« Tauturu nō te feiā aupuru », Te mau mātēria tauturu nō te fa’aa’o i te ta’ata (2018).

« Tauturu nō te feiā aupuru », Te mau mātēria tauturu nō te fa’aa’o i te ta’ata

Tauturu nō te feiā aupuru

Te hō’ē ta’ata aupuru ’o te hō’ē ïa ta’ata ’o tē hōro’a tāmau noa i te aupuru i te tahi ta’ata e’ita e nehenehe e pāhono i te tahi ’aore rā i te tā’āto’ara’a o tō rātou iho mau hina’aro. E mea pinepine te ta’ata e fāri’i i te aupuru ’o te hō’ē melo ïa nō te ’utuāfare e ma’i tōna i te pae tino ’aore rā i te pae ferurira’a, ’aore rā e ma’i tāmau, ’aore rā e mau hope’ara’a nō te matahiti pa’ari. E nehenehe te rahira’a hora e tītauhia nō te aupuru i taua mau ta’ata ra e haere mai te tahi mau hora i te hepetoma i te 24 hora.

E tītauhia i te feiā aupuru ’ia fa’anaho i tō rātou taime nō tā rātou ’ohipa, te ’Ēkālesia, ’e te tahi atu mau hōpoi’a ’utuāfare ’e i te hō’ē ā taime, nō te tauturu i te hō’ē ta’ata tei herehia e rātou. Noa atu ē, pinepine te hōro’ara’a i te aupuru i te mea ho’ona ’e te mea maita’i, e nehenehe ato’a rā te mau tītaura’a nō te aupuru tāmau i te hō’ē ta’ata e fa’atupu i te ha’ape’ape’ara’a, te mapumapu, te fifi pae moni, te hepohepo, ’e te rohirohi.

Tē vai ra paha tō te feiā aupuru mau hina’aro ’o tē ’ore e ’itehia e vētahi ’ē, ’e e nehenehe ato’a rātou e taiā ’ia ani i te tauturu. E nehenehe roa te feiā aupuru e topa i roto i te fa’aturumara’a o te urupu’upu’u, te hepohepo, te ravera’a i te mau rā’au ta’ero, ’e ’aore rā te mau fifi i te pae nō te ea. E nehenehe ato’a rātou e nā roto i te ’oto, te ’ino’ino, ’e te ’iriā nō te mo’era’a tō rātou mau ti’aturira’a ’e mau tīa’ira’a. E nehenehe tō rātou orara’a tāmahana, tō rātou ti’amāra’a ’ia rave i tā rātou e hina’aro ’e tā rātou mau fā nō a muri a’e e ta’a ’ē roa i tā rātou i tīa’i nā mua a’e.

’Imi ’ia hāro’aro’a

’A paraparau ai ’outou ’e te feiā aupuru, ’a ha’apāpū maita’i ’ia fa’a’ite i te here ’e te auma’i mai tā te Fa’aora e nā reira ra. Nō te mea e mea ta’a ’ē te mau ’ohipa ’e te vaira’a o te ta’ata tāta’itahi, ’a feruri nā roto i te pure ’ia ui i te mau uira’a mai teie, ma te hāmani maita’i ’e ma te here, nō te māramarama maita’i a’e i te huru o te ta’ata aupuru ’e nō te hāro’aro’a i tōna mau hina’aro.

