Te ea i te pae ferurira’a

11:26

E ’ohipa te ea i te pae ferurira’a i ni’a i tō tātou mau mana’o, mau mana’o o te ’ā’au, tō tātou huru, ’e te mau autā’atira’a. Te feiā e ro’ohia i te mau fifi o te ea i te pae ferurira’a ’aore rā, i te ma’i i te pae ferurira’a, e nehenehe rātou e paruparu i te amora’a i te mau ’ohipa ’e te mau tītaura’a o te orara’a i te mau mahana ato’a. Pinepine te reira mau huru i te riro ’ei mea rohirohi ’e te ’āehuehu i te pae o te mana’o nō te ta’ata ’e nō te mau ta’ata tei au mai ’e nō te feiā fa’atere e tāmata ra e ’atu’atu i te feiā i roto i te pe’ape’a.

’Aita e tītauhia, ’aita ato’a e fa’aitoitohia te mau ta’ata e ’ere tō rātou tōro’a nō te ea i te pae ferurira’a, ’ia hi’opo’a ’aore rā, ’ia hōro’a i te utuutura’a i te mau ta’ata tē fifi ra rātou i roto i te ea i te pae ferurira’a. ’Ia ’ore ana’e te ta’ata e pāhono i te mau tauto’ora’a a te feiā fa’atere ’ia riro ’ei feiā tauturu maita’i, ’eiaha te hō’ē ta’ata e ’ino’ino nō te pāhonora’a ’ore a te mau ta’ata. E ti’a rā i te feiā fa’atere ’ia feruri māite ’ia fa’aitoito i te ta’ata ’ia fāri’i i te hō’ē hi’opo’ara’a nō tōna ea i te pae ferurira’a i pīha’i iho i te hō’ē ta’ata ’aravihi (hi’o Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei [2020], 31.2.6). E nehenehe te Pū tāvinira’a ’utuāfare (i te vāhi tē vai ra) e rave i te hō’ē hi’opo’ara’a ’e ’ia hōro’a i te mau mana’o tauturu i te feiā fa’atere nō ni’a i te mātēria tauturu nō te hi’opo’a i te ea i te pae ferurira’a i roto i te ’oire. E ti’a i te feiā fa’atere ’ia hi’o i te parau nō te « ea i te pae ferurira’a » i roto i te tuha’a Te mau mātēria tauturu nō te mau huma o te ChurchofJesusChrist.org nō te mau ha’amāramaramara’a hau atu nō ni’a i te ma’i i te pae o te ferurira’a.

’A imi ’ia māramarama

’Ia paraparau ana’e ’outou nō te mau fifi o te ea i te pae ferurira’a, ’a ha’apāpū i te fa’a’ite i te here ’e te aumihi mai tā te Fa’aora e nā reira. Mai te mea ’ua ani mai te reira ta’ata i te tauturu, ’a ha’amāuruuru iāna nō te anira’a mai i te tauturu. Nō te ta’a ’ē o te mau huru tupura’a ’e nō te ta’a ’ē o te orara’a o te terā ’e terā ta’ata, ’a feruri nā roto i te pure, ’ia ui i te mau uira’a mai teie, ’e i muri iho ’a fa’aro’o i te Vārua nō te tauturu ia ’outou ’ia māramarama maita’i a’e i tōna mau fifi ’e ’ia ’ite i tōna mau hina’aro.

’Ua ravehia a’ena ānei te hō’ē hi’opo’ara’a nō te ea i te pae ferurira’a i ni’a ia ’oe ? Mai te mea e ’ē, e aha te maorora’a i teienei te reira ma’i ? E aha tā te reira e fa’atupu nei i ni’a i tā ’oe ’ohipa ’e tō ’oe mau autā’atira’a ’utuāfare ?
E aha tō ’oe mau māna’ona’ora’a ’aore rā mau ha’ape’ape’a rahi roa a’e i teienei ?
E aha te mau utuutura’a (mai te mea tē vai ra) tā ’oe e fāri’i nei mai roto mai i te hō’ē ta’ata utuutu ma’i i te pae ferurira’a ? Tē ha’apa’o ra ānei ’oe i te mau arata’ira’a a tō ’oe ta’ata utuutu, ’e e mea au ānei nā ’oe te mau utuutura’a tā ’oe e fāri’i nei ?
Tē mana’o ra ānei ’oe ē, tē maita’i mai ra tō ’oe ea i te pae ferurira’a, ’aita e taui ra, ’aore rā, tē ’ino atu ra ?
Nāhea ’oe i te fa’aruru i tō ’oe huru ?
Nāhea te mau melo o tō ’oe ’utuāfare i te ārai nei i tō ’oe huru ? ’Ua parau mai ānei rātou i te hō’ē mea ’aita ’oe e rave nei i teie taime, ’e ’o tā ’oe e feruri nei ē, e mea maita’i ?
E aha te pāturura’a e nehenehe e noa’a mai nō ’oe ?
’Ua fāri’i ānei ’oe i te mau ha’amāramaramara’a nō ’ō mai i te Metua i te ao ra nō ni’a i tō ’oe huru ? Mai te mea e ’ē, e aha ïa te reira mau mana’o ?

