« E aha te ha’api’ira’a tumu e nehenehe e tauturu i te ta’ata hō’ē ’ia upo’oti’a i ni’a i te mau fifi o te hōho’a faufau ? » Te mau mātēria nō te fa’aa’o i te ta’ata (2020).
« E aha te ha’api’ira’a tumu e nehenehe e tauturu i te ta’ata hō’ē ’ia upo’oti’a i ni’a i te mau fifi o te hōho’a faufau ? » Te mau mātēria nō te fa’aa’o i te ta’ata
Te mau mātēria nō te fa’aa’o i te ta’ata
E aha te ha’api’ira’a tumu e nehenehe e tauturu i te ta’ata hō’ē ’ia upo’oti’a i ni’a i te mau fifi o te hōho’a faufau ?
Hō’ē ’o tā ’oe mau hōpoi’a ’ei melo nō te ’Ēkālesia ’o tē ha’api’ira’a ïa ’e te fa’a’ite-pāpū-ra’a i te ha’api’ira’a tumu pāpū ’o te ’evanelia a Iesu Mesia. E nehenehe e rave i te reira nā roto i te ha’api’ira’a i te ha’api’ira’a tumu a te Mesia, ’oia ho’i, e ti’a i te tā’āto’ara’a ’ia roa’a te fa’aro’o ia Iesu Mesia, ’ia tātarahapa i tā rātou mau hara, ’ia bāpetizohia, ’ia fāri’i i te hōro’a o te Vārua Maita’i, ’e ’ia ha’apa’o e tae noa atu i te hope’a. ’A hi’o i teie mau a’ora’a, ’o tē vai ato’a ra i roto i te tuha’a « ’Arora’a i mua i te hōho’a faufau » i ni’a i te ChurchofJesusChrist.org:
« Te mana o te ha’api’ira’a i te ha’api’ira’a tumu »
« Te ha’api’ira’a tumu a te Mesia »
« Rōtahi i ni’a i te ha’api’ira’a tumu a te Mesia »
« Pe’e i te ha’api’ira’a tumu ’e te ’evanelia a te mesia »
E hōpoi’a nā te ta’ata hō’ē ’ia fa’atītī’aifaro i tō rātou iho mau fifi nō te hōho’a fafau. E ti’a ia rātou ’ia rave i te hōpoi’a nō to rātou iho orara’a ’e te mau tauira’a tā rātou e hina’aro e rave. ’A ha’amata ai ’outou i te mau ’āparaura’a fa’auruhia ’e te ta’ata hō’ē, ’a arata’i ia rātou nō te ’imi i te heheura’a o te ta’ata iho nō ni’a i te mau rāve’a fa’atītī’aifarora’a. E fa’aitoito ia rātou ’ia ’imi i te fa’anava’ira’a iāna iho i te pae vārua nā roto i te mau tauto’ora’a nō te māramarama ’e nō te fa’a’ohipa i te ha’api’ira’a tumu a te Mesia. E mea faufa’a roa te tuatāpapara’a ’e te pure nō teie ravera’a.
E hōpoi’a ato’a nā te ta’ata hō’ē ’ia māramarama ’e ’ia rapa’au i te māuiui ’o tā te fa’a’ohipara’a rātou i te hōho’a faufau i fa’atupu i ni’a ia vetahi ’ē. ’A ’ohipa ai ’outou i pīha’i iho ia rātou, ’a arata’i ia rātou ’ia fāri’i rātou i teie hōpoi’a ’e ’a rave i te mea e ti’a ia rātou ’ia rave nō te fa’aho’i.
