« Te tauturu nō te mau hoa fa’aipoipo o te feiā e fa’a’ohipa nei i te hōho’a faufau », Te mau mātēria nō te fa’aa’o i te ta’ata (2020).

« Te tauturu nō te mau hoa fa’aipoipo o te feiā e fa’a’ohipa nei i te hōho’a faufau », Te mau mātēria nō te fa’aa’o i te ta’ata

Te tauturu nō te mau hoa fa’aipoipo o te feiā e fa’a’ohipa nei i te hōho’a faufau

3:53

E mea pinepine te fa’a’ohipara’a i te hōho’a faufau i te ha’ape’ape’a pāpū i te hoa fa’aipoipo o te ta’ata e fa’a’ohipa. E riri paha te hoa fa’aipoipo, e’ita e nehenehe e pāruru iāna, ’e e tāvirihia e te ta’ata e fa’a’ohipa. Hau atu i te reira, te mau mana’o ri’ari’a, te māere, te māuiui rahi, te ’oto, ’e te pe’ape’a, e tae noa atu te riri ’aore rā, te hepohepo e mea mātarohia ïa. Pinepine te mau hoa fa’aipoipo i te fāri’i i te mana’o ha’amā rahi ’e te uiui i ni’a i tō rātou iho faufa’a. E fāri’i ato’a te tahi mau hoa fa’aipoipo i te mau tāpa’o pae tino, mai te ma’i, te māuiui ta’a ’ore o te māfatu ’aore rā, o te ouma, te māuiui upo’o ’aore rā, te ’orera’a e ti’a ’ia ta’oto.

E tae nehenehe ato’a rātou e fāri’i ē, ’ua ha’avare te Atua ia rātou ma te uiui ē, nō te aha ’oia i vaiiho ai i te reira ’ia tupu. E’ita te mau hoa fa’aipoipo ato’a e feruri ’e e pāhono i te hō’ē ā huru. E nehenehe te tahi atu mau fifi i te pae fa’aipoipora’a, ’aore rā, te pinepinera’a ’e te roara’a o te fa’a’ohipara’a i te hōho’a faufau, e fa’auru i tā rātou mau ’ohipa ’e te teimaha o tā rātou pāhonora’a.

E fa’ataiā paha te mau hoa fa’aipoipo ’ia paraparau i te hō’ē ta’ata nō tā rātou mau ’arora’a i te pae ’āehuehu ’e i te pae vārua, ’e i te tahi taime e mā’iti ’ia mamae muhu noa, ’eiaha rā e toro i te rima nō te ani i te tauturu ’aore rā, i te pāturura’a. ’Ia ’imi ana’e rātou i te tauturu, pinepine te mau hoa fa’aipoipo i te hina’aro i te hō’ē ta’ata ’ia fa’aro’o ma te aumihi ’e ’ia hōro’a i te pāturura’a ’e te aroha. Pinepine te mau hoa fa’aipoipo i te feruri hape ē, ’o rātou te tumu o te fifi, nō reira, e hina’aro ïa rātou i te tauturu nō te hāro’aro’a ē, e ’ere ’o rātou te tumu nō te huru o te ta’ata fa’a’ohipa.

’A imi ’ia māramarama

Te tauturura’a i te hoa fa’aipoipo o te ta’ata e fa’a’ohipa ra i te hōho’a faufau ’ia ’ite ē, tē fa’aro’ohia nei rātou ’e tē ta’ahia atura rātou, ’o tē riro ’ei ’ohipa faufa’a roa i te a’ora’a o tā ’outou e hōro’a. Te fa’aro’ora’a ma te aumihi, e fa’atae te reira i te hō’ē parau poro’i pūai i te hoa fa’aipoipo ē, ’ua herehia ’oia, tē ha’afaufa’ahia ra, ’e tē aupuruhia ra ’oia. ’A fa’a’ite i te here ’e te aumihi mai tā te Fa’aora e nā reira. A feruri nā roto i te pure ’ia ui i te mau uira’a mai teie nō te tauturu ’ia ’outou ’ia hāro’aro’a i te huru tupura’a o te hoa fa’aipoipo ’e ’ia ’ite i tōna mau hina’aro. ’Ia ineine ’outou nō te hōro’a i te taime ’ia fa’aro’o ’ōhie noa i te hoa fa’aipoipo, ’ia fa’a’ite mai i tōna mau mata’u, tōna mau fea’a ’e tōna mau hepohepo.