Ma te parau fa’ati’a a te ta’ata, ’e ma te fa’atura i te mau mana’o o te ta’ata, ’a feruri i te fārerei atu i te mau melo o te ’utuāfare nō te fāri’i mai i te hō’ē ’itera’a maita’i a’e i te fifi.

Tauturu i te ta’ata

’Ia tauturu ana’e ’outou i te ta’ata ’ia māramarama, e nāhea tōna mau tāmatara’a i te ha’afifi i tōna orara’a, ’a feruri e fa’a’ohipa i te tahi mau mana’o tauturu i muri nei :

’A ha’apāpū fa’ahou i te ta’ata ē, tē here nei te Metua i te ao ra iāna, ’e tē hāro’aro’a nei te Fa’aora i tōna mau tāmatara’a.

’A tauturu i te ta’ata ’ia hāro’aro’a ē, e ’ere te ma’i i te pae ferurira’a i te hō’ē fa’autu’ara’a nā te Atua.
’A tauturu i te ta’ata ’ia ’ite ē, e’ita ’oia e upo’oti’a i ni’a i te ma’i i te pae ferurira’a nā roto i te hō’ē noa hina’aro. E ’ere te ma’i i te pae ferurira’a ’ei fa’a’itera’a ē, tē ’ere ra te hō’ē ta’ata i te fa’aro’o, i te huru ’aore rā, i te ti’amā.

’A arata’i i te ta’ata i roto i te mau fa’a’oa’oara’a a te ’Ēkālesia ’e i roto i te mau taime tāvinira’a tano.

’A fārerei i te ta’ata, te mau melo o te ’utuāfare, ’e vetahi atu tei mātau maita’i i teie ta’ata, nō te ’ite i tōna pūai ’e tōna mau ’ōti’a.

’A feruri i te fārerei atu i te Pū tāvinira’a ’utuāfare (i te vāhi tē vai ra) ’aore rā, i te feiā rapa’au i te ea i te pae ferurira’a nō te mā’iti i te mau pāturura’a ’e te rapa’aura’a. ’Ia ’ite mai ’outou ē, e nehenehe te tahi mau tupura’a e vai noa nō te orara’a tā’āto’a, noa atu te maita’i o te rapa’aura’a.

Te feiā e rave nei i te mau rā’au e mea tano ïa ’eiaha rātou e taui ’aore rā, e fa’aea i te rapa’aura’a ma te ’ore e fārerei nā mua i tō rātou ta’ata ’atu’atu ea.

Pinepine te ’ōnohi i te riro ’ei tumu ’ata’ata nō te mau ta’ata tei fifi i te pae ferurira’a. ’A ha’amātau ia ’outou i te mau tāpa’o fa’aarara’a o te ’ōnohi ’e ’a ha’apa’o maita’i i te reira mai te mea tē ’itehia ra.

Mai te mea e au ra te parau a te melo ē, « ’a pārahi ana’e », te paraura’a nō te ’ōnohi, ’aore rā, e fa’a’ite ra i te mau mana’o hepohepo, ’a ’imi ’oi’oi i te tauturu nōna. ’A fārerei i te ’episekōpo, hō’ē ta’ata ’atu’atu ea, te ’utuāfare o te reira ta’ata ’aore rā, te piha rū o te fare ma’i. Tē vai ato’a ra hō’ē rēni tauturu nō te feiā fa’atere. ’A feruri e niuniu i te pū ’atu’atura’a ea rū nō te fāri’i ’oi’oi i te tauturu. ’A hi’o i te parau i ni’a i te ’ōnohi i roto i te tuha’a o te mau tumu parau nō ni’a i te evanelia o te ChurchofJesusChrist.org nō te mau ha’amāramaramara’a hau atu nō ni’a i te ’ōnohi ’e te āraira’a i te ’ōnohi.
’A ani i te ta’ata ’ia feruri i te mau pupu pāturu a te ’oire, mai te mea tē vai ra.