E riro te upo’oti’ara’a i ni’a i te hōho’a faufau ’ei ’ohipa fifi. E ti’a i te ta’ata ’ia ha’a nō te ’imi ’e nō te fa’a’āfaro i te mau tumu hō’ē roa ’o tē tūra’i nei ia rātou ’ia fa’a’ohipa i te hōho’a faufau. E mea faufa’a roa ’ia ’ite ē, te mau rāve’a fa’atītī’aifarora’a pae vārua, noa atu te faufa’a ’e te maita’i o te reira nō te upo’oti’a i ni’a i te hōho’a faufau, pinepine te reira i te riro o te tahi noa tuha’a iti o te rāve’a hope roa. E ti’a i te ta’ata hō’ē ’ia feruri e tuatāpapa i te mau fifi i te pae ihiora, i te pae ferurira’a, ’e i te pae tōtiare, ’o tē ’ohipa pinepine nei i roto i te parau nō te fa’a’ohipara’a i te hōho’a fafau.
Ha’api’i i te ha’api’ira’a tumu
’A ha’api’i ai ’outou i te feiā e ’aro nei i te hōho’a faufau, ’a ’ohipa ’āmui nō te fa’ata’a e aha te ha’api’ira’a tumu e nehenehe e tauturu ia rātou ’ia ’aro i te mau mana ’o te fa’atupu nei i ni’a i tō rātou huru. ’Ua ha’api’i te peresideni Boyd K.Packer : « ’Ia māramarama-ana’e-hia te ha’api’ira’a tumu mau, e taui te reira i te mau huru ’e te peu. E vitiviti a’e te tuatāpapara’a i te mau ha’api’ira’a tumu o te ’evanelia i te ha’amaita’i i te peu, i te hō’ē tuatāpapara’a i te peu i te ha’amaita’i i te peu. Te ha’ape’ape’ara’a nō te hō’ē peu ti’amā ’ore, e nehenehe te reira e arata’i atu i te peu ti’amā ’ore. Nō reira, mātou e ha’apāpū ’ū’ana atu ai i te tuatāpapara’a i te mau ha’api’ira’a tumu o te ’evanelia » (« Little Children », Ensign, Novema 1986, 17).
Te ha’api’ira’a tumu niu e ha’api’ihia i roto i te séminaire ’e te institut ’o te hō’ē ïa arata’i maita’i nō te ’itera’a ē, e aha te ha’api’ira’a tumu e rōtahi i ni’a iho (hi’o « Mau ha’api’ira’a tumu niu »). Ha’api’i i te ha’api’ira’a tumu nā roto i te fa’a’ohipara’a i te mau rāve’a tauturu o te ’evanelia mai te mau pāpa’ira’a mo’a ’e te mau a’ora’a nō te ’āmuira’a rahi.
’A tāvini ma te aroha ’a ha’api’i ai ’outou, ’e ’a rōtahi i ni’a i te tauturura’a i te ta’ata hō’ē ’ia ’ite i te Vārua Maita’i i roto i to rātou orara’a. ’A fa’aitoito ia rātou ’ia ’ite e nāhea ’ia tupu i te rahi nā roto i tō rātou mau tāmatara’a nō ni’a i te hōho’a faufau. ’A feruri e ui i te mau uira’a fa’auruhia nō ni’a i tō rātou haerera’a i mua ; tō rātou hāro’aro’ara’a i te haerera’a i mua nō rātou iho i te pae ihiora, i te pae ferurira’a, i te pae tōtiare ’e i te pae vārua ; ’e tō rātou fa’ananeara’a i te mau huru mai tō te Mesia. ’A arata’i i te ta’ata hō’ē ’ia māramarama e nāhea te mana o te Mesia e nehenehe ai e fa’ataui ia rātou ’e e hāmani i te ta’ata tā rātou e riro mai.
’A fa’atumu i tā ’outou mau ha’api’ira’a i ni’a i te tauturura’a i te ta’ata hō’ē ’ia māramarama i te parau nō te tātarahapa ’e te mana o Iesu Mesia ’e tāna tāra’ehara. E mea maita’i ato’a ’ia fa’aitoito ia rātou ’ia ’imi i te mau ha’amāramaramara’a nō ni’a i te peu hereherera’a mā, te tā’atira’a ti’a i te pae tino, ’e te ’ohipa a te hina’aro e herehere i roto i te mau ’ōti’a tā te Atua i ha’amau.