E nehenehe te hō’ē hoa fa’aipoipo e paraparau au mau nō ni’a i te huru tupura’a mai te mea ē, tē vai ra tōna hō’ē hoa, hō’ē metua, ’aore rā, hō’ē ti’a fa’atere ti’aturihia nō te ’Ēkālesia i reira. ’A ha’apāpū ē, ’ua ’ite te hoa fa’aipoipo ē, e nehenehe tāna e fāri’i i te hō’ē ta’ata pāturu i reira. A feruri ’ia ui i te mau uira’a mai teie i raro nei nā roto i te aumihi ’e te here :

E aha te huru tupura’a i teie taime, ’e tā ’oe e fa’aruru nei ?
E aha te tuha’a pe’ape’a roa a’e nō te fa’a’ohipara’a i te hōho’a faufau a tō ’oe hoa fa’aipoipo ?
E aha te mea e ha’ape’ape’a rahi nei ia ’oe i roto i tō ’ōrua fa’aipoipora’a i teie taime ?
E mea nāhea te hōho’a faufau i te ha’ape’ape’ara’a ia ’oe, ’e tō ’oe ’utuāfare (te mau fifi ’utuāfare, te mau fifi nō te ea, ’e te vai atu ra) ?
E aha te mau rāve’a pāturura’a tā ’oe e fāri’i nei i teie taime ?
E aha te fāito ’ā’au matara ’e te ha’avare ’ore o tō ’oe hoa fa’aipoipo i mua i teie tāmatara’a o te hōho’a faufau ?
E aha te fāito o tō ’oe hina’aro ’ia paraparau i te reira fifi i tō ’oe hoa fa’aipoipo ?
E aha atu ā te ti’a iā’u ’ia ’ite nō ni’a i teie huru tupura’a ?
E mea nāhea tō te Fatu tauturura’a ia ’oe ’ia fa’a’oroma’i i teie tāmatara’a ?

Mai te mea e ’ite atu ’outou i te hō’ē hāmani-’ino-ra’a, te ’ohipa ’iriā i te fare, ’aore rā, te māta’ita’ira’a, te ho’ora’a mai, ’aore rā, te ’ōperera’a i te hōho’a faufau tamari’i, ’a fārerei atu i te huimana fa’atere nō te fenua. Tē vai ra tā te mau ’episekōpo hō’ē rēni tauturu hau atu tā rātou e nehenehe e niuniu i roto i terā mau huru tupura’a.

Tauturu i te ta’ata

’Ia tauturu ana’e ’outou i te hoa fa’aipoipo, ’a feruri ’ia fa’a’ohipa i te tahi o te mau mana’o tauturu i muri nei.

’A ha’apāpū i te ti’ara’a o te Fa’aora ’ia hōro’a i te hō’ē fa’aorara’a i te hoa fa’aipoipo o te ta’ata e fa’a’ohipa ra i te hōho’a faufau (hi’o Alama 7:11 ’e Mataio 11:28–30).

’A ani i te hoa fa’aipoipo ’ia tuatāpapa nāhea te Mesia i te aupurura’a i te feiā e fa’aruru nei i te mau ’ati, ’e nāhea e ti’a ai i te Mesia ’ia tauturu iāna ’ia ora.
’A tauturu i te hoa fa’aipoipo ’ia māramarama ’e ’ia fa’aro’o i roto i te mau ’ōro’a o te autahu’ara’a, te mau ’ōro’a iho ā rā o te hiero.
’A fa’aitoito i te hoa fa’aipoipo ’ia ’imi i te hō’ē ha’amaita’ira’a autahu’ara’a.

