Te mau mātēria nō te fa’aa’o i te ta’ata

E aha tē tītauhia iā’u ’ia māramarama i ni’a i te ’ā’anora’a o te fa’a’ohipara’a o te hoho’a faufau ?

’Ua rau te mau tumu ’o te fa’a’ohipara’a o te hōho’a faufau, ’e mea ta’a ’ē te fa’anahora’a o te tātarahapa nō te melo tāta’itahi. ’A fa’aro’o i te mau melo ’ia fa’a’ite ē, tei hea rātou, tae noa atu i tā rātou mau peu (’ua ’itehia ānei, ’aore rā, tē ’imi ra ānei rātou i te tauira’a ?), te fāito o te fa’a’ohipara’a, ’e tā rātou e hina’aro nō te haere i mua.

’A ha’amata nā roto i te fa’a’itera’a i tō ’outou here ’e tō ’outou māuruuru i te mau ta’ata tei ’itehia ia rātou te itoito nō te haere mai e ani i te tauturu. ’A fa’aitoito i te tauturu ia rātou ’ia hāro’aro’a ē, tē vai ra te ti’aturira’a. E nehenehe rātou e fa’aruru i taua tupura’a ra ’e ’ia haere i mua ’ei mau pipi nā Iesu Mesia. ’A ha’apāpū ia rātou i tō rātou ti’ara’a ta’ata hanahana ’ei mau tamari’i nā te Atua. ’Ia roa’a ana’e te ’itera’a pūai ia rātou ē, o vai mau rātou, e tauturu te reira ia rātou ’ia ’ore e ha’amā ’e ’ia fa’a’ohipa i te reira tupura’a nō tō rātou iho tupura’a i te rahi ’e tō rātou iho tauira’a.

E ti’aturira’a mo’a tō te mau ’episekōpo nō te tauturu i te mau melo i roto i tā rātou fa’anahora’a nō te tātarahapa. ’Ei ha’avā nō ’Īsera’ela, e ’ohipa rātou i raro a’e i te fa’aurura’a nō te tauturu i te mau melo ’ia hāro’aro’a ē, e hōpoi’a ’e e ha’amaita’ira’a nō rātou ’ia ’imi i te fa’aurura’a o te ta’ata iho ’e ’ia fāri’i i te mau pāhonora’a e tītauhia nō te upo’oti’a i ni’a i tō rātou mau tāmatara’a.

E tano i te feiā fa’atere ’ia fa’atumu i ni’a i te ha’apa’arira’a i te ti’ara’a pipi ’e te fa’aro’o nā roto i te ha’api’ira’a « ’Ei ta’ata fa’atere i roto i te ’Ēkālesia a Iesu Mesia, e pāturu ’outou i te mau ta’ata ’e te mau ’utuāfare i te ravera’a i te ’ohipa fa’aorara’a ’e te fa’ateiteira’a a te Atua » (Buka arata’i rahi : Te tāvinira’a i roto i te ’Ēkālesia a Iesu Mesia i te Feiā Mo’a i te au Mahana Hope’a nei [2020], 2.0). (’A hi’o « E aha te mau parau tumu e tauturu i te ta’ata ’ia upo’oti’a i ni’a i te mau fifi o te hōho’a faufau ? »)

Te hi’opo’ara’a i te ’āmuira’a mai i roto

Noa atu ē, ’aita te tātarahapara’a nō te fa’a’ohipara’a i te hōho’a faufau e tītau nei i te hō’ē ture mana a te ’Ēkālesia, ’a ha’amana’o ē, « Te fa’ahapa nei te ’Ēkālesia i te hōho’a faufau i roto i tōna mau huru fāito ato’a. E fa’a’ino te mau huru fa’a’ohipara’a ato’a i te hōho’a faufau i te orara’a o te ta’ata, i te ’utuāfare, ’e i te tōtaiete. Tē tīahi ato’a nei te reira i te Vārua o te Fatu » (Buka arata’i rahi, 38.6.13). Tā ’outou ’ōpuara’a o te tauturura’a ïa i te ta’ata ’ia tāmata i te hō’ē « tauira’a rahi o te ’ā’au » (hi’o Alama 5:12–14) ’e ’ia fāri’i rahi atu i te ti’ara’a o Iesu Mesia i roto i tō rātou orara’a, te mana hoa rā nō tāna tāra’ehara. E tupu i te rahi tō rātou ti’ara’a pipi ’ia ’ite ana’e rātou i tōna mana i roto i tō rātou orara’a nā roto i te hō’ē fa’anahora’a o te tauira’a, ’o tē tītau i tāna arata’ira’a ’e tōna pūai ti’a.

