Te paraparaura’a i te mau melo nō ni’a i te hete

I te tahi taime, e uira’a tā te mau melo e tū’ati i tō rātou mana’o nō ni’a i te hete. Tē vai ra paha te mau melo o tō rātou ’utuāfare ’aore rā te mau hoa e fa’aruru nei i teie huru mau uira’a. ’Aore rā e uiui rātou ia rātou iho nō ni’a i te mau parau ’o tā rātou i fa’aro’o nā te ao nei nō ni’a i te hete.

Mai te peu e haere mai te mau melo e fārerei ia ’outou nō te ani i te fa’aa’o, nō ni’a i te hete, ’a tītau nā roto i te pure i te arata’ira’a a te Vārua. ’A tauturu ia rātou ’ia feruri i tā rātou mau uira’a ma te hi’ora’a ātea a te mau parau mau mure ’ore a te fa’anahora’a a te Metua i te ao ra nō tāna mau tamari’i. E tauturu te fa’aro’ora’a ia rātou ma te here ’e te aroha, i te fa’aturu’i ia rātou i ni’a i te Fa’aora ’ia noa’a mai te māramaramara’a ’e te pūai pae vārua.

’A ’imi ai ’outou i te māramarama ’e i te tauturu i teie mau ta’ata, ’ia mana’o ato’a ’outou i te tauturu i te ’utuāfare ’e i te fa’a’ohipa i te mau mātēria tauturu e vai ra. Hi’o « Huriāhete : Turu ia vetahi ’ē » o te Tauturu i te orara’a i roto i te Vaira’a buka ’Evanelia.

Fa’ata’ara’a : E ’ere hō’ē ā te hete ’e te hia’ai pae ’āpeni. Vetahi mau ta’ata e hi’o nei ia rātou ’ei huriāhete, ’aita rā e fa’ahina’arora’a ta’ata nō tōna iho ’āpeni. Nā reira ato’a, nō te feiā e fa’ahina’arora’a ta’ata nō tōna iho ’āpeni, ’aita rātou e pāto’i nei i tō rātou hete. Nō te tauturu nō ni’a i te paraparaura’a i te ta’ata nō ni’a i te hia’ai pae ’āpeni, ’a hi’o « Te fa’ahina’arora’a i te ta’ata nō tōna iho ’āpeni » i roto Te mau mātēria tauturu nō te fa’aa’o i te ta’ata.

Te mau parau mau mure ’ore

E mau tamaiti ’e e mau tamāhine herehia tātou nā te mau metua i te ao ra—’o tō tātou ihota’ata faufa’a roa a’e teie.

I ora na tātou i pīha’i iho i te Atua hou tātou ’a fānauhia mai ai. ’Ei tamari’i nāna, e mana tō tātou nō te riro mai mai iāna te huru.

Tō tātou ihota’ata tamari’i nā te Atua ’o tō tātou ïa ti’ara’a hau a’e te teitei.

Hi’o ato’a Russell M. Nelson, « Choices for Eternity [Mau mā’itira’a nō te ao mure ’ore] » (purera’a nā te feiā ’āpī pa’ari ’ati ti’a i te ao nei, 15 nō Mē 2022), « First, know the truth about who you are [Nā mua roa, ’ia ’ite i te parau mau nō ni’a ’o vai ’outou]. »

Tō tātou tino tāne ’e te vahine, ’ua hāmanihia ïa i te hōho’a o te Atua.

E mea faufa’a roa te ta’a-’ē-ra’a i rotopū i te mau tamāhine a te Metua i te ao ra ’e tāna mau tamaiti, i roto i tāna fa’anahora’a mure ’ore. Maoti teie ta’a-’ē-ra’a e ti’a ai ia tātou ’ia hāmani i te ora, ’oia ato’a te mau ’utuāfare ’oa’oa ’e te mure ’ore. Nō te reira tumu, tē fa’aue nei ’oia, ē ’ia fa’ariro tātou i tō tātou tino ’e te mana nō te hāmani i te ta’ata ’ei hōro’a mo’a, nā roto i te ha’apa’ora’a i te ture nō te vi’ivi’i ’ore.

Hi’o ato’a Genese 1:27 ; 1 Korinetia 11:11.

E tino ’e e vārua tō tātou tāta’itahi, ’e ’ua hāmanihia tō tātou tino mai te au i tō tātou vārua.

« E tuha’a faufa’a rahi te [hete] nō te ihota’ata ’e nō te tumu o te ta’ata tāta’itahi i te ao nā mua a’e, i te tāhuti nei, i te ao a muri atu » (« Te ’utuāfare : E poro’i i tō te ao nei »).

Te aura’a nō te ta’o hete i roto i te poro’i nō te ’utuāfare ’o te « ’āpeni ïa i te fānaura’a ».

Tē mana’o nei vetahi mau ta’ata ē, ’aita e tū’ati ra tō rātou hīro’a hete (te mana’o i roto ia rātou) ’e tō rātou ’āpeni. E ’ere te reira mau mana’o i te hara, noa atu ā e mea huru fifi nō rātou e tupu nei terā mau mana’o.