’A pāturu iāna nō te tauturu iāna ’ia arai i te mau ’āehuehu māuiui.

’A fa’a’ite i tō ’outou here ’e te māna’ona’o nōna, ’e nō tōna ato’a hoa fa’aipoipo ’e tāna mau tamari’i.
’A tauturu i te hoa fa’aipoipo ’ia māramarama ē, e’ita te fa’aotira’a a te ta’ata fa’a’ohipa i te hōho’a faufau e taui i te huru o te hi’ora’a a te Atua i te hoa fa’aipoipo tāta’itahi.
’A fa’ata’a maita’i ē, e ’ere ’o ’oia te tumu nō te fa’a’ohipara’a tōna hoa fa’aipoipo i te hōho’a faufau ’aore rā, tōna huru au ’ore, ’e e’ita ’oia e fāri’i i te peu hāmani ’ino. Mai te mea tē ’ite ra ’outou i te hō’ē hāmani-’ino-ra’a, ’a fārerei ’oi’oi atu i te mau huimana fa’atere o te fenua.
’A fa’aha’amana’o i te hoa fa’aipoipo i tōna ti’amā ’e tōna faufa’a.
’A fa’aitoito i te hoa fa’aipoipo ’ia fārerei i te ’episekōpo, mai te mea ’aita ā ’oia i nā reira atu ra.

’A ani i te hoa fa’aipoipo ’ia hi’o fa’ahou i te mau mātēria tauturu nā te mau hoa fa’aipoipo ’e te ’utuāfare i ni’a i « ’Arora’a i te hōho’a fafau » i ni’a i te ChurchofJesusChrist.org.

’A tauturu i te hoa fa’aipoipo ’ia māramarama ē, e nehenehe ’oia e fāri’i i tāna iho heheura’a nō te ’ite nāhea ’ia fa’ata’a i te mau ’ōti’a māramarama i roto i te autā’atira’a ’e i te fare.

’A ani iāna ’ia tuatāpapa i te « Parau tumu 8: ’Ia vai pāpū noa ’e te ’āueue ’ore » i roto i te Arata’ira’a nō te pāturu : Tauturu nō te mau hoa fa’aipoipo ’e te ’utuāfare o te feiā e ora mai ra (e ’itehia i roto i te tuha’a o te « Fa’aorara’a i te hia’ai maha ’ore » i ni’a i te ChurchofJesusChrist.org) nō te tauturu iāna ’ia māramarama nāhea ’ia fa’ata’a i te mau ’ōti’a ’o tē nehenehe e tauturu ’ia fa’aho’i mai i te nahonaho i roto i te orara’a ’e i te fare.
E tauturu i te hoa fa’aipoipo ’ia ’ite ē, e ti’ara’a tōna nō te fāri’i i te ha’avare ’ore hope roa, ’aita e hōho’a faufau i te fare ’e te tahi atu mau huru, ’o tē fa’a’ōhie i te hau ’e te hō’ēra’a.
E tauturu iāna ’ia hāroaroa ē, e nehenehe tāna e fa’aoti ’e e ’āparau i tōna hoa fa’aipoipo i tōna hina’aro rahi ’ia ’ite nō ni’a i te fa’a’ohipara’a i te hōho’a faufau (mai te nātura, te ora maoro, ’e te teimaha o te fifi). E nehenehe te fa’a’itera’a hope roa e tauturu i te rāve’a nō te fa’aorara’a.

E tauturu i te hoa fa’aipoipo ’ia ’imi i te hō’ē hoa ti’aturihia ’aore rā, hō’ē melo o te ’utuāfare e nehenehe e hōro’a i te hō’ē pāturura’a pāpū tāmau, ’a ’imi ai ’oia i te hau ’e te ti’ara’a pāpū i roto i tōna orara’a.