Te mau hi’ora’a nō te ha’api’ira’a tumu
Tē ha’apāpū mai nei te mau hi’ora’a i muri nei i te mau tāmatara’a e fārerei-rahi-hia nei e te mau ta’ata hō’ē e ’aro nei i te hōho’a faufau, ’e e hōro’a mai nei i te ha’api’ira’a tumu ’o tē nehenehe e tauturu i roto i teie mau tāmatara’a. ’A pure i pīha’i iho i te ta’ata hō’ē nō te tauturu iāna ’ia ’ite i te ha’api’ira’a tumu pāpū e tītau-roa-hia a’e nō teie taime.
Te vai ’ōtahi-noa-ra’a ’e te mo’emo’e ho’i.
Te ta’ata hō’ē e ’aro nei i te parau nō te hōho’a faufau, pinepine rātou i te fāri’i i te mau mana’o vai-’ōtahi-noa-ra’a ’e te mo’emo’e ho’i. E nehenehe rātou e ’ere i te tū’atira’a tōtiare ’e vetahi ’ē. E nehenehe te hāro’aro’ara’a i te ha’api’ira’a tumu o te Atuara’a e tauturu i te ta’ata hō’ē ’ia ’ite i te here ’o te Metua i te ao ra, ’o Iesu Mesia ’e ’o te Vārua Maita’i, ’e ’ia atihia mai. ’A ’imi ’ia ha’api’i i te nātura hanahana ’e te mau ti’ara’a o te melo tāta’itahi o te Atuara’a.
Te ha’amā ’e te hunara’a
Pinepine te mau mana’o ha’amā i te arata’i i te ta’ata ’ia huna i tō rātou huru. E fa’atupu te ha’amā i te mana’o i roto i te ta’ata ē, e mau ta’ata ’ino rātou ’e te ti’amā ’ore nō te fa’a’orera’a hara. I te tahi a’e pae, e arata’i te mana’o fa’ahapa i te ta’ata hō’ē ’ia ’ite i te mau hape ’e ’ia ’imi ’ia tātarahapa ’e ’ia taui. Te hāro’aro’ara’a i te fa’anahora’a nō te fa’aorara’a e tauturu te reira ia tātou ’ia fa’a’ohipa i te mana o te ti’amāra’a ’e te ti’a’aura’a. E fa’a’ore Iesu Mesia ’e tāna tāra’ehara i te ha’amā ’e e tauturu ia tātou ’ia tātarahapa, ’ia tupu i te rahi, ’e ’ia taui.
Te ta’a-’ore’ra’a nō ni’a i te ti’ara’a o te hereherera’a
E nehenehe e tupu mai te mau ti’aturira’a tano ’ore ’aore rā, hape nō ni’a i te ti’ara’a a te fa’a’ohipara’a o te ’āpenira’a, nā roto i te fa’a’ohipara’a i te hōho’a faufau. Tē ha’amāramarama nei te fa’anahora’a nō te fa’aorara’a i te faufa’a o te ti’ara’a a te fa’a’ohipara’a o te ’āpenira’a ’e tōna ’ōpuara’a i roto i te fa’atupura’a i te mau ’utuāfare ’e i te mau autā’atira’a o te fa’aipoipora’a here. ’A ha’api’i ē, e tauturu te fa’anahora’a nō te fa’aorara’a ’e te tahi atu ha’api’ira’a tumu ’ia tu’u i te faufa’a rahi i ni’a i te faufa’a mau o te hō’ē vārua ’eiaha rā te mau ha’api’ora’a ’e te fa’atupura’a ataata e ’itehia i roto i te hōho’a faufau.
’A fa’aro’o ai ’outou i te ta’ata hō’ē ’ia ’āparau i te mau tāmatara’a tā rātou e fa’aruru nei, e arata’ihia ’outou ’ia fa’ata’a i te ha’api’ira’a tumu ’o tē pāhono maita’i a’e i tō rātou mau hina’aro. Teie mau hi’ora’a ’o te tahi noa ïa mau huru nō te ha’amata i te ha’api’i i te ha’api’ira’a tumu.