E aha te vaira’a i teienei, ’e e aha tā ’oe mau hōpoi’a ?
E aha te mau ’ohipa fifi roa a’e nō ni’a i te mea tā ’oe e rātere ra ?
E aha tā te rirora’a ’ei ta’ata aupuru i fa’atupu i ni’a i tō ’oe ’utuāfare (i te pae nō te ea, te pae moni, te mau ti’ara’a, te mau hōpoi’a, ’e tē vai atu ra) ?
E aha te mau fifi tā ’oe e ’ite nei i roto i tō ’oe tā’amura’a i te ta’ata e fāri’i nei i te aupuru ?
E riro ānei te reira ’ohipa i te maita’i mai, ’aore rā e tāmau noa mai te reira, ’e ’aore rā e ’ino roa atu ’āraua’e ?
E aha te huru tauturu tā ’oe e fāri’i nei ’ei ta’ata aupuru (nō roto mai i te tahi atu mau melo o te ’utuāfare, te mau taea’e ’e te mau tuahine aupuru, te mau tā’atira’a a te ’oire, ’aore rā te mau rave ’ohipa nō te ea ?
E aha te mau ’ohipa ’e te mau hōpoi’a tā ’oe ’e tā te tahi atu mau melo o te ’utuāfare e ’ore e nehenehe e rave, nō te iti paha te taime ’aore rā te ’aravihi ?
E aha tā ’oe e rave nei nō te ha’apa’o ia ’oe iho (te mā’a, te ta’otora’a, te fa’a’eta’etara’a tino, te rapa’aura’a mātarohia) ?
E aha atu ā tā ’oe e hina’aro e fa’a’ite mai iā’u nō ni’a i tō ’oe vaira’a ?

Tauturu i te ta’ata

’A tauturu ai ’outou i te melo ’e tōna vaira’a, e nehenehe e fa’a’ohipa i te tahi o te mau mana’o tauturu i muri nei.

Tauturu i te ta’ata aupuru ’ia māramarama i te mana fa’atupu ’e te mana fa’aora o te Fa’aora o Iesu Mesia (’a hi’o Alama 7:11–12 ; Te Parau Ha’api’ira’a ’e te mau Parau Fafau 88:6 ; Mosia 24:13–15).

Fa’aoti nāhea i te tauturu i te ta’ata aupuru ’ia vai tū’ati noa i ni’a i te tahi atu mau melo nō te pāroita ’e te mau purera’a ha’amorira’a.

Mai te mea ē tē mana’o ra te ta’ata aupuru ’e te ta’ata e fāri’i i te aupuru ē ’ua riro rāua ’ei zugo nā te pāroita, ’a tauturu ia rāua ’ia māramarama ē e mea faufa’a rāua ’e e rave rahi melo o te pāroita e ’oa’oa nei e tāvini ia rāua.
Ha’apāpū ē e hōro’ahia te ’ōro’a i te fare, mai te mea e hina’arohia.
Hi’o ē ’ua hina’aro ānei te ta’ata aupuru i te tauturu nō te haere i te fare purera’a, i te hiero, ’aore rā i te tahi atu mau fa’a’oa’oara’a.
Fa’a’ite i te ta’ata aupuru e mea nāhea tōna hi’ora’a ’e te mau ’ohipa e tupu nei i ni’a iāna e tauturu ra i te tahi atu mau melo o te pāroita.
E nehenehe e hōro’a i te ta’ata aupuru i te mau rāve’a tano nō te tāvini ma te ’ore e fa’arahi i tāna hōpoi’a.

Haere e fārerei i te ta’ata aupuru ’e te ta’ata fāri’i i te aupuru ’e fa’a’ite i tō ’outou here ’e tō ’outou māna’ona’ora’a i te mau ta’ata ato’a i roto i te reira.

Fa’anaho i te mau hāhaerera’a i tō rātou fare nō ’ite maita’i a’e e aha tō rātou vaira’a.
Hōro’a i te fa’aitoitora’a ’e tauturu i te ta’ata aupuru ’ia māramarama ē e ’ere ’oia i te ta’ata ’ōtahi noa.
Tauturu i te fa’anahora’a i te mau ha’amaita’ira’a autahu’ara’a mai te mea e tītauhia ’aore rā e fa’auruhia ’ia nā reira.
’Āparau e aha te mau ’ōpuara’a a te ta’ata aupuru nō te fa’atano i tōna orara’a i ni’a i te ’ohipa aupurura’a ’e ’aore rā te mea e rave mai te peu e fifi roa atu te ’ohipa, ’e nāhea te pāroita e nehenehe ai e tauturu.