Mai te mea e nehenehe, ’a fa’aitoito i te hoa fa’aipoipo ’ia paraparau i te tahi atu mau ta’ata ’o tē ’ore e fa’ao’ō’o i te ta’ata e fa’a’ohipa ra i te hōho’a faufau, ’aore rā, e’ita e tura’i iāna ’ia rave i te mau ha’avāra’a vitiviti ’aore rā, ’ia rave i te mau fa’aotira’a rū.
Mai te mea tē vai ra, e mea pinepine te mau putuputura’a pāturu i rotopū i te mau hoa fa’aipoipo ’e te ’utuāfare, i te riro ’ei vāhi maita’i nō te ’ite ē, tē pāturuhia ra ’oia, tē fa’aro’ohia ra, ’e tē ha’amanahia ra, ’e nō te ’ite mai i te pūai i roto i te Mesia nā roto i te mana o tōna tāra’ehara.

E tauturu iāna ’ia hāro’aro’a ē, te fa’a’orera’a hara a tōna hoa fa’aipoipo, ’o te hō’ē ïa fa’anahora’a, ’e e nehenehe tāna e fāri’i i tāna iho heheura’a nō te ’ite, e nāhea ’e a hea e ha’amata ai i te reira fa’anahora’a.

E tauturu i te hoa fa’aipoipo ’ia ’ite i te aumihi i tāna iho fa’anahora’a nō te fa’aorara’a i te pae ’āehuehu ’e i te pae vārua, ’o tē nehenehe e tītau i te tau maoro, ta’a ’ē noa atu te huru o te fa’aorara’a o te ta’ata fa’a’ohipa. ’Eiaha e tāmata i te rū noa ’aore rā, i te fa’ahepo i te fa’anahora’a. ’A vaiiho iāna ’ia ’ohipa i ni’a i tōna mau mana’o ’e tāna mau tāmatara’a e tū’ati i te huru tupura’a hou ’a ’āparau i te fa’a’orera’a hapa.
’A fa’aha’amana’o i te hoa fa’aipoipo ē, te fa’aroara’a i te fa’a’orera’a hapa, ’e ’ere i te fa’aroa-ato’a-ra’a i te ti’aturira’a. E nehenehe te ti’aturira’a e tae mai i muri iho, ’aore rā, e’ita roa atu, tei te huru ’o te mau mā’itira’a ’e te mau peu a muri a’e. E ho’i fa’ahou mai te ti’aturira’a ’a tāmau noa ai te ta’ata fa’a’ohipa i te hōho’a faufau i te ha’a i ni’a i tōna iho fa’aorara’a, ’e ’ia ’ite te hoa fa’aipoipo i te itoito ’e te tītaura’a tā te ta’ata fa’a’ohipa ’ia taui.

E ti’a i te feiā fa’atere o te ’Ēkālesia ’ia ha’apa’o maita’i ’eiaha e mana’o ē, te aura’a herehere tahito o nā ta’ata fa’aipoipo, e tā’atira’a mana te reira i te tahi ’aore rā, i te tahi o nā hoa fa’aipoipo tei topa i roto i te hōho’a faufau. Terā rā, e nehenehe te fa’a’ohipara’a i te hōho’a faufau e fa’a’ino i te mau aura’a hereherera’a. E ti’a i te feiā fa’atere o te ’Ēkālesia ’ia ha’apae i te hōro’a i te mau parau a’o nō ni’a i te mau parau o te hereherera’a, ’e mai te mea e tītauhia te tauturu, ’a fārerei atu i te Pū tāvinira’a ’utuāfare ’aore rā, i te tahi atu mau tahu’a pāturu i te pae tōtiare ’e i te pae ’āehuehu, ’e ’ia tono atu i nā ta’ata fa’aipoipo i te mau taote ti’a.

Pāturu i te ’utuāfare

’A hi’o i te mea tei tupu i ni’a i te fa’aipoipo ’e i te ’utuāfare ’e ’a fa’atītī’aifaro i te mau fifi.

Mai te mea e hina’aro nā ta’ata fa’aipoipo i te tahi atu tauturu, ’a fa’aitoito ia rāua ’ia fāri’i i te tauturu tā rāua tāta’itahi e hina’aro ’e tae noa atu i te tauturu nō rāua ’ei nā ’āpiti fa’aipoipo.