’A fa’aitoito i te ta’ata hō’ē ’ia fa’a’ohipa i te ha’api’ira’a tumu o te ’evanelia.
’A tauturu i te ta’ata hō’ē ’ia fa’aitoito i te hāro’aro’a i te ha’api’ira’a tumu ’ia au i tō rātou mau hina’aro ta’a ’ē. E nehenehe te Vārua Maita’i e tūra’i i te ta’ata hō’ē ’ia ’imi i te mau huru ta’a ’ē nō te fa’a’ohipa i te parau mau i roto i tō rātou orara’a. ’A fa’aitoito ia rātou ’ia fafau ’ia ora mai te au i te mau muhumuhura’a tā rātou e fāri’i, te mau fa’auera’a a te Fatu, ’e te mau ha’api’ira’a o te ’evanelia a Iesu Mesia. E fa’anahora’a teie nō te orara’a tā’āto’a nō te feiā ato’a e ’imi ’ia riro ’ei mau pipi nā Iesu Mesia.
Teie mau mana’o i muri nei, e mau ha’api’ira’a tumu hau atu ïa ’o tē nehenehe e tauturu i te ta’ata e ’aro nei i te fa’a’ohipara’a i te hōho’a faufau.
Hōpoi’a
E mau tamari’i tātou tāta’itahi nā te Atua. Nō taua ti’ara’a hanahana ra, ’ua fāri’i tātou i te mau hōro’a, mai te ti’amāra’a, ’e te mau hōpoi’a, mai te ti’a’aura’a.
Te hōpoi’a i ni’a iāna iho, i ni’a ia vetahi ’ē ’e i mua i te Fatu, ’o te tāviri ïa nō te haerera’a i mua. ’A ha’api’i i te ta’ata hō’ē i te mau fifi o te hōho’a faufau ’e e mea nāhea te reira i te ’ōfati i te mau ture ’āvei’a a te Atua. ’A tauturu ia rātou ’ia māramarama ē, e’ita e nehenehe ia rātou ’ia haere i mua ma te ’ore e fatu i te mau huru ’ino ’e te tano ’ore.
Nō te mau ’episekōpo ’e te mau peresideni ’āma’a : Tei roto te fā’ira’a. I te tahi mau taime, e nehenehe e pau e rave rahi rurura’a hou te feiā e fa’a’ohipa nei i te hōho’a faufau ’a fa’a’ite hope ai i te peu tano ’ore. ’Ia fārerei ana’e ’outou ia rātou, ’a tauturu ia rātou ’ia māramarama i te autā’atira’a i rotopū i te parauti’a ’e te aroha, ’e nāhea teie mau parau mau e tū’ati ai i ni’a i te fā’ira’a ’e te hōpoi’a. ’A fa’a’ohipa i te ha’apa’o maita’i, te here, ’e te māhanahana nō te fa’auru ’e nō te fa’aitoito. E ara i te ’ape i te ha’amā ’aore rā, i te fa’ahepora’a. ’Eiaha e fa’atupu i te hō’ē ’apora’a fa’atītī’aifarora’a nō te fa’a’āfaro ’aore rā, nō te ha’amāta’u i te mau melo e ’aro nei i te parau nō te hōho’a faufau (hi’o Buka arata’i rahi : Tāvinira’a i roto i te ’Ēkālesia a Iesu Mesia i te Feiā Mo’a i te mau Mahana Hope’a nei [2020], 32.8.2).
