Pi’ira’a nō te pāroita ’e te ’āma’a
Te mau misiōnare e ho’i ’oi’oi i te fare

« Te mau misiōnare e ho’i ’oi’oi i te fare », Te mau mātēria tauturu nō te fa’aa’o i te ta’ata (2020).

« Te mau misiōnare e ho’i ’oi’oi i te fare », Te mau mātēria tauturu nō te fa’aa’o i te ta’ata.

Te mau misiōnare e ho’i ’oi’oi i te fare

4:29

Te mau misiōnare e ho’i ’oi’oi mai ’aore rā e fa’aoti ’oi’oi i tā rātou misiōni nā mua a’e i tei mana’ohia, e nehenehe te reira ’ia riro ’ei tāmatara’a ta’a ē nō rātou. ’A fa’aineine ai rātou nō tā rātou misiōni ’e ’a haere atu ai nō te tāvini, ’ua ’ī rātou i te ti’aturira’a rahi ’e te hina’aro ’ia tāvini i te Fatu. ’Ia ho’i ’oi’oi ana’e mai rātou i te fare nō te tahi atu tumu (’ei hi’ora’a, nō te mau fifi pae tino ’aore rā pae ferurira’a ’aore rā nō te ’ōfatira’a i te ture), e nehenehe e tupu mai tō rātou ’oto, te ha’amā, ’aore rā te ha’aparuparura’a mana’o. E nehenehe rātou e uiui i te fa’aurura’a ’o tei arata’i ia rātou ’ia tāvini i te hō’ē misiōni. E ha’ape’ape’a teie mau misiōnare tei ho’i mai nāhea te tahi atu mau ta’ata i te hi’o mai ia rātou ’aore rā nāhea te Fatu i te hi’o mai ia rātou. E nehenehe rātou e mana’o ē ’aita rātou i manuia ’aore rā e ’ere rātou i te mea ti’amā ’e e nehenehe rātou e fa’ahapa ti’a ’ore ia rātou iho. E nehenehe ato’a e tupu tō rātou mana’o mo’emo’e ’e nā roto roa atu i te mau tuha’a rau nō te ’oto.

Tītauhia nō te mau misiōnare e ho’i ’oi’oi nei i te fare, te mau tauto’ora’a ’āmui a te ’utuāfare, te mau hoa, te feiā fa’atere ’e te mau melo o te pāroita nō te tauturu ia rātou i roto i teie taime fifi. ’A toro i te rima ma te here, nō te tāmāhanahana, nō te fa’aitoito, ’e nō te aupuru i te misiōnare tāta’itahi i ho’i ’oi’oi mai ’e tae noa atu i tōna ’utuāfare. ’A fa’aitoito i te misiōnare, i tōna ’utuāfare, ’e te mau melo o te pāroita ’ia hi’o iāna ’ei « misiōnare tei ho’i mai » ’eiaha rā ’ei misiōnare ’o tei « ho’i ’oi’oi mai » ’e ’aore rā ’o tei « ha’amāuruuru-’oi’oi-hia ». E nehenehe teie huru fa’ahitira’a parau e tauturu ’ia fa’aiti i te tāpa’o fa’aha’amā i tā’amuhia i te ha’amāuruurura’a ’oi’oi.

’Imi ’ia hāro’aro’a

’A paraparau ai ’outou ’e te mau ta’ata, a fa’a’ite pāpū i te here ’e te auma’i mai tā te Fa’aora e nā reira. Nō te ta’a-’ē-ra’a o te mau ti’ara’a ato’a ’e te mau huru vaira’a ato’a o te ta’ata tāta’itahi, ’a feruri nā roto i te pure i te mau uira’a mai teie te huru nō te tauturu ia ’outou ’ia hāro’aro’a maita’i a’e i te mau māna’ona’ora’a a te misiōnare ’e ’ia ’ite i tōna mau hina’aro.

  • E aha tō ’oe mana’o i tā ’oe misiōni ?

  • E aha te mau ha’amaita’ira’a tā ’oe i fāri’i nā roto i tā ’oe tāvinira’a ?

  • E aha tō ’oe mau māna’ona’ora’a ’aore rā mau ha’ape’ape’a rahi roa a’e i teienei ?

  • E aha tō ’oe mana’o nō tō ’oe ha’amāuruura’ahia ?

  • E aha tē mana’o o tō ’oe ’utuāfare nō ni’a i tō ’oe ha’amāuruurura’ahia ?

  • E aha tā ’oe mau ’ōpuara’a nō te upo’oti’a i ni’a i te mau tāmatara’a ’o tei fa’aho’i mai ia ’oe i te fare nei ?

  • E aha te pāturura’a e nehenehe e noa’a mai nō ’oe ?

  • Nāhea te mau ha’api’ira’a tā ’oe i ’apo mai i roto i tā ’oe misiōni e nehenehe e ha’apūai ia ’oe i roto i teie taime tauira’a ?

  • E aha tō ’oe tā’amura’a i te Fatu i teienei ?