Pāturu i te ’utuāfare

E nehenehe ato’a te mau tāmatara’a nō te ea i te pae ferurira’a o te ta’ata e ha’afifi i te orara’a o te mau melo o tōna ’utuāfare. ’A fa’ata’a i te hope’ara’a i ni’a i te ’utuāfare o te reira ta’ata, ’e ’a feruri e nāhea ’ia aupuru maita’i a’e i tō rātou mau hina’aro. ’A fa’a’ite i te here ’e te aumihi ’ia ha’a ana’e ’outou i pīha’i iho i te mau melo o te ’utuāfare.

’A fa’aitoito i te ’utuāfare, tei au mai, ’e vetahi ’ē ’ia ’āparau ’āmui nō ni’a i te mau hina’aro o te melo ’e te mau mātēria tauturu e vai ra (hi’o Buka arata’i rahi, 22.3–22.11).

’A fa’aitoito i te mau melo o te ’utuāfare ’ia fa’aineine nō te mau taime e hina’aro te ta’ata i te tauturu nō te pāhono i te mau tītaura’a mātarohia o te orara’a.
’Ia hina’arohia, ’a ’āparau nāhea e nehenehe ai i te mau melo o te ’utuāfare ’ia tauturu i te mau ha’amāu’ara’a, te mau faufa’a moni, te utara’a, ’e te mau mātēria tauturu e hina’arohia nō te ’atu’atu i te ea (’ei hi’ora’a, te ’āparaura’a i te feiā tōro’a, te rā’au, ’e te tāpe’ara’a i te fare ma’i).

’A a’o i te mau melo o te ’utuāfare ’eiaha e ani rahi roa ’aore rā, ’aita e nava’i. Te fa’aorara’a, tei te huru ïa o te hi’opo’ara’a ’e te rapa’aura’a e fāri’ihia. I roto i te tahi mau huru tupura’a, te mea maita’i roa a’e tā rātou e nehenehe e ti’aturi, ’o te tahi ïa vāhi maita’i ri’i mai, ’eiaha rā te ora hope roa.

’A feruri i te mau rāve’a pāturura’a nō te mau melo o te ’utuāfare ’e te mau hoa o te feiā e fifi tō rātou i te ea i te pae ferurira’a.

E mea pinepine e nehenehe te feiā ’atu’atu i te pae nō te ea e tauturu ’ia ’imi i te mau pupu pāturu ta’a ’ē i te mau tāmatara’a o te ta’ata.

’A fa’a’ohipa i te mau mātēria tauturu a te pāroita ’e a te titi

Mai te mea e nehenehe, ’a feruri e ani i te feiā fa’atere o te pāroita ’aore rā, i te tahi atu mau ta’ata ti’aturihia ’ia tāmau noa i te pāturu. ’A ani i te parau fa’ati’a a te ta’ata hou ’a ’āparau ai ia vetahi ’ē i te huru tupura’a.

’A ’imi i te hō’ē ta’ata ti’aturihia ’ia riro ’ei mentor[arata’i] nō te melo ’e nō tōna ’utuāfare, ’e ’a fa’aitoito ia rātou ’ia fārerei tāmau.

’Ei ta’ata auhia te mentor nā te ta’ata, e nehenehe e riro ’ei tuahine ’aore rā, ’ei taea’e aupuru.
’Ia ha’apa’o maita’i ’eiaha te mentor ’ia vai i roto i te mau huru tupura’a e nehenehe rātou e fifi.

Mai te mea e tano, ’a fa’aitoito i te ’utuāfare ’ia fa’a’ohipa i te feiā fa’atere o te ’Ēkālesia ’ia aupuru i tei herehia e rātou.

’A fa’aitoito i te feiā e tauturu ra i te melo ’ia rave i te mau ’ohipa ’e te ta’ata, ’eiaha rā nō te ta’ata (’ei hi’ora’a : e arata’i iāna i te hō’ē fa’a’oa’oara’a ’aore rā, e rave i te ’ohipa i pīha’i iho iāna i roto i te hō’ē fa’auera’a ’ohipa tauturu i te pae tōtiare).

Mai te mea e hina’aro te melo i te tauturu a te hō’ē ta’ata ha’apa’o, nō te mea e ma’i pae ferurira’a tō te melo, ’a fa’a’ite iāna i te mātēria tauturu Turu i te feiā tauturu.

’A tauturu i te melo ’ia ’imi i te taturu a te feiā ’aravihi mai te mea e tītauhia.

’A fa’a’ohipa i te mau mātēria tauturu nō te fenua iho ’o tē hōro’a i te mau tāvinira’a e au i te mau parau tumu o te ’evanelia.
’A fārerei i te Pū tāvinira’a ’utuāfare ’aore rā, i te mau piha tōro’a o te ārea nō te mau mātēria tauturu ’aore rā, te mau mā’itira’a ’āparaura’a hau atu.