’A fa’aitoito ai ’outou i te ta’ata ’ia hāro’aro’a i tā rātou fa’a’ohipara’a i te hōho’a faufau mai te hō’ē mea tei hau atu i te hō’ē noa tāpa’o nō te paruparu i te pae mōrare, e nehenehe tā rātou e fa’ata’a ē, e aha te mau rāve’a tauturu hau atu tā rātou e hina’aro, mai te mea e tītauhia. ’Ei hi’ora’a, ’ua rau te mau tumu o te fa’a’ohipara’a i te hōho’a faufau (mai te mau tumu i te pae ihiora, pae ferurira’a, pae tōtiare ’e te pae vārua). Te mau rāve’a tauturu e hina’arohia, tei te huru ïa o te teimaha o te peu a te reira ta’ata, ’e i te huru o tāna ravera’a i te fifi.

’A feruri i teie mau mana’o i muri nei ’a tauturu ai ’outou i te mau melo ’e tō rātou mau hoa fa’aipoipo ’ia māramarama i te ’ā’anora’a o tō rātou tomora’a i roto i te hōho’a faufau ’e te fa’ahope’ara’a o te reira i ni’a i tō rātou orara’a.

Te hōpoi’a a te ta’ata iho

E fa’aitoito ’outou i te tauturura’a i te mau melo ’ia amo rātou iho i te hōpoi’a o te mau fa’aotira’a, te mau mā’itira’a ’e te mau tauira’a a muri a’e. ’Eiaha ’ia mo’ehia ia ’outou ē, te mau fa’aotira’a nō ni’a i te ananahi e hōpoi’a te reira nā te ta’ata e fifi ra ’e tōna hoa fa’aipoipo. Tā ’outou ’ohipa ’o te tauturura’a ïa ’e te pāturura’a ia rātou ’a ’imi ai rātou i te fa’aurura’a.

Te fāito o te hōho’a faufau

’Ia ui ana’e ’outou i te mau uira’a fa’auruhia, e nehenehe ïa ’outou e tauturu i te mau ta’ata tei roto i te fifi (te mau ta’ata ; te mau metua; mai te mea e feiā ’āpī; ’e te mau hoa fa’aipoipo) ’ia ’ite ē, te feiā e fa’a’ohipa ra i te hōho’a faufau, e feiā e fa’a’ohipa nō te tahi noa taime, e feiā e fa’a’ohipa ’ū’ana nei, ’aore rā, e feiā e fa’a’ohipa maha ’ore nei. E nehenehe te hāro’aro’ara’a i te reira e tauturu ia ’outou i te roara’a o te fa’anahora’a o te tātarahapara’a ’e tae noa atu i te ’itera’a e nāhea ’ia tāvini i te hoa fa’aipoipo ’aore rā, i te mau metua. ’A ui ato’a i te mau uira’a nō ni’a i te huru o te hōho’a faufau e fa’a’ohipahia ra—e nehenehe te hōho’a faufau e ta’a ’ē i roto i tō rātou huru ’ū’ana ’e e nehenehe ato’a e tū’ati i te tahi atu mau peu.

’A ha’apa’o maita’i ’ia parau ana’e ’outou i te ta’ata ē, e feiā hia’ai māha ’ore ; e’ita te rahira’a o te ta’ata e fa’a’ohipa i te mau mātēria nō te hōho’a faufau e parauhia e feiā hia’ai maha ’ore, te feiā ’āpī iho ā rā. E nehenehe te tapa’ora’a ’ei hia’ai māha ’ore i te hōho’a faufau e ha’aparuparu ia rātou i roto i tā rātou mau tauto’ora’a ’ia taui. Nō te mau ha’amāramaramara’a hau atu , hi’o Dallin H. Oaks, « Recovering from the Trap of Pornography », Ensign, ’Ātopa 2015, 32-38.

Pinepine te fa’a’ohipara’a i te hōho’a faufau ’ua hau atu i te hō’ē noa paruparu i te pae mōrare

Pinepine te tomora’a te hō’ē ta’ata i roto i te hōho’a faufau i te riro ’ei ’ohipa fifi, ’e e mea faufa’a ’ia ’ite ē, te māta’ita’ira’a i te hōho’a faufau, ’ua hau atu ïa te reira i te hō’ē noa hina’aro i te pae ’āpeni. I te rahira’a o te taime, ’ua tā’aihia te māta’ita’ira’a i te hōho’a faufau i te mau tāmatara’a i te pae ihiora, i te pae ferurira’a, i te pae tōtiare, ’e i te pae vārua o te ta’ata tāta’itahi.

