Te mau mātēria tauturu nō te fa’aa’o i te ta’ata

Nāhea vau i te tauturu i te tauira’a ?

E hōpoi’a mo’a tō te mau ’episekōpo ’ia riro ’ei mau ha’avā nō ’Īsēra’ela, nō te tauturu i te mau melo ’ia ha’apūai i tō rātou tā’amura’a i te Atua, ’e nō te riro ’ei mau ’orometua ha’api’i pae vārua. E hōpoi’a nā te ta’ata tāta’itahi ’ia ha’apūai i tō rātou tā’amura’a i te Atua nā roto i te tātarahapa ’e te fa’a’orera’a hara. E hōpoi’a nā te mau ta’ata, ’eiaha rā nā te feiā fa’atere o te ’Ēkālesia, ’ia ’imi i te mea e tītauhia nō te taui i tā rātou peu au ’ore. (’A hi’o « Identifying and Understanding Influences [Te ’itera’a ’e te māramaramara’a i te mau aratōra’a] » i ni’a i te tuha’a « Addressing Pornography [Pāhono i te fifi nō te hōho’a faufau]» a te ChurchofJesusChrist.org). E tītau te reira i te heheura’a a te ta’ata iho, nā roto i te tuatāpapara’a ’e te pure. E hōpoi’a ato’a nā te mau melo ’ia māramarama ’e ’ia ’āparau i te māuiui ’o tā te fa’a’ohipara’a o te hōho’a faufau i fa’atupu i ni’a ia rātou iho ’e ia vētahi ’ē.

’A tauturu ai ’outou i te mau melo ’ia tūtava nō te fa’a’orera’a hara, ’a fa’atumu i ni’a i te ha’api’ira’a ’e te tūra’ira’a i te parau nō :

• Te ha’api’ira’a tumu

• Te ti’amāra’a ’e te ti’a’aura’a

• Te fa’a’ohipa-tāmau-ra’a i te fa’aro’o

• Te fa’aitoito-noa-ra’a

Te ha’api’ira’a tumu

’Ua riro te ha’api’ira’a tumu nō te tāra’ehara a Iesu Mesia ’ei mea faufa’a nō te hāro’aro’a e nāhea ’ia tātarahapa ’ia fa’a’orehia te hara. Te tauturura’a i te mau melo ’ia māramarama ia Iesu Mesia ’e i tāna ’ohipa i roto i tō rātou orara’a, e mea faufa’a rahi ïa nō te taui. E arata’ihia ’outou nāhea i te ha’api’i maita’i a’e i te reira ’e i te tahi atu mau parau mau. Tei te pū ato’a teie mau mana’o i te ’aupurura’a i te mau hoa fa’aipoipo ’e te tahi atu mau ta’ata tei pēpē nā roto i tera ravera’a. E nehenehe e hi’opo’a i te mau ’api i muri nei i roto i te Gospel Topics [Te mau tumu parau o te ’evanelia] :

• Te tāra’ehara a Iesu Mesia

• Te fa’a’orera’a hapa

• Te tātarahapara’a

Te ti’amāra’a ’e te ti’a’aura’a

’A fa’aitoito i te ta’ata tāta’itahi ’ia amo i te ti’a’aura’a o tāna mau mā’itira’a. Tītauhia i te ta’ata tāta’itahi ’ia māramarama e aha te taime tītauhia te fā’ira’a hara. Pinepine te fā’ira’a i te hape i tōna hoa fa’aipoipo, i te mau metua (mai te mea e tamari’i matahiti tae’a ’ore), ’aore rā i te ’episekōpo, i te tauturu ’ia haere i mua. E tītauhia paha e rave rahi tāmatara’a fa’a’itera’a hou te hō’ē ta’ata e ineine roa ai nō te fa’a’ite hope i te mau mea ’e nō te parau i te parau mau nō ni’a tāna mau ’ohipa i rave. ’A fa’a’oroma’i i roto i teie ’ohipa tau maoro, ’a fa’a’ite i te mana’o au, te here, ’e te tāmāhanahana nō te fa’auru ’e nō te fa’aitoito i te mau ta’ata ’ia parau hope mai i te parau mau. ’Eiaha e fa’aha’amā ’e ’aore rā e fa’ahepo i te hō’ē ta’ata ’ia fā’i mai hou ’oia ’a ineine roa ai.