Pure tāmau ’e e tuatāpapa i te pāpa’ira’a mo’a
E mea faufa’a te pure tāmau ’e te tuatāpapara’a i te mau pāpa’ira’a mo’a nō te hō’ē tauira’a rahi ’o te ’ā’au. ’A ha’api’i i te ta’ata hō’ē ’ia pure pāpū, ma te ani i te fa’a’orera’a hapa ’e ma te fa’a’ohipa i te fa’aro’o i te Metua i te ao ra ’e ia Iesu Mesia. E roa’a ato’a i te ta’ata hō’ē te pūai nā roto i te tuatāpapara’a i te Buka a Moromona i te mau mahana ato’a (hi’o Russell M. Nelson, « Te Buka a Moromona : E aha te huru o tō ’outou orara’a ’āhani ’aita te reira ? » Liahona, Novema 2017, 60–63). ’A ani ia rātou ’ia ’imi tāmau i te mau a’ora’a nō te ’āmuira’a rahi ’e te mau parau pāpa’i o te ve’a a te ’Ēkālesia nō ni’a i te hōho’a faufau ’e te mau ’ōpuara’a pae vārua.
Te fa’aro’o i tō tātou Metua i te ao ra ’e ia Iesu Mesia
’Ia ti’aturi te ta’ata hō’ē ē, e nehenehe rātou e taui. ’A ’imi ’ia vai te mana’o maita’i ’e te mana’o tano ’e o rātou ’a hi’opo’a ai ’outou i te mau parau tumu o te fa’aro’o i te Metua i te ao ra ’e ’ia Iesu Mesia. ’A ha’api’i ia rātou ē, te hina’aro ha’iha’i roa a’e nō te ha’amata i te hō’ē fa’anahora’a nō te taui, e nehenehe te reira e arata’i atu i te haerera’a i mua (hi’o Alama 32:27–28). ’A fa’a’amu ai te ta’ata hō’ē i tō rātou fa’aro’o ’e ’a fa’a’ohipa ai i te mau mea tā rātou e ha’api’i mai, e nehenehe rātou e fa’ahotu i tō rātou fa’aro’o nō te pāturu i te hō’ē tauira’a rahi.
Hō’ē ravera’a, e ’ere i te hō’ē terera’a ’ohipa
E ravera’a ’oa’oa te tātarahapara’a ’o tē tītau i te taime (hi’o Dale G. Renlund, « Te tātarahapa : Hō’ē fa’aotira’a ’oa’oa », Liahona, Novema 2016, 121–24 ; Stephen W. Owen, « E mea maita’i noa te tātarahapara’a », Liahona, Novema 2017, 48–50). Mai te fa’atupura’a i te hō’ē peu ’ino e tītau i te taime, mai te reira ato’a nō te fa’ahotura’a i te mau huru mā mai te Mesia te huru. Te pure tāmau, te tuatāpapara’a i te mau pāpa’ira’a mo’a ’e te fa’ahotura’a i te fa’aro’o i tō tātou Metua i te ao ra ’e ia Iesu Mesia, nā te reira e fa’a’ōhie i teie ravera’a.
’Aita e tītauhia, ’e e ’ere ato’a i te mea ti’a roa, i te hō’ē ta’ata hō’ē ’ia maita’i roa ’oia a muri a’e ’aore rā, ’ia ’ite ’oia i te hō’ē tauira’a ’oi’oi o te ’ā’au. ’Āre’a rā, ’ia haere ’oia i mua e ti’a ai, ma te hina’aro mau ’ia ’imi i te fa’a’orera’a hapa, ’ia tinai i te peu hara, ’e ’ia haere i mua. Hau atu i te reira, te ta’ata e māta’ita’i i te hōho’a faufau e ti’a ato’a iāna ’ia ’ite ’e ’ia amo i te hōpoi’a nō te māuiui tā te reira huru e fa’atupu ra ’e te ’inora’a o te ti’aturira’a tā te reira e fa’atupu i roto i tōna mau autā’atira’a. Tei roto i te reira te fa’aho’ira’a e tae noa atu i te rirora’a ’ei mea parauti’a i ni’a i te hoa fa’aipoipo, mai te mea ē, e ta’ata fa’aipoipo ’oia.
’A fa’a’ite pāpū pinepine i te mana o te tāra’ehara a Iesu Mesia ’e tōna ti’ara’a ’ia tauturu i te ta’ata ’ia taui. E hōro’a mai te tāra’ehara a Iesu Mesia i te ’oa’oa (hi’o Mosia 4:2–3).