Mai te mea tē vai ra te mau tamari’i i roto i te ’utuāfare ’o tei ’ite i te fifi, ’a tauturu i tō rātou nā metua ’ia hāro’aro’a i tā rāua hōpoi’a ’ia ha’apa’o ia rātou ’e ’ia tauturu i te mau tamari’i mai te mea e tītauhia.

’A ’imi e pāturu i te ta’ata i fa’a’ohipa i te hōho’a faufau i roto i tāna fa’anahora’a nō te ora fa’ahou mai i te pae vārua. E nehenehe te mau mātēria tauturu nō te hia’ai māha ’ore ’e te fa’a’ohipara’a i te hōho’a faufau, te tuha’a nō te « ’Arora’a i te hōho’a faufau » ’o te ChurchofJesusChrist.org,’e te tahua natirara ’o te Fa’anahora’a nō te fa’aorara’a i te hia’ai maha ’ore e riro ’ei mea maita’i, ’a tauturu ai ’outou i te hō’ē ta’ata e ’aro ra i te hōho’a faufau ’ia māramarama i tāna hōpoi’a ’ia fa’a’āfaro i te huru.

’A fa’aitoito i te ta’ata i fa’a’ohipa i te hōho’a faufau ’ia fa’a’ite i tāna mau ’ohipa ’e ’ia pāturu i tōna hoa fa’aipoipo. ’A hi’o i te mātēria tauturu nō te fa’a’ohipara’a i te hōho’a faufau nō te mau ha’amāramaramara’a hau atu

’A fa’a’ohipa i te mau mātēria tauturu a te pāroita ’e a te titi

I muri a’e i te fāri’ira’a i te parau fa’ati’a a te hoa fa’aipoipo ’e a te ta’ata e fa’a’ohipa ra i te hōho’a faufau nō te paraparau ia vetahi ’ē i te huru tupura’a, ’a feruri e fa’aau ’e te feiā fa’atere o te pāroita ’aore rā, te tahi atu mau ta’ata ti’aturihia nō te hōro’a i te pāturura’a, te arata’ira’a, ’e te tauturura’a tāmau.

’A ’imi i te hō’ē ta’ata ti’aturihia e nehenehe e riro ’ei ta’ata pāturu nō te hoa fa’aipoipo o te ta’ata e fa’a’ohipa ra i te hōho’a faufau. Te mea au roa atu, e manuia teie ta’ata pāturu ’ia pāhono i te hō’ē tāmatara’a mai te reira, terā rā, e nehenehe te mau huru ta’ata pa’ari ato’a i te pae vārua e hōro’a i te pāturura’a aupuru.

’A ani i te hoa fa’aipoipo ’ia ’āmui atu i roto i te hō’ē pupu pāturu nō te fenua iho nō te mau hoa fa’aipoipo ’e te mau melo o te ’utuāfare.

’A haere a hi’o i te tahua natirara nō te fa’anahora’a nō te Fa’aorara’a i te feiā tei ro’ohia i te hia’ai maha ’ore ( tuha’a nō te « Fa’aorara’a i te hia’ai maha ’ore » i ni’a ChurchofJesusChrist.org) nō te ’imi i te mau putuputura’a a te hō’ē pupu pāturu hoa fa’aipoipo nō te fenua iho, o te fa’atupuhia ma te fārerei tino roa, ’aore rā, nā roto noa i te niuniu.
Mai te mea ’aita e putuputura’a, ’a feruri e fārerei atu i te ’episekōpo nō te ani iāna ’ia fa’atupu i te hō’ē putuputura’a ’aore rā, ’ia fa’a’ohipa i te mau pupu pāturu o te ’oire.

’A feruri e ’āfa’i i te hoa fa’aipoipo o te ta’ata e fa’a’ohipa ra i te hōho’a faufau ’ia fāri’i i te tauturu ’aore rā i te a’ora’a a te taote. ’A ’imi i te mau mātēria tauturu o te fenua iho o tē hōro’a nei i te mau tāvinira’a e tū’ati i ni’a i te mau parau tumu o te ’evanelia.