Tauturu i te ta’ata

’A tauturu ai ’outou i te misiōnare tei ho’i mai ’e tōna vaira’a, ’a feruri i te tahi o teie mau mana’o :

Mai te mea e mea maita’i, e fārerei pinepine i te misiōnare tei ho’i mai nō te tauturu iāna ’ia ’ite i te ti’aturira’a ’e te fa’aorara’a nō tōna māuiui.

E tauturu i te misiōnare ’ia māramarama ē ’ua māuruuru ’e ’ua fāri’i te Fatu i te tāvinira’a tāna i rave ’ei misiōnare, mai te fāri’ira’a ato’a i te pi’ira’a ’ia tāvini (hi’o Te Parau Ha’api’ira’a ’e te mau Parau Fafau 124:49).

  • E fa’a’ite i te māuruuru nō te tāvinira’a tā te ta’ata i hōro’a ’ei misiōnare.

  • Mai te mea te tumu i ha’amāuruurura’ahia ai te misiōnare, nō te ma’i tino ’aore rā te ma’i i te ferurira’a, e nehenehe te ’episekōpo e ani iāna ’ia hōro’a i tāna parau fa’a’ite i mua i te ’āpo’ora’a teitei a te titi.

  • E ’imi i te mau rāve’a nō te tauturu iāna ’ia ’ite ē tē fāri’i-poupou-hia nei ’oia i roto i te pāroita ’aore rā ’ia fa’ati’a mai ’oia i te tahi mau ’ohipa nō ni’a i te misiōni. Mai te mea e tano, e ani i te misiōnare mai te mea ’ua hina’aro ’oia e hōro’a i te hō’ē pure, e fa’a’ite i tōna ’itera’a pāpū, ’aore rā e paraparau i roto i te purera’a.

  • E tauturu i te misiōnare ’ia māramarama ē e rave rahi mau rāve’a tāvinira’a i roto i te ohipa a te Fatu, noa atu ē ’aita ’oia e ’ō’omo fa’ahou i te hō’ē tāreta misiōnare.

E tūra’i i te parau nō te ’ohipa mātāmua roa a te misiōnare i ho’i mai, ’oia ho’i ’ia ora mai i teie ’ohipa māuiui, ’e i muri iho e ferurihia ai i te ho’i-fa’ahou-ra’a i ni’a i te ’ohipa misiōnare.

  • ’Eiaha e fa’ahepo i te misiōnare ’ia ho’i fa’ahou i roto i te ’āua misiōni. E nehenehe teie fa’aotira’a e tae mai i muri noa i te ora-maita’i-ra’a te mau fifi tei fa’aho’i iāna i te fare.

  • Nō te feiā e hina’aro e ho’i fa’ahou i te tāvinira’a misiōnare ’aore rā e ’imi i te tahi atu mau rāve’a tāvinira’a, ’o te parau « Te ho’ira’a i te tāvinira’a ».

E fa’aitoito i te misiōnare ’ia tāmau noa i te paraparau i te peresideni misiōni ’e tāna vahine ’a nā roto noa ai i teie taime tauira’a.

Mai te mea ē ’aita te misiōnare e ho’i i roto i te tāvinira’a rave tāmau, e ’imi ’ia hōro’a i te pāturura’a ’e te aupurura’a. ’A ha’amata ai te misiōnare tei ho’i mai i te ha’amau i te mau fā nō tōna ananahi, ’a hōro’a iāna i te mau a’ora’a nō ni’a i te mau tumu parau mai :

  • Te ha’api’ira’a

  • Te ’ohipa

  • Te mau aura’a (te arapaera’a)

  • Te mau rāve’a tāvinira’a

  • Te haerera’a i te ha’api’ira’a ’evanelia Institut

  • Te haerera’a i te hiero ’e te va-ti’amā-ra’a nō te hiero

Nō te ’ēpisekōpo : mai te mea e fa’anu’u ’aore rā e taui te misiōnare i te pāroita i muri noa i te ho’ira’a mai, ’a ’āparau i te ’ēpisekōpo ’āpī o te misiōnare ’e ’a ha’apāpū ē ’ua ’ite ’oia i te vaira’a o te misiōnare tei ho’i mai.

  • Mai te mea ē ’ua ho’i te misiōnare i te fare nō te tahi fifi i te pae nō tōna vai-ti’amā-ra’a, ’a tauturu iāna i roto i te ’ohipa tātarahapara’a (hi’o Buka arata’i rahi : Te tāvinira’a i roto i te ’Ēkālesia a Iesu Mesia i te Feiā Mo’a i te mau Mahana Hope’a nei [2020], pene 32).

  • Mai te mea te tumu i ha’amāuruurura’ahia ai te misiōnare, nō te ma’i tino ’aore rā te ma’i i te ferurira’a, e nehenehe te ’episekōpo e ani iāna ’ia hōro’a i tāna parau fa’a’ite i mua i te ’āpo’ora’a teitei a te titi.