E nehenehe te mau tāmatara’a tei tā’aihia i ni’a i te hō’ē ’aore rā, i ni’a i te ’āmuira’a o teie nā tuha’a e maha, e ha’aparuparu i te mau ta’ata, ’e e fa’ariro ’ei ’ohipa fifi nō rātou ’ia fa’aea i te fa’a’ohipa i te hōho’a faufau. ’A ’imi ai rātou ’ia māramarama i te ’ite hōhonura’a o tō rātou mau fifi i te pae nō te hōho’a faufau, e nehenehe rātou e ha’amata i te ’imi i te tahi atu mau mea e ha’ape’ape’a ra ia rātou. Noa atu te faufa’a o te pūai pae vārua, pinepine te fa’a’āfarora’a i te mau tuha’a o te pae ihiora, te pae ferurira’a, ’e te pae tōtiare o tō rātou orara’a, i te tauturu maita’i i te ta’ata. ’A fa’aitoito i te ta’ata ’ia tuatāpapa i teie mau tuha’a ’e tō rātou pūai ha’aputapū. E nehenehe te reira e arata’i ia rātou i te manuiara’a rahi a’e i te fa’aeara’a i te fa’a’ohipa i te hōho’a faufau.

E maha tumu e feruri

E maha tāpa’o fa’a’ite e nehenehe e tauturu i te mau melo ’ia hi’opo’a ē, e aha te fāito o tō rātou tomora’a i roto i te hōho’a faufau : te pinepinera’a, te maorora’a, te ’ū’anara’a ’e te hia’ai pe’ape’a. E nehenehe te māramaramara’a i te reira mau tāpa’o fa’a’ite e tauturu ia ’outou, te mau ta’ata, ’e tei au mai ia rātou, ’ia ’ite i te fifi o tā rātou tāmatara’a.

Te pinepinera’a

Te pinepinera’a ’o te pinepinera’a ïa ’o tō te hō’ē ta’ata ravera’a i te hō’ē peu. Te māta’ita’ira’a i terā ’e terā taime i te hōho’a faufau, e fa’a’itera’a te reira nō te hō’ē fifi na’ina’i, noa atu ē, e ’ere te reira peu i te ’ohipa tano. Rahi atu te pinepinera’a o tō te ta’ata māta’ita’ira’a i te hōho’a faufau, rahi ato’a atu te ’ino o te fifi.

Te maorora’a

Te maorora’a ’o te roara’a ïa te taime ’a rave ai te hō’ē ta’ata i te hō’ē peu. Mai te mea ’aita i ti’a i te hō’ē ta’ata ’ia fa’aea i te māta’ita’i i te hōho’a faufau i te roara’a e rave rahi matahiti, penei a’e e mea fifi atu ïa nōna ’ia upo’oti’a i ni’a i te reira peu nō te hō’ē tau poto.

Te ’ū’anara’a

Te ’ū’anara’a ’o te huru ïa o te mātēria māta’ita’ira’a hōho’a. Noa atu ē, e mea tano ’ore te mau hōho’a ’e te mau mea ato’a i roto i te hōho’a faufau, tē vai ra te tahi mau mātēria e mea ’ino mau te reira. ’Ia ’ite ana’e ’outou i te fifi o te hō’ē melo, e mea faufa’a ’ia ’ite i te huru hōho’a faufau tāna e māta’ita’i ra.

’Ei hi’ora’a, e mea ’ū’ana a’e te mau ve’a e pāpa’i ra i te mau peu ’āpenira’a ’e te mau hōho’a, i te mau hōho’a o te mau ta’ata ’aita re’a ’aore rā, ’aita roa atu e ’ahu i ni’a ia rātou. Tē vai ra te tahi mau mātēria hōho’a faufau e mea hāmani ’ino ’aore rā, e ’itehia te tamari’i i roto. Mai te mea e ’ite ’outou i te māta’ita’ira’a, te ho’ora’a, ’aore rā, te ’ōperera’a i te hōho’a faufau tamari’i, ’a fārerei atu i te mau huimana fa’atere o te fenua. Tē vai ato’a ra hō’ē rēni tauturu nā te ’episekōpo nō te fa’a’āfaro i teie fifi.

Hia’ai pe’ape’a

Te hina’aro hia’ai pe’ape’a ’aore rā, te mau peu tei tā’atihia i ni’a i te fa’a’ohipara’a i te hōho’a faufau, ’o te tahi atu ïa tāpa’o fa’a’ite o te teimaha o te tāmatara’a. Rahi atu te hina’aro ’o te hō’ē ta’ata ’ia māta’ita’i i te hōho’a faufau, rahi ato’a atu tōna fifi ’ia fa’aea i te fa’a’ohipa i te reira. Te mau ’ohipa fifi ’oia ho’i, te ’orera’a e haere i te ha’api’ira’a, i te ’ohipa, ’aore rā, i te tahi atu mau tītaura’a ; te fa’a’itera’a i te hō’ē huru ti’a ’ore, te hunara’a ’aore rā, te ha’avare ; ’aore rā, te mau ’ohipa mai te reira te huru. E nehenehe te mau peu ataata i roto i te feiā pa’ari e hōro’a mai i te ’erera’a i te ’ohipa, te fa’ata’ara’a, te pararīra’a te ’utuāfare ’aore rā, te hō’ē ’ohipa ’ino.