu fa’ahou i te ti’aturi i roto i te feiā ’o tē mana’o ra ē, ’ua ha’avarehia rātou nā roto i teie fa’a’ohipara’a i te hōho’a faufau.
’A ani i te ta’ata ’ia fārerei tāmau i te hō’ē ta’ata ti’aturihia nō te ’āparau i tōna haerera’a i mua.
E nehenehe e fa’atū’ati i terā ta’ata i te mau pupu turu ’aore rā, i te mau fa’anahora’a ’o tē turu nei i te hō’ē ā mau peu nō te upo’oti’ara’a i ni’a i te hōho’a faufau.
-
’A ani i te melo ’ia ’āmui atu i te hō’ē pupu turu fa’aorara’a ma’i fa’atītī (tuha’a « Te fa’aoraorara’a iāna i te ma’i fa’atītī » o te ChurchofJesusChrist.org) mai te mea tē vai ra.
-
Mai te mea ’aita hō’ē noa a’e fa’anahora’a pāturu i reira, ’a feruri i te tahi atu mau rāve’a e vai ra, mai te mau pupu ’aore rā, te mau fa’anahora’a pāturu nō te ’oire ’aore rā, i ni’a i te natirara.
Pāturu i te ’utuāfare
E fa’atupu te fa’a’ohipara’a i te hōho’a faufau i te hō’ē mea i ni’a i te hoa fa’aipoipo ’e i te tahi atu mau melo o te ’utuāfare. ’Ia tāmata ana’e ’outou i te pāturu i te hoa fa’aipoipo ’aore rā, i te tahi atu mau melo o te ’utuāfare o terā ta’ata, ’a fa’aro’o i tō rātou mau mata’u ’e te mau ha’ape’ape’ara’a. E hi’o maita’i ē e fa’a’ite atu i te here ’e te aumihi mai tā te Fa’aora e nā reira. Hau atu, ’ia pāpū maita’i ē tē hōro’a ra ’outou i te pāturura’a tano i te hoa fa’aipoipo e tāfifi ra paha. Hi’o Te tauturu nō te mau hoa fa’aipoipo o te feiā e fa’a’ohipa nei i te hōho’a faufau nō te mau ha’amāramaramara’a hau atu.
’A fa’aitoito i te hoa fa’aipoipo ’aore rā, i te melo o te ’utuāfare ’ia feruri e aha te ’ohipa tā teie mea e fa’atupu ra i ni’a iāna, ’e ’ia tītau i te tauturu, mai te mea e hina’arohia, nō te fa’a’āfaro i te reira mau fifi.
’A tauturu i te melo o te ’utuāfare ’ia ’ite e nāhea te Fa’aora e nehenehe ai e tauturu iāna, rave noa atu ā tōna hoa i terā ’ohipa māta’ita’ira’a i te hōho’a faufau (hi’o Alama 7:11 ’e Mataio 11:28–30).
’A ani i te melo o te ’utuāfare ’ia haere mai i te pupu tauturu nō te hoa fa’aipoipo ’e nō te ’utuāfare a te ’Ēkālesia, ’aore rā, i te hō’ē pupu pāturu mai te reira te huru, mai te mea tē vai ra. ’A hi’o i te tuha’a « Te fa’aoraorara’a iāna i te ma’i fa’atītī » o te ChurchofJesusChrist.org i te mau taime o te pupu pāturu.
’A fa’aitoito i te melo o te ’utuāfare ’ia hi’o i te mau rāve’a tauturu nō te mau hoa fa’aipoipo ’e nō te mau melo o te ’utuāfare i roto i te tuha’a « Te ha’apa’ora’a i te fifi nō te hōho’a faufau » o te ChurchofJesusChrist.org.
Fa’a’ohipa i te mau rāve’a tauturu a te pāroita ’e a te titi
E nehenehe e ani i te feiā fa’atere o te pāroita ’aore rā, i te tahi atu mau ta’ata ti’aturihia ’ia hōro’a i te pāturura’a tāmau. ’A ani i te parau fa’ati’a a te ta’ata hou ’a ’āparau ai ia vetahi ’ē i tōna vaira’a.
’A ’imi i te hō’ē ta’ata ti’aturihia ’ei ta’ata pāturu nō te melo ’e ’a fa’aitoito iāna ’ia fārerei tāmau noa rāua.
-
Tōna tanora’a, e ta’ata auhia e te tahi atu ta’ata, ’e e ta’ata tei upo’oti’a i ni’a i te hōho’a faufau, ’aore rā, tei māramarama maita’i i te reira huru fifi.
-
E nehenehe e tu’u i te hō’ē taea’e aupuru ’aore rā, te hō’ē tuahine aupuru.
I te tahi taime, e nehenehe te fa’a’ohipara’a i te hōho’a faufau a terā ta’ata e tāmau noa, noa atu tāna mau tauto’ora’a rahi, ’e noa atu te tauturu a te tahi atu mau ta’ata, nō te upo’oti’a i ni’a i te fa’a’ohipara’a i te hōho’a faufau.
-
E nehenehe e fa’afārerei i terā melo i te hō’ē taote manava, ’o tē rapa’au nei mai te au i te mau parau tumu o te ’evanelia.
-
E nehenehe te mau Piha ’ohipa nō te ’utuāfare (i te mau vāhi tē vai ra) e tauturu ’aore rā, e fa’a’ite i te mau tauturu e vai ra i reira, mai te mau fa’anahora’a rapa’aura’a, ’aore rā, te mau pū rapa’aura’a, te mau fa’anahora’a a te ’oire ’aore rā, te mau pupu pāturu ’e te mau pū a te hau.