Pāturu i te ’utuāfare

E fa’ateimaha ato’a te ho’i-’oi’oi-ra’a mai te misiōnare i te fare, i te orara’a o te mau melo o tōna ’utuāfare. ’A hi’o i te fifi tā te reira e fa’atupu i ni’a i te ’utuāfare o taua melo ra, ’e ’a ’imi ’ia fa’a’āfaro i te reira.

’A fa’aa’o ’e ’a tauturu i te mau melo o te ’utuāfare i roto i tā rātou iho mau ’arora’a, mau māna’ona’ora’a ’e mau uira’a, ’o tē tae mai nō i te ho’i-’oi’oi-ra’a mai te misiōnare.

  • ’A tauturu i te mau melo o te ’utuāfare ’ia māramarama nāhea te Fa’aora e nehenehe ai e fa’aora i te māuiui, e hōpoi mai i te hau, ’e e tāmāhanahana ia rātou ’e i te misiōnare tei ho’i mai.

’A fa’aitoito i te ’utuāfare ’ia ’āpo’o ’āmui nō ni’a i te mau hina’aro o te misiōnare tei ho’i mai ’e te mau rāve’a tauturu e vai ra nō te tauturu iāna.

  • ’A tauturu i te mau melo o te ’utuāfare ’ia fa’atumu i tō rātou māna’ona’ora’a i ni’a i te misiōnare ’e te fa’aorara’a tōna māuiui, ’eiaha rā i ni’a i te huru te ta’ata e hi’o i teie ’ohipa.

  • ’A tauturu i te mau metua o te misiōnare ’ia māramarama ē ’aita te ho’i-’oi’oi-ra’a mai o tā rātou tamaiti ’aore rā tamāhine e fa’a’ite ra ē ’ua rave rātou i te hō’ē ’ohipa hape ’ei metua.

  • ’A tauturu i te mau metua ’ia māramarama ē ’aita e tītauhia ia rātou ’ia fa’autu’a ’aore rā ’ia fa’ahapa ia rātou iho nō te ho’i-’oi’oi-ra’a mai te misiōnare.

’A parau i te mau melo o te ’utuāfare ’eiaha e fa’ahepo i te misiōnare ’ia ho’i i roto i te tāvinira’a misiōnare hou ’a ineine ai ’oia, ’aore rā mai te mea ’aita te misiōnare e hina’aro e ho’i atu.

Fa’a’ohipa i te mau rāvea tauturu a te pāroita ’e a te titi

E nehenehe e ’ohipa ’e te feiā fa’atere o te pāroita ’aore rā e te tahi atu mau ta’ata e nehenehe e ti’aturi nō te hōro’a i te pāturura’a ’e te arata’ira’a tāmau. ’A ani i te parau fa’ati’a a te ta’ata iho hou a ’āparau ai i tō vaira’a i te tahi atu ta’ata.

E nehenehe te feiā fa’atere e paraparau i te vaira’a o te misiōnare tei ho’i mai, i roto i te ’āpo’ora’a pāroita, nō te ’ite mai i te mau rāve’a tauturu ’e te mau mea nō te tauturu iāna.

  • ’A ’imi i te mau rāve’a ’ia nehenehe i te feiā fa’atere o te ’Ēkālesia ’ia tāvini ’e ’ia turu i te misiōnare tei ho’i mai ’e tōna ’utuāfare ato’a, i roto i teie tau fifi.

’A fa’aitoito i te misiōnare ’ia feruri mai i te hō’ē ta’ata e nehenehe e ti’aturi atu, nō te riro ’ei ta’ata arata’i nōna, ’e ’a fa’aitoito ia rāua ’ia fārerei tāmau.

  • E nehenehe teie ta’ata arata’i e riro ’ei tuahine aupuru ’e ’aore rā ’ei taea’e aupuru nō te misiōnare i ho’i mai.

  • E nehenehe e mā’iti i te tahi atu misiōnare tei ho’i mai, ’e hō’ē ā ’ā’amu tō rāua, ’o tei ’ite mai i te tīa’ira’a ’e te pūai nā roto i te Fa’aora Iesu Mesia ’e tāna ’evanelia.

’A fa’aō au maita’i noa i te misiōnare i roto i te mau pi’ira’a ’e te mau rāve’a tāvinira’a, ’e nō te paraparau ato’a i mua i te ta’ata, ’ia ineine ana’e ’oia nō te rave i te reira.

Mai te mea e tano, ’a feruri i te tahi atu ā tauturu nō roto mai i te mau rāve’a tauturu a te ’Ēkālesia ’e a te fenua e tuea i te mau parau tumu o te ’evanelia.

  • I te tahi mau ārea, tē hōro’a nei te piha ’ohipa nō te ’utuāfare i te tauturu nō te feiā fa’atere o te ’Ēkālesia ’e te mau fārereira’a fa’aa’o ta’ata nō te mau misiōnare ’o tei ho’i ’oi’oi mai i te fare.

  • Mai te mea ē ’aita e piha ’ohipa nō te ’utuāfare, ’a hi’o i te tahi atu tauturu a te fenua.