’Imi i te mau rāve’a tauturu e vai ra ’o tā te ta’ata aupuru e nehenehe e fāriu atu nō te tauturu

Hāmani i te hō’ē tāpura nō te mau tālēni, te mau ’aravihi, ’e te mau rāve’a tauturu a te mau melo o te ’utuāfare ’e a te mau hoa ’o tē nehenehe e hōro’a mai i te tauturu e hina’arohia ’e ’a ha’amau i te hō’ē fa’anahora’a nō te fa’a’ohipa i teie mau rāve’a tauturu.
Tauturu i te ta’ata aupuru ’ia ’imi i te rāve’a nō te fa’ata’a i te tahi taime nōna iho. Feruri i te mau hina’aro pae vārua ’e pae tino, ’e tae noa atu i te mau taime ’āreareara’a.

’Imi i te tahi atu mau rāve’a tauturu, mai teie te huru :

Te tauturu pae moni
Te pārurura’a (assurance)
Te tauturura’a ’e te pāturura’a nō roto mai i te tahi atu mau melo o te ’utuāfare
Te pāturura’a i te pae tino ’e i te pae o te ferurira’a nō te orara’a maita’i
Te tōro’a ’ohipa
Te utara’a
Te mau rāve’a ’āpī ’e te mau mauha’a tomora’a ’e tauturura’a

Turu i te ’utuāfare

Mai te mea ē tē vai ra te tahi atu mau melo o te ’utuāfare i roto i te ’utuāfare, e tītauhia paha ia rātou ’ia tauturu i te ta’ata aupuru. ’A hi’o i te ’ohipa e tupu ra i ni’a i te ta’ata aupuru ’e te ta’ata e fāri’i i te aupuru, nā reira ato’a i ni’a i te hoa fa’aipoipo, te mau tamari’i, ’aore rā te tahi atu mau melo o te ’utuāfare, ’e ’a ’ohipa i ni’a i terā mau fifi.

’A tauturu i te mau tamari’i ’ia māramarama maita’i i te mau tauira’a hōpoi’a ’e hina’aro i roto i te ’utuāfare.

E ’ite paha te mau tamari’i ’e te feiā ’āpī ē e hōpoi’a rahi atu ā tā rātou mai te mea ē, ’o te hō’ē metua ’aore rā te hō’ē taea’e ’aore rā tuahine te ta’ata aupuru ’aore rā te ta’ata e fāri’i i te aupuru (’ei hi’ora’a, te mau hōpoi’a i te ’utuāfare, te ’āua, ’aore rā te hi’opo’ara’a pere’o’o).
Penei a’e te mau metua e feiā aupuru ’aore rā e feiā e fāri’i i te aupuru, e’ita paha e nehenehe e hōro’a rahi roa i te taime i tā rātou mau tamarii mai tā rātou e hina’aro ra.

’A fa’aō i te mau tamari’i i roto i te mau ’ohipa ’e te tahi atu mau ’utuāfare o te pāroita.

’A ani i te mau ’utuāfare i roto i te pāroita ’ia haere e fārerei ia rātou i tō rātou fare, ’e ’ia fa’aitoito ia rātou ’ia ’āmui mai i roto i tā rātou mau ’ātivite ’utuāfare, mai te pō ’utuāfare.

E nehenehe te ta’ata e aupuruhia ra e mana’o ē e mea teimaha ’oia nō te feiā aupuru ’e e rahi roa atu ā tōna fifi ’ia ’ite mai i te aura’a mai te mea ē ’ua iti roa mai tōna ’aravihi. ’A feruri i te mau rāve’a nō te tauturu i te ta’ata ’ia hi’o mai i te tahi fā ’e ’ia ’ite i te manuiara’a.