E mea ti’a i te mau ’episekōpo ’e te mau peresideni ’āma’a ’ia hi’o fa’ahou i te Buka arata’i rahi, te 32.8.2, nō te tahi atu ā tauturu. ’A tauturu i te ta’ata iho ’ia māramarama ē e tamari’i ’oia nā te Atua ’e ’ua riro te fa’a’ohipara’a i te hōho’a faufau ’ei peu ’o tē ’ore e tū’ati i taua ti’ara’a hanahana ra.

Te fa’a’ohipara’a i te fa’aro’o

E mea faufa’a te pure tāmau ’e te tuatāpapara’a pāpa’ira’a mo’a nō te fa’atupu i te fa’aro’o i te Metua i te ao ra ’e ia Iesu Mesia. E tītauhia te fa’a’ohipara’a i te fa’aro’o i roto ia Iesu Mesia nō te ’itera’a i te hō’ē tauira’a rahi o te ’ā’au. E nehenehe te mau pure e hōro’a mai i te mana’o pāpū nō te arata’i i te mau ta’ata ’ia ’imi i te fa’a’orera’a hara nō ’ō mai i te Atua ’e i te feiā tā rātou i ha’apēpē. E nehenehe ato’a te mau ta’ata e fāri’i i te pūai rahi nā roto i te tuatāpapara’a i te ha’api’ira’a mai roto mai i te ’āmuira’a rahi ’e te mau parau ve’a i roto i te mau ve’a a te ’Ēkālesia nō ni’a i teie mau tumu parau.

E mea tītauhia ’ia ti’aturi te ta’ata hō’ē ē e nehenehe tāna e taui. ’A fa’a’ite i te maita’i ’e ’a hi’o fa’ahou i te mau parau tumu nō te fa’aro’o i te Metua i te ao ra ’e ia Iesu Mesia. ’A fa’aitoito i te ha’amorira’a i te mahana Sābati, te tāvinira’a ia vētahi ’ē, ’e te tahi atu mau huru e tū’ati i ni’a i te huru o te Mesia.

Te fa’aitoito-noa-ra’a

E ’imi te ta’ata tāta’itahi i te heheura’a nō rātou iho nō te fa’aineine i tā rātou fa’anahora’a nō te ’aro i te fa’a’ohipara’a o te hōho’a faufau. E mea ti’a i te ta’ata tāta’itahi ’ia feruri i tōna iho mau hina’aro ta’a ’ē nō te fa’aoti i te mau rāve’a ’e te mau ta’ahira’a e pe’e. ’A fa’ariro noa ai i te fa’a’orera’a i te fa’a’ohipara’a i te hōho’a faufau ’ei fā faufa’a rahi, ’a fa’aitoito ato’a rā i te ta’ata ’ia fa’atumu i ni’a i te ’imira’a i te huru Mesia ’e te rirora’a ’ei pipi fa’afāriuhia nā Iesu Mesia. E tauturu te mau ’api i muri nei, i ni’a i te tahua natirara, nō ni’a i te pāhonora’a i te fifi nō te hōho’a faufau i te mau melo i roto i teie ’ohipa :

• Nāhea vau i te fa’aineine i te hō’ē fa’anahora’a ’o tē manuia iho ā ?

• E aha te roara’a o te taime nō te upo’oti’a i ni’a i te hō’ē peu hōho’a faufau ?

• E aha tā’u e nehenehe e rave nō te ha’apūai iā’u iho ’eiaha e topa fa’ahou ’āraua’e ?

’A fa’aha’amana’o tāmau noa i te mau melo ē ’ua riro te tauira’a ’ei fa’anahora’a ’o tē tītau i te taime. E ti’a ato’a paha ia ’outou ’ia ha’apāpū ē ’ua riro te amora’a i tāna iho mau hōpoi’a tāta’itahi, te fa’a’itera’a i te tauto’ora’a tāmau ’e te ’itera’a i te māuiui tei fa’atupuhia nō te fa’a’ohipara’a i te hōho’a faufau, ’ei mau rāve’a nō te fa’aho’i fa’ahou mai i te ti’aturira’a i tōna hoa fa’aipoipo, i te mau metua ’e te tahi atu mau melo o tōna ’utuāfare. E ere i te mea ’ohipa ta’a ’ē te fa’arurura’a i te taupupūra’a. ’A fa’aitoito i te ta’ata ’ia vai parauti’a noa i roto i te fa’a’itera’a i teie mau fifi i tō rātou hoa fa’aipoipo ’e ’aore rā i te mau metua, nō te ’apo mai i tā rātou ha’api’ira’a, ’e nō te ho’i ’oi’oi i te mau peu maita’i.