’Ua ha’api’i te peresideni Dallin H. Oaks ē, te ri’iri’ifai nō ni’a i te hīro’a hete « e nehenehe ïa e tāuiui te huru i te roara’a o te orara’a o te hō’ē ta’ata ». Te feiā e uira’a tā rātou, e mea maita’i ïa « ’ia fa’a’ohipa rātou i te hi’ora’a ātea mau ma te ’imi i te turu’i i ni’a i te mau parau tumu mure ’ore ’e ’ia rave mai te au i teie mau parau tumu » (« Stand for Truth [Ti’a nō te parau mau » [Purera’a nā te feiā ’āpī pa’ari ’ati ti’a i te ao nei, 21 nō Mē 2023], newsroom.ChurchofJesusChrist.org). ’Eiaha rātou e fa’ati’a ia Sātane ’ia fa’a’ohipa i te ri’iri’ifai nō ni’a i te hete nō te fa’aātea ia rātou i te Fa’aora, ’aore rā nō te tū’ino i tō rātou fa’aro’o i te fa’anahora’a a te Metua i te ao ra nō tō rātou ’oa’oa mure ’ore.

Tei roto te hau o te vārua, te pūai pae vārua ’e te hi’ora’a mure ’ore ia Iesu Mesia, tāna ’evanelia ’e tāna ’Ēkālesia, noa atu ’aita te tahi mau uira’a e nehenehe e pāhono-hope-hia i roto i teie orara’a.

« Mai te peu tei roto ’outou, te hō’ē melo nō te ’utuāfare ’aore rā te hō’ē hoa i teie mau fifi nō te ri’iri’ifai hīro’a, tē a’o atu nei au ia ’outou ’ia fa’a’ohipa ’āmui i te ture o te ’evanelia ’e te here ’e te hāmani maita’i o tō tātou Fa’aora ’e Tāra’ehara, ’o tē tauturu mai ’e ’o tē arata’i mai ia ’outou, mai te peu e haere māite ’outou nā ni’a i tōna mau ’ē’a. Tē ha’api’i nei Iesu Mesia… ia tātou te ’ē’a ’o tā tātou e pe’e nō te fa’atupu i te mau ha’amaita’ira’a maita’i roa a’e a tō tātou Metua i te ao ra… ’Ua here ’oia ia tātou ’e tē arata’i nei ia tātou, ’a ’imi ai tātou i te pe’e i te vāhi i reira ’oia e arata’i ai ia tātou » (Dallin H. Oaks, « Stand for Truth »).

Hi’o ato’a Etera 3:16 ; Te Ha’api’ira’a Tumu ’e te mau Fafaura’a 77:2 ; 88:15.

’Ua here te Atua i tāna mau tamari’i ’e ’ua au te mau ta’ata ato’a i te here ’e te fa’atura.

Te mau ta’ata e uiui nei ia rātou iho nō ni’a i tō rātou mau mana’o i te pae nō te hete, pinepine ato’a rātou i te uiui ia rātou nō ni’a i tō rātou tā’amura’a i te Fatu, ’e tō rātou pārahira’a i roto i te ’Ēkālesia. Noa atu « ’aita [tātou] i ’ite i te aura’a nō te mau mea ato’a » e nehenehe tātou e ti’aturi i te Atua ’e ’ia « ’ite ē ’ua aroha ’oia i tāna mau tamari’i » (1 Nephi 11:17).

E fāri’i-poupou-hia te tā’āto’ara’a i te fare purera’a. Ta’a ’ē noa atu tō tātou mau mana’o i te pae nō te hete, e hina’aro tātou pā’āto’a i te mau hoa maita’i e mau hi’ora’a ato’a nō te here huru Mesia. ’Ua ha’api’ihia tātou i te mea i muri nei nō ni’a i te herera’a i te mau tamari’i ato’a a te Atua :

« Te ta’ata ’o tē ’ore e rave ma te here ’e te tura i te feiā e fa’aruru nei i te mau fifi nō te hīro’a hete, ’aita ïa i tū’ati i ni’a i te rēni o te mau ha’api’ira’a o nā fa’auera’a rahi, te mātāmua ’e te piti. Nō reira, nō ni’a i te ture a te Atua, tītauhia ia tātou e ha’amana’o ē, ’ua heheu mai te Atua e rave rahi taime ē, ’ua hāmani ’oia i te tāne ’e te vahine. ’E nō ni’a i tā tātou hōpoi’a ’ia here i tō tātou ta’ata tupu, tītauhia ia tātou ’ia ha’amana’o ē, ’ua fa’aue mai te Atua ia tātou ’ia here ato’a i te feiā ’aita e ha’apa’o nei i te mau fa’auera’a ato’a…

« … ’A ha’amana’o ē, noa atu te huru o tō tātou vaira’a i roto i te raura’a o te mau hāmanira’a a tō tātou Metua i te ao ra, ’ua here ’oia ia tātou pā’āto’a, ’e e pārahira’a nō tātou pā’āto’a i roto i tāna fa’anahora’a maita’i roa a’e nō te ’oa’oa. E fa’a’ite tātou i tō tātou here nōna nā roto i te ha’apa’ora’a i tāna mau fa’auera’a, tei roto ato’a ïa te here nō tāna mau tamari’i » (Dallin H. Oaks, « Stand for Truth »).