’Ia au i te vaira’a o te ta’ata, ’a tauturu iāna ’ia ’ite mai ’e ’ia fa’aō i roto i te mau ’ohipara’a maita’i (mai te tāvinira’a, te fa’a’ana’anataera’a, te ’āmuira’a te ’utuāfare, te mau ’ōpuara’a ta’ata hō’ē ’e te mau ’ohipa fa’a’ana’anataera’a, ’e tē vai atu ra).
’A feruri i te mau rāve’a nō te tāvini i roto i te ’Ēkālesia mai te ’utuāfare atu, mai te tānūmerara’a FamilySearch ’e ’aore rā te tahi atu mau rāve’a i ni’a i te natirara.

Fa’a’ohipa i te mau rāve’a tauturu a te pāroita ’e a te titi

E nehenehe te feiā fa’atere o te pāroita ’aore rā, te tahi atu mau ta’ata e nehenehe e ti’aturi, e hōro’a i te pāturura’a, te arata’ira’a ’e te tauturura’a tāmau. ’A ani i te parau fa’ati’a a te ta’ata aupuru nā mua a’e ’a tāu’aparau ai i te reira ia vētahi ’ē.

E nehenehe te feiā fa’atere e tāu’aparau i te reira ’ohipa i roto i te ’āpo’ora’a pāroita nō te fa’ata’a ē nāhea te pāroita e nehenehe ai e turu i te ta’ata aupuru ’e te ta’ata e fāri’i ra i te aupuru.

E nehenehe te ’ēpisekōpo e ani i te peresidenira’a Sōtaiete Tauturu ’ia ’ohipa ’e te ta’ata aupuru nō te tuatāpapa atu ā i tō rātou vaira’a ’e nō te fa’aoti nāhea ’ia pāhono i te mau hina’aro.
E mea ti’a i te peresideni pupu peresibutero ’e te peresideni Sōtaiete Tauturu e mana’o e fa’aue i te mau taea’e ’e te mau tuahine aupuru pūai nō terā ’utuāfare.
E tauturu i te ta’ata aupuru ’ia ’ite mai i te hō’ē ta’ata e nehenehe e ti’aturi ’o tē nehenehe e riro ’ei turu tāmau nōna. Penei a’e ’o te hō’ē taea’e ’aore rā tuahine aupuru, ’aore rā te tahi atu melo o te pāroita.

’A ’imi i te mau rāve’a nō te mau melo o te pāroita ’ia hōro’a i te tauturu.

’A hi’o i te mau melo ’o tē nehenehe e hāhaere i roto i te ’utuāfare nō te tāmarū i te vai-’ōtahi-ra’a.
’A fa’a’ohipa i te feiā ’āpī ’aore rā te tahi atu mau ta’ata i roto i teie mau ’ōpuara’a tāvinira’a nō te tauturu i te ’utuāfare.
’A ’imi i te mau rāve’a tā te mau melo o te pāroita e nehenehe e hōro’a tāmau i te taime fa’afa’aeara’a nā roto i te tauturura’a i te ta’ata e fāri’i ra i te aupuru ’a ’āmui ai te ta’ata aupuru i te hō’ē pupu tauturu, ’a ha’apa’o ai i tōna mau hina’aro pae vārua ’e tōna iho ho’i, ’e ’aore rā ’a fāri’i ai i te tahi atu taime fa’afa’aeara’a.

’A ’imi i te mau pupu o te fenua iho ’e te mau rāve’a ’e ’a fa’aitoito i te ta’ata aupuru ’ia fa’a’ohipa ia rātou. Teie te tahi mau rāve’a :

Te ta’ata tōro’a fa’aa’o
Te mau pupu tauturu nō terā iho vāhi ’aore rā nō te fenua, nō te feiā aupuru (haere tino ’aore rā nā ni’a i te natirara)
Te mau tā’atira’a a te hau ’e a te mau fa’anahonahora’a unuma
Te mau fa’anahora’a e ’ere nā te